¹ Era mu kikolo kya Yese muliva ensibuko, n'eitabi eririva mu mizi gye riribala ebibala: ² n'omwoyo gwa Mukama gulibba ku iye, omwoyo ogw'amagezi n'okutegeera, omwoyo ogw'okuteesya n'amaani, omwoyo ogw'okumanya n'okutya Mukama; ³ n'okutya Mukama kw'alisanyukira: so taasalenga emisango ng'okubona kw'amaiso ge bwe kwabbanga, so taanenyenga ng'okuwulira kw'amatu ge bwe kwabbanga: ⁴ naye yasaliranga omwavu emisango gye nsonga, era yanenyanga n'obutuukirivu olw'abawombeefu abali ku nsi: era alikubba ensi n'omwigo ogw'omu munwa gwe, era aliita omubbiibi n'omwoka ogw'omu munwa gwe. ⁵ N'obutuukirivu bulibba lukoba lwo mu nkende ye, n'obwesigwa bulibba lukoba lwo mu mugongo gwe. ⁶ N'omusege gwagonanga wamu n'omwana gw'entama, n'engo yagalamiranga wamu n'omwana gw'embuli; n'enyana n'omwana gw'empologoma n'ekye isava wamu; n'omwana omutomuto aligitangira. ⁷ N'ente n'eidubu giririira wamu; abaana bagyo baligalamira wamu: n'empologoma erirya omwido ng'ente. ⁸ N'omwana anyonka alizanyira ku kiina eky'ensowera, n'omwana eyaakava ku mabeere aliteeka omukoao gwe ku mpampagama y'enfulugundu. ⁹ Tebaliruma waire okuzikirirya ku lusozi lwange olutukuvu lwonalwona: kubanga ensi eriizula okumanya Mukama, ng'amaizi bwe gasaanikira enyanza. ¹⁰ Awo olulituuka ku lunaku ludi ekikolo kya Yese, ekiryemerera okubba ebbendera ey'amawanga, eri oyo amawanga gye basagiira; n'ekifo kye eky'okuwumuliramu kiribba kitiibwa. ¹¹ Awo olulituuka ku lunaku ludi Mukama aliteekawo ate omukono gwe omulundi ogw'okubiri okukwiryawo abalifiikawo ku bantu be abalisigalawo, okubatoola mu Bwasuli n'o mu Misiri n'o mu Pasuloosi n'o mu Kuusi no mu Eramu n'o mu Sinali n'o mu Kamasi n'o mu bizinga eby'omu nyanza. ¹² Era aliwanikira amawanga ebbendera, era alikuŋaanya ababbingiibwe mu Isiraeri, n'aleeta wamu abaasaansaanyiziibwe ku Yuda okubatoola mu nsonda eina egy'ensi. ¹³ Era eiyali lya Efulayimu liriwaawo, n'abo abateganya Yuda balizikirizibwa. Efulayimu talikwatirwa Yuda eiyali, ne Yuda talidaagisya Efulayimu. ¹⁴ Era balibuuka ne bagwa ku kibega ky'Omufirisuuti ebugwaisana; balyetaba okunyaga abaana b'ebuvaisana: baligolola omukono gwabwe ku Edomu n'o Mowaabu; n'abaana ba Amoni balibagondera. ¹⁵ Era Mukama alizikiririrya dala olulimi lw'enyanza ey'e Misiri; era alikunkumulira omukono gwe ku Mwiga n'empewo ye ekalya, n'agukubba n'agufuula emiiga musanvu, n'asomokya abantu nga tibazubire bigere. ¹⁶ Era walibba oluguudo eri abo abalifiikawo ku bantu be, abalisigalawo, okuva mu Bwasuli; nga bwe lwabbairewo eri Isiraeri ku lunaku lwe yaliniiniraku okuva mu nsi y'e Misiri.