¹ Ne kaniki n'olugoye olw'efulungu, n'olumyofu, ne babikolya ebivaalo ebyalangiibwe okusa, eby'okuweerereryangamu mu watukuvu, ne bakolera Alooni ebivaalo ebitukuvu Mukama nga bwe yalagiire Musa. ² N'akola ekanzo eye zaabu, ne kaniki, n'olugoye olw'efulungu, n'olumyofu, ne bafuta ensa, erangiibwe. ³ Ne baweesya zaabu, ne bagifuula ebipaapi, ne bagikomolamu obunyere, okugirunga mu kaniki, no mu lugoye olw'efulungu, no mu lumyofu, no mu bafuta ensa, omulimu ogw'omukozi ow'amagezi. ⁴ Ne bagikolaku eby'okubibega ebyagaitiibwe: yagaitiibwe ku nsonda gyayo gyombiri. ⁵ N'olukoba olw'alangiibwe n'amagezi, olwagibbaireku, okugisibyanga, lwabbaire lwo lugoye lumu yoona era omulimu gwalwo gwafanaine nga iyo; lwe zaabu, ne kaniki, n'olugoye olw'efulungu, n'olumyofu, ne bafuta ensa erangiibwe; nga Mukama bwe yalagiire Musa. ⁶ Ne balongoosya amabbaale aga onuku, ne gayingiribwa mu mapeesa age zaabu, ne gasalibwaku ng'akabonero bwe kasalibwa, ng'amaina g'abaana ba Isiraeri bwe gabbaire ⁷ N'agateeka ku by'oku bibega eby'ekanzu, okubba amabbaale ag'okujukizanga eri abaana ba Isiraeri; nga Mukama bwe yalagira Musa. ⁸ N'akola eky'omu kifubba, omulimu ogw'omukozi ow'amagezi okufaanana ng'omulimu ogw'ekanzo; kye zaabu, ne kaniki, n'olugoye olw'efulungu, n'olumyofu, ne bafuta ensa erangiibwe. ⁹ Kyekankana enjuyi gyonagyona; eky'omu kifubba bakifunyiremu: obuwanvu bwakyo luta, n'obugazi bwakyo luta, nga kifunyiibwemu. ¹⁰ Ne bakiteekamu enyiziri ina egy'amabbaale: olunnyiriri olwa sadio, ne topazi, ne kabunkulo niilrwo lwabbaire olunyiriri olw'oluberyeberye. ¹¹ N'olunnyiriri olw'okubiri eibbaale erya nawandagala, safiro, ne alimasi. ¹² N'olunnyiriri olw'okusatu yakinso, sebu, ne amesusito. ¹³ N'olunnyiriri olw'okuna berulo, onuku, ne yasipero: geetoolooleibwe zaabu we gatoneibwe. ¹⁴ Amabbaale ne gabba ng'amaina g'abaana ba Isiraeri, eikumi n'abiri, ng'amaina gaabwe; ng'akabonero bwe kasalibwa, buli muntu ng'eriina lye, ebika eikumi n'ebibiri. ¹⁵ Ne bakola ku ky'omu kifubba emikuufu ng'emiguwa, obw'omulimu ogulangibwa ogwe zaabu ensa. ¹⁶ Ne bakola amapeesa mabiri age zaabu, n'empeta ibiri egye zaabu; ne bateeka empeta eibiri ku nsonda gyombiri egy'eky'omu kifubba. ¹⁷ Ne bateeka emikuufu gyombiri obwa zaabu obulangibwa ku mpeta gyombi ku nkomerero egy'oky'omu kifubba. ¹⁸ N'enkomerero gyombiri egindi egy'emikuufu gyombiri egirangibwa ne bagiteeka ku mapeesa gombiri, ne bagateeka ku by'okubibega eby'ekanzo, ku luuyi lwayo olw'omu maiso. ¹⁹ Ne bakola empeta ibiri egye zaabu, ne bagiteeka ku nsonda gyombiri ez'eky'omu kifubba, ku mambali kwakyo agali ku luuyi olw'ekanzo munda. ²⁰ Ne bakola empeta ibiri egye zaabu, ne bagiteeka ku by'oku bibega byombiri eby'ekanzo wansinsi, ku luuyi lwayo olw'omu maiso, kumpi n'olukindo lwayo, waigulu w'olukoba olw'ekanzo olulukibwa n'amagezi. ²¹ Ne basiba eky'omukifubba n'empeta gyakyo n'empeta egy'ekanzo n'akagoye aka kaniki, kibbe ku lukoba olw'ekanzo olulangibwa n'amagezi, era eky'omu kifuba kireke okusumululwanga ku kanzo; nga Mukama bwe yalagiire Musa. ²² N'akola omunagiro ogw'omu kanzo gwo mulimu ogulangiibwe, gwa kaniki gwonagwona; ²³ n'ekituli eky'omunagiro wakati mu gwo, ng'ekituli eky'ekizibawo eky'ekyoma, nga guliku olukugiro okwetooloola ekituli kyagwo, guleke okuyugibwa. ²⁴ Ne bakola ku birenge by'omunagiro amakomamawanga aga kaniki n'ag'efulungu, n'ag'olumyofu, n'aga bafuta erangiibwe. ²⁵ Ne bakola endege egye zaabu ensa, ne bateeka endege wakati w'amakomamawanga ku birenge by'omunagiro okwetooloola, wakati w'amakomamawanga; ²⁶ endege n'eikomamawanga, endege n'eikomamawanga, ku birenge by'omunagiro okwetooloola, okuweerereryangamu; nga Mukama bwe yalagiire Musa. ²⁷ Ne bakolera Alooni ebizibawo ebye bafuta ensa eby'omulimu ogulangiibwe, n'abaana be, ²⁸ n'ekiremba ekya bafuta ensa, n'enkoofiira ensa egya bafuta ensa, ne seruwale egya bafuta ensa erangibwe, ²⁹ n'olukoba olwe bafuta ensa erangiibwe, ne kaniki, n'olugoye olw'efulungu, n'olumyofu, omulimu ogw'omudaliza; nga Mukama bwe yalagiire Musa. ³⁰ Ne bakola akapande ak'oku ngule entukuvu ake zaabu ensa, ne bakawandiikaku abigambo, ng'ebiwandiikiibwe ku kabonero, nti OMUTUKUVU ERI MUKAMA. ³¹ Ne bakasibaku akagoye aka kaniki, okukasiba ku kiremba waigulu; nga Mukama bwe yalagiire Musa. ³² Gutyo omulimu gwonagwona ogw'enyumba ey'eweema ey'okusisinkanirangamu ne guwa: era abaana ba Isiraeri bakolere nga byonabona Mukama bye yalagiire Musa, bwe bakolere batyo. ³³ Ne bagireetera Musa enyumba, Eweema, n'ebintu byayo byonabona, ebikwaso byayo, n'embaawo gyayo, n'emisaale gyayo, n'empagi gyayo, n'ebiina byayo; ³⁴ n'eky'okubiikaku eky'amawu g'entama egya sedume amainike amamyofu, n'eky'okubiikaku eky'amawu g'entukulu, n'eijiji eryawulamu; ³⁵ esanduuku ey'obujulizi, n'emisituliro gyayo, n'entebe ey'okusaasira; ³⁶ emeenza, n'ebintu byayo byonabona, n'emigaati egy'okulaga; ³⁷ ekikondo ekirongoofu, eby'etabaaza byakyo, niibyo by'etabaaza eby'okulongoosebwanga, n'ebintu byakyo byonabona, n'amafuta ag'etabaaza; ³⁸ n'ekyoto ekye zaabu, n'amafuta ag'okufukangaku, n'obubaani obuwoomerevu, n'akatimba ak'olwigi olw'eweema; ³⁹ ekyoto eky'ekikomo, n'ekitindiro kyakyo eky'ekikomo, emisituliro gyakyo, n'ebintu byakyo byonabona, ekinaabirwamu n'entobo yaakyo; ⁴⁰ eby'okutimba eby'oluya, empagi gyalwo, n'ebiina byalwo, n'akatimba ak'olwigi olw'oluya, emigwa gyalwo, n'eninga gyalwo, n'ebintu byonabona eby'okuweererya okw'omu nyumba, eby'eweema ey'okusisinkanirangamu; ⁴¹ ebivaalo ebyakoleibwe okusa eby'okuweerereryangamu mu watukuvu, n'ebivaalo ebitukuvu ebya Alooni kabona, n'ebyambalo eby'abaana be, okuweerereryangamu mu bwakabona. ⁴² Nga byonabyona Mukama bye yalagiira Musa, batyo abaana ba Isiraeri bwe bakolere omulimu gwonagwona. ⁴³ Musa n'abona omulimu gwonagwona: Musa n'abasabira omukisa.