¹ ನಾನು ಸುಸ್ನಾಪ್ಡು ಯಜ್ಞಕುರಿಯಾದಾತುಡು ಚೀಯೋನ್ ಪರ್ವತ ಮಿಂದ ನಿಲಚ್ಕ ವುಂಡೆದಾನ್ನಿ ಸೂಸ್ತಿ . ಆತುಡ ಜೋತ್ಲಾ ಒಕ್ಕ ಲಕ್ಷ ನಲಪೈ ನಲ್ಗು ಸಾವಿರ ಮಂದಿಲೂ ವುಂಡ್ಲಿ . ವಾಳ್ ವಾಳ್ ಅಣೆಮಿಂದ ಆತುಡ ಪೇರು ಆತುಡ ತಂಡ್ರಿ ಪೇರು ರಾಸುಂಡೆ . ² ಇದುಕಾಕು೦ಡ ಪರಲೋಕ ಕಡೆಯಿಂಚ ಜಲಪ್ರವಾಹ ಘೋಷ ರೀತಿ ಪೇದ್ದ ಗುಡುಗು ಶಬ್ದಮ್ ರೀತಿ ವುಂಡ ಶಬ್ದಮ್ನಿ ಇಂಟ್ಟಿ . ನಾನು ಇನ್ನಾಟ್ಟ ಆ ಶಬ್ದಮು ವೀಣೆಲ್ನಿ ನುಡಿಬಿಚ್ಕೊನೀ ಸೋಪ್ತಾವುಂಡ ವೀಣೆಗಾರುಡ ಶಬ್ದಮ್ ರೀತಿ ವುಂಡೆ . ³ ವಾಳು ಸಿಂಹಾಸನ ಮುಂದ್ರನೂ ಆ ನಾಲ್ಗು ಜೀವಿಲ್ಲಾ ಮಲ್ಲಿ ಹಿರಿಯುಲ್ ಮುಂದ್ರ ಕೊತ್ತ ಹಾಡ್ನಿ ಹಾಡ್ಲಿ . ಭೂಲೋಕಲೋಗನಿಂಚ ಕೊಡ್ಕನೀ ಇಚ್ಕನುಂಡ ಆ ಲಕ್ಷದ ನಲಪೈ ನಾಲ್ಗು ಸಾವಿರ ಜನಲೇ ಇಸ್ಪೆಟ್ಟಿ ಬೇರೇ ಯೋಳು ಆ ಹಾಡ್ನಿ ಕಲಿಸ್ಸೇಕಿ ಅಯ್ಯೇಲೆದು . ⁴ ಸ್ತ್ರೀ ಸಹವಾಸಮ್ನಿಚ್ಚ ಮಲಿನಮ್ ಕಾನ್ದನೆ ವುಂಡೋಳ್ ವೂಳೆ ; ವೂಳು ಕನ್ಯೆ ರೀತಿ ನಿಷ್ಕಂಳಕುಲು ; ಯಜ್ಞಾಕುರಿಯಾದಾತುಡು ಯಂಕೆ ಪಾತ್ನೂ ವೂಳು ಆತನ ಯಂಕ ಪಾತರೂ . ವೂಳು ಮನುಷ್ಯಲೋಗನಿಚ್ಚ ಸ್ವಕೀಯ ಜನಲೈಯ್ಯಿ ಕೊಡ್ಕನೀ ಇಚ್ಕನುಂಡ ದೆವುಡ್ಕೂ ಯಜ್ಞಕುರಿಯಾತಾಡ್ಕು ಮೊದಲ್ನೇ ಫಲಮ್ ರೀತಿ ಐಲ್ಲಿ . ⁵ ದೀನ್ ನೋಟ್ಲಾ ಸುಳ್ಳು ಸಿಕ್ಲೇದು ; ವೂಳು ನಿರ್ದೊಷಿಲ್ ಐನ್ನಾರು . ⁶ ಇಂಕ್ಕೋಕ ದೇವದೂತುಡು ಆಕಾಶ ಮಧ್ಯಮ್ಲಾ ಹಾರಿ ಪಯ್ಯೆದಾನ್ನಿ ಸೂಸ್ತಿ . ಭೂನಿವಾಸಿಲ್ ಅಯ್ಯುಂಡ ಸಕಲ ಜನಾಂಗ ಕುಲ ಪ್ರಜೆಲ್ಕಿ ಸಕಲ ಭಾಷೆನ್ನಿ ಆಡೋಳ್ಕಿ ಸಾರಿ ಸೋಪ್ಪೆಕಿ ನಿತ್ಯಮೈನಾ ಶುಭವರ್ತಮಾನಮು ವಾಡ್ಲಾ ವುಂಡೆ . ⁷ ವಾಡು - ಮೀ ಅಂದ್ರೂ ದೇವುಡ್ಕಿ ಭಯಮ್ಪಡಿ ಆತುಡ್ನಿ ಘನಪಡಿಚಂಡಿ . ಆತುಡು ನ್ಯಾಯತೀರ್ಪು ಸೇಸ್ಸೇ ಗಳಿಗೆ ವಚ್ಚಿಂದಿ . ಭೂಲೋಕ ಪರಲೋಕನ್ನಿ ಸಮುದ್ರನ್ನಿ ನೂಳ್ ಬುಗ್ಗೆಲ್ನಿ ಉಂಟು ಸೇಸ್ನಾಟ್ಟ ಆತುಡ್ಕಿ ನಮಸ್ಕಾರಮ್ ಸೇಯಂಡ್ರಿ ಅನಿ ಮಹಾ ಶಬ್ದಮ್ನಿಚ್ಚ ಸೋಪ್ಪೆ . ⁸ ವಾಡ್ ಹೇಂಕ ರೊಂಡನೆ ದೇವದೂತುಡು ವಚ್ಚಿ - ಪೊಡೆ ಪೊಡೆ ಬಾಬೆಲ್ ಅನೆ ಮಹಾ ನಗರಮೂ ಪೊಡೆ . ಆಕೆ ಸಕಲ ಜನಾ೦ಗಲ್ಕಿ ತನ್ ಅತಿ ಜಾರತ್ವ ಅನೆ ದ್ರಾಕ್ಷರಸಮ್ನಿ ತಗ್ಬಿಚ್ಚೆ . ಅನಿ ಸೋಪ್ಪೆ . ⁹ ವಾಡ್ ಹೇಂಕ ಮೂಡ್ನೆ ದೇವದೂತುಡು ವಚ್ಚಿ - ಯೋವಡ್ ಐತ್ನೂ ಮೊದಲ್ನೇ ಮೃಗಂಕಿ ದಾನ್ ವಿಗ್ರಹ೦ಕ್ಕಿ ನಮಸ್ಕಾರಮ್ ಸೇಸ್ಸಿ ತನ್ ಹಣೆಮಿಂದ ಕಾನಿ , ಸೈ ಮಿಂದ ಕಾನಿ ಗುರುತು ಹೇಬಿಚ್ಕಂಟೆ , ¹⁰ ವಾಡು ಸಹ ದೇವುಡ ಕೊಪಮ್ ಅನೆ ಪಾತ್ರೆಲ್ಲಾ ಹೇಮಿ ಬೇರೆಬಿಸ್ದನೆ ಹೇಸ್ನಾಟ್ಟ ದೇವುಡ ರೌದ್ರಮ್ ಅನೆ ದ್ರಾಕ್ಷರಸಮ್ನಿ ತಾಗ್ತಾಡು ; ಪರಿಶುದ್ದ ದೇವದೂತುಲ್ ಮುಂದ್ರನೂ ಯಜ್ಞದಕುರಿಯಾದಾತುಡ ಮುಂದ್ರ ಅಗ್ಗಿಯಿ೦ಚನೂ ಗಂಧಕಮ್ನಿಚ್ಚನೂ ಯಾತನೆ ಪಡ್ತಾಡು . ¹¹ ಅಟ್ಟೋಳ ಯಾತನೆ ಪಗ ಯುಗಯುಗಾ೦ತರಮ್ಲಾನು ಏರ್ತಾ ಪತಾದಿ . ಮೃಗಂಕಿ ಮಲ್ಲಿ ಆ ವಿಗ್ರಹಂಕಿ ನಮಸ್ಕಾರಮ್ ಸೇಸ್ಸೋಳು ದಾನ್ ಪೆರ್ನಿ ಸೂಬಿಚ್ಚೆ ಗುರುತ್ನಿ ಹೇಬಿಚ್ನೊಂಟ್ಟ ಅಂದ್ರೂ ಹಗಲಿರುಳು ಉಪಶಮನಮ್ ಲೇನ್ದನೆ ಯಾತನೆ ಪಡ್ತಾರು . ಅನಿ ಮಹಾ ಶಬ್ದಮ್ನಿಚ್ಚ ಸೋಪ್ಪೆ . ¹² ದಿಂಟ್ಲಾ ದೇವುಡ ಆಜ್ಞೆಲ್ನಿ ಯೇಸುಮಿಂದ ಮೇಲಣ ನಂಬಿಕೆನೀ ಕೈಗೊನ್ನೀ ನಡುಸ್ತಾವುಂಡ ದೇವಜನಲಾ ತಾಳ್ಮೆ ತೋರಿ ವಸ್ತಾದೀ . ¹³ ಪರಲೋಕಮ್ನಿಚ್ಚ ಒಕ್ಕ ಶಬ್ದಮ್ ಇನ್ಬಡಿಚ್ಚೆ ಅದಿ ಇಪ್ಪುಡ್ನಿಚ್ಚ ಕರ್ತುಡ ಭಕ್ತುಲ್ ಅಯ್ಯಿ ಸೇಚ್ಚೋಳು ಧನ್ಯುಲು ಅನಿ ರಾಯ್ಯಿ ಅನಿ ನಾಕಿ ಇನ್ಬಡಿಚ್ಚೆ . ದಾನ್ಕಿ ಆತ್ಮುಡು - ಹೌನು ವಾಳು ಧನ್ಯುಲೇ ; ವಾಳ್ ಕಷ್ಟಮೂ ತೀರೇ , ವಾಳ್ಕಿ ವಿಶ್ರಾಂತಿ ಅಯ್ತಾದೀ . ವಾಳ್ ಸುಕೃತ್ಯಲು ವಾಳ್ ಜೊತ್ಲಾ ವಸ್ತಾವೀ ಅನಿ ಸೋಪ್ತಾಡು . ¹⁴ ನಾನು ಸುಸ್ನಾಪ್ಡು ಇಗೋ ಪ್ರಕಾಶಮೈನಟ್ಟ ಒಕ್ಕ ಮೇಘಮೂ ಕಮಡಿಚ್ಚೆ . ಆ ಮೇಘ ಮಿಂದ ಮನುಷ್ಯ ಕುಮಾರ್ಲಕ ವು೦ಡ್ನಾಟ್ಟ ಒಕ್ಡು ಕುಚ್ಚವುಂಡದಾನ್ನಿ ಸೂಸ್ತಿ . ಆತುಡ ತಲಕೈ ಮಿಂದ ಚಿನ್ನಮ್ದಿ ಕೀರಿಟಮ್ನಿ ಆತುಡ ಸೈಲಾ ಹದಮೈನಾ ಕುಡುಗೋಲು ವುಂಡೆ . ¹⁵ ಅಪ್ಡು ಇಕ್ಕೋಕ ದೇವದೂತುಡು ದೇವಾಲಯಮ್ ಲೋಗನಿಚ್ಚ ವಚ್ಚಿ ಮೇಘಮಿಂದ ಕುಚ್ಚನು೦ಡಟ್ಟ ಆತುಡ್ಕಿ - ಭೂಮಿಯ ಪೈರು ಮಾಗಿ ಹೆಂಡ್ ಪೈಯಿಂದಿ ; ಕೊಸ್ಸೇ ಕಾಲಮು ವಚ್ಚೆ . ನೀ ಕುಡುಗೊಲ್ನಿ ಹೆಸ್ಸಿ ಕೊಯ್ಯಿ ಅನಿ ಮಹಾ ಶಬ್ದಮ್ನಿಚ್ಚ ಕೂಸ್ಸೇ . ¹⁶ ಮೇಘಮಿಂದ ಕುಚ್ಚನು೦ಡಟ್ಟ ಆತುಡು ತನ್ ಕುಡುಗೊಲ್ನಿ ಹೆಸ್ಸಿ ಭೂಮಿ ಪೈರ್ನಿ ಕೊಸ್ಸೇ . ಭೂಮಿ ಪೈರೂ ಕೊಸಲ್ ಪಟ್ಟೆ . ¹⁷ ಇಕ್ಕೋಕ ದೇವದೂತುಡು ಪರಲೋಕಮ್ಲಾ ವುಂಡ ದೇವಾಲಯಮ್ ಲೋಗನಿಚ್ಚ ವಚ್ಚೆ . ವಾಡ್ ಜೋತ್ಲನೂ ಹದಮೈನಾ ಕುಡುಗೋಲು ವುಂಡೆ . ¹⁸ ತರುವಾಯಮು ಅಗ್ಗಿ ಅಧಿಕಾರಿ ಐನಾ ಇಕ್ಕೋಕ ದೇವದೂತುಡು ಯಜ್ಞವೇದಿಯಿಂಚ್ಚ ವಚ್ಚಿ ಆ ಹದಮೈನಾ ಕುಡುಗೊಲ್ನೋಡ್ಕಿ - ನೀ ಹದಮೈನಾ ಕುಡುಗೊಲ್ನಿ ಹೇಸ್ಸಿ ಭೂಮಿ ದ್ರಾಕ್ಷೆಗೊಂಚುಲ್ನಿ ಕೊಯ್ಯಿ ; ದಾನ್ ಪೋಡ್ಲು ಪೂರಾ ಮಾಗ್ನಾವೀ ಅನಿ ಮಹಾ ಶಬ್ದಮ್ನಿಚ್ಚ ಕೂಸ್ಸೇ . ¹⁹ ಅಪ್ಡು ಆ ದೂತುಡು ತನ್ ಕುಡುಗೊಲ್ನಿ ಭೂಮಿಕೀ ಹೇಸ್ಸಿ ಭೂಮಿ ದ್ರಾಕ್ಷೆ ಬಳ್ಳಿ ಪೋಡ್ನಿ ಕೊಸ್ಸಿ ದೇವುಡ ರೌದ್ರಮ್ ಅನೆ ಪೆದ್ದ ತೊಟ್ಟಿಲಾ ಹೇಸ್ಸಿ . ²⁰ ದಾನ್ನಿ ಪಟ್ಟಣ ಆತರ್ಲ ಆ ತೊಟ್ಟಿಲಾ ತೊಕ್ಲಿ . ಆ ತೊತ್ತಿಲೋಗನಿಚ್ಚ ರಕ್ತಮೂ ಶುರು ಅಯ್ಯಿ ಕುದುರೆಲಾ ಕಡಿವಾಣನ್ನಿ ಮುಟ್ಟೆ ರೀತಿ ಆಳಮೈಯ್ಯಿ ಇನ್ನೂರು ಮೈಲಿ ದೂರಮ್ ಅರ್ಸೆ .