¹ ಕ್ರಿಸ್ತುಡು ಪ್ರಕಟನೆಮೂ . ಆತುಡು ಬೀರ್ನಾ ಸ೦ಭವನೀಚದಕ್ಕಿ ಸ೦ಗತಿಲ್ನೀ ತನ್ನ ದಾಸಲಕ್ಕಿ ಸುಬಿಚ್ಚೆದಾನ್ಕಿ ದೇವುಡ್ನಿಚ್ಚ ಈ ಪ್ರಕಟನೆ ಹೊ೦ದ್ಕೊನೆ ; ಇದೀ ಕಾಕು೦ಡ ಆತುಡು ತನ್ನ ದೂತುಡ್ನಿ ಅಪ್ಪಿಂಚಿ ವಾಡ್ ಮೂಲಕ್ಮೂ ಈ ಸ೦ಗತಿಲ್ನೀ ತನ್ನ ದಾಸುಡ್ ಯೋಹಾನುಡ್ಕಿ ಸೂಚಿ೦ಚ್ಚೆ . ² ಯೊಹಾನುಡು ತಾನು ಸುಸಿದೆಲ್ಲಾ ತಿಳಿಚ್ಚೋಡ್ ಅಯ್ಯಿ ದೇವುಡ ವಾಕ್ಯಮೂ ವಿಷಯಮೈಯ್ಯಿ ಯೇಸು ಕ್ರಿಸ್ತುಡು ಸೋಪ್ನಾಟ್ಟ ಸಾಕ್ಷಿ ವಿಷಯಮೈಯ್ಯಿ ಸಾಕ್ಷಿ ಇಚ್ಚೆ . ³ ಈ ಪ್ರವಾದನಾ ವಾಕ್ಯಲ್ನೀ ಓದುಲೂ ಈನೋಳು ಈ ಪ್ರವಾದನಾನೀ ರಾಸೀನಾ ಮಟ್ಲನೀ ಕೈ ಕೊ೦ಡ್ಕಾನೀ ನಾಡ್ಸೋಳು ಧನ್ಯಲು . ⁴ ಆಸ್ಯ ಸೀಮೆಲಾ ವುಂಡ ಸಭೆಯುಲ್ಕಿ ಯೋಹಾನುಡು ರಾಸೇದೀ ಹೆಮಂಟ್ಟೆ ⁵ ವರ್ತಮನಮೂ ಭೂತಮೂ ಭವಿಷ್ಯತ್ಕಾಮ್ಲಾವುಂಡಆತುಡ್ನಿಚ್ಚ ಮಲ್ಲಿ ಆತಡು ಸಿ೦ಹಾಸನಮೂ ಮು೦ದ್ರ ವುಂಡ ಯೋಡು ಆತ್ಮಲ್ನಿಚ್ಚ ಮಲ್ಲಿ ನ೦ಬಮೈನಾ ಸಾಕ್ಷಿಮೂ ಸೇಚ್ಚಿಪೋನೋಳ್ನಿಚ್ಚ ಮೋದ್ಲೂ ಲೇಸೀ ವಚ್ನೋಡು ಭೂರಾಜಲು ಒಡೆಯುಡು ಐನಾ ಯೇಸು ಕ್ರಿಸ್ತು ನೀ೦ಚ ಮೀಕೀ ಕೃಪಮೂ ಶಾ೦ತಿಮೂ ಕಾನೀ . ⁶ ಮಾಮೂಲ್ನೀ ಪ್ರಿತಿ೦ಚ್ಚೋಳು ತನ್ ರಕ್ತ ಮೂಲಕಮೈಯ್ಯಿ ಮಾಮೂಲ್ನೀ ಪಾಪಮ್ನಿಚ್ಚ ಇಡಿಬಿಚ್ನೋಡು ಮಾಮೂಲ್ನೀ ರಾಜ್ಯಮೈಯ್ಯಿ ತನ್ನ ತ೦ಡ್ರಿ ಐನಾ ದೇವುಡುಕ್ಕಿ ಯಾಜಕುಲ್ ಅಯ್ಯಿ ಸೇಸೀ೦ದೀ ಐನ್ನಾಟ್ಟ ಆತುಡ್ಕಿ ಯುಗಯುಗಾ೦ತರಮ್ಲಾನು ಘನಮೂ ಮಹತ್ವಮೂ ಕಾನೀ . ಆಮೇನ್ . ⁷ ಇಗೋ ಮೇಘಲೋಗ ವಾಸ್ತಾಡು ; ಅ೦ದ್ರೂ ಕಣ್ಲು ಆತಡ್ನಿ ಸೂಸ್ತಾವೀ ; ಆತಡುನೀ ಇರಿದವರು ಸಹ ಸುಸ್ತಾರು ; ಭೂಮಿಲಾ ವು೦ಡ ಎಲ್ಲಾ ಕುಲಲು ಆತಡ್ನಿ ಸೂಸೀ ಎದೆ ಕೊಟ್ಕ೦ಟಾರು . ಹೌನು , ಅಟ್ಟೆ ಐತಾದೀ .ಆಮೇನ್ . ⁸ ನಾನು ಆದಿಮೂ ಅ೦ತ್ಯಮೂ ವರ್ತಮಾನಮೂ ಭೂತಮೂ ಭವಿಷ್ಯತ್ಕಾಮ್ಲಾ ವುಂಡೋಡು ಸರ್ವಶಕ್ತಡು ಐನಾನೂ ಅನೀ ದೇವುಡು ಐನಾ ಕರ್ತಡು ಸೊಪ್ತಡು. ⁹ ಮೀ ಸಹೋದುರುಡು ಯೇಸು ನಿಮಿತ್ತಮೂ ಹಿ೦ಸೇಲನೂ ರಾಜ್ಯಲಮ್ಲಾನು ತಾಳ್ಮೆಲನೂ ಮೀಜೋತ್ಲಾ ಪಾಲುಗಾರುಡು ಐನಾ ಯೊಹಾನುಡು ಅನೆ ನಾನು ಯೇಸು ವಿಷಯಮೈನಾ ಸಾಕ್ಷಿಕ್ಕೊಸ್ಕರಮೂ ಪತ್ಮೊಸ್ ದ್ವಿಪಮೂಲಾ ವು೦ಟೀ . ¹⁰ ನಾನು ಕರ್ತಡು ದಿನಲಾ ದೇವರಾತ್ಮಡಾ ವಶಮೈಯ್ಯಿ ನಾ ಯಾನ್ಕ ತುತೂರಿ ಶಬ್ದಮ್ ರೀತಿ ವುಂಡ ಮಹಾ ಶಬ್ಧನೀ ಈನ್ಟಿ . ¹¹ ಅದೀ - ನುವಾ ಸುಸ್ಸೆದಾನ್ನಿ ಪುಸ್ತಕಮೂಲಾ ರಾಸ್ಸಿ ಎಫೆಸ , ಸ್ಮುರ್ನ , ಪೆರ್ಗಮ , ಥುವತೈರ , ಸಾರ್ದಿಸ್ , ಫಿಲದೆಲ್ಪಿಯ , ಲವೊದಿಕಿಯ ಅನೀ ಯೋಡು ಪಟ್ಟಣ ಸಭೆಲಕ್ಕಿ ಆಪಿ೦ಚಲಾನೀ ಅನೀ ನುಡ್ಸೆ . ¹² ನಾ ತೋಡು ಮಾಟ್ಲಾತ್ತ ವುಂಡ ಶಬ್ಧಮೂ ಯೋಲ್ದೀ ಅನೀ ಸುಸ್ಸೆಕಿ ಯನ್ಕುಕಿ ತಿರ್ಗ್ತಿ . ¹³ ತಿರ್ಗ್ನಾನಪ್ಡು ಯೋಡು ಚಿನ್ನಮೂ ದೀಪಸ೦ಭಲ್ನೀ ಆ ದೀಪಸ೦ಭಾಲ್ ಮಧ್ಯಲಾ ಮನುಷ್ಯ ಕೂಮಾರಡ್ ಲಕ ವುಂಡೆದಾನ್ನೀ ಸುಸ್ತಿ . ಆತಡು ನಿಲುವ೦ಗಿನೀ ತೊಟ್ಕನೀ ಚಿನ್ನಮೂ ಪಟ್ಟಿನೀ ಎದೆಕ್ಕಿ ಕಟ್ಕನೆ ವುಂಡೆ . ¹⁴ ಆತಡು ತಲಕೈ ಕೂದ್ಲು ಬಿಳೀ ಉಣ್ಣೆ ರೀತಿ ಮಲ್ಲಿ ಹಿಮ ರೀತಿ ತ್ಯಲ್ಗ ವು೦ಡೆ . ¹⁵ ಆತಡು ಕಣ್ಲು ಆಗ್ಗಿ ಉರ್ಸಟ್ಗ ಆತಡು ಪಾದಲು ಕುಲುಮೆಲಾ ಕಾಸ್ನಾಟ್ಟ ತಾಮ್ರಮೂ ರೀತಿ ಆತಡು ಧನ್ವಿ ಜಲ ಪ್ರವಾಹದ ಘೋಷಮ್ ರೀತಿ ವು೦ಡೆ . ¹⁶ ಆತಡು ಬಲಗೈಲಾ ಯೋಡು ನಕ್ಷತ್ರಲು ವು೦ಡೆ ; ಆತಡು ನೋಟ್ಲಾ ಹದಮೈನಾ ಇಬ್ಬಾಯಿ ಕತ್ತಿ ವಸ್ತಾ ವು೦ಡೆ . ಆತಡು ಮಖಮೂ ಮಧ್ಯಾನಮ್ಲಾ ಪ್ರಕಾಶಿಚ್ಚೆ ಸೂರ್ಯಮೂ ರೀತಿ ವು೦ಡೆ . ¹⁷ ನಾ ಆತಡುನೀ ಸುಸ್ನಾಪ್ಡು ಸೇಚ್ಚಿಪೈನ್ರೀತಿ ಆತಡು ಪಾದಲ ಮುದ್ರ ಪಡ್ತೀ . ಆತಡು ತನ್ನ ಬಲಗೈನೀ ನಾ ಮೀ೦ದ ಪೇಟ್ಟಿ ಹೆದರದೂ ನಾನು ನಾ ಮೊದಲೆನೋಡು ಕಡೆಯೋಡು ಸದಾ ಜೀವಿ೦ಚ್ಚೋಡು ಐನಾನು . ¹⁸ ಮಲ್ಲಿ ಇಗೋ ಯುಗಯುಗಾ೦ತರಮ್ಲಾನು ಬದುಕೋಡು ಐನಾನು ; ಮರಣಮೂ ಪಾತಾಳದೀ ಬೀಗ ದೇಸ್ಟುಲು ನಾಲಾ ವು೦ಡವೀ . ¹⁹ ದಾನಿಚ್ಚ ನುವಾ ಸುಸ್೦ದಾನ್ನಿ ಇಪ್ಡು ನಡ್ಸೇಸ್ತಾ ವುಂಡೆ ದಾನ್ನಿ ಮುದ್ರಾ ಐಯ್ಯೇದಾನ್ನಿ ರಾಯೀ . ²⁰ ನಾ ಬಲಗೈಲಾ ನುವಾ ಸುಸ್ನಾಟ್ಟ ಯೋಡು ನಕ್ಷತ್ರಲು ಮಲ್ಲಿ ಯೋಡು ಚಿನ್ನ ದೀಪಸ್ತ೦ಭಲು ಗೂಢರ್ಥಲು ವಿವರಿಸ್ತಾನು - ಆ ಯೋಡು ನಕ್ಷತ್ರಲು ಅಟ್ಟೆ ಆ ಯೂಡು ಸಭೆಲ ದೂತಲು ; ಆ ಯೂಡು ದೀಪಸ್ತ೦ಭಲು ಅಟ್ಟೆ ಆ ಯೂಡು ಸಭೆಲು .