¹ Mukama n'akoba Musa nti Weebaizire ebipande bibiri eby'amabbaale ebifaanana ng'eby'oluberyeberye: nzena ndiwandiika ku bipande ebigambo ebyabbaire ku bipande eby'oluberyeberye, bye wamenyere. ² Era eizo obe nga weeteekereteekere, oniine eizo ku lusozi Sinaayi, weeragire okwo gye ndi ku ntiiko y'olusozi. ³ So tewaabe muntu aniina naiwe, so n'omuntu yenayena aleke okubonekera ku lusozi lwonalwona; waire entama waire ente bireke okuliira mu maiso g'olusozi olwo. ⁴ N'abaiza ebipande bibiri ebifaanana ng'eby'olubereberye; Musa n'agolokoka amakeeri mu makeeri, n'aniina ku lusozi Sinaayi, Mukama nga bwe yamulagiire, n'atwala mu ngalo gye ebipande bibiri eby'amabbaale. ⁵ Mukama n'aikira mu kireri, n'ayemerera eyo wamu naye, n'atendera eriina lya Mukama. ⁶ Mukama n'abita mu maiso ge, n'atendera nti Mukama, Mukama, Katonda aizwire okusaasira era ow'ekisa, alwawo okusunguwala, era alina okusaasira okungi n'amazima amangi; ⁷ aijukira okusaasira eri abantu enkumi n'enkumi, asonyiwa obutali butuukirivu n'okwonoona n'ekibbiibi: era atalimutoolaku omusango n'akatono oyo aligubaaku; awalana obutali butuukirivu bwa baitawabwe ku baana baabwe, no ku baana b'abaana baabwe, ku mirembe egya bannakasatue n'egya banakana. ⁸ Musa n'ayanguwa, n'avuunamya omutwe, n'asinza. ⁹ N'atumula nti Bwe mba styanu nga nalaba ekisa mu maiso go, ai Mukama, Mukama; atambulenga wakati mu ife, nkwegayiriire; kubanga niilyo eigwanga eririna eikoti enkakanyali; era otusonyiwe obutali butuukirivu bwaisu n'okwonoona kwaisu, era otutwale okubba obusika bwo. ¹⁰ N'atumula nti Bona, ndagaana endagaanu: mu maiso g'abantu bo bonabona nakolanga eby'amagero, ebitakolebwanga mu nsi gyonagyona, waire mu igwanga lyonalyona: n'abantu bonabona b'olimu babonanga omulimu gwa Mukama, kubanga kye ndikukolya kye ntiisya. ¹¹ Lowooza kino kye nkulagira watyanu: bona, mbinga mu maiso go Omwamoli, n'Omukanani, n'Omukiiti, n'Omuperizi, n'Omukiivi, n'Omuyebusi. ¹² Weekuume wenka, tolagaananga ndagaanu n'abo abali mu nsi gy'oyaba, ereke okubba ng'ekyambika wakati mu iwe: ¹³ naye mulimenyaamenya ebyoto byabwe, era mulyasayasa empagi gyabwe, era mulitemaatema Baasera baabwe: ¹⁴ kubanga toosinzenga Katonda ogondi yenayena: kubanga Mukama, eriina lye W'eiyali, niiye Katonda ow'eiyali: ¹⁵ tolagaananga ndagaanu n'abo abali mu nsi, baleke okwenda nga basengererya bakatonda baabwe, ne babawa saddaaka bakatonda baabwe, ne wabaawo akubita n'olya ku saddaaka ye; ¹⁶ n'otwalira abaana bo abasaiza ku bawala baabwe, abawala baabwe ne bayenda nga basengererya bakatonda baabwe, ne babayendesya abaana bo nga basengererya bakatonda baabwe, ¹⁷ Teweekoleranga bakatonda abasaanuukye. ¹⁸ wekuumanga embaga ey'emigaati egitazimbulukuswa. Enaku musanvu walyanga emigaati egitazimbulukuswa, nga bwe nakulagiire, mu kiseera ekyalagiirwe mu mwezi Abibu: kubanga mu mwezi Abibu mwe waviiriire mu Misiri. ¹⁹ Buli ekyaigulanga enda kyange; n'ensolo gyo gyonagyona enume, eby'oluberyeberye eby'ente n'eby'entama. ²⁰ N'omwana omuberyeberye ogw'endogoyi wamununulanga n'omwana gw'entama: era bw'ewabbanga tokaka kumununula, wamenyanga eikoti lyayo. Wanunulanga ababeryeberye bonabona mu baana bo. So tewaabbenga eyeeraga eri nze nga taleeteree kintu. ²¹ Enaku omukaaga wakolerangamu emirimu, naye ku lunaku olw'omusanvu wawumulanga: mu naku gye balimirangamu no mu naku gye bakungulirangamu wawumulanga. ²² Era wekuumanga embaga eya sabbiiti, niiyo y'omwaka omuberyeberye ogw'eŋaanu, n'embaga ey'okugisa omwaka nga guweireku. ²³ Emirundi isatu buli mwaka abasaiza bo bonabona beraganga mu maiso ga Mukama Katonda, Katonda wa Isiraeri. ²⁴ Kubanga ndibbingamu amawanga mu maiso go, ne ngaziya ensalo gyo: so tewaabbenga muntu alyegomba ensi yo, bw'ewayabanga okuboneka mu maiso ga Mukama Katonda wo emirundi isatu buli mwaka. ²⁵ Towangayo musaayi gwe saddaaka yange wamu n'omugaati oguzimbulukuswa; waire saddaaka ey'embaga ey'Okubitaku tesigalangaku okutuusya amakeeri. ²⁶ Eby'oluberyeberye eby'ensi yo ebisooka wabireetanga mu nyumba ya Mukama Katonda wo. Tofumbiranga omwana gw'embuli mu mata ga maye waagwo. ²⁷ Mukama n'akoba Musa nti iwe wandiika ebigambo ebyo: kuba ebigambo ebyo nga bwe biri, ndagaine ntyo endagaanu naiwe ne Isiraeri. ²⁸ N'amala eyo wamu ne Mukama enaku ana emisana n'obwire; nga talya mere so nga tanywa maizi. N'awandiika ku bipande ebigambo eby'endagaanu, amateeka eikumi. ²⁹ Awo olwatuukire Musa bwe yaikire okuva ku lusozi Sinaayi, ebipande bibiri eby'obujulizi nga biri mu ngalo gya Musa, bwe yaikire okuva ku lusozi, Musa n'atamanya ng'omubiri ogw'amaaso ge gumasamasa olw'okutumula naye. ³⁰ Alooni n'abaana bonabona aba Isiraeri bwe baboine Musa, bona, omubiri ogw'amaaso ge ne gumasamasa; ne batya okumusemberera. ³¹ Musa n'abayeta; Alooni n'abakulu bonabona ab'ekibiina ne baira gy'ali: Musa n'atumula nabo. ³² Oluvanyuma abaana bonabona aba Isiraeri ne basembera: n'abalagira byonabyona Mukama by'atumwire naye ku lusozi Sinaayi. ³³ Musa bwe yamalire okutumula nabo, n'ateeka eky'okubiika ku maiso ge. ³⁴ Naye Musa bwe yayingiranga mu maiso ga Mukama okutumula naye, n'atoolaku eky'okubiika, okutuusya lwe yafulumanga; n'afulumanga n'atumula n'abaana ba Isiraeri bwe yalagirwanga; ³⁵ abaana ba Isiraeri ne babona amaiso ga Musa, omubiri ogw'amaiso ge nga gumasamasa : Musa n'airyanga eky'okubiika ku maiso ge, okutuusya lwe yayingiranga okutumula naye.