¹ Awo abantu bwe baboine nga Musa alwire okwika okuva ku lusozi, ne bakuŋaana eri Alooni, ne bamukoba nti Golokoka, otukolere bakatonda, abatutangiranga; kubanga Musa oyo, niiye yatutoire mu nsi y'e Misiri, tetumaite ky'abaire. ² Alooni n'abakoba nti Mumenye ku mpeta egya zaabu, egiri mu matu g'abakali banyu, n'ag'abaana banyu ab'obwisuka n'ab'obuwala, mugindeetere. ³ Abantu bonabona ne bamenya ku mpeta egya zaabu egyabbaire mu matu gaabwe, ne bagireetera Alooni. ⁴ N'agitoola mu ngalo gyabwe, n'agiwumba n'ekyoma ekisala, n'agifuula enyana ensaanuukye: ne batumula nti Bano niibo bakatonda bo, iwe Isiraeri, abaakutoire mu nsi y'e Misiri ⁵ Alooni bwe yaboine, n'azimba ekyoto mu maiso gaayo; Alooni n'alangirira n'atumila nti Eizo wabbaawo embaga eri Mukama. ⁶ Ne bagolokoka Amakeeri mu makeeri, ne bawaayo ebiweebwayo eby'okwokya, ne baleeta ebiweebwayo olw'emirembe; abantu ne batyama okulya n'okunywa, ne bagolokoka okuzanya. ⁷ Mukama n'akoba Musa nti yaba oserengete; kubanga abantu bo be watoire mu nsi y'e Misiri beeyonooneserye: ⁸ bakyamire mangu ne bava mu ngira gye nabalagiire: beekoleire enyana ensaanuukye, ne bagisinza, ne bagiwa Sadaaka, ne batumula nti Bano niibo bakatonda bo, iwe Isiraeri, abaakutoire mu nsi y'e Misiri: ⁹ Mukama n'akoba Musa nti Abantu bano era, bona, niibo abantu abalina eikoti eikakanyali: ¹⁰ kale watyanu ndeka, obusungu bwange bwake ini ku ibo, era mbazikirirye: era ndikufuula iwe eigwanga einene. ¹¹ Musa ne yeegayirira Mukama Katonda we, n'atumula nti Mukama, kiki ekyaikirye einu obusungu bwo ku bantu bo, be watoire mu nsi y'e Misiri N'amaani amangi n'omukono ogw'obuyinza? ¹² Lwaki okutumulya Abamisiri nti Yabatoleiremu obubbiibi, okubaitira ku nsozi, n'okubazikirirya okuva ku maiso g'ensi? Oleke obusungu bwo obukambwe, oijulukuke oleke obubbiibi obwo eri abantu bo. ¹³ Oijukire Ibulayimu, Isaaka, no Isiraeri, abaweereza bo, be weerayiririire wenka n'obakoba nti Ndyongera eizaire lyanyu ng'emunyenye egy'omu igulu, n'ensi eyo yonayona gye ntumwireku ndigiwa eizaire lyanyu, nabo baligisikira emirembe gyonagyona. ¹⁴ Mukama n'aijulukuka n'aleka obubbiibi bw'abbaire atumwire okubakola abantu be. ¹⁵ Musa n'akyuka, n'aserengeta okuva ku lusozi, ng'alina ebipande bibiri eby'obujulizi mu ngalo gye; ebipande ebyawandiikiibweku ku njuyi gyabyo zombiri; byawandiikiibweku eruuyi n'eruuyi. ¹⁶ N'ebipande byabbaire mulimu gwa Katonda, n'okuwandiika kwabbaire kuwandiika kwa Katonda, okwayoleibwe ku bipande. ¹⁷ Yoswa bwe yawuliire eidoboozi ly'abantu nga batumurira waigulu, n'akoba Musa nti Waliwo eidoboozi ery'okulwana mu lusiisira. ¹⁸ N'atumula nti Eryo ti idoboozi lyabo abatumulira waigulu olw'okuwangula, so ti idoboozi lyabo abakunga olw'okubbingibwa: naye eidoboozi lyabo abemba lye mpulira. ¹⁹ Awo olwatuukire bwe yasembereire olusiisira, kaisi n'abona enyana n'abakina: obusungu bwa Musa ne bwaka inu, n'akasuka ebipande mu ngalo gye, n'abimenyera wansi w'olusozi, ²⁰ N'atwala enyana gye babbaire bakolere, n'agyokya n'omusyo, n'agisekulasekula, n'agimansira ku maizi, n'aganywisyaku abaana ba Isiraeri. ²¹ Musa n'akoba Alooni nti Abantu bano bakukolere ki, iwe n'okuleeta n'obaleetaku okwonoona okunene? ²² Alooni n'atumula nti Obusungu bwa mukama wange buleke okubuubuuka einu: Niiwe omaite abantu bano, nga basengererya dala obubbiibi. ²³ Kubanga bankobere nti Tukolere bakatonda, abatutangiranga: kubanga Musa oyo, niiye yatutoire mu nsi y'e Misiri, tetumaite ky'abbaire. ²⁴ Ne mbakoba nti Buli alina zaabu yonayona, bagimenyeku; awo ne bagimpa: ne ngiteeka mu musyo, n'enyana eno n'evaamu. ²⁵ Awo Musa bwe yaboine ng'abantu bajeemere; kubanga Alooni yabajeemere okusekererwa abalabe baabwe: ²⁶ Musa kaisi n'ayemerera mu wankaaki w'olusiisira, n'atumula nti Buli muntu ali ku lwa Mukama, aize gye ndi. Abaana bonabona aba Leevi ne bakuŋŋaana gy'ali. ²⁷ N'abakoba nti Ati bw'atumula Mukama, Katonda wa Isiraeri, nti Muteeke buli muntu ekitala kye ku kisambi kye, mwiriŋane mu miryango gyonagyona mu lusiisira lwonalwona, mwite buli muntu mugande we, na buli muntu mwinaye, na buli muntu muliraanwa we. ²⁸ Abaana ba Leevi ne bakola ng'ekigambo kya Musa: ne bafa ku bantu ku lunaku ludi abasaiza nga nkumi isatu. ²⁹ Musa n'atumula nti Mwetukulye Atyanu eri Mukama, waire okulwana buli muntu n'omwana we, era no mugande we; kaisi abawe watyanu omukisa. ³⁰ Awo olwatuukire amakeeri Musa n'akoba abantu nti Mwayonoonere ekyonoono ekinene: ne atyanu naniina eri Mukama; koizi nakola ekyatangirira olw'ekyonoono kyanyu. ³¹ Musa n'airayo eri Mukama, n'atumula nti Woo, abantu abo bayonoonere ekyonoono ekinene, ne beekolera bakatonda abe zaabu. ³² Naye atyanu, bw'ewasonyiwa ekyonoono kyabwe; naye bw'otoobasonyiwe, onsangule nze, nkwegayiriire, mu kitabo kyo kye wawandiikire. ³³ Mukama n'akoba Musa nti Buli eyanyonoonere nze, oyo gwe naasangula mu kitabo kyange. ³⁴ Ne watyanu njaba, otwale abantu mu kifo kye nakukobereku: bona, malayika wange yakutangiranga: era naye ku lunaku ludi lwe ndiwalana, ndibawalanaku ekibbiibi kyabwe. ³⁵ Mukama n'abonyaabonya abantu, kubanga bakolere enyana, Alooni gye yakolere.