¹ ಅಪ್ಡು ಪವಿತ್ರಾತ್ಮನಿಚ್ಚ ವಾಚ್ನಾಟ್ಟ ಮಹಾ ಶಬ್ದಮ್ನಿ ಇಂಟೀ . ಅದಿ ಆ ಯೋಡು ಮ೦ದಿ ದೇವದೂತುಲ್ಕಿ - ಮೀಳು ಪಾಯ್ಯೀ ಆ ಯೋಡು ಪಾತ್ರೆಲಾ ವುಂಡ ದೇವುಡ ರೌದ್ರಮ್ನಿ ಭೂಮಿ ಮೀ೦ದ ಹೊಯ್ಯಿರಿ ಅನೀ ಸೊಪ್ಪೇ . ² ಅಪ್ಡು ಮೋದಲ್ನೇಯೋಡು ಪಾಯೀ ತನ್ನ ಪಾತ್ರೆಲಾ ವುನ್ಡಿಂದಾನೀ ಭೂಮೀಕೀ ಹೇಸೇ ; ಅಪ್ಡು ಮೂದಲ್ನೇ ಮೃಗದೀ ಗುರುತ್ನೀ ಪುಡ್ಕನೀ ದಾನ್ ವಿಗ್ರಹಕ್ಕಿ ನಮಸ್ಕಾರಮೂ ಸೇಸೇ ಮನುಷ್ಯಲಾ ಪೈ ಮೀ೦ದ ಸೇಡ್ಡ ಉರಿ ಹುಣ್ಣು ಲೇಸೆ . ³ ರೋಡ್ನೇ ಯೋಡು ತನ್ನ ಪಾತ್ರೆಲಾ ವುನ್ಡಿಂದಾನೀ ಸಮುದ್ರಮೂ ಮೀ೦ದ ಹೇಸೇ . ದಾನ್ ನೂಳು ಸೇಚ್ಚಿ ಪೋಯ್ನೋಡ ರಕ್ತಮ್ ರೀತಿ ಅಯಾ . ಮಲ್ಲಿ ಸಮುದ್ರಮ್ಲಾ ವುಂಡ ಜೀವಜ೦ತುಲು ಅನ್ನಿ ಸೇಚ್ಚಿ ಪಯಾ . ⁴ ಮುಡ್ನೆಯೋಡು ತನ್ನ ಪಾತ್ರೆಲಾ ವುನ್ಡಿಂದಾನೀ ನದಿಲ್ ಮೀ೦ದನೂ ನೂಳು ಮೀ೦ದ ಹೇಸೇ ; ದಾನ್ ನೂಳು ರಕ್ತಮ್ ಆಯಾ . ⁵ ಆ ಮೀ೦ದ ಜಲಾಧಿಪತಿ ಐನಾ ದೂತುಡು - ಸದಾ ಉ೦ಡೋಡು , ಪರಿಶುದ್ದುಡು , ನುವಾ ಇಟ್ಟ ತೀರ್ಪು ಸೇಸ೦ದಟ್ಲಾ ನೀತಿ ಸ್ವರೂಪಡು ಐನಾವು . ⁶ ದೇವಜನಲು ಮಲ್ಲಿ ಪ್ರವಾದಿಲ್ ರಕ್ತಮೂನೀ ಸುರಿಬಿಚ್ಲಿ ; ನುವಾ ವಾಳ್ಕಿ ರಕ್ತಮ್ನೇ ತಾಗೇಕ್ಕಿ ಇಚ್ನಾವು ; ದೀನಕಿ ವಾಳೆ ಪಾತ್ರಲು ಅನೀ ಸೋಪ್ಪೆದಾನ್ನಿ ಇಂಟ್ಟಿ . ⁷ ಆ ಮೀ೦ದ ಯಜ್ಞವೇದಿ ಮಾಟ್ಲಾಡ್ತ - ದೇವುಡು ಐನಾ ಕರ್ತುಡು , ಸರ್ವಶಕ್ತಡು , ನೀ ನ್ಯಾಯತೀರ್ಪಮೂ ಸತ್ಯಮೂ ನ್ಯಾಯಮೂ ಐನಾವೀ ನಿಜಮೂ ಅನೀ ಸೋಪ್ಪೆದಾನ್ನಿ ಇಂಟ್ಟಿ . ⁸ ನಾಲುಗ್ನೆಯೋಡು ತನ್ನ ಪಾತ್ರೆನೀ ವು೦ಡಿದಾನ್ನಿ ಸೂರ್ಯುಡ್ ಮೀ೦ದ ಹೇಸೇ ; ಅಪ್ಡು ಸೂರ್ಯಡುಕ್ಕಿ ಕಡುಬಿಸಿಲಿನ್ಯೀಚ್ಚ ಮನುಷ್ಯುಲ್ನೀ ಕ೦ದಿಚ್ಚೆ ಶಕ್ತಿಮೂ ಇಚ್ಚಾಲ್ ಪಟ್ಟೆ . ⁹ ಮನುಷ್ಯಡು ಬಲಮೈನಾ ಕಾವಿನಿ೦ಚ್ಚ ಕ೦ದಿ ಪಾತ್ನೂ ವಾಳ್ ದೇವುಡ್ನಿ ಘನಪಡಿಚ್ಚೆ ರೀತಿ ಮಾನಸಾ೦ತರಮ್ನೀ ಸೇಸ್ಕೊಂದನೆ ಈ ಉಪದ್ರವಲ್ ಮೀ೦ದ ಅಧಿಕಾರಮ್ ವುಂಡ ದೇವುಡ ನಾಮನೀ ದೂಷಿಚ್ಲಿ . ¹⁰ ಐದನೇಯೋಡು ತನ್ನ ಪಾತ್ರೆನೀ ವು೦ಡಿದಾನ್ನಿ ಮೊದಲ್ನೇ ಮೃಗ ಸಿ೦ಹಾಸನಮಿಂದ ಪೋಸ್ನಾಪ್ಡು ದಾನ್ ರಾಜ್ಯಮೂ ಸೀಕಟಿ ಅಯಾ . ಜನಲು ವಾಳ್ಕಿ ಐನಾ ಕಷ್ಟಮೂ ದೆಸೆಯೀ೦ಚ್ಚ ತಮ್ಮ ನಾಲಿಗೆಲ್ನಿಕೊರ್ಕನೀ ತಮ್ಮ ಕೃತ್ಯಲಾ ¹¹ ವಿಷಯಮ್ಲಾ ಮಾನಸಾ೦ತರಮ್ನೀ ಸೇಸ್ಕೊಂದನೆ ತಮ್ಮ ಕಷ್ಟಲ್ ದೆಸೆಯೀ೦ಚ್ಚ ಹುಣ್ನುಲ್ನೀ ದೆಸೆಯೀ೦ಚ್ಚ ಪರಲೋಕ ದೇವುಡ್ನೀ ದೂಷಿಚ್ಲಿ . ¹² ಆರನ್ನೇ ಯೋಡು ತನ್ನ ಪಾತ್ರೆಲಾ ವು೦ಡಿದಾನ್ನಿ ಯೂಫ್ರೆಟಿಸ್ ಅನೀ ಮಹಾ ನದಿ ಮೀ೦ದ ಹೇಸೇ ದಾನ್ ನೂಳು ಇಂಗಿ ಪಯಾ ; ದಾನೀಚ್ಚ ಮೂಡಣ ದಿಕ್ಕಿ ನೀ೦ಚ್ಚ ವಾಚ್ಚೆ ರಾಜುಲ್ಕಿ ಮಾರ್ಗಮೂ ಸಿದ್ಧಮ್ ಆಯಾ . ¹³ ಮಲ್ಲಿ ಘಟ ಸರ್ಪಮೂ ಮೃಗಮೂ ಸುಳ್ಳು ಪ್ರಾವಾದಿಲು ವುಳ್ ನೋರಿ೦ಚ್ಚ ಕಪ್ಪೆಲ್ ರೀತಿ ವುಂಡ ಮೂಡು ಅಶುದ್ದ ಆತ್ಮಲೂ ವಚ್ಚೆದಾನ್ನಿ ಸೂಸ್ತೀ . ¹⁴ ಇವೀ ಮಹತ್ಕಾರ್ಯಲ್ನಿ ಸೇಸ್ಸೇ ದೆವ್ವಲು ; ಭೂಲೋಕಮ್ಲಾ ವು೦ಡ ರಾಜುಲ್ ಹತ್ತಿರ೦ಕ್ಕಿ ಪಾಯ್ಯಿ ಸರ್ವಶಕ್ತುಡ್ ಐನಾ ದೇವುಡ ಮಹಾ ದಿನಲಾ ಯೂದ್ಧ೦ಕಿ ವಾಳ್ನಿ ಕೂಡಿಬಿಸ್ತಾಮು . ¹⁵ ಇಗೋ ದೊಂಗುಡು ವಚ್ಚೆ ರೀತಿ ವಾಸ್ತನು ; ತಾನು ನಿರ್ವಾಣಮೈಯ್ಯಿ ತಿರುಗಾಡಿ ಅವಮಾನಕ್ಕಿ ಗುರಿ ಐತಾನೋ ಅನಿ ಎಚ್ಚರಮೈಯ್ಯಿ ವುಂಡಿ ತನ್ನ ವಸ್ರ್ತಲ್ನೀ ಕಾಪಾಡ್ಕ ನೋಡು ಧನ್ಯುಡು . ) ¹⁶ ಆ ದ್ವೆವಲು ಭೂರಾಜುಲ್ನಿ ಇಬ್ರಿಯ ಭಾಷೆಲಾ ಹರ್ಮಗೆದೊನ್ ಅನೇ ಪೇರು೦ಡ ಸ್ಥಳ೦ಕ್ಕಿ ಕೂಡಿಬಿಚ್ಚೆ . ¹⁷ ಯೋಡನೆಯೋಡು ತನ್ನ ಪಾತ್ರೆಲಾ ವು೦ಡಿದಾನ್ನಿ ವಾಯುಮ೦ಡಲಾ ಮೀ೦ದ ಹೆಸ್ನಾಪ್ಡು ದೆವಾಲಯಮ್ಲಾ ವುಂಡ ಸಿಂಹಾಸನ ಕಡೆಯಿಂಚ್ಚ ಮಹಾ ಶಬ್ಧಮೂ ಉ೦ಟೈಯ್ಯಿ - ಆಯಾ ಅನೀ ಸೋಪ್ಪೆ . ¹⁸ ಅಪ್ಡು ಮಿ೦ಚುಲು ವಾಣಿಲೂ ಗುಡುಗುಲೂ ಉ೦ಟಾಯ ; ಇದೀ ಕಾಕುಂಡ ಪೇದ್ದ ಭೂಕ೦ಪಮೂ ಆಯಾ . ಮನುಷ್ಯುಲು ವುಂಡ್ನಾಪುಡ್ನಿಚ್ಚ ಇಟ್ಟ ಭೂಕ೦ಪಮೂ ಕಾಲೇದು . ¹⁹ ಮಹಾ ಪಟ್ಟಣಮೂ ಮುಡ್ ಭಾಗಮೂ ಆಯಾ ; ಜನಾ೦ಗಲು ಪಟ್ಟಣಮೂ ಪೋಡೇ . ಇದೀ ಕಾಕು೦ಡ ದೇವುಡು ಪೇದ್ದ ಬಾಬೆಲ್ನಿ ಜ್ಞಾಪಿಚ್ಕೊನಿ ತನ್ನ ಉಗ್ರ ಕೋಪಮ್ನಿಚ್ಚ ದ್ರಾಕ್ಷರಸ ಪಾತ್ರೆನೀ ದಾನ್ಕಿ ತಾಗೇಕೀ ಇಚ್ಚೆ . ²⁰ ಅಪ್ಡು ದ್ವೀಪಲ್ ಎಲ್ಲಾ ಪಾರಿಪಾಯಾ ; ಬೆಟ್ಟಲು ಸಿಕ್ನಾಟ್ಗಾ ಪಾಯಾ . ²¹ ಮಲ್ಲಿ ಆಕಾಶಮ್ನಿಚ್ಚ ಮನುಷ್ಯುಲ್ ಮೀ೦ದ ಪೇದ್ದ ಆನೇ ರಾಳ್ಳು ವಾನ ಪೋಸೇ ; ಒ೦ಕೊಕ್ಕ ರಾಯಿ ಹೆಚ್ಚು ಕಡಿಮೆ ನಾಲ್ಗು ಮಣ ತೂಕಮ್ ವುಂಡೆ . ಆ ಆನೇ ರಾಳ್ಳು ವಾನ ಕಾಟಮೂ ಬಹಳ ಜ್ಯಾಸ್ತಿ ಅಯ್ಯಿನ್ ದಾನಿ೦ಚ್ಚ ಆ ವಾನ್ಲಾ ಸಿಕ್ಕೆಸ್ಕೋನ್ನಟ್ಟ ಮನುಷ್ಯಲು ದೇವುಡ್ನಿ ದೂಷಿಚ್ಲಿ .