¹ Kutunda ku mukuluntu i va hangula va vakentu na vana vendi, uje yonja yongola mu vuchili - keti ngue yange lika vunoni na vaje voshe va dhivuka vuchili - ² muomu lia vuchili vuje vua kala muli yetu vuka kala netu hoshe. ³ Kavumbi, chivovo na chiyulo vikale netu kutunda kuli Kalunga Tata na Yesu Kilistu, na Muna Tate mu vuchili na chilemo. ⁴ Njina jolela muakama nji na uana vana vove vamo venda mu vuchili, ngue omo tua uana lishiko lia kutunda kuli Tate. ⁵ Hano vene nji kulomba ove ndona, keti ngue nji ku thonena lijui lia shiko lia liha, vunoni lije vene li tua kele nalio kutunda kuku haku shangumuka, likelio tu liyongole umo na mukuavo. ⁶ Echi chi ke ch chilemo, mekemo motuenda mu kushungama mu lijui lia lishiko liendi. Eli likelio lijui lia lishiko, ngue mo mua viuvua ku kushangumuka, munapande kuenda mo. ⁷ Muomu vavengi vakua ku kuitha vaya mulifuti, kova tavele nguavo Yesu ikeye Kilistu uedhile ha vuntu. Ou ikeye vene mukua ku kuitha, na ikeye antekilistu. ⁸ Liniungenu eni vavenia, keti mudhimbalethe ku vilinge vije vitua pangele, vunoni linga mutambule feto yakushula. ⁹ Nkala uoshe aye kulutue naku kala muvi longetha via Kilistu kuahi kakele na Kalunga. Uoshe a kala muvilongetha, ou ali navioshe na Yishe na Munendi. ¹⁰ Nga umo eja kuli yeni keho ka nehele vilongetha evi, keti mumu tambule mu vinjivo vieni, keti lalomumu kunde. ¹¹ Kuli uje a mu kunda aka livandakana mu vipanga viendi via kuviha. ¹² Omo njili na via vingi viaku mithonena, vunoni kunji ku thoneka mu lipapelo na tinda. Vunoni, nja thselela kuija kuli yeni naku kuania neni kulitala vihanga, linga kujolela cheni chipue mo. ¹³ Vana va munanoko ua mukentu ua kuhangula na ku kunduho.