¹ Di ngaan hu, nyin ānikhwui Yesu beh nang n chat āni, n chat nyi gwai Āgwaze wu! N si min mak van di liru nyin ālyiat nang n ku nshei nyin din jen jhyang āni bah. N ku nyiā āynia, dānian n ke chok nyin kalak nyi kwa di nwuak āchuchuk nyin hu. ² Nyi tābam mā ākātuk āniet ābya bā li nang ākābwu āyit āni. Bibya yet āniet fāk nvam. Bā yong nyiā, ku yet tā hwa ā tyei nyin mi chen nyi ke shyā san āni. ³ Mat nzit āniet zi dyep Āgwaze mami Āzāzārak Ntswa āni, nzit bya yet ātsatsak āniet Āgwaze nang ā tyei mi chen mami fwuo āni. Zi tāyuk di ntām nang Yesu Kristi nyiā nzit ndyo wa āni. Dā nzit, zi tyiā fwuo di ntām vam ātyubishyi bah. ⁴ Kā āyin fa nyiā ā tāyuk di ntām nvam ātyubishyi nia, nung miyang ki n doot n tāyuk di ntangkāi ntām āynia. Ātsak ālyiat, kā āyin fa ā byiā ntām vam ātyubishyi nang gu ntām āni, nung n byiā nā ndan nggu. ⁵ Kidee, jija yet, ā ku tyiā nung mi chen ātuk mam āninai di mbyin. N gyet ātsatsak nggwon ābyin Isirela wa neet mi kwai Benyamin. Kā ā mbyiā āniet bā yet ātsatsak āniet Ibriniyawa āni, nung n ngyet ātyo nyiung wa! N ku ngyet ātyo nyiung mi sot Āfārisawa ji, bā ni tyiet bā khwi doka Āyahudawa ji chāchaat āni. ⁶ N ku ntyiā ālyiā bāt di khwi doka mā taada Āyahudawa ji chāchaat. Mā ānyiā, n sii yāshuk susot ānikhwui Kristi ji dā ākākpāt. Āwot tanzwe khwi doka ji tsotswat, n si mbyiā ābun bah. ⁷ N ku nfa din jen āja, n nā shyā kpangtin di nkyang nāni. Āwot māninika, n kyiak nā nā yet ābuk nkyang wa, mat ntām nang Kristi nyiā nung ndyo āni. ⁸ Ātsak ālyiat, n kyiak kuzang kyang nang n dyin āni, ku yet ābuk kyang wa; kā n tyan nhu mā āgbāndang kpangtin nang n shyā di lyen Yesu Kristi, Ātyoli nung wu āni. Dānian khwi Kristi hwa, nang n jip kuzang kyang. N si kyiak kuzang kyang nang ātong āni, dānian n ke nkhwi Kristi mi swat nung hu, ⁹ āwot n ke shyā mun āpyiā mā ānggu. N tāyuk di khwi doka ji, ji ke tyiā nung yet ātsotswat āzaghyi Āgwaze bah. Dā ākwonu ākya, Āgwaze kyiak nung n gyet ātsotswat āzaghyi nggu, mat n nwuak fwuo di Yesu Kristi wa. Mat vak hu nang Āgwaze nā ntyiā zi ngyet ātsotswat āzaghyi nggu āni, huhwa yet nwuak fwuo di Yesu. ¹⁰ Kyang nang n chat n dyen swak āni, huhwa yet; n dyen Kristi mā āpyiā nggu mā chet nang gu ndoot mā swuan mā āniet bā kān kwi āni. N chat n dyen nggu; n bu mun āpyiā mā ānggu mami swuo ābung nggu hu; n bu ntai nggu di sisak ji nang gu nkhwu āni. ¹¹ Dānian ku di ku li ni wa, n ke tai nggu n bu ndoot mā swuan mā āniet bā kān kwi āni! ¹² N fa n wa kān shyā nkyang nāni nang n chat wa āni bah,m ku ā kān tyiā n gyet ātsatsak āyin dā ā lyin kyang āni bah. Dā ākwonu ākya, n kwan wa bāt n gghiye āson n ke ntai Yesu Kristi; huhwa yet jat nang gu nkhai nung āni. ¹³ Nyinānikhwui Yesu beh nan g n chat āni, ātsak ālyiat, n kān tat gak hu bah. Āwot kyang nyiung hwa nang n tyiā āghyi beh āzanson: N bwung kyang ku kān swak āni. Āwot n kwan bāt n tyiā āghyi n tat gak hu ku shyā āzanson nung āni, ¹⁴ huhwa yet; n kwan wa bāt n gghiye āson n ke ntat gak hu, n ke shyā āgbāndang zang. Jija yet yorong hu nang Āgwaze yorong nung tswazwa, mat Yesu Kristi āni. ¹⁵ Āmgbām nzit zi kān tat āghyi mi khwi Kristi hu āni, si zi shim nkyang nāni mā fwuo nyiung. Āwot kā āyin mā nyin ma byiā kyang ku vwuon mā si huni āni, n nwuak āchuchuk Āgwaze nā tyai nggu hu kpāsai. ¹⁶ Āwot ku yet tā hwa, zi yong chik di kyang nang Āgwaze kān tak nzit āni. ¹⁷ Nyin ānikhwui Yesu beh nang n chat āni, nyi maat swat nung hu. Āwot nyi myiam dā āvwuo āniet bā khwi kidee swat nzit ji āni. ¹⁸ Mat n ku mi nshei nyin ālyiat nāni din jen jhyang. Āwot n bu shei nyin nea mā ndang āghyi, nang āghyang āniet bā swan tangkāi nswat ku tak nang bā ngyet ākātuk āniet lak li āteam ākhwu Kristi bya āni. ¹⁹ Di ngaan hu, Āgwaze nā bwuk mā āmba. Mat āgwaza mba wu yet shyuo nvam ja. Bā tam di nyiān nkyang nsum. Kuzang ādidam nang bā nyiā āni, yet āsi fwuong didang nkyang swanta nāni nia. ²⁰ Āwot nzit, dā ākwonu ākya, zi yet mman ābyin Ma Āgwaze tswazwa nia; āvwuo ke nang Ātyoli nzit wu Yesu Kristi nshyā āni. Āwot zi fwuong didang bwuok bai nggu hu; nggu ā yet Ātyusan nzit wu āni. ²¹ Kristi nā shyak ābobwot nvam nzit nāni nā tyiai āni, ā tyiā nā nā tai vam ākyenkyai shi nggu hu. Ā nā nyiā si huni mat chet nang gu byiā ā nnyiā tyok tanzwe kākāp kuzang kyang āni.