¹ Mu mwaka ogw'o musanvu ogwa Yeeku Yekoyaasi n'atandika okufuga; n'afugira emyaka ana mu Yerusaalemi: n'o maye eriina lye yabbaire Zebbiya ow'e Beeruseba. ² Yekoyaasi n'akola ebyabbaire mu maiso ga Mukama ebisa enaku gye gyonagyona Yekoyaada kabona gye yamwegereseiryemu. ³ Naye ebifo ebigulumivu tebyatoleibwewo: abantu nga bakaali bawaayo sadaaka ni bootererya obubaani ku bifo ebigulumivu. ⁴ Awo Yekoyaasi n'akoba bakabona nti efeeza gyonagyona egy'ebintu ebitukuzibwa egireetebwa mu nyumba ya Mukama, egibitaŋana, efeeza egy'a bantu buli muntu gy'a wandiikirwa, n'e feeza gyonagyona omuntu yenayena gye yesaliire okuleeta mu nyumba ya Mukama, ⁵ bakabona bagitwale ewaabwe, buli muntu ng'agitoola ku abo b'a maite: kale baliziba ebituli by'e nyumba yonayona ekituli gye kyabonekera. ⁶ Naye olwatuukire mu mwaka ogw'a biri ogwa kabaka Yekoyaasi bakabona nga bakaali kuziba bituli by'e nyumba. ⁷ Awo kabaka Yekoyaasi n'ayeta Yekoyaada kabona na bakabona abandi n'a bakoba nti Kiki ekibalobera okuziba ebituli by'e nyumba? kale temweyongera kutoola feeza ku abo be mumaite, naye mugisasule olw'e bituli by'e nyumba. ⁸ Awo bakabona ni baikirirya obutatoola ate feeza ku bantu waire okuziba ebituli by'e nyumba. ⁹ Naye Yekoyada kabona n'airira ebbweta n'awumula ekituli mu kinikiryo kyayo, n'agiteeka ku mabali kw'e kyoto ku luuyi olulyo ng'o yingira mu nyumba ya Mukama: awo bakabona abaakuumanga olwigi ni bateeka omwo efeeza gyonagyona egyaleetebwanga mu nyumba ya Mukama. ¹⁰ Awo olwatuukire bwe baboine nga mu bbweta mulimu efeeza nyingi, omuwandiiki wa kabaka n'o kabona asinga obukulu ni bambuka, ni bagisa efeeza eyasangiibwe mu nyumba ya Mukama mu nsawo, ni bagibala. ¹¹ Ni bawa efeeza egyagereibwe mu mikono gy'abo abakolere emirimu abalabirira enyumba ya Mukama: ne bagiwayo eri ababaizi n'abazimbi abaakola emirimu gy'e nyumba ya Mukama, ¹² n'eri abazimbi b'amabbaale n’a batema amabbaale n'o lw'o kugula emisaale n'a mabbaale amabaize okuziba ebituli by'e nyumba ya Mukama, n'olwa byonabyona ebyaiziriire enyumba okugidaabirirya. ¹³ Naye ebikompe ebye feeza n'ebisalaku ebisiriirya n'ebibya n'amakondeere n'e bintu byonabyona eby'e zaabu oba ebintu ebye feeza tibyakoleirwe nyumba ya Mukama n'e feeza egyaleteibwe mu nyumba ya Mukama: ¹⁴ kubanga egyo ni bagiwa abo abaakola emirimu, era ni bagidaabiriisirya enyumba ya Mukama. ¹⁵ Era tebaabaliriire muwendo eri abasaiza be baawire efeeza mu mukono gwabwe okubawa abo abakolere emirimu: kubanga baakolanga n'o bwesigwa. ¹⁶ Efeeza egy"e biweebwayo olw'o musango n'e feeza egy'e biweebwayo olw'o kwonoona tegyaleeteibwe mu nyumba ya Mukama: gyabbanga gya bakabona. ¹⁷ Awo Kazayeeri kabaka w'e Busuuli n'a yambuka n'a lwana ne Gaasi n'akimenya: Kazayeeri n'a simba amaiso ge okwambuka e Yerusaalemi. ¹⁸ Awo Yekoyaasi kabaka wa Yuda n'airira ebintu byonabyona ebyatukuziibwe, Yekosafaati n'o Yekolaamu n'o Akaziya bazeizabe bakabaka be Yuda bye bawongere, n'e bintu bye iye ebyatukuziibwe n'e zaabu yonayona eyabonekere mu by'obugaiga eby'o mu nyumba ya Mukama n'e by'o mu nyumba ya kabaka, n'abiweererya Kazayeeri kabaka w'e Busuuli: n'ava ku Yerusaalemi. ¹⁹ Era ebikolwa ebindi byonabyona ebya Yowaasi ne byonabyona bye yakolere tibyawandiikibwe mu kitabo eky'e by'omu mirembe gya bakabaka ba Yuda? ²⁰ Abaidu be ni bagolokoka ni beekobaana ni baitira Yowaasi awali enyumba ey'e Miiro ku ngira eserengeta e Sira. ²¹ Kubanga Yozakali mutaane wa Simeyaasi n'o Yekozabadi mutaane wa Someri, Abaidu be baamsumitire n'afa; ni bamuziikira wamu na bazeizabe mu kibuga kya Dawudi: Amaziya mutaane we n'afuga mu kifo kye.