Agbandang Zunzwo 5.

1 Mā ānyiā, nyin ānikhwui Yesu beh nang n chat āni, nyi yong chik di nwuak fwuo nyin hu dā Ātyoli Yesu. Mat n fāk dā nyin, nyi yet ākpāndang nung, nyin bya bu yet āgwai nung nā mā bung tyok nung ji, ji yet zang tām nung ji āni. 2 Yodiya mā Sintiki, māninika, n naai nyin, māsākut nyi jhyi swat nyin hu. Nyi swan swat nyinyang mā āghyang nyin, mat kākāp nyin nyi yet ānikhwui Ātyoli Yesu bya. 3 Nwan ātsotswat ākpāndang tām nung,n biyang ānyiuk bāni, mat bā kān nyiā tām zām mā ānung di biyang ghiye āson shei Āsham Nkhang Yesu ke. Bā ku nyiā tām hu dundung mā Kālāmen mbiyang ākum ākpāndang tām nung beh, nang ā liru-liru mbe hu mi Kwebwat Nswuan hu āni. 4 Nyi gwai di mun āpyiā nyin hu mā Ātyoli Yesu kuzang jen. N bu nyiā, nyi ni ngwai! 5 Nyi yok konyan ā li yet āshonshyon nyin hu dā kākāp nkyang nang nyi nyiā āni. Nyi yok bwung bah; bwuok Ātyoli Yesu hu bwat kpāmkpaan. 6 Nyi ni ngyok sorop di kyang bah. Dā ākwonu ākya, nyi ni naai Āgwaze tanzwe kuzang kyang. Nyi ni hyiā mā Āgwaze kyang nang nyi chat āni. Āwot nyi gwai mā nggu mat kākāp nkyang nang gu nyiā nyin ndyo āni. 7 Ājawa nyi nā ndyen swat nyinyang ku neet dā āvwuo Āgwaze āni, si hu swak kākāp kyang nang zi nā fik āni. Swat nyinyang nang Āgwaze nwuat nzit āni, ku nā chok nfwuo nyin ne mā ādidam nyin wu mami Yesu Kristi. 8 Nyin ānikhwui Yesu beh nang n chat āni, āwot māninika:
Nyi tyiā ādidam nyin wu
di kyang ku yet āchuchuk āni; ku maai ā nwuak hu shi āni;
kyang ku yet ātsotswat āni;
kyang ku yet āzāzārak āni;
kyang ku yet āsham nang ā chyin āni;
kyang hu ku myim āni;
kyang ku yet ātan ā swak āni;
mā kyang ku myim
ā dyep āni. Nyi ni nyiā ādidam di nkyang nei nia.
9 Nyi ghiye āson mi nyiā ntām mā kākāp tyiet nung hu nang nyi fāk, nyi si san, nyi si bu li nang n nyiā āni. Āwot Āgwaze ā nwuat swat nyinyang āni, nā shyā dundung mā ānyin. 10 N gwai Āgwaze zām, nang nyi bu njhyung nyi biyang nung mānini āni. Nyi tak nang nyi ni mbyiā fwuo nyi biyang nung. Ātsak ālyiat, n dyen nyi ku mi nchat nyi biyang nung, āwot nyi si shyā āwat ke bah. 11 N shei nyin ālyiat nāni, dānian n ke nchat biyang hwa bah. Mat n wa kān miyang mā āswa di kuzang kyang ku shyā nung āni. 12 N dyen sisak ji nang n nā nswan nang ātyu kunak āni, mā sisak ji nang n nā nswan nang ātyu nzwá āni. N wa kān miyang mā āswa mi kuzang tangkāi njen nang n shyā āpyiā nung āni; ku mā kyayak ku mā āfa ākhwot, ku n shyā gbāmgbam, ku n shyā mā ādādei. 13 Ki n doot n swan nswat huni mi kuzang tangkāi njen nang n shyā āpyiā nung ānio, mat chet hu nang Kristi nang nung āni. 14 Āmgbām mā āynia, ku yet āsham bāt nang nyi mbiyang nung mami swuo ābung nung hu āni. 15 Nyin ānikhwui Āfilibiyawa beh, nyi lyen zām nang nyin bya mānyin nyin, ku biyang nung mā kurum din jen nang n ku ntsa shei nyin Āsham Nkhang ke āni. Neet nang n ku nghwon fam ābyin Mākidoniya hu, ā ku mbyiā sot ānikhwui jhyang ji ku biyang nung āni bah, si mānyin bya mānyin nyin. 16 Ku nang n ku nshyā mā ākeang Tāsolonika āni, nyi ku biyang nung bwuo ākāfeang. 17 N hyiā ālyiat nāni, mat n chat nyi nang nung kurum hwa bah. Dā ākwonu ākya, n chat nyi ma shyā zang ja dā āvwuo Āgwaze, mat shok nang nyi nyiā nung dyo āni. 18 Māninika, n wa kān san kuzang kyang nang nyi tām mā ānung ndyo āni. Āwot ku swak kyang hu nang n chat āni. N wa kān swa mā kākāp zānang ji nang nyi tām mā ānung ndyo gbāmgbam mbwak Ābafāratut āni. Zānáng nyin ji yet zānang ja ji byiā swam turare nyinyang nang Āgwaze san ā si fāk nyinyang ji āni. 19 Āwot Āgwaze nung wu nā nang nyin kākāp kuzang kyang nang nyi chat āni, mami āgbāmgbam zwá nggu wu, mat mun āpyiā nzit hu mā Yesu Kristi. 20 Māninika, yok zi nwuak Āgwaze, ā bu yet Ātyiā nzit wu āni shi, bāng si nat sang sangbāp. Sambārka! 21 Nyi byiat nung kākāp āzāzārak āniet Āgwaze beh, bā yet ānikhwui Yesu Kristi beh āni. Á̱niet khwi beh bā shyā āji mā ānung āni, bā byiat nyin.