¹ Сыр Мардахеё саро дава уджиндя, то починдя пэ пэстэ гад, и уридя гонытко идя и чивэлас пэ пэстэ прахо, выгия машкир форо, и дрыван роволэс и годлэлас. ² Догия кэ царска вудары, нэ до вудары нашты сыс тэ заджял дэ дасави идя. ³ И дэ сарэ форы, кон шунэнас царёскиро лав саво припхэндя тэ умарэн иудеен, ёнэ до посто на ханас и на пьенас ровэнас и гадэнас годла: гонынко идя и прахо сыс пэ лэндэ дэвэс и рат. ⁴ Явнэ кэ Есфирь служанки и евнухи и роспхэндэ лакэ саро со кэрэлпэ, царица Есфирь шундя дава и дрыван пиридарандыя, и бичявдя Мардохеёскэ идя соб ёв тэ слэл пэстыр гонытко идя, и тэ пиривьрэлпэ, нэ ёв на прылыя. ⁵ Тэнче кхардя Есфирь Гафахас, евнухос саво царё чидя тэ ракхэл ла, и бичявдяв лэс ко Мардохеё тэ уджинэл со кэрдяпэ. ⁶ И гия Гафахо ко Мардохеё саво сыс машкир форо пашил вудары царёскирэ. ⁷ И роспхэндя Мардохеё пал саро, со кэрдяпэ лэса и скицы рупонэ ловэ дэла Амано дэ царско кхэр пал иудеендэ, соб лэн тэ умарэн. ⁸ И дыя лэскэ лыл тэ сыкавэл Есфирякэ саво сыс чиндо дэ Сузы баро форо, со умарэна сарэн иудеен, и тэ пхэнэл лакэ, соб ёй тэ джял ко царё тэ ровэл и тэ мангэл лэс тэ зракхэл лако народо. ⁹ Явья Гафахо кэ Есфирь и пирипхэндя лакэ саро со пхэндя Мардохеё. ¹⁰ Пхэндя Есфирь Гафахогоскэ тэ пиридэл Мардохеёскэ: ¹¹ «Сарэ слуги царёскирэ и кон дживэл до форо сарэ джинэн, мурш чи джювлы, кон заджяла ко царё до машкиратуно дворо, и ёв нанэ кхардо, лэс умарна; и ачелапэ джидо дова кэ кон царё протырдэла пэскиро сувнакуно дэсто; а ман на кхарэнас кэ царё триндэша дэвэс». ¹² И пирипхэндэ Мардохеёскэ сарэ лава Есфирякирэ. ¹³ И пиридыя Мардохеё, соб тэ пхэнэн Есфирякэ: «На думинэ со ту зракхэса пэскиро джиипэн, до кхэр царёскиро кокори машкир сарэндыр иудеедыр. ¹⁴ Сыр ту проштылёса и ничи на пхэнэса дадывэс, тэнче явэла зракхипэн иудеенгэ авирэстыр штэтостыр, а ту и тэро родо хасёса; и кон джинэл чи нанэ ваш дава дэвэс тут чидэ царицаса?» ¹⁵ И пиридыя Есфирь Мардохеёскэ: ¹⁶ «Джя, скэдэ сарэн иудеен савэ сын до форо Сузы, и лэнте посто пал мандэ, на ханте и на пьен трин дэвес и трин ратя. И мэ пэскирэнса служанкэнса лава дякэж тэ рикирав посто, а тэнче мэ джява ко царё, тэ поракирав лэса нэ лэнгиро законо запкхэнэл дава тэ кэрав, и сыр хасёвава –хасёвава». ¹⁷ И гия Мардохеё, и кэрдя дякэ сыр припхэндя лэскэ Есфирь.