¹ Amʉg jẽbta aujiieram Manasés khodnaanau (jã ajim José iewa nacharam), amʉgau, Maquir gaaimua, Manasés iewa nacharam maimua ichpai Galaad aai ajim. Maquir khodnaanta deejim Galaad jẽb maima Basán den, Maquir emkhooin khukhajem atarrai. ² Manasés khodnaan dewan khʉʉnagta deejiieram chi jẽb amach khodnaanpierr, Abiezer, Helec, Asriel, Siquem, Hefer maimua Semida. Amʉ khʉʉn ajim Manasés khodnaan emkhooin, José iewa,ich khodnaanag oopijim. ³ Magwai, Zelofehad, Hefer iewa, Galaad iewa, Maquir iewa, Manases iewa, pod emkhooin oobajim ʉʉin paita oojim. I kharran naan thʉ̃r mʉg ajim Malaa, Noa, Hogla, Milka maimua Tirsa. ⁴ Chi ʉʉin Eleazer dakha beejiieram anʉm, Josué Nun iewa aig, maimua agjo chi pornaanau maimua amag jaaujiieram: "Ẽwandamau Moiseeg iekhajim mãrãg juakharr deenkhĩir maan ephemkhooin dʉi ãba." Magsiei, Ẽwandamau jaautarrjo, ichdiu deejim juakharr chi ʉʉinag ãba ich aai ẽudeen khʉʉn dʉi. ⁵ Manasesag deejim jẽb banaan jua numi Galaad gar maimua Basan Jordán thoon bi gar sim, ⁶ Manasés kharan naanau aujiieram chi juakharr chi iewanaan dʉi ãba. Galaad jẽb deejiieram Manasés khodnaan dewan khʉnag. ⁷ Manases jẽb pomag sĩiejim Aser mua Micmetat sim aar, Siquem edau ober jem sim gar. Magsiei chi khĩir thẽu sim sur garta sĩiejim Tapúa dakha joobanaar khʉʉn aar. ⁸ (Tapúa jẽb Manasés den ajim, mamʉ Tapúa phobor Manases den anʉm chi khĩir thẽu sim, Efraín khodnaan den ajim anʉm.) ⁹ Chi khĩir thẽu sim siiejim Caná dosĩg chururr sim aar. Mʉg phobor thʉnʉm sur dosĩg chururr sim gar mua Manasés phobor thʉnʉm ee agjo Efraín denau. Manasés khĩir thẽu sim siiejim norte chi dosĩg chururr sim bi gaau, maimua thʉba siiejim phũas gar. ¹⁰ Chi jẽb sur garam Efraín den ajim, maimua chi jẽb norte garam Manasés den ajim; phũasta chi khĩir thẽu siiejim. Magwia norte bi gar, Aser dʉita oosiiejim maimua edau ober jem bi gar, Isacar. ¹¹ Agjo Isacar gar maimua Aser gar, Manaseu ausiiejim maimua ich joobaju, Ibleam maimua ich joobaju, Dorpien õor maimua am joobanʉm, Endorpien õor maimua am joobanʉm, Tanaacpien õor maimua am joobanʉm, Meguidopien õor maimua am joobanʉm (maimua thãrjũpan phobor Nafét anʉmau). ¹² Mamʉ Manases khoodnaanau podbajiieram jãg phobor awaag, cananeospien chi phobor gaai ichmag jooba wenʉʉrrai ¹³ Chi Israelpien õor juapa theeg aphʉbadeei, amachdiu chi cananeospien theeg phigkha pijiieram, mamʉ am jʉrpʉibajiieram ¹⁴ Magwia, José chaainau Josué jaaujiieram, amʉg: "¿Khan gaaimuata mãrãg deeji jãg jẽb mãar dempai maimua jãg juakharr agat khitarr, mãar khapan nʉm ee, maimua mãar thunwe Ẽwandamau bendesiitarr ee?" ¹⁵ Josue amag magjim: "Pãar phobor chadcha pomaamkhai beerwai, pãach cha petat pa bʉ ee maimua magai jẽb jʉrathag pãachdiu cha ferezeospien jẽb ee miamua refaiaspien den ee. Amʉta waubat, pãar ithee Efraín jẽb sirphʉg bãrãasiei." ¹⁶ José chaainau magjiieram: "Chi jẽb durr bʉ apha sim mãar ithee bãrãa sim. Mamʉ thunwe cananeospien joobanʉm jẽb sirphʉg wainʉm carro jiierden khukhaag ithee, jã khʉʉn Bet Seán gar nʉm khʉʉn maimua am joobanʉm, jã khʉʉn Jezreel khʉtag ee nʉm khʉʉn." ¹⁷ Magsĩe, Josue jaaujim Jose di, Efrainag maimua Manasés: "Pʉchta phobor pomaamau beerwai maimua juapa theeg sim. Pua pod bãrãa jẽb auju khaba sim puch ithee. ¹⁸ Agjo Jẽb durr bʉ apha sim pudenau. Pabʉ apha sim awiaja, phʉpʉiwia maimua puch athee auju chi khĩir thẽu sim aigmua warrphag masim aar. Cananeospien jʉr apui, amachdiu carro jiier den khukhaag aunaawiaja, maimua amach juapa theegnaawiaja."