¹ Awo olwatuukire oluvanyuma lw'ebyo Nakasi kabaka w'abaana ba Amoni n'afa, mutaane we n'afuga mu kifo kye. ² Dawudi n'atumula nti Nalaga eby'ekisa Kanuni mutaane wa Nakasi, kubanga itaaye yandagire eby'e kisa. Awo Dawudi n'atuma ababaka okumukubbagizya olwa itaaye: Abaidu ba Dawudi ni baiza mu nsi y'a baana ba Amoni eri Kanuni, okumukubbagizya. ³ Naye abakungu b'a baana ba Amoni ni bakoba Kanuni nti olowooza nga Dawudi ateekamu ekitiibwa itaawo, n'o kutuma n'a kutumira abakubagizya? abaidu be tebaizire okusagira n'okumenya n'okukeeta ensi? ⁴ Awo Kanuni n'airira abaidu ba Dawudi n'abamwa, n'asalira ebivaalo byabwe wakati, okukoma ku matako gaabwe, n'abasindika. ⁵ Awo abamu ni baaba ni bakobera Dawudi bye babakolere abasaiza. N'atuma okubasisinkana; kubanga abasaiza nga bakwatiibwe inu ensoni. Kabaka n'atumula nti Mubbe e Yeriko okutuusya ebirevu byanyu lwe birikula, kaisi mwirewo. ⁶ Awo abaana ba Amoni bwe baboine nga bamutamire Dawudi, Kanuni n'a baana ba Amoni ni baweererya talanta egye feeza lukumi okugulirira amagaali n'a. beebagala embalaasi mu Mesopotamiya n'o mu Alamumaaka, n'o mu Zoba. ⁷ Awo ne bagulirira amagaali emitwalo isatu mu enkumi ibiri n'o kabaka w’e Maaka n'a bantu be; ni baiza ni basiisira okwolekera Medeba. Abaana ba Amoni ni bakuŋaana okuva mu bibuga byabwe ni baiza okulwana. ⁸ Awo Dawudi bwe yakiwuliire n'agaba Yowaabu n'eigye lyonalyona ery'abasaiza ab'a maani. ⁹ Awo abaana ba Amoni ni batabaala, ni basimbira enyiriri awali wankaaki w'e kibuga n'a bakabaka ababbaire baizire babbaire bonka ku itale: ¹⁰ Awo Yowaabu bwe yaboine ng'o lutalo balusimbire mu maiso ge n'e nyuma we, n'alonda ku basaiza bonabona aba Isiraeri abalonde, n'a basimbire enyiriri okulwana n'Abasuuli. ¹¹ N'abantu abandi bonabona n'abagisisya mu mukono gwa Abisaayi mugande we, ni basimba enyiriri okulwana n'a baana ba Amoni. ¹² N'a tumula nti Abasuuli bwe banyinga amaani, kale iwe wanyamba: naye abaana ba Amooni bwe bakuyinga amaani, kale nze nakuyamba. ¹³ Guma omwoyo, twerage obusaiza olw'a bantu baisu, n'o lw'ebibuga bya Katonda waisu: era Mukama akole ekyo kyeyasiima. ¹⁴ Awo Yowaabu n'abantu ababbaire naye ni basembera mu maiso g'Abasuuli okulwana; ni bairuka mu maiso ge. ¹⁵ Awo abaana ba Amoni bwe baboine Abasuuli nga bairukire, era boona batyo ni bairuka mu maiso ga Abisaayi mugande we, ne bayingira mu kibuga. Awo Yowaabu n'aiza e Yerusaalemi. ¹⁶ Awo Abasuuli bwe baboine nga babbingiibwe mu maiso ga Isiraeri, ni batuma ababaka, ne batoolayo Abasuuli ababbaire emitala w'o mwiga, ne Sofaki omukulu w'e igye lya Kadalezeri nga niiye mugabe. ¹⁷ Ne bakobera Dawudi; n'a kuŋaanya Isiraeri yenayena n'a somoka Yoludaani, n'a batuukaku n'a simba enyiriri okulwana nabo. Awo Dawudi bwe yamalire okusimba enyiriri okulwana n'Abasuuli, ni balwana naye. ¹⁸ Abasuuli ne bairuka mu maiso ga Isiraeri; Dawudi n'aita ku Basuuli abasaiza ab'o mu magaali kasanvu, n'a batambula n'ebigere emitwaalo ina, n'aita Sofaki omukulu w'eigye. ¹⁹ Awo abaidu ba Kadalezeri bwe baboine nga babbingiibwe mu maiso ga Isiraeri, ne batabagana n'o Dawudi, ne bamuweererya; so n'Abasuuli ni bataikirirya kuyamba abaana ba Amoni ate olw'o kubiri.