¹ Sʊtang kərə jiiguwʊng ka yəmbə ləmangngəm ba Yesʊ Kristiyəm, Yəlla Taajiiyuwi. ² Nyəngkə mʊlarə ga wang ka Ni-yʊweri Ishayang, "Chuuwe, kəmən təme rə ni təmri ya miyʊ a kak ka mʊng wʊ ba yəngna nən jʊwiyʊ. ³ Ka jir bɨrɨ buwʊng a sei muri, sʊwe rə go, 'Tə yəngnatən jʊwiya Taajiiyuwi; tə yəngna jʊwiyan gʊ a si sap."" ⁴ Yohana ka be, nəngngatən batisma nəb a mura sei, warə yəmba butangnga kangngəm bəra rə yunotang ka jɨnii bwirai. ⁵ Təm ba Yahudiyam warigʊ tən nəbba Urshalimam ka be gwang giyʊ, ka nəngngatən batisma hanjiimi a Laa Urdʊniyəng, menni hanjiim sʊrə jɨnii bwiraiya jiiyu. ⁶ Yohana a mai biyang rə yiir da kurmongəng rə biyang a bʊ a fer da gən, mənni jɨnii jaʊrang gʊ ləngate tən yʊtta sei. ⁷ Ka si finang go, "Ka rə wʊ bera bukka miyəngngi, wa lii rə kumniiyu. Wʊ sitən bǝ kɨmɨn dʊtətta ləbərta gʊwi. ⁸ Mən nəngnga gəmən batisma nən hii mənni hangʊ ba nəngnga gəmən nən We Yʊlgoi." ⁹ A yai kotəye Yesʊ ka dɨgiiye wa Nazared a təm ba Galiliyəm, kən Yohana ni wʊ nəngnga batisma a nəngngatən batismang a Laa Urdʊniyəng. ¹⁰ A bukkə Yesʊ a jɨrməne wa hiiyəng, korən ka wumən bwi, We Taajiiyuwi ka suwe nyəra muglo. ¹¹ Kə jiir a jɨre wa korən sʊwe rə go, "Mwe mən yəlla daai ya miyʊ, kəmən nui fur də kwaʊwʊn nən mwe deni." ¹² Kə We dəg hangʊ a diya seiyəng. ¹³ Hangʊ ka sei muri Kotə fʊrtə gwar, Chetan bɨnggore. Ka tən namta sei, kə weni təmri nengngatən swiyerǝng. ¹⁴ A fʊlla wʊn taʊ Yohannai, Yesʊ ka be a mura Galili warə yəm bə ləmmangəm ba Taajiiyuwʊm, ¹⁵ mənni sʊwe rə go, Fʊlla hi ka rii, dʊʊtətta Taajiiyuwi ka diye rə do. Tə bukang na tə nga rə yəm bə ləmmangəm. ¹⁶ A jii wʊn hangʊ sura kɨng ka wimmang ka Galiliyəng, ka chuu Siman tən Andrawus chiya Simani kwii garta wimmang a muri, bəra ki hanjiim nəbbə tʊwa laatəm. ¹⁷ Yesʊ a sotənna hanjiimi go, "Tə be tə fʊngngiye, na dəgən tə yullo bə tʊwa wʊ nəbbəm." ¹⁸ Rə kwa rə kwang hanjiim ka dʊ garta fʊng hangʊ. ¹⁹ A fʊlla Yesʊ a yoyom banigʊwi ka chuu Yakobo yəllang Zabadiyu tən Yohana chiyan gʊ yəngna garte a mura bʊntəlong ka hiiyəng. ²⁰ Ka bu hanjiiməng, hanjiim ka dʊ teen jiiyu Zabadi a bʊntəlong ka hiiyəng tən nəbbbə nəngnga swiyer kiinəm, ka fʊng hangʊwʊng. ²¹ A dɨgiiya Kafarnahum, a ko nyibiyʊwʊng, Yesʊ ka dɨgiiya kandən rʊwaninyiiniwʊn ka məsatənna hanjiimi. ²² Hanjiim ka mənabʊnte rə məsarang ka gəng, bǝrkə hangu bə məssatən nən kumnii, me nyərarə nəb mʊlarəm. ²³ A kandə rʊwanyiiniwʊn ka gʊ ni rə we sirəmmi, ka maʊ wʊri rə kumnii. ²⁴ Sʊwe rə go, "Wʊlla dabən nən mwe, Yesʊ wa Nazaredi? Be mo na juuwobən ga? Kən yəmən, mʊ wʊ mə yʊlgoi ya Taajiiyuwi!" ²⁵ Yesʊ ka kwertən yəm a we sirəmmi go "Məra nyi na jɨrmən na hangʊwi!" ²⁶ A bukkə we sirəmmi hi a baʊtənna təməng, kə we sirəmmi hi ya maʊ wʊriyəng ka jɨrməna bwiyan gʊwʊng. ²⁷ Nəb warigʊ ka nəngnga məna bʊni rə kwani, gʊl bwitan jiiyu go, "Wʊllai jii waiwe? Kang məsarang kə fiyəng kərə kumniiyəng kə gən kɨne? Dəg weni sirəmi nuitən yəmi!" ²⁸ A langbəng yəm ba gəm ka tʊwe təm ba Galiliyəm rə murtangʊ warigʊ. ²⁹ A bukka dʊ kandə rʊwanyiiniwʊnəng, ka dɨgiiya kaitan Saminu tən Andrawʊsiyəng, bo ka tən Yakobo na Yohana. ³⁰ Nyiille Saminuwi wʊ chʊwi ka dədai me bwiləmang rə kətərən, kən ba hanjiim a sotənna Yesʊwiyəng. ³¹ Ka be taʊ kang ka gəng a guggəng; ka kwarang ka sʊ nəngngatən swiyerəng. ³² A yʊ hi, a bukkə ko dɨgiirəng, kən betənnə rə nəbba bwara bwaraiyəm warigʊ tən bə rə səmbatə bwiraiyəm. ³³ Nəbba bɨr hənəm warigʊ ka kʊra-bwi a nyiiya fʊgangngi. ³⁴ Ka kwara rə nəbba bwara bwaraiyəm mwam rə bə rə bwatə dəndangngəm, bo, ka jəg səmbatǝ bwirai, mənni a ngatən ba səmbati hi ya sʊ yəm bəra ki ka yəm hangʊ. ³⁵ Ka gun rə mori wʊlag, təm ka nyuru-nyuru, ka diya gʊ me gʊ wi a rʊwa nyiiniyǝng. ³⁶ Saminu tən bə ka kiinəm ka faʊ hangʊ. ³⁷ A nyang, ka soten go, "Warigʊ ka fanne." ³⁸ Ka sotən go, "Tənen diya gʊ ka, a yagi murte na waʊ yəm a gai bo. Jii ya dəgi kən be gwi." ³⁹ Ka di a təm ba Galiliyəm warigʊ, warə yəm a gana kandə rʊwa nyiiniyǝn jəg sembatǝ bwirai. ⁴⁰ Gʊ ni rə bʊgabwiri ka be gwan hangʊwi; ka ru a chəlla hangʊwʊng, ka sotən go, "Kən nga ki bən dəmən kwara nən me." ⁴¹ Ka nəngnga bʊmte, kən Yesʊwa yak kang a titənəng, ka soten go, "Kən nga. Tʊmən bwi." ⁴² A gɨlobe bʊgabwir ka dʊ hangʊ, bo hangʊ ka nya tʊməntang ka bwiyəng. ⁴³ Yesʊ ka wʊtən suu rə kumnii ka dʊ a diyəng. ⁴⁴ Ka sotənna hangʊwi go "Yəm mo me bən sotənna gʊ ni, mənni di na yɨgi nʊng dur da mʊn ni tung jɨnii a chəriya Taajiiyuwi, na yɨgi nəbbən jii ya tungtang a chəriya Taajiiyuwi bəri tʊmʊntang nyəngkə Musa sʊwe re gəng bəra jəggatang." ⁴⁵ Mənni a jɨrɨng ka sʊ sotəna nəb warigʊ, wʊsa yəm a gani warigʊ, bərə nyang, Yesʊ a dəmən ba ku bwi a yom a muri hi. Ka di a sei a gani me nəb wi, kə nəbba be gwan giyʊ a gani dəndangngǝng.