¹ Awo Asaliya maye w'Akaziya bwe yaboine omwana we ng'afiire, n'agolokoka n'azikirirya eizaire lyonalyona erya kabaka. ² Naye Yekoseba muwala wa kabaka Yolaamu mwanyoko w'Akaziya n'atwala Yowaasi mutaane wa Akaziya n'a mwibba n’amutoola mu baana ba kabaka abaitibwe, iye n'o mwisuka we n'abateeka mu kisenge eky'o kugonamu; ni bamugisa Asaliya, aleke okwitibwa. ³ Awo n'abba naye ng'a gisiibwe mu nyumba ya Mukama n'amala emyaka mukaaga: Asaliya n’afuga ensi. ⁴ Awo mu mwaka ogw'o musanvu Yekoyaada n'atuma n'asyoma abaami b'e bikumi ab'o ku Bakulu n'a bambowa, n'abaleeta gy'ali mu nyumba ya Mukama; n'alagaana nabo endagaanu n'abalayirya ekirayiro mu nyumba ya Mukama, n'abalaga omwana wa kabaka. ⁵ Awo n'abalagira ng'atumula nti Ekigambo kino kye mubba mukola: ekitundu kyanyu eky'okusatu abaayingira ku sabbiiti banaaba n'o mulimu ogw'o kukuuma enyumba ya kabaka; ⁶ n'ekitundu eky'okusatu baabba ku mulyango Suuli: n'e kitundu eky'okusatu baabba ku mulyango enyuma w'abambowa: mutyo bwe mwabba n'o mulimu ogw'o kukuuma enyumba, ni mubba lukomera. ⁷ N'ebibiina byanyu ebibiri, bonabona abaafuluma ku sabbiiti, mulibba n'o mulimu ogw'o kukuuma enyumba ya Mukama okwetooloola kabaka. ⁸ Era mweetooloola kabaka enjuyi gyonagyona, buli muntu ng'akwite ebyokulwanisya bye mu mukono gwe; n'oyo eyayingira mu nyiriri aitibwe: era mubbenga n'o kabaka bweyafulumanga era bweyayingiranga. ⁹ Abaami b'e bikuni ni bakola nga byonabyona bwe biri Yekoyaada kabona by'alagiire: ni batwala buli muntu Abasaiza be, ab'o kuyingira ku sabbiiti wamu n'a b'o kufuluma ku sabbiiti, ni baiza eri Yekoyaada kabona. ¹⁰ Awo kabona n'abawa abaami b'e bikumi amasimu n'e ngabo ebyabbaire ebya kabaka Dawudi, ebyabbaire mu nyumba ya Mukama. ¹¹ Awo abambowa ni beemerera, buli muntu ng'a kwaite ebyokulwanisya bye, okuva ku luuyi lw'e nyumba olulyo okutuuka ku luuyi lw'e nyumba olugooda, okuliraana ekyoto n'e nyumba awali kabaka enjuyi gyonagyona. ¹² Awo n'afulumya omwana wa kabaka n'a mutiikira engule ey'o bwakabaka n’amuwa obujulizi; ne bamufuula kabaka ni bamufukaku amafuta; ne bakubba mu ngalo ni batumula nti Kabaka, abbe mulamu. ¹³ Awo Asaliya bwe yawuliire oluyoogaanu lw'abambowa n'olw'abantu, n’aiza eri abantu mu nyumba ya Mukama: ¹⁴ n'alinga, kale, bona, kabaka ng'ayemereire awali empango ng'ebngeri bwe yabbanga, n'abaami n'amakondeere nga baliraine kabaka; n'abantu bonabona ab'e nsi ni basanyuka ne bafuuwa amakondeere. Awo Asaliya n'akanula ebivaalo bye n'atumulira waigulu nti bujeemu, bujeemu. ¹⁵ Awo Yekoyaada kabona n'alagira abaami b'e bikumi abateekeibwewo ku igye, n'abakoba nti Mumufulumye wakati w'e nyiriri; n'oyo eyamusengererya mumwite n'e kitala: kubanga kabona yatumwire nti Aleke okwitirwa mu nyumba ya Mukama. ¹⁶ Awo ni bamusegulira; n'abita mu ngira embalaasi we giyingirira mu nyumba ya kabaka: n'aitirwa eyo. ¹⁷ Awo Yekoyaada n'alagaana endagaanu eri Mukama n'o kabaka n'a bantu, babbe abantu ba Mukama; era eri kabaka n'a bantu. ¹⁸ Awo abantu bonabona ab'o mu nsi ni baaba mu nyumba ya Baali, ni bagimenyamenya; ebyoto bye n'ebifaananyi bye ni babimenyera dala, ni baitira Matani kabona wa Baali mu maiso g'e byoto. Awo kabona n'ateekawo abaami ab'o ku nyumba ya Mukama. ¹⁹ N'atwala abaami b'e bikumi n'Abakulu, n'abambowa n'abantu bonabona ab'omu nsi omwo; ne baserengetya kabaka nga bamutoola mu nyumba ya Mukama, ni baiza nga bafuluma mu ngira ey'omulyango gw'abambowa eri enyumba ya kabaka. ²⁰ Awo abantu bonabona ab'o mu nsi ni basanyuka, ekibuga nikitereera: ni baitira Asaliya n'e kitala awali enyumba ya kabaka. ²¹ Yekoyaasi yabbaire yaakamala emyaka musanvu bwe yatandikire okufuga.