¹ ಒಗಾನೋಕ್ಕಟ್ಟಿ ದಿನುಂ ಜನಲು ಒತ್ತಂಗ ವಚ್ಚಿ ಆತುಡ್ ಪೈನಾ ಪೋಡ್ಗಾನೀ ದೇವುಡ ವಾಕ್ಯಾಮ್ನಿ ಇಂಟಉಂಡಾಗ ² ಸೇರ್ವ್ ಅಂಚ್ಲಾ ನಿಲ್ಚಿನ ಆತುಡು ಆ ಸೇರ್ವ್ ದಡಲಾ ರೊಂಡು ದೊಣಿಲ್ನಿ ಸೂಸ್ನಾಡು.ಬೆಸ್ತುಲು ಅವಟ್ಲಾಜೊತ್ಲಾ ಇತರ್ಗಿ ವಚ್ಚಿ ವಾಳ್ ಬಲೆಲ್ನಿ ಕಡ್ಗತಾಉಂಡ್ರಿ. ³ ಆ ದೋಣಿಲಾ ಸೀಮೊನುಡ ಒಕ್ಕ ದೋಣಿನಿ ಎಕ್ಕಿ ದಡಂನಿಂಕ ಕ್ವಂಚಂ ದೂರಂ ನೂಕಲಾ ಅನಿ ವಾಡ್ನಿ ಅಡ್ಗಕoಟಾಡು.ತರುವಾಯಂ ಆತುಡು ಕುಚ್ಗಾನಿ ದೋಣಿಲೋಗನಿಂಕಾನೆ ಆ ಜನಾಲ್ ಗುಂಪ್ಗಿ ಉಪದೇಶಂ ಸೇಸ್ನಾಡು. ⁴ ಮಾಟಡದಾನ್ನಿ ಮುಗ್ಬಿಚ್ಚಿನ್ ಪೈನಾ ಸೀಮೋನುಡ್ಗಿ-ಆಳ ಮೈನ ಸ್ಥಳಾನ್ಗಿ ದೋಣಿನಿ ನಡ್ಪಿ ಸ್ಯಾಪ್ಲ್ ಬೇಟೆಗೈ ಮೀ ವಲಾಲ್ನಿ ಯೆಯಂಡಿ ಅನಿ ಸೋಪ್ನಾಡು. ⁵ ಅಂದ್ಗೆ ಸೀಮೋನುಡು-ಗುರುವೇ ಮಾಮು ರಾತ್ರಂತ ಪ್ರಯಾಸಂಪಡ್ನು ಏಮಿ ಸಿಕ್ಲೇದು;ಆಯ್ನಾ ನೀ ಮಾಟ್ ಪೈನಾ ವಲಾಲ್ನಿ ಎಸ್ತಾನು ಅಂಟಡು. ⁶ ಎಸಿನ್ ಪೈನಾ ಸ್ಯಾಪ್ಲು ರಾಶಿರಾಶಿ ಸಿಕ್ಕಗನಿ ವಾಳ್ ವಲಾಲು ಚಿಂಚಿಪಾಯ. ⁷ ವಾಳು ಮಲಿಒಕ್ಕಟಿ ದೋಣಿಲಉಂಡ ವಾಳ ಪಾಲುಗಾರಲ್ಗಿ --ಮೀಳು ವಚ್ಚಿ ಮಾಕಿ ನೆರಾವ್ಕಾವಲನಿ ಸನ್ನೆ ಸೇಸ್ನಾಳು.ವಾಳು ವಚ್ಚಿ ಆ ರೊಂಡು ದೋಣಿಲಾ ಸ್ಯಾಪಲ್ನಿ ನಿಮ್ಪಿಚ್ಚ ಅವಿ ಮುಲ್ಗ್ನಟ್ ಆಯಾ. ⁸ ಸೀಮೋನ್ ಪೆತ್ರುಡು ದೀನ್ನಿ ಸೂಸಿ ಯೇಸು ಮೊಣಕಾಳ್ಗಿ ಪೊಡಿ -ಸ್ವಾಮಿ ,ನೀನು ಪಾಪಾತ್ಮುಡು ;ನನ್ನಿ ಉಡ್ಸಿ ಪೋವ್ವಾಲ ಅನಿ ಅನ್ನಾಡು. ⁹ ಎಂದ್ಗoಟೆ ವಾಡ್ಗಿ ವಾಡ ಜೊತ್ಲಾ ಉನ್ನವಾಲ್ಗು ವಾಳು ಪೊಟ್ಟಿನ ಸ್ಯಾಪ್ಲ ನಿಮಿತ್ತಂ ವಿಸ್ಮಯಂ ಪೊಟ್ಟಿoದಿ; ¹⁰ ಪಾಳುಗಾರ್ಲಾಯಿಉಣ್ನಂತ ಜೆಬೇದಾಯಡ ಬಿಡ್ಲೈನಾ ಯಾಕೋಬ ಯೋಹಾನುಲು ಅಟ್ಲೇ ವಿಸ್ಮಯಂ ಪಟ್ರಿ.ಯೇಸು ಸೀಮೊನುಡ್ಗಿ-ದಡ್ಸ್ಗಾವದ್ದು,ಇಪ್ಪಡ್ನಿಂಕ ನುವ್ವ ಮನುಷ್ಯಲ್ನಿ ಪೊಟ್ಟವಾಡೈತ್ವೀ ಅನಿ ಸೋಪ್ನಾಡು. ¹¹ ವಾಳು ವಾಳ ದೋಣಿಲ್ನಿ ದಡಂನ್ಗಿ ತಿಸ್ಗಾನಿ ಅಂತದಾನಿ ಉಡ್ಸಿ ಆತುಡ್ನಿ ಇಂಬಾಲಿಚ್ಚಾಳು. ¹² ಒಕ್ಕನೋಕ್ಕಟ್ಟಿ ಊರ್ಲಾಉನ್ನಪಡು ಪೈಯಂತ ಕುಷ್ಟರೋಗಂ ನಿಂಡಿನ ಒಕ್ಕ ಮನುಷ್ಯಡು ಯೇಸುನಿ ಸೂಸಿ ಆಡoಪೊಡಿ -ಸ್ವಾಮಿ, ನೀಕಿ ಮನ್ಸುಂಟೆ ನನ್ನಿ ಶುದ್ದಂ ಸೇಸ್ತಾವ ಅನಿ ಬೇಡ್ಗಂನ್ನಾಡು. ¹³ ಆತುಡು ಸೈನೀಡಿ ನಾಕಿ ಮನ್ಸುಂದ್ದಿ; ಶುದ್ದಂಕಾ ಅಂಟಾಡು.ಕೂಡಲೇ ವಾಡ ಕುಷ್ಟoಪಾಯ. ¹⁴ ಅಪ್ಡು ಆತುಡು ವಾಡ್ಗಿ -ನುವ್ವ ಯವ್ವಲ್ಗು ಸೋಪ್ಪದ್ದು;ಆಯ್ನಾ ಪೈಯಿ ಯಾಜಕುಡ್ಗಿ ನೀ ಪೈ ಸೂಪಿ ಮೊಶೆಯು ನೇಮಕಂ ಸೇಸಿನ್ದಾನ್ನಿ ಅರ್ಪಿಚ್ಚಿ ನೀ ಶುದ್ದಾಚಾರಂನಿ ನೆರವೆರಿಚ್ಚು , ಅದಿ ಜನಲ್ಗಿ ಸಾಕ್ಷಿಕಾನಿ ಅನಿ ಅಪ್ಪಣಂಇಚ್ಚಾಡು. ¹⁵ ಆತುಡ ಸುದ್ದಿ ಇoಕoತ ಹಬ್ಬಿಂದಿ; ಮಲಿ ಜನಲು ಆತುಡ ಉಪದೆಶಮ್ನಿ ಇನದಾನ್ಗಿ ವಲ್ವಾಳ ಜಾಡ್ಯಾಲ್ನಿ ವಾಸಿ ಸೇಸದಾಂನ್ಗೂ ಗುಂಪುಗುಂಪೈ ನೆರ್ಸ್ನಾಳು. ¹⁶ ಆತುಡೈನ ಅರಣ್ಯಪ್ರದೇಶಾಲ್ಗಿ ಪೈಯಿ ದೇವುಡ ಪ್ರಾರ್ಥನಾನ್ನಿ ಸೇಸ್ತಾಉಂಟಾಡು. ¹⁷ ಒಕ್ಕಾನೋಕ್ಕಟಿ ದಿನಂಲಾ ಆತುಡು ಉಪದೇಶಂಸೇಸ್ತುಂಡಗ ಗಲಿಲಾಯ ಯೂದಾಯಂಲಾ ಅನ್ನಿ ಗ್ರಾಮಲ್ನಿಂಕಾನು ಯೆರುಸಲೆಮ್ನಿಕಾನು ವಚ್ಚುಂಡ ಫರಿಸಾಯಲು ನ್ಯಾಯಶಾಸ್ತ್ರಿಲು ಆತುಡ ದೇಗ್ಗರ ಕುಚ್ಗಾನುoಡ್ರಿ.ಗುಣoಸೇಸೆದಾನ್ಗಿ ಕರ್ತುಡ ಶಕ್ತಿ ವಾಡ್ಲಾಉಂಡ್ಯ. ¹⁸ ಇಟ್ಳುನ್ಡಾಗ ಕೆಲವು ಮಂದಿ ಮೊಗವಾಳು ಒಕ್ಕ ಪಾರ್ಶ್ವವಾಯು ರೋಗಂವಾಡ್ನಿ ದೋಲಿಲಾ ಎತ್ಗಾನಿ ವಚ್ಚಾರು;ಆಯ್ನಾ ವಡ್ನೀ ಲೋಕಿ ತಿಸ್ಕೊನಿ ಪಾಯಿ ಆತುಡ ಮುಂದ್ರ ¹⁹ ಪೆಟ್ಟಲಅನಿ ಪ್ರಯತ್ನಂಸೇಸಾರು ಜನಲು ಗುಂಪಂಗಉನ್ನದಾಂನ್ಗೂ ವಾಡ್ನಿ ಲೋಗಕಿ ತಿಸ್ಕೊನಿಪಯ್ಯಜಾಗ್ಲಾ ಸೂಡ್ಗುನ್ನ ಇಂಟ್ ಪೈನಾ ಎಕ್ಕಿ ಪೆಂಚಲ್ನಿ ತಿಸಿ ವಾಡ್ನಿ ಹಾಸ್ಗಸಹಿತುಂ ನಡ್ಮು ಯೇಸುಮುಂದ್ರ ದಿಗಿಪೆಟ್ಟರು. ²⁰ ಆತುಡು ವಾಳ ನಂಬಿಕಾನ್ನಿ ಸೂಸಿ-ಅಬ್ಬಾ, ನೀ ಪಾಪಲು ಕ್ಷಮಸ್ನಾವಿ ಅನ್ನಾಡು. ²¹ ಆ ಶಾಸ್ತ್ರಿಲು ಫರಿಸಾಯರಲು-ದೇವದೂಷಣಂ ಮಾಟ್ನಆಡ್ನಾ ಊಡು ಎಂತ್ಮೂಡು?ಪಾಪಲ್ನಿ ಕ್ಷಂಸಿಚ್ಚಾದಿ ದೇವುಡಒಕ್ಕಡ್ನಿಂಕ ಹೊರ್ತು ಮತ್ತೆಯವ್ವಳಿಂಕ ಅಯ್ತಾದಿ ಅನ್ಗಂಟಉಂಡ್ರಿ. ²² ಆಯ್ನಾ ವಾಳು ಅಟ್ಲಅನ್ಕನ್ನದಾನ್ನಿ ಯೇಸು ತಿಲ್ಚಿಗಾನಿ ವಾಳ್ಗಿ-ಮೀಳು ಮೀ ಮಂಸ್ಲಾ ಅನ್ಗನ್ನದೇಮಿ? ²³ ಸುಲ್ಬ?ನೀ ಪಾಪಲು ಕ್ಷಂಬಿಚ್ಚ್ನಾವಿ ಅನ್ನದೇ ?ಲೇಸಿ ನಡಿ ಅನ್ನದೇ? ²⁴ ಪಾಪಲ್ನಿ ಕ್ಷಂಸಿಉಡ್ಸದಾನ್ಗಿ ಮನಿಷ್ಯ ಕುಮಾರುಡ್ಗಿ ಭೂಲೋಕಂಲಾ ಅಧಿಕಾರಂಉಂದ್ಅನಿ ಮೀಕಿ ತಿಲಾಲ ಅನಿ ಸೊಪ್ಪಿ ಆ ಪಾರ್ಶ್ವವಾಯು ರೋಗಮ್ನಿ ಸೂಸಿ -ಲೇಸಿ ನೀ ಹಾಸ್ಗನ್ನಿ ಎತ್ಗಗನಿ ಇಂಟ್ಗಿ ಪೋಅನಿ ನೀಕಿ ಸೋಪ್ತಾನು ಅನ್ನಾಡು. ²⁵ ಅನ್ನ ಕೂಡ್ಮೆ ವಾಡು ವಾಳ ಮುಂದ್ರ ಲೇಸಿ ವಾಡು ಪೋನ್ಗನುಣ್ಣ ಹಾಸ್ಗನ್ನಿ ಎತ್ಗಾನಿ ದೆವುಡ್ನೀ ಕೊಂದಾಡ್ತಾ ಇಂಟ್ಗಿ ಪೈನಾಡು. ²⁶ ಸೂಸ್ನಾವಾಳoದ್ರು ಬೇರ್ಗೈ ದೆವುಡ್ನೀ ಕೊಂಡಾಡ್ನಾಳು;ಮಲಿ ವಾಳು ಭಯಂನಿಂಕ ನಿಂಡಿನವಾಲೈ -ಮಾಮು ಈ ಪದ್ದು ಅಪೂರ್ವ ಸಂಗತಿನಿ ಸೂಸ್ನಾಮು ಅನ್ನಾಳು. ²⁷ ಇದೈನಪೈನ ಆತುಡು ಎಲ್ಲಿ ಸುಂಕಾನ್ಗಿ ಕುಚ್ಗಾಉನ್ನ ಲೇವಿಅನ ಒಕ್ಕ ಸುಂಕಮೊಡ್ನೀ ಸೂಸಿ-ನನ್ನಿ ಹಿಂಬಾಲಿಚ್ಚು ಅನಿ ವಾಡ್ನಿ ಕೂಸ್ನಂದ್ಗು ²⁸ .ವಾಡು ಅಂತದಾನ್ನಿ ಉಡ್ಸಿ ಲೇಸಿ ಆತುಡ ಎನ್ಕ ಪೈಯ್ಯಡು. ²⁹ ತರುವಾತಂ ಲೇವಿಯು ತನ್ನಿಇಂಟ್ಲಾ ಆತುಡ್ಗಿ ಒಕ್ಕ ಪೆದ್ದ ಔತಣಂನ್ನಿ ಸೇಬಿಚ್ಚದಾನ್ಗು ಸುಂಕಮೊಳು ಇತರ್ಲು ಗುoಪಂಗ ಸೇರಿ ವಾಳ ಜೊತ್ಲಾ ಊಟನ್ಗಿ ಕುಚ್ಗನುಂಡ್ರಿ. ³⁰ ಸೂಸಿ ಫರಿಸಾಯರ್ಲು ವಾಳಉನ್ನ ಶಾಸ್ತ್ರಿಲು ಆತುಡ ಶಿಷ್ಯಲ್ ಪೈನ ಗುನ್ಗುಡ್ತಾ -ಮೀಳು ಸುಂಕಮೊಳ ಮಲಿ ಪಾಪಿಲ್ಲಾ ಜೊತ್ಲಾ ಊಟಂ ಸೇಸೆದೆನದ್ಗು ಅನಿ ಅದ್ಗನಾಳು. ³¹ ಅಂದ್ಗೆ ಯೇಸು -ಕ್ಷೇಮಂನಿಂಕಉನ್ನವಾಳ್ಗಿ ವೈದ್ಯಡು ಬೇಕ್ಲೆದು,ಕ್ಷೇಮಂ ಲೇಗುನ್ನವಾಳ್ಗಿ ಕವಾಲ; ³² ಕಡ್ಗಿ ತಿರಿಕ್ಕಂಡಿ ಅನಿ ನೀತಿವಂತಲ್ನಿ ಪಿಲ್ಚದಾನ್ಗಿ ನೀನು ವಚ್ಚಿನವಾಡುಕಾದು, ಪಾಪಿಲ್ನಿ ಪಿಲ್ಚದಾನ್ಗಿ ವಚ್ಚಿನವಾಡು ಅನಿ ವಾಳ್ಗಿ ಉತ್ತರಂಇಚ್ಚಾಡು. ³³ ವಾಳು ವಾಡ್ಗಿ -ಯೋಹಾನುಡ ಶಿಷ್ಯಲು ಪದೇಪದೇ ಉಪವಾಸಾಲ್ನಿ ವಿಜ್ಞಾಪಾಲ್ನಿ ಸೇಸ್ತಾ ಉಂಡಾಳು;ದಾನಂತೆ ಪರಿಸಾಯರ್ಲಾ ಶಿಷ್ಯಲು ಸೆಸ್ತಾಉoಡ್ರಿ;ಆಯ್ನಾ ನೀ ಶಿಷ್ಯಾಲು ಊಟoಸೇಸ್ತಾಳು. ³⁴ ಅನಿ ಸೋಪ್ಪಾಲು ಯೇಸುವಾಳ್ಗಿ ಮದಲಿoಗಡು ಪೆಂಡ್ಲಿಜನಲ ಜೊತ್ಲಾ ಉಂಡಾಗ ವಾಳ್ಗಿ ಉಪವಾಸಂಸೇಬಿಚ್ಚದಾನ್ಗಿ ಮಿಮ್ಮಿಲ್ನಿoಕ ಆಯನ್ದಾ? ³⁵ ಮದಲಿoಗಡ್ನೀ ವಾಳ ದೇಗ್ಗರ್ನಿಂಕ ತಿಸ್ಗನಿಪಯ್ಯ ಕಾಲಂವಸ್ತಾದಿ.ಆ ಕಾಲಂಲ ಉಪವಾಸಂ ಸೇಸವಾಳು ಅನಿ ಉತ್ತರಂ ಇಚ್ಚಾಡು. ³⁶ ವಾಳ್ಗಿ ಒಕ್ಕ ಸಾಮ್ಯನ್ನಿ ಸಹ ಸೋಪ್ನಾಡು,ಅದೇಮಂಟೆ ಯವ್ವಳು ಕೊತ್ತ ವಸ್ತ್ರoನಿಂಕ ಒಕ್ಕ ತುಂಡ್ನೀ ಚಿ ಚಗನಿ ಪಾತ್ ವಸ್ತ್ರಾನ್ಗಿ ತ್ಯಾಪೆನ್ನಿ ಹಚ್ಚೆಲೇದು ;ಎಸ್ತೆ ಆ ಕೊತ್ತದಾನ್ನಿ ಚಿ ಚಿ ಸೇಡ್ಪಾನಟ್ಲ ಅಯ್ಯಲೇ ಕೊತ್ತದಾನ್ನಿಂಕ ಚಿ ಚಿ ಏಸಿನ ತ್ಯಪೆಯು ಪಾತದಾನ್ಗಿ ಒಪ್ಪಲೇದು. ³⁷ ಪಾತ ಬಿದ್ದಲಿಲಾ ಕೊತ್ತ ದ್ರಾಕ್ಷಾರಸಂನೀ ಯವ್ವಳು ಏಸಿಪೆಟ್ಟೆಲೇದು; ಪೆಟ್ತೆ ಆ ದ್ರಾಕ್ಷಾರಸಂ ಬುದ್ದಲಿಲ್ನಿ ಕೊಟ್ಟಿ ಆದಿ ಚೆಲ್ಲಿಪಯ್ಯದಿ ಕಾಕುನ್ನ ಬುದ್ದಲಿಲು ಸೇಡಿಪಾತವಿ. ³⁸ ಕೊತ್ತ ದ್ರಾಕ್ಷಾರಸಂಮನಿ ಕೊತ್ತ ಬುದ್ದಲಿಲಾ ಎಸ್ಪೆಟ್ಟೆದಿ. ³⁹ ಪಾತ ದ್ರಾಕ್ಷಾರಸಂನಿ ತಾಗ್ನಾವಾಡು ಕೊತ್ತದಿ ಕಾವಲ ಅನಲೇದು;ಪಾತದೆ ಉತ್ತಮಂ ಅಂಟಾಡು.