¹ Awo Erisa nabbi n'ayeta omumu ku baana b'a banabbi n'amukoba nti weesibe ekimyu otwale ecupa eno ey'a mafuta mu mukono gwo oyabe e Lamosugireydi. ² Kale bw'olituukayo osagirirenga eyo Yeeku mutaane wa Yekosafaati mutaane wa Nimusi, oyingire omugolokosye ave mu Bagande be, omuyingirye mu kisenge eky'o munda. ³ Kaisi oirire ecupa ey'a mafuta ogafuke ku mutwe gwe otumule nti Atyo bw'atumula Mukama nti nkufukireku amafuta okubba kabaka wa Isiraeri. Kaisi oigulewo olwigi oiruke so tolwanga. ⁴ Awo omuwisuka, omuwisuka nabbi, n'ayaba e Lamosugireyaadi. ⁵ Awo bwe yatuukire n'asanga abaami ab'o mu igye nga batyaime; n'atumula nti ndiku kye ntumiibwe gy'oli, iwe omwami. Yeeku n'atumula nti Eri ani ku ife fenafena? N'atumula nti eri iwe, omwami. ⁶ N'agolokoka n'ayingira mu nyumba; n'afuka amafuta ku mutwe gwe n'amukoba nti Atyo bw'atumula Mukama Katonda wa Isiraeri nti nkufukireku amafuta okubba kabaka w'a bantu ba Mukama, owa Isiraeri. ⁷ Era olikubba enyumba ya Akabu mukama wo mpalane eigwanga ly'o musaayi gw'a baidu bange banabbi, n'o musaayi gw'a baidu bonabona aba Mukama eri omukono gwa Yezeberi. ⁸ Kubanga enyumba yonayona eya Akabu erizikirira: era ndimalawo eri Akabu buli mwana w'o bwisuka n'oyo asibiibwe n'oyo atasibiibwe mu Isiraeri: ⁹ Era ndifuula enyumba ya Akabu okubba ng'e nyumba ya Yerobowamu mutaane wa Nebati era ng'e nyumba ya Baasa Mutaane wa Akiya. ¹⁰ N'embwa giririira Yezeberi mu musiri ogw'e Yezuleeri, so tiwaliba wo kumuziika. N'aigulawo olwigi n'airuka. ¹¹ Awo Yeeku n'afuluma n'aiza eri abaidu ba mukama we: ne wabba amukoba nti Mirembe? kiki ekireetere gy'oli olusaiza luno olulalu? N'abakoba nti Omusaiza mumaite n'e bigambo bye bwe bibbaire. ¹² Ni batumula nti obbeeya; tukobere. N'atumula nti ati bw'ankobere nti Atyo bw'atumula Mukama nti nkufukireku amafuta okubba kabaka wa Isiraeri. ¹³ Awo ni banguwa ne bairira buli muntu ekivaalo kye ne bakyaliira wansi we waigulu ku madaala, ne bafuuwa eikondeere nga batumula nti Yeeku niiye kabaka. ¹⁴ Awo Yeeku mutaane wa Yekosafaati mutaane wa Nimusi ni yeekobaana Yolaamu. (Era Yolaamu yabbaire ng'akuuma Lamosugireyaadi) iye n'o Isiraeri yenayena, olwa Kazayeeri kabaka w'e Busuuli: ¹⁵ naye kabaka Yolaamu yabbaire airiewo okuwonera e Yezuleeri ebiwundu Abasuuli bye baamusumitire bwe yalwaine n'o Kazayeeri kabaka w'e Busuuli.) Awo Yeeku n'atumula nti Oba nga bwe mutaka mutyo, kale waleke okubbaawo eyawoona n'ava mu kibuga okubunisya mu Yezuleeri. ¹⁶ Awo Yeeku n'atambulira mu igaali n'ayaba e Yezuleeri; kubanga Yolaamu yabbaire agalamiire eyo. Era Akaziya kabaka w'e Yuda yabbaire aserengetere okulambula Yolaamu. ¹⁷ Awo omukuumi yabbaire ayemereire ku kigo mu Yezuleeri, n'alengera ekibiina kya Yeeku ng'aiza n'atumula nti mboine ekibiina. Yolaamu n'atumula nti irira eyeebagala embalaasi otume okubasisinkana, atumule nti Mirembe? ¹⁸ Awo omumu n'ayaba nga yeebagaire embalaasi okumusisinkana n'atumula nti Atyo bw'atumula kabaka nti Mirembe? Yeeku n'atumula nti emirembe ogifaaku ki? kyuka oire enyuma wange. Omukuumi n'akobera ng'atumula nti Omubaka atuukire gye bali, naye taira. ¹⁹ Awo n'atuma ow'okubiri nga yeebagaire embalaasi, n'atuuka gye baali n'atumula nti atyo bw'atumula kabaka nti Mirembe? Yeeku n'airamu nti emirembe ogifaaku ki? kyuka oire enyuma wange. ²⁰ Omukuumi n'akoba ng'atumula nti atuukire gye bali, so taira: era entambula eri sooti ntambula ya Yeeku mutaane wa Nimusi; kubanga atambula ng'awulukuka. ²¹ Yolaamu n'atumula nti muteeketeeke. Ni bateekateeka eigaali lye. Yolaamu kabaka wa Isiraeri n'o Akaziya kabaka we Yuda ni bafuluma, buli muntu mu igaali lye, ne bafuluma okusisinkana Yeeku, ni bamusanga mu musiri gwa Nabosi Omuyezuleeri. ²² Awo olwatuukiire Yolaamu bwe yaboine Yeeku n'atumula nti mirembe, Yeeku? N'airamu nti mirembe ki, obwenzi bwa mawo Yezeberi n'obulogo bwe nga bukaali bungi bwekankaniire awo? ²³ Yolaamu n'akyusya emikono gye n'airuka n'akoba Akaziya nti O! Akaziya, waliwo olukwe. ²⁴ Awo Yeeku n'anaanuula omutego gwe n'a maani ge gonagona n'alasa Yolaamu wakati w'e mikono gye, akasaale ni kabitamu ni kaiguka awali omwoyo, n'agwira mu igaali lye. ²⁵ Awo Yeeku n'akoba Bidukali omwami we nti Musitule omusuule mu musiri ogw'e kyalo kya Nabosi Omuyezuleeri: kubanga ijukira, nze naiwe bwe twebagala, fembiri nga tusengererya Akabu itaaye, Mukama n'amuteekaku omugugu guno; nti ²⁶ Mazima naboine eizo omusaayi gwa Nabosi n'o musaayi gw'a baana be, bw'atumula Mukama; era ndikusasulira mu musiri guno, bw'atumula Mukama. Kale musitule omusuule mu musiri ng'e kigambo bwe kyabbaire ekya Mukama. ²⁷ Naye Akaziya kabaka we Yuda bwe yaboine kino, n'airukira mu ngira ey'o mu nyumba ey'o lusuku. Yeeku n'amusengererya n'atumula nti mumwitire mu igaali naye: ne bamwitira awaniinirirwa okwaba e Guli ekiriraine Ibuleamu. N'airukira e Megido n'afiira eyo. ²⁸ Abaidu be ne bamusitulira mu igaali ni bamutwala e Yerusaalemi, ni bamuziikira mu magombe iye wamu na bazeiza be mu kibuga kya Dawudi. ²⁹ Awo mu mwaka ogw'e ikumi n'o gumu ogwa Yolaamu mutaane wa Akabu Akaziya n'atandika okufuga Yuda. ³⁰ Awo Yeeku bwe yatuukiire e Yezuleeri, Yezeberi n'akiwulira, n'aziga amaiso ge n'ayonja omutwe gwe n'alengezya mu dirisa. ³¹ Awo Yeeku bwe yabbaire ng'ayingira mu mulyango, n'atumula nti Mirembe, iwe Zimuli, omwiti wa mukama wo? ³² N'ayimusya amaiso ge eri edirisa n’atumula nti Yani ali ku lwange, yani? Abalaawe babiri oba basatu ne balengezya gy'ali. ³³ N'atumula nti Mumusuule wansi. Awo ni bamusuula wansi: omusaayi gwe ne gumansukira ku kisenge n'o ku mbalaasi, n'amuniinirira n'e bigere. ³⁴ Awo bwe yayingiire n'alya n'anywa; n'atumula nti mulabirire omukali ono elaamiibwe mumuziike: kubanga mwana wa kabaka. ³⁵ Ni baaba okumuziika: naye ne batasangawo ku iye wabula ekiwanga n'ebigere n'ebigalo by'e mikono gye. ³⁶ Kyebaaviire bairawo ni bamukobera. Naye n'atumula nti kino niikyo kigambo kya Mukama kye yatumwire mu mwidu we Eriya Omutisubi ng'atumula nti embwa giririira omubiri gwa Yezeberi mu musiri ogw'e Yezuleeri: ³⁷ n'omulambo gwa Yezeberi gulibba ng'obusa ku itale mu musiri ogw'e Yezuleeri, n'okutumula ne batatumula nti Ono niiye Yezeberi.