3 ¹ .ನು ವಾತ್ ಚಾತ್ ಅಂಕೆಕ್ಲೆ , ಸಹೋದರರಾವ್ , ಹಮರ್ ವೋಲ್ತಿ ಪ್ರಾರ್ಥನೆ ಕರೋ .ಕರ್ತೋನು ವಾಕ್ಯಂ ತಮರುಮೆ ಹಬ್ಬೇಲು ಪ್ರಾಕಾರಂ ಚಾಚಾಬೀ ಬಜ್ಜಿ ಹಬ್ಬಿನೇಪ್ರಖ್ಯಾತಿ ಹೊಂದೆಮ್ ಬೀ . ² .ದೇವ್ ಹಮ್ನೆ ಮೂರ್ಖರ್ ಥೈಲಾ ದುಸ್ಟಲೋಕ್ನು ಹಾತ್ತಿ ತಪ್ಪಿಸೆಮ್ಬೀ ಪ್ರಾರ್ಥಿಸೋ ;ಹನ್ದನ್ಮೆಬೀ ಕ್ರಿಸ್ತೋನು ನಂಬಿಕೆ ಕೈಮರ್ನಿ . ³ .ಕರ್ತೋ ನಂಬಿಗಸ್ತೋ;ಎ ತಮ್ನೆ ದೃಡ ಪಡಿಸಿನೆ ಕೆಡುಕೊನು ಹಾತ್ಮೆದಡೆನಾಂ ಕಾಪಾಡೇ. ⁴ .ಆಜ್ನಾಪಿಸ್ಯೆತೆ ಪ್ರಾಕಾರಂ ತಮೆ ಕರೋಕಿನೆಬೀ ಮೊಗ್ಗರ್ಬೀ ಕರೋಕಿನೆಬೀ ತಮರು ವಿಷಯಮ್ಮೆ ಕರ್ತೋನು ಮೂಲಕಂ ಹಮ್ನೆ ಭರವಸಂ ಸೇ . ⁵ .ದೆವ್ನು ಪ್ರಿತಿಮೆಬೀ ಕ್ರಿಸ್ತೋನು ತಾಳ್ಮೆಮೆಬೀ ಭೆರಾಯಂ ಕರ್ತೋದ್ ತಮ್ನೆ ಸಲವೋದೆ . ⁶ .ಸಹೋದರಾರಾವ್ ,ಹಮೆತೀ ಹೊಂದೆಲು ಬೊಧನೆ ಅನುಸರೀಸೆನಾಂ ಅಕ್ರಮಮ್ತಿ ಸಾಲೆತೆ ಪ್ರತಿ ಸಹೋದರನೆ ತಮೆ ದೂರ್ಥೈಲ ರ್ಹೆವೋನು ಕಿನೇಹಮರು ಕರ್ತೋ ಥೈಲೋ ಯೇಸು ಕ್ರಿಸ್ತೋನು ನಾಮ್ಮೆ ತಮ್ನೆ ಆಜ್ಞಾಪಿಸ್ಯೆ. ⁷ .ಹಮ್ನೆ ಅನುಸರಿಸೀನೇಕಂ ಸಾಲೋನುಕಿನೇ ತಮೆದ್ ಮಾಲಂ ಕರ್ಲಿದೆಲಾ ಸೇವ್ ;ಹಮೇ ತಮರುಮೆ ಅಕ್ರಮಂ ಥೈನೆ ಸಾಲ್ಯಾತಿನಿ; ⁸ .ಹಮೇ ಪೈಸಾ ನಾ ಅಲೆಮ್ ಚಿನು ಫಾಯ್ಬೀ ಖವ್ನು ಖಾದಾತಿನಿ; ತಮರುಮೆ ಎಕ್ಲುನೆಬೀ ಭಾರ್ಥಾವೊನ್ ನೋಯ್ಕಿನೆ ದಿನ್ರಾತ್ಕಸ್ಟಮ್ ತಿಬೀ ಪ್ರಾಯಾಸಂತಿಬೀ ಸಪ್ಡಾವಿನೇ ಜೀವನಂ ಕರ್ಲಿದಾ . ⁹ .ತಮರುತೀ ಪೋಷಣೆ ಹೊಂದೊನೆ ಹಮ್ನೆ ಹಕ್ ಕೈಮರ್ಕಿನೇ ತಮ್ನೆ ಅಮ್ ಕರ್ಯಾತಿ ,ತಮೆ ಹಮ್ನೆ ಅನುಸರಿಸೋನು ವಲ್ತಿದ್ ತಮ್ನೆ ಮಾದರಿಥೈನೆ ರಿದ್ಯೇ ಕಿನೆದ್ ಅಮ್ ಕರ್ಯಾ. ¹⁰ .ನೋಯ್ತೆ ಹಮೇ ತಮರು ಫಾಯ್ ವುತ್ತಾತಗ್ಡೆ - ಕಾಂ ನಾ ಕರ್ನಾರೋ ಖೌನು ಖಾವೊನ್ ನೋಯ್ ಕಿನೆ ಆಜ್ಞಾ ಪಿಸೆಲಾ ಸಿದ್ಯೇ ಅಕ್ಲುದ್ . ¹¹ .ತಮರುಮೆ ತೋಡ ಭಾಂಡು ಚು ಕಾಮ್ಬೀ ಕರೆನಾಂ ಬಿಸ್ರಾವ್ ನು ಕಾಮ್ಮೆ ಮಾತ್ರಂ ಮುಡ್ಡಿ ಘಾಲಿನೆ ಅಕ್ರಮಂ ತೀ ಸಾಲೆ ಕಿನೆ ವಾರ್ತಾ ಮಾನಂ ಹಂದೆಲಾ ಸಿದ್ಯೇ. ¹² .ಅವ ಥಾಯ್ಲ ಇವ್ನು ಕಾಂ ದೊತಾನೆ ಎದ್ ಸಂಪಾದಿಸೇಲುಮೇ ಖೌನು ಖಾವೋನು ಕಿನೇ ಕರ್ತೋ ಥೈಲೋ ಯೇಸು ಕ್ರಿಸ್ತೋನುಮೆ ಹಮೇ ಆಜ್ಞಾಪಿಸಿನೆ ಪ್ರಬೋಧಿಸ್ಯೆ . ¹³ .ತಮೆತೆಬೀ ಅಸ್ಸಲ್ ಕರೋನುಮೆ ಭೆಸರ ಗೋಳ್ಮೋ. ¹⁴ .ಆ ಪತ್ರಿಕೆನು ಮುಲಕಂ ಥೈನೆ ಕಿದೆಲಾ ಸಿದ್ಯೇತೇ ಹಮರು ವಾತ್ನೆ ಚುನ್ತೆಬೀ ಮ್ಹೆಥಾಯ್ಲೋರ್ಹೆಕ್ಲೆ ಇನು ದೊಡೆ ಗುರುತ್ ಮ್ಹೆಲ್ಲಿನೆ ಇನೇ ಸಿವ್ಡೋತಾಯಂ ಇನು ಸಹವಾಸಂ ಮೇ ಭೆರಾಮೊವ್. ¹⁵ .ತೆಬೀ ವೈರೀಕಿನೆ ಗನೆನಾಂ ಸಹೋದರೋ ಕಿನೆ ಗನಿಲಿನೆ ಬುದ್ದಿ ಕೇವ್ . ¹⁶ .ಶಾಂತಿ ದಾಯಕೋ ಥೈಲೋ ಕರ್ತೋ ಎದ್ ಸದಾಕಾಲಮ್ಮೆಬೀ ಸಕಲ ವಿದಂ ಮೆಬೀ ತಮ್ನೆ ಶಾಂತಿ ದಯಪಲಿಸೋದೆ ¹⁷ .ಕರ್ತೋ ತಮರ್ ಹಂದಾನು ದೊಡೆ ರ್ಹೆವೋದೆ . .ಪೌಲ್ ಅಂಕೆತೆ ಹು ಸ್ವಂತಮ್ನು ಹಾತ್ತಿ ವಂದನೆ ಲಚ್ಚೆಲೋ ಸೇಮ್; ಹಂದಾ ಪತ್ರಿಕೆಮೆಬೀ ಆದ್ ಗುರ್ತ್; ಅಮ್ಮದ್ ಮಾರು ಹಾತ್ನು ಬರಹಂ . ¹⁸ .ಹಮರು ಕರ್ತೋ ಥೈಲೋ ಯೇಸು ಕ್ರಿಸ್ತೋನು ಕೃಪೆ ತಮರ್ ಹಂದಾನ್ ದೊಡೆ ರ್ಹೆವೋದೆ .