¹ Nung Bulut, nung gwa liru nyin wosika jii, n shyā ndung mā Timoti, zit zi yet ākhwo Yesu Kristi āni. N liru wosika jii dānian n ka byiat kākāp āzāzārak āsurong ānikhwui Āgwaze beh, mbe bā shyā mā ākirang Filibi āni, mbe bā mun āpyiā mā Yesu Kristi āni, mbiyang āyaa kwok āson ānikhwui beh, mbiyang āniet bā biyang ntām āsurong ānikhwui ne āni. ² Yok Āgwaze ā yet Ātyiā nzit āni, mā Yesu Kristi Ātyoli nzit wu, bā fāk shok nyin, āwot bā nang nyin swat nyinyang. Bulut Naai Āgwaze mā Āgwai. ³ Kuzang jen ki n nyiā ādidam dā nyin, n ni gwai Āgwaze nung wu dānian nyin. ⁴ Kudang jen ki n naai Āgwaze, n ni naai dānian kākāp nyin, mā ālyiā sai. ⁵ Mā nyin nyi yet ākpāndang tām ndung mā ānung di shei Āsham Nkhang tanzwe Kristi, niyet din jen nang nyi ku ntse fāk Āsham Nkhang ke āni, bāng dā ntat āfwun. ⁶ Āwot n nwuak āchuchuk, Āgwaze ā tse ātaan tām mami nfwuo nyin ne āni, ā nā ghiye āson mā tām gu hu, se nang gu tyak hu ātuk nang Yesu Kristi nā mbwuok ā bai āni. ⁷ Mā ānyiā, dā āvwuo nung, ku myim bāt nang n nyiā ādidam āynia tanzwe nyin āni, kākāp nyin nyi shyā nung mi fwuo. Nyi yet ākpāndang nung bya di shyā shok Āgwaze, din jen nang ā ndāp nung mā ānyanyang ā si tyiā nung mi jaru; āwot din jen nang n tyieet āniet beh āchuchuk dānian Āsham Nkhang Yesu ke āni, n bu ntak nang kā ngyet ātsatsak wa āni. ⁸ Āgwaze lyen sangak zi nang n chat nyin n si bu nfāk dā nyin āni bāt, mānang Yesu Kristi nchat nyin āni. ⁹ N naai Āgwaze gu tyiā nyi mban di chat āghyang nyin hu, āwot nyi mbiyang ghiye āson mā mumwang lyen Āgwaze hu. ¹⁰ Mā ānyiā, n chat nyi fik kyang hu ku swak mi yet ātan āni, dānian nyi kan swan āzāzārak nswat mā sang ābun, tā nat ātuk bwuok bai Yesu Kristi ke. ¹¹ Mānang ākwon ni ntyiā sum āni, ma ānyiā wa, yok shyā san nyin hu ku tyiā nyi shyā ātan zākwai ā ghuut dā āvwuo Yesu Kristi āni, dānian ā ka dyep Āgwaze ā nwuak gu shi. ¹² Nyin ānikhwui Yesu beh nang n chat āni, n chat nyi lyen swuo ābung ku shyā nung āji āni. Ātsak ālyiat, ku tyiā āniet mā ādidit si fāk Āsham Nkhang ke. ¹³ Mā kākāp mman nzwang ne bā chok āli āgwam shan Āromawa ke āni, mā āghyang āniet āji, bā lyen nang n shyā mi lāp mi jaru dānian shei Āsham Nkhang Kristi kya. ¹⁴ Āwot nang ā nnyim nung mi jaru ji āni, ku tyiā ānikhwui Ātyoli Kristi mā ādidit āji si mbiyang gbang ālyiā hua. Bā si shei ālyiat Āgwaze ne mā sāt, di min fāk āwun bah. ¹⁵ Ku yet ātsak ālyiat wa nang āghyang āniet nshei Āsham Nkhang Kristi ke mā kwi swam dā nung. Āwot bā si nyiā nānvan mā ānung. Āwot āghyang āniet si shei nkhang ne mā ātan ādidam wa. ¹⁶ Á̱niet beh bā shei ālyiat Āgwaze ne mā ātan ādidam āni, bā shei ne mā chat nung. Bā lyen nang Āgwaze wa nshim ā nyim nung mi jaru ji, dānian n ki shyā āwat n tyieet āniet āchuchuk dānian Āsham Nkhang Kristi ne. ¹⁷ Mbe āniet ābyai bā shei Āsham Nkhang Kristi ne di mā ātan ādidam āni; bā shei ne ah sangak bā nchat āpyiā mbe ah āni. Mbe, bā shei ne mā fwuo nyiung bah. Āwot bā byiā ādidam nang bā nā mbiyang nung swuo ābung hu nang n swuo mi jaru ji āni bah. ¹⁸ Ban mā ānyiā, ku shyak kyang bah! Ndyen kā ādidam mbe wu yet ālaa nia, ko ā ma ngyet ātsatsak ah bah. Āgbāndang kyang wu wa yet, kudang vak, ā shei Āsham Nkhang Kristi ne. Mā ānyiā, n nā gwai, n bā ngghiye āson mā āgwai. ¹⁹ Ning dāi, sangak nyi nnaai Āgwaze dānian nung āni, Āzāzārak Ntswe Yesu Kristi wu nā biyang nung, ā san nungb ā tin nung mi jaru jic. ²⁰ Ning dāi, n tyiā fwuo mā didang, n si mbāng fwuo bāt, nang n si min fāk nsum bah. Āwot n nā chat n gghiye āson mā gbang ālyiā di shei Āsham Nkhang tanzwe Kristi, mānang n ku nnyiā din jen ji ji swak āni. Āwot n nwuak āchuchuk tangkāi swat nang n swan āni, ku nā nwuak Kristi shi, ko nang n shyā āchet, ko nang n kān khu. ²¹ Dā āvwuo nung, ki n shyā āchet, n shyā āchet dānian Yesu kya. Āwot ki n khwu, kikya nā yet tswot firing ning hu ā swak. ²² Āwot ki n shyā āchet mi vam hi, n nā nghiye āson mi nyiā Kristi ātan ntām mi swante hu. Māng ānyiā, yihwa n nā khai, ākhwu kya kee, shyā āchet hwa? N dyen bah! ²³ Ku vwuo nung ākhwu n khai mi nkyang nfiyang nang n byiā didang āni: Nyiung hu, huhwa yet; n chat nat dā āvwuo Kristi. Huhwa lan nung mā zānzan. ²⁴ Āwot fiyang hu, n bu chat n ghiye āson mā shyā āchet, dānian n ke biyang nyin. ²⁵ Nang ku ndi ānyiā āni, n nwuak āchuchuk n nā nghiye āson mā shyā āchet, dānian n ki biyang nyin nyi mbiyang nwuak fwuo dā Āgwaze; āwot nyi bu lyen tangkāi āgwai nang nyi byiā di nwuak fwuo dā ngu āni. ²⁶ Āwot didang nung huhwa yet; nyi nā dyep Yesu Kristi bāt, din jen nang nyi ndi gu bu mbwuok mā nung ā bai ndyo dā āvwuo nyin āni. Ānikhwui yet Ātsak Mman Ābyin Me Āgwaze Tanzwe Āni. ²⁷ Kyang ku yet ā swak āni, ku myim nyi swan nang ātsak mman khui Āsham Nkhang Kristi ke āni. Āwot kā nyi nyiā ānyiā, ko mbai ko mbai bah, nkhang ne nang n nā fāk dānian nyin āni, n nā ndyen nang nyi ngyong mi chet dundung mā āghyang, mamii mun āpyiā mā lāp sak nyiung. ²⁸ Nyi yok fāk āwun āniet lak li nyin beh bah. Di nwai fāk āwun huhwa nyi nā ntak mā āmbe nang ā nā mbwuk mā āmbe, āwot nyin, nyi nā shyā san. Āgwaze wa nā tyiā kudangkyang ku indi ānya. ²⁹ Ātan kyan nang gu nyiā nyin dyo dānian Kristi āni, bā dānian nyiā nyi ku nwuak fwuo ha, ku chat nyin ma nyi swuo abung mang gu dung. ³⁰ Yi shyā mi hyai tangkāi āyirak kāāi dundung māning, sangak nyin nfwuong ābung ke nang nswuo āfwun āni.