¹ ಸಭೆ ಪೆದ್ದೋಡು ತಾನು ಸತ್ಯುಮಾಯಿ ಪ್ರೀತಿಚ್ಚೆ ಪ್ರಿಯ ಗಾಯುಡ್ಕಿ ರಾಸೇದೆಮಂಟೆ - ² 2 ಪ್ರಿಯುಡಾ , ನುವ್ವ ಆತ್ಮುಮು ವಿಷಯುಮ್ಲ ಅಭಿವೃದ್ಧಿ ಹೊಂದುಂಡೆ ಪ್ರಕಾರ್ಮು ಅನ್ನಿ ವಿಷಯುಮ್ಲಾನು ಅಭಿವೃಧ್ಧಿ ಹೊಂದಿ ಕ್ಷೇಮಂಗ ವುಂಡಾಲನಿ ಪ್ರಾರ್ಥಿಸ್ತಾನು . ³ ಸಹೋದರುಲು ಅಪ್ಡಪ್ಡುಕಿ ನಾ ದೆಗ್ರುಕಿ ವಚ್ಚಿ ಸೊಪ್ಪೆನಪ್ಡು ನೀಲಾವುಂಡೆ ಸತ್ಯುಮ್ನಿ ಕುರಿಂಚಿ ತಿಲ್ಬಿಚ್ಚಿ ನುವ್ವ ಸತ್ಯುವಂತುಡಾಯಿ ನಡ್ಸೋಡು ಅನಿ ಸೊಪ್ಪೆನಪ್ಡು ನಾನು ಹೆಕ್ವ ಸಂತೋಷ್ಮು ಪಡ್ತಾನು . ⁴ ನಾ ಬಿಡ್ಳು ಸತ್ಯುಮ್ನಿ ಅನುಸರಿಚ್ಚಿ ನಡ್ಸೋಳಾಯಿನಾರು ಅನಿ ಅಡ್ಗೆದಾನ್ಕಿಂತ ಹೆಕ್ವಾಯಿನ ಸಂತೋಷ್ಮು ನಾಕ್ಲೇದು . ⁵ ಪ್ರಿಯುಡಾ , ಪರಿಚಯ್ಮುಲೇನೋಳಾಯ್ನ ಸಹೋದರ್ಲುಕು ನುವ್ವ ಸತ್ಕಾರ್ಮುನಿ ಸೇಸೆದಾಂಟ್ಲ ನಂಬೋಡ್ಕಿ ಯೋಗ್ಯುಡಾಯಿ ನಡ್ಸ್ತಾವು . ⁶ ಸಭೆ ಮುಂದ್ರ ನೀ ಪ್ರೀತೀಕಿ ಸಾಕ್ಷಿ ಸೊಪ್ರಿ . ವಾಳ್ನಿ ನುವ್ವ ದೇವುಡು ಸೇವಕುಲ್ಕಿ ಯೋಗ್ಯುಮೈನ ರೀತಿಯಿಂಚ ಅಂಪಿಸ್ತೆ ಬಾಗುಂಟಾದಿ . ⁷ ದ್ಕಂಟೆ ವಾಳು ಕ್ರಿಸ್ತುಡು ಪೇರ್ನಿ ಪ್ರಸಿದ್ಧಿ ಪಡ್ಬಿಚ್ಚೆಕೊಸ್ಕರ್ಮು ಪಾಯ್ನಾರು ಮಲಿ ಅನ್ಯಜನಲಿಂಚ ಏಮಿ ಸೀಸ್ಕೊನೋಳ್ಕಾದು . ⁸ ದಾನಿಂಚ ಮಾಮು ಸತ್ಯುಮ್ಕಿ ಸಹಕಾರಿಲು ಆಯೇ ಅಟ್ಗ ಅಟ್ಟೋಳ್ನಿ ಸೇರ್ಬಿಚ್ಕೊನೆ ಹಂಗ್ಲವುಂಡಾಮು . ⁹ ಸಭೇಕಿ ಕೊಂಚ್ಮು ಮಾಟ್ಲುನಿ ರಾಸ್ನಾನು , ಆಯ್ತೆ ಸಭೆಯೋಳ್ಳಾ ಪ್ರಮುಖ್ಮುಆವಾಲನುಂಡೆ ದಿಯೋತ್ರೆಫುಡು ¹⁰ ಮಾ ಮಾಟ್ನಿ ಅಂಗಿಕರಿಚ್ಚೆಟ್ಲೇದು . ದಾನ್ನಿಂಚ ನಾನು ವಸ್ತೆ ವಾಡು ಸೇಸೆ ಕ್ರುತ್ಯುಲು ವಿಷಯುಮ್ಲ ಅಂದ್ರುಕು ನೆನಪುಇಸ್ತಾನು . ¹¹ ವಾಡು ಹರಟೆಕೊಚ್ಚೋಡಾಯಿ ಮಾ ವಿಷಯುಮ್ಲ ಶೆಡ್ದೆ ಶೆಡ್ದೆ ಮಾಟ್ಲುನಿ ಆಡ್ತಾಡು . ಇವಿ ಸಾಲ್ಕುನ್ನ ತಾನು ಸಹೋದರುಲ್ನಿ ಸೇರ್ಬಿಚ್ಕೊನಾಲನುಂಡೋಳ್ಕಿ ಅಡ್ಡಿ ಸೇಸಿ ವಾಳ್ನಿ ಸಭೆನೋನಿಂಚ ಬಹಿಷ್ಕರಿಸ್ತಾಡು . ಪ್ರಿಯುಡಾ , ನುವ್ವ ಶೆಡ್ದೆ ನಡ್ತೆನಿ ಅನುಸರಿಕುಣ್ಣಾ ಮಂಚಿ ನಡ್ತೆನಿ ಅನುಸರಿಯ್ಯಿ , ಮಂಚಿದ್ನಿ ಸೇಸೋಡು ದೇವುಡಿಂಚ ಪುಟ್ನೊಡಾಯಿನಾಡು . ಶೆಡ್ದೆದ್ನಿ ಸೇಸೋಡು ದೇವುಡ್ನಿ ಕನ್ನೋಡುಕಾದು . ದೇಮೇತ್ರುಡು ಸಂಭಾವಿತುಡನಿ ಅಂದ್ರಿಂಚಾನು ಸಾಕ್ಷಾತ್ ಸತ್ಯುಮಿಂಚಾನು ಸಾಕ್ಷಿ ಹೊಂದ್ನಾಡು . ¹² ಮಾಮು ಸಹ್ಮು ವಾಡ್ ವಿಷಯುಮ್ಲ ಸಾಕ್ಷಿ ಸೊಪ್ಪೋಳಾಯಿನಾಮು , ಮಾ ಸಾಕ್ಷಿ ಸತ್ಯುಮಾಯಿಂದಿ ಅನಿ ನುವ್ವ ತಿಳ್ಚ್ನಾವು . ¹³ ನೀಕಿ ರಾಸೇ ತಕ್ಮು ಅನೇಕ್ಮು ಸಂಗತಿಲುಂಡೆ , ಆಯ್ತೆ ಮಸಿ ಲೇಖನಿಲ್ನಿ ಸೀಸ್ಕೋನಿ ರಾಸೆದಾನ್ಕಿ ನಾಕಿಷ್ಟ್ಮುಲೇದು . ¹⁴ ನಿನ್ನಿ ಸೂಸ್ತಾನನಿ ನಿರೀಕ್ಷಿಸ್ತಾನು , ಅಪ್ಡು ಮುಖಾ ಮುಖಿಯಾಯಿ ಮಾಟ್ಳಾಡ್ತಾನು . ¹⁵ ನೀಕಿ ಶಾಂತಿ ವುಂಡ್ನೀ . ಸ್ನೇಹುತ್ಲು ನೀಕಿ ವಂದನ್ಮು ಸೊಪ್ತಾರು . ಸ್ನೇಹುತ್ಲುನಿ ಪೇರ್ಪೇರಾಯಿ ವಂದಿಯ್ಯಿ .