¹ Okwolesebwa kwa Isaaya omwana wa Amozi, kwe yabonanga ku Yuda ne Yerusaalemi, mu mirembe gya Uziya, Yosamu, Akazi; ne Keezeekiya, bakabaka ba Yuda. ² Wulira iwe Eigulu era tega okitu, iwe Ensi, kubanga Mukama atumwire: nayonserye ne ndera abaana, ne banjeemera, ³ Ente emanya mwene wayo, n'endogoyi emanya ekisibo kya mukama waayo: naye Isiraeri tamaite, abantu bange tebalowooza. ⁴ Woowe eigwanga eririna ebibbiibi, abantu abazitoowereirwe n'obutali butuukirivu, ezaire ery'abakola obubbiibi, abaana aboonoona: balekere Mukama, banyoomere Omutukuvu wa Isiraeri, basengukire bairire enyuma. ⁵ Ekibatakisya ki okukubbibwa ate, n'okweyongera ne mweyongera okujeema? omutwe gwonagwona gulwaire, n'omwoyo gwonagwona guzirikire. ⁶ Okuva munda w'ekigere okutuuka ku mutwe mubulamu bulamu; wabula ebiwundu, n'okuzimba, n'amabbwa amavundu: tebibunizibwanga so tebisibibwanga so tebiteekebwangamu mafuta. ⁷ Ensi yanyu ezikire; ebibuga byanyu byokyeibwe omusyo; ensi yanyu, ab'amawanga bagiriira mu maiso ganyu era ezikire, kubanga ab'amawanga bagiswire. ⁸ Era omuwala wa Sayuuni asigaire ng'ensiisira eri mu lusuku lw'emizabbibu, ng'ekikuumirwamu ekiri mu nimiro y'emyungu, ng'ekibuga ekizingizibwa. ⁹ Mukama ow'eigye singa teyatulekerewo kitundu ekyafikirewo ekitono einu, twandibbaire nga Sodomu, twandifaanaine nga Gomola. ¹⁰ Muwulire ekigambo kya Mukama, imwe abafuga Sodomu; mutege okitu eri amateeka ga Katonda waisu, imwe abantu ab'e Gomola. ¹¹ Gigasa ki sadaaka gyanyu enkumu gye munsalira, bw'atumula Mukama: ngiikutire entama enume enjokye egiweebwayo n'amasavu g'ensolo ensibe; so tinsanyukira musaayi gwe nte, waire ogw'abaana b'entama, waire ogw'embuli emandwa. ¹² Bwe mwiza okuboneka mu maiso gange, yani eyabasaliire kino, okuniinirira empya gyange? ¹³ Temuleetanga ate bitone ebibulamu; obubaani bwo muzizo gye ndi; emyezi egibonekere ne sabbiiti, okweta amakuŋaaniro, tnisobola butali butuukirivu no kukuŋaana kwa idiini. ¹⁴ Emyezi gyanyu egibonekere n'embaga gyanyu egiragiibwe obulamu bwange bubikyawa: niikwo kutegana gye ndi; nkoowere okubigumiikirizanga. ¹⁵ Era bwe mwayanjalanga engalo gyanyu, naabagisanga amaiso gange: niiwo awo, bwe mwasabanga ebigambo ebingi, tinabiwulirenga: emikono gyanyu giizwire omusaayi. ¹⁶ Munaabe, mwerongoosye; mutolengawo obubbiibi bw'ebikolwa byanyu bive mu maiso gange; mulekenga okukola obubbiibi: ¹⁷ mwege okukolanga okusa; musengereryenga eby'ensonga; mwirukirirenga ajoogebwa, musalenga omusango gw'abula iitaaye, muwozereryenga namwandu. ¹⁸ Mwize , tuteesye bw'atumula Mukama: ebibbbiibi byanyu ne bwe bibba ng'olugoye olumyofu, byabba byeru ng'omuzira; ne bwe bitwakaala ng'ebbendera, byabba ng'ebyoya by’entama. ¹⁹ Bwe mwagondanga nemuwulira; mwalyanga ebisa eby’ensi: ²⁰ naye bwe mwagaananga ne mujeemanga, mwaliibwanga n'ekitala: kubanga omunwa gwa Mukama niigwo gukitumwire. ²¹ Ekibuga ekyesigwa nga kifuukire omwenzi! oyo eyaizulanga emisango egy'ensonga! obutuukirivu bwatyamanga mu iye, naye atyanu baiti. ²² Efeeza iyo efuukire masengere, omwenge gwo gutabwirwemu amaizi. ²³ Abalangira ibo bajeemu, mikwanu gya baibbi; buli muntu yeegomba enguzi, era asengererya mpeera: tebasala musango gw'abula itaaye, so n'ensonga ya nnamwandu tetuuka gye bali. ²⁴ Kyava tumula Mukama, Mukama ow'eigye, Owaamaani owa Isiraeri, nti ndyetoolaku abalabe bange, era ndiwalana eigwanga ku abo abankyawa: ²⁵ era ndikuteekaku omukono gwange, ne nongooserya dala amasengere go gonagona, ne ntoolawo eisasi lyo lyonalyona: ²⁶ era ndiiryawo abalamuzi bo ng'oluberyeberye, n'abateesya ebigambo byo nga mu kusooka: oluvannyuma olyetebwa nti Ekibuga eky'obutuukirivu, ekibuga ekyesigwa. ²⁷ Sayuuni alinunulibwa n'omusango n'abakyukire be n'obutuukirivu. ²⁸ Naye okuzikirira kw'aboonooni n'abalina ebibbiibi kulibba wamu n'abo abaleka Mukama balimalibwawo. ²⁹ Kubanga ensonyi giribakwata olw'emivule gye mwegomba, era muliswazibwa olw'ensuku gye mwerobozya. ³⁰ Kubanga mulibba ng'omuvule oguwotoka amakoola, era ng'olusuku omubula maizi. ³¹ Era ow'amaani alibba ng'enfuuzi, n'omulimu gwe ng'olusasi olw'omusyo; era byombiri biriggiira wamu, so tewalibba abizikirirya.