¹ Ka birawa kagi kɨng ka wimangəng a təmba Garisaniyawam. ² Yesʊ jɨre ra bʊntəlong ka hiiyəngngəng, rəkwa-rəkwang, gʊ ni rə we bwirai ka jɨrtəne wa hangʊwi a mura suutə ka gaiyʊ. ³ Ni hi bə da suuti hi, mən bʊwa nən chəmte. Məni rə chəmtən bʊwa rə gi me niya sɨng a taʊwi. ⁴ Kən bʊwa rə chəmte kali mwam mənni ka tɨso chəmti hi, me rə gʊ ni rə kumnii tə ba sɨng a kaba bʊwai. ⁵ Rə kum rə ko ni hi ka mura suuti hi mʊwa wurte mwiya bwiyangʊ rə wetətə bəlgəmi. ⁶ A fʊlla chuuwe Yesʊ berə preng ka mwawʊ səg a ruwa kak ka gəng. ⁷ Ka maʊ wuri rə kumnii go "wʊllai a dai nən mwe, Yesʊ yəlliya Taajiiyu wa lii graati? Kən chəllan rə dun da Taajiiyuwʊn kari ni kʊnang." ⁸ Bəra ki Yesʊ ka sotən go "Jɨrmən na niwe mwe we bwira." ⁹ Ka gʊl hangʊ go "Dun da mʊn mo wune?" Ka jaʊtən go, dun da miyən mo mwam, nyəngkə nə ka mwamməng. ¹⁰ Ka chəlla hangʊ a jiiya ji go kari ba kaigin a təm həm. ¹¹ Ka gən da kulmor da ngərtən to bwita siir da həllaniyən. ¹² Ka chəlla hangʊ go "Tʊng bən nən dɨgiiya bwita ngərtə hiyʊ" ¹³ Ka ngatənəng, kə weni bwirai hi a jɨrmənəng ka dɨgiiya bwita ngarti hiyəng, mwamiya jiiyu ba laʊ nee tə təsʊ, ka suwowe rə səgniyəng ka yəra mura hiiyəng. ¹⁴ Kə yarəm ba ngərtə hiyəm a mwara səngniyəng ka sotən jiiya nəngnga bwiyʊ a nəbbə bɨrrɨm na gani kɨngriyəng. Nəb mwam ka birawe na tə chuu jiiya nəngnga bwiyʊ. ¹⁵ A be gwa Yesʊwiyəng ka chuu ni waiwe rə weni bwiraiyʊ a chiiya gai a yobi yangʊ rə dʊtəttǝ nyai, kə taata ma hanjiiməng. ¹⁶ Ba be na chuu jiiya nəngnga bwi rə ni we rə weni bwiraiyʊwʊng ka diya sotəna nəb ji hanjiim a chuuwi. ¹⁷ Nəb həm ka chəlla hangʊ go jɨrmənna təm ba jiiyəm. ¹⁸ Yesʊ dirəng, kə ni hi jəgmən weni bwiraiyʊ wi a chəlla hangʊ go na tə di kwang. ¹⁹ Mənni Yesʊ a ngatən be, ka sotən go "di a kaitan jɨnu, a gwa nəbba mʊmmi na sotən ji nya Taajiiyu a nəngnga nənni na nyəngka nui bʊmta mʊ gərəng ." ²⁰ Kə ni hi a dɨgiiya bɨr da Dikafofisəng sʊwe rə grɨjiiya ji nyai wʊ Yesʊ a nəngngatənni, warigʊwa jiiyu ka mənabʊnte. ²¹ Rə kaʊtang ka bwiyəng ka Yesʊwʊng a bʊntəlong ka hiiyəng a kagi kɨng ka wimangngəng ne nəbbi ka kawʊr hangʊ. ²² Kə kwan a mura nəbbə gram ba kaita nyiinirʊwaniya Yahudawai wʊ bɨrɨ mo Yayirusi a be rutəna kak ka gəngngəng. ²³ Kə chəlla rə go "Yʊwiya miyʊ me bwiləmang, wa nyiiya bwiyati. Kən chəlan nən diya kaitamiyʊ na titən kang na nya bwiləmangi na kwara." ²⁴ Ka di kiinəng, nəb mwam fʊng re, fʊmmarə hangʊ a kɨngngər warigʊ. ²⁵ Ka gʊ nyui dʊgʊm kwiyomini jɨttə kwu a jɨr təsʊ. ²⁶ Ka no kʊnang rəge rə kwani, ka yogo gana yɨnongngi mwam, a ju chəmmər deni, mənni bwar hən bə yɨgtən kwewi. ²⁷ Ka nui jɨnii nyai Yesʊ nəngngari, ka tʊwe wa buk kan gəngngəng ka məbra lɨgɨna gʊwʊng. ²⁸ Nyəngkə ka dəb a furiiyangʊ go, "Kə nabə məbra hang nyiiya dʊk ka gəngngi ki bən kwara" ²⁹ A məbra hangʊwʊng kə dʊgʊm həm a siyəng, ka nui a bwiyangʊ go kə gə kwara a bwatətangʊ. ³⁰ Re kwang, Yesʊ ka nui kumnii ka jir a bwiyangʊ ka nəngnga gʊlən go, "Wuna məbra dʊk ka miyəngngi?" ³¹ Nəb məssarəm ba gəm a jaʊtən go, "Chuu nee nəbbi a kawʊr ni na nyəngkə fʊmmanə rəgəng. A wai yobi we bən yəm niya məbrani go nyəne? ³² Mənni Yesʊ ka wulgo kəmtə na gə chuu niya məbra gəni. ³³ Nyui hi a yəm jiiya nəngnga bwi nən giyəng ka jire wa mura nəb bwi kare bəri taatə, ka ruwa kak ka Yesʊwʊng, ka soten ji a nəngngai warigʊ. ³⁴ Kə Yesʊ a soten go "Yʊwi, neetang ka furiiyəng ka mʊng ka kwara nən mwe; di ləmang kən kwara a bwatətta mʊ. ³⁵ Ka mura sʊtangnga yəməng kə bagi nəbba diyawa kaita nigra kanda nyiini rʊwaniyən da Yahudawan a be rə yəm go, "Yʊwiya mʊ ka bwiya. Wʊlla ma ki mən da Ni-məsariyəng?" ³⁶ Mənni Yesʊ a nui ji hanjiim a sʊweyəng, ka sotena nigra hi go, "Kari nui taate. Nǝbən yəm bə nyam bwigi." ³⁷ A laʊ a kai hiyəng, a ngatən ba gʊ ni a dɨgiiya suməna Bitrusi, na Yakobo na chiyangʊ Yohana. ³⁸ Ka dɨgiiya kaita nigra hiyəng ka chuu nəb nəngnga fur də yulluwun na bagi mwam tiiro wiite. ³⁹ A dɨgiiya kai hiyəng kə gʊllə nəb həm go,"Bəra rə wʊllai kə tə tiro witəng?" Bwe chʊwi hi a bwiya be; bə dan dum." ⁴⁰ Kən hanjiima nura nutəng. Ka jəg nəbbə ka gaiyəm warigʊ a tariyəng. Ka buwe tee bwe chʊwiyʊ na neen gʊ na bagi bǝ hangʊ a be kiinəm. Ka dɨgiiya gʊn ti bwe chʊwi hi wiyǝng. ⁴¹ Ka taʊ kang ka bwe chʊwi hiyəng ka sotən go "Talitha Koum" mənni bə sʊwe go, "Bwe chʊwi, mən sʊnən mo, gun." ⁴² Re kwa-rə-kwang bwe chʊwi hi ka gun a yo yom. (Nyəngkə jətəttan gʊ ka laʊ kwu a jɨr təsʊ) ⁴³ Ka sotəna hanjiimi go, kari gʊ ni ba yəm. Ka kaba sotən go tə ne jɨnii jaʊri a jaʊ.