¹ Awo Musa yabbaire ng'aliisya ekisibo kya Yesero muko we, kabona w’e Midiyaani: n'atwala ekisibo enyuma w'eidungu n'atuuka ku lusozi lwa Katonda Kolebu. ² Malayika wa Mukama n'amubonekera mu lulimi lw'omusyo okuva wakati w'ekisaka: n'aliingilira, Bona, ekisaka ekyo ne kyaka omusyo ekisaka ne kitasiriira. ³ Musa n'atumula nti Ka neekooloobye kaakati, nbone ekigambo kino ekikulu, ekisaka kyekiviire kireka okusiriira. ⁴ Mukama bwe yaboine nga yeekoolooberye okubona, Katonda n'amweta ng'ayema wakati w'ekisaka n'atumula nti Musa, Musa. N'avugira nti Ninze ono. ⁵ N'atumula nti Tosembera wano: toolamu engaito gyo mu bigere byo, kubanga ekifo ky'oyemereiremu niiyo ensi entukuvu. ⁶ N'atumula ate nti Nze ndi Katonda wa itaawo, Katonda wa Ibulayimu, Katonda wa Isaaka, era Katonda wa Yakobo. Musa n'agisa amaiso ge: kubanga yatiire okumulingirira Katonda. ⁷ Mukama n'atumula nti Mboneire dala okubonaabona okw'abantu bange abali mu Misiri, ne mpulira okukunga kwabwe ku lw'abo ababakolya; kubanga maite enaku gyabwe; ⁸ era ngizire okubawonya mu mukono ogw'Abamisiri, okubaniinisya okuva mu nsi edi bayingire mu nsi ensa engazi, mu nsi eizwire amata n'omubisi gw'enjoki; mu kifo eky'omu Kanani, n'eky'omu Kiiti, n'eky'omu Amoli, n'eky'omu Perizi, n'eky'omu Kiivi, n'eky'omu Yebusi. ⁹ Kale bona, okukunga okw'abaana ba Isiraeri kutuukire gye ndi: ate mboine okubonaabona kwe baababonyaabonya Abamisiri. ¹⁰ Kale iza, nakutuma eri Falaawo obatoleyo abantu bange abaana ba Isiraeri mu Misiri. ¹¹ Musa n'akoba Katonda nti Niinze ani ayaba eri Falaawo mbatooleyo abaana ba Isiraeri mu Misiri? ¹² N'atumula nti Mazima ndibba wamu naiwe; era kano kalikubbeera akabonero, nga nze nkutumire: bw'olimala okutoola abantu abo mu Misiri, muliweerererya Katonda ku lusozi luno. ¹³ Musa n'akoba Katonda nti bona, bwe ndyaba nze eri abaana ba Isiraeri, ne mbakoba nti Katonda wa bazeiza banyu niiye antumire eri imwe; nabo balitumula nti Eriina lye niiye ani? ndibakoba ntya? ¹⁴ Katonda n'akoba Musa nti NINGA BWE NDI: n'atumula nti Otyo bw'olibakoba abaana ba Isiraeri nti NDI niiye antumye eri imwe. ¹⁵ Katonda n'agamba ate Musa nti Otyo bw'olibakoba abaana ba Isiraeri nti Mukama Katonda wa bazeiza banyu, Katonda wa Ibulayimu, Katonda wa Isaaka, era Katonda wa Yakobo niiye antumire eri imwe: eryo niilyo liina lyange ebiseera ebitawaawo, n'ekyo niikyo kiijukiryo kyange emirembe gyonagyona. ¹⁶ Yaba okuŋaanye abakaire ba Isiraeri awamu, obakobe nti Mukama Katonda wa bazeiza banyu, Katonda wa Ibulayimu, owa Isaaka, era owa Yakobo, yambonekeire ng'atumula nti Mbaiziriire dala, mboine bye mukolebwa mu Misiri: ¹⁷ ne ntumula nti Ndibaniinisya okubatoola mu kibonyoobonyo eky'e Misiri okuyingira mu nsi ey'Omukanani, n'Omukiiti n'Omwamoli, n'Omuperizi, n'Omukiivi, n'Omuyebusi, mu nsi eizwire amata n'omubisi gw'enjoki. ¹⁸ Balikuwulira eidoboozi lyo: oliiza, iwe n'abakaire ba Isiraeri, eri kabaka w'e Misiri, mulimukoba nti Mukama, Katonda wa Baebbulaniya, yatwiziriire: kale, otulagire, tukwegayiriire, twabe olugendo olw'enaku isatu mu idungu, tuweeyo sadaaka eri Mukama Katonda waisu. ¹⁹ Era maite nti kabaka w'e Misiri talibalagira kwaba, niiwo awo era n'omukono ogw'amaanyi. ²⁰ Nzeena ndigolola omukono gwange, ne nkubba Misiri n'amagero gange gonagona ge ndikola wakati waayo: oluvanyuma lwago alibalagira. ²¹ Era ndibawa abantu abo okutakibwa mu maiso g'Abamisiri: awo lwe mulivaayo, temulivaayo bwereere: ²² naye buli mukali alisaba muliraanwa we n'odi abba mu nyumba ye, ebintu ebye feeza n'ebintu ebye zaabu n'engoye: mulibiteeka ku bataane banyu n'abawala banyu; mulinyaga Abamisiri.