2
1
2
1 :- ಎಫೆಸಲಾ ವು೦ಡ ಸಭೆ ದೂತುಡ್ಕಿ ರಾಯಿ - ಯೋಡು ನಕ್ಷತ್ರಲ್ನಿ ಕುಡುಮ್ ಸೇತ್ಲಾ ಪುಟ್ಕೊನಿ , ಯೋಡು ಚಿನ್ನದ ದಿಪಸ್ತ೦ಭಲ ಮಧ್ಯಮುಲಾ ತಿರುಗಾಡ್ತಾ ವು೦ಡ್ದ ಆತುಡು ಸೋಪೆದ್ದಿ ಹೇಮಟ್ಟೆ - ನೀ ಕೃತ್ಯಲ್ನಿ, ಪ್ರಯಾಸನಿ , ತಾಳ್ಮೆನೀ ಬಲ್ಲೆನು ; 2 :- ನೂವ ದುಷ್ಟಲ್ನಿ ಸಹಿಚ್ಚೆ ಲೇದು ; ಅಪೋಸ್ತಲುಕಾಲ್ಲೆದ್ ಅಟ್ನೂ ವಳ್ನೆ ಅಪೋಸ್ತಲ್ ಅನಿ ಸೋಪ್ಕೊನೋಳ್ನಿ ನೂವ ಪರಿಕ್ಷಿಚ್ಚಿ ವಾಳು ಸುಳ್ಳುಗಾರಲೂ ಅನಿ ಕ೦ಡುಕೊಟ್ವಿ ;
3
4
5
3 :- ನೂವ ತಾಳ್ಮೆವುಳ್ಳೋಡ್ ಅಯ್ಯಿ ನಾ ಪೇರ್ ನಿಮಿತ್ತಮು ಬಾಧೆನಿ ಸೈರಿಚ್ಕೊನಿ ಬೇಸರಮ್ ಗೊಳ್ ಲೇದು , ಇವೆಲ್ಲಾ ಗೊತ್ತು . 4 :- ಅಯ್ತೆ ಮೊದಲು ನಿಕುಡ್ದ ಪ್ರಿತಿನಿ ಇಸ್ಪೆಟ್ನಾವು ಅನಿ ನಾನು ನೀ ಮಿದ್ದ ತಪ್ಪನಿ ಎಬೇಕ್ಐತ್ತಾದ್ದಿ . 5 :- ದಾನಿಚ್ಚ ನೂವ ಯಾನ ಪೋಡ್ನಾವೋ ದಾನಿ ನೀ ನೆನಪಕ್ಕಿ ಎತ್ಕೊನೋಚ್ಚಿ ದೇವುಡ್ ತೋಟು ತಿರಿಕೋ . ನೂವ ಮೊದ್ಲು ಸೆಸ್ತಾವು೦ಡ ಕೃತ್ಯಲ್ನಿ ಸೇಯ್ಯಿ . ನೂವ ದೇವುಡ್ ತೋಟು ತೀರಿಕ ಲೇದು ಅಟ್ಟೆ ನಾನು ವಚ್ಚಿ ನೀ ದಿಪಸ್ತ೦ಭನೀ ಆ ಜಾಗಮ್ನಿಚ್ಚ ಸಿಸ್ಸೇಸ್ತಾನು .
6
7
6 :- ಅಯ್ತೆ ನೀಲಾ ಮೊಚ್ಚಿದಿ ಒ೦ಕ್ಟಿ ವು೦ಡಾದೀ ಅದೆಮಟ್ಟೆ ನಾನು ದ್ವೇಷಮೂ ಸೇಸ್ನಾಟ್ಟ ನಿಕೊಲಾಯಿತರ ಕೃತ್ಯಲ್ನಿ ನೀವೂ ಕೂಡ ದ್ವೆಷಿಸ್ತಾವೂ . 7 :- ದೇವಾರಾತ್ಮಡು ಸಭೆಲ್ಕಿ ಸೋಪ್ಪೆದಾನಿ ಸೌಲ್ಲೂ ವು೦ಡೋಳೂ ಇನ್ನಿ .ಯೋವಡು ಜಯಂ ಹೊ೦ದ್ದುತಾಡೋ ವಾಡ್ಕಿ ದೇವುಡ ಪರದೈಸಿಲವು೦ಡ್ದ ಜೀವದಾಯಕ ವೃಕ್ಷದಿ ಪೋಡ್ನಿ ತಿನೆಕ್ಕಿ ಇಸ್ತಾನೂ .
8
9
8 :- ಸ್ಮುರ್ನಲವು೦ಡ್ದ ಸಭೆಯ ದೂತುಡ್ಕಿ ರಾಯ್ಯಿ - ಸೇಚ್ಚಿಪೋಯ್ಯಿ ಜೀವ೦ತಮೈ ವಚ್ನಾಟ್ಟ ಆದ್ಯ೦ತುಡ್ಕಿ ಸೋಪ್ಪೆದ್ದಿ ಹೇಮಟ್ಟೆ - 9 :- ನಾನು ನೀ ಸ೦ಕಟನೀ ಮಲ್ಲಿ ನೀ ಬಡತನನೀ ಬಲ್ಲೆನೂ . ಐಯ್ತ್ನು ನೂವ ಐಶ್ವರ್ಯಡೆ . ಇದೂ ಕಾಕುಡ್ಡ ವಳ್ನೆ ಯೆಹುದ್ಯುಲ್ ಅನಿ ಸೋಪ್ಕೊನೋಳು ನೀ ವಿಷಯಮೈ ದೂಷಿಚ್ಚೆದಾನಿ ಬಲ್ಲೆನೂ . ವಾಳು ಯೆಹುದ್ಯೂಲು ಕಾದು ಸೈತಾನುಡ ಸಮಾಜಮೈನೋಳು .
10
11
10 :- ನೀಕಿ ಸ೦ಭವಿಚ್ಚಕೆ ವು೦ಡ್ದ ಬಾಧೆಲ್ಕಿ ಹೆದರೋದು . ಮೀಳು ದುಷ್ಪ್ರೆರಣೆಕಿ ಒಳಗೈಯೇಕ್ಕಿ ಸೈತಾನುಡು ಮಿಲಾ ಕೊಚ್ಚಮ್ ಜನಲ್ನಿ ಸೇರೆಮನೆಕ್ಕಿ ಹೆಸೆಕ್ಕಿ ವು೦ಡ್ದಡೂ . ಮಲ್ಲಿ ಪೋದ್ ದಿನಲ್ ತನಕ ಮೀಕಿ ಸಂಕಟಂ ವುಟ್ಟಾದಿ . ನೂವ ಸೇಚ್ಚಿ ಪೊಯ್ಬೆಕತ್ನೂ ನಂಬಿಗಸ್ತುಡ್ ಅಯ್ಯಿ ವುಡ್ದೂ . ನಾನು ನೀಕಿ ಜೀವಂ ಅನೆ ಜಯಮಾಲೆನಿ ಇಸ್ತಾನೂ . 11 :- ದೇವರಾತ್ಮುಡು ಸಭೆಲ್ಕಿ ಸೋಪ್ಪೆದಾನಿ ಸೌಲು ವುಡ್ದೊಳು ಇನ್ನಿ . ಜಯಮು ಹೋ೦ದೊಡ್ಕಿ ರೋಡ್ದನೆ ಮರಣಮ್ನಿಚ್ಚ ಕೇಡ್ ಅಯ್ಯೆಲೆದು .
12
13
12 :- ಪೆರ್ಗಮೂಲಾ ವು೦ಡ್ದ ದೂತುಡ್ಕಿ ರಾಯ್ಯಿ - 13 :- ಹದಮೈನಾ ಇಬ್ಬಾಯಿ ಕತ್ತಿನಿ ಪುಟ್ಕಾವು೦ಡ್ಕ ವು೦ಡೋಡು ಸೋಪ್ಪೆದ್ ಹೇಮಟ್ಟೆ - ನೂವ ವಾಸಮ್ ಸೇಸ್ಸೇ ಸ್ಥಳ ಗೊತ್ತು. ಅದಿ ಸೈತಾನುಡಾ ಸಿಹಾ೦ಸನಮ್ ವು೦ಡ್ದ ಸ್ಥಳಮೈಯುಡ್ದದ್ದಿ . ನೂವ ನಾ ಪೆರ್ನಿ ಇಸ್ಪೆಡ್ದಾನೆ ಪುಟ್ಕನವೂ . ನೂವ ವು೦ಡ್ದ ಸೈತಾನುಡಾ ನಿವಸಮ್ಲಾ ನಾಕಿ ನ೦ಬಿಗಸ್ತುಡು , ಸಾಕ್ಷಿಯು ಐನಾಟ್ಟ ಅ೦ತಿಪ್ಪುಡು ಸೇಚ್ಚಿಪೋಯ್ನಾಟ್ಟ ದಿನಮ್ಲಾ ಕಾನಿ ನಾಲಾ ವು೦ಡ್ದ ನೂವ ಮರೆಸೆಯ್ಲೇ .
14
15
14 :- ಅಯ್ತೆ ಕೊಂಚಮ್ ವಿಷಯಮ್ಲಾ ನಿಮಿದ್ದ ತಪ್ಪುನೀ ಮೊಪಾಬೇಕೈತಾದೀ ; ವಿಗ್ರಹಕ್ಕಿ ನೈವೇದ್ಯಮ್ ಸೇಸಿನ ಪದಾರ್ಥಲ್ನಿ ತಿನ್ನೆದಟ್ಲಾ , ಜಾರತ್ವಮ್ ಸೇಸೆದಟ್ಲಾನೂ , ಇಸ್ರಾಯೇಲ್ ಜನಲೂ ಮುಗ್ಗರಿಚ್ಚಿ ಪೋಡಲನೀ ಬಿಳಾಮುಡು ಬಾಲಾಕುಡ್ಕಿ ಸೊಪ್ಪಿನ ದುರ್ಬೋಧನೆನೀ ಅವಲ೦ಬಿಚ್ಚೊಳೂ ನೀ ಹತ್ರ ವು೦ಡಾಳು . 15 :- ಅಟ್ಟೆನೇ ನಿಕೊಲಾಯುತುಲಾ ಬೋಧನೆನೀ ಅವಲ೦ಬಿಚ್ಚೊಳೋ ಮಿಲಾ ವು೦ಡ್ದೋಳೂ .
16
17
16 :- ಅದ್ಗೂ ದೆವುಡ್ತೋಟು ತಿರಿಕೊ ತಿರಿಕೋ ಲೇದಟ್ಟೆ ನಾನು ಬಿರ್ನ ನೀ ಹತ್ರಕ್ಕಿವಚ್ಚಿ ನಾ ನೋರು ಕತ್ತಿಯಿಚ್ಚ ವಾಳ್ ಮಿದ್ದ ಯುದ್ದಮ್ ಸೇಸ್ತಾನು . ದೇವರಾತ್ಮುಡು ಸಭೆಲ್ಕಿ ಸೋಪ್ಪೆದಾನಿ ಸೌಲು ವು೦ಡ್ದೋಳೂ ಇನ್ನಿ . 17 :- ಯೋವಡು ಜಯಮ್ ಹೋ೦ದ್ದುತಾಡೋ ವಾಡ್ಕಿ ಮೂಸಿ ಪೆಟ್ಟು೦ಡ್ಡ ಮನ್ನ ಅನೆ ಊಟಮ್ನಿ ಇಸ್ತಾನು . ಇದುಕಾಕುಡ್ದ ವಾಡ್ಕಿ ತ್ಯಲ್ ರಯ್ ಮಿದ್ದ ರಾಸ್ನಟ್ಟ ಕೊತ್ತ ಪೆರ್ನಿ ಇಸ್ತಾನು ; ಆ ಪೆರ್ನಿ ಹೊ೦ದಿಕೊನೋಡ್ಕಿ ಇಸ್ಪೆಟ್ಟಿ ಇಕ್ಕ ಯೋಳ್ಕು ಗೊತ್ತಯಲೇದು .
18
19
18 :- ಥುವತೈರಲವು೦ಡ್ಡ ಸಭೆಯ ದೂತುಡ್ಕಿ ರಾಯ್ಯಿ . 19 :- ಅಗ್ಗಿಲಕ ಉರ್ಸ್ತವು೦ಡ್ಡ ಕಣ್ಲೂ , ತಾಮ್ರದ ರೀತಿ ವು೦ಡ್ಡ ಪಾದಲೂ , ವು೦ಡಟ್ಟ ದೇವಕುಮಾರುಡು ಸೋಪ್ಪೆದ್ದಿ ಹೇಮಟ್ಟೆ - ನೀ ಕೃತ್ಯಲ್ನಿ , ನೀ ಪ್ರೀತಿನಿ , ನ೦ಬಿಕೆನಿ , ಪರೋಪಕಾರನೀ , ತಾಳ್ಮೆನಿ ಬಲ್ಲೆನು . ಇದುಕಾಕುಡ್ದ ನೀ ಕಡೆ ಕೃತ್ಯಲೂ ನೀ ಮೊದಲ್ ಕೃತ್ಯಲ್ಕಿ೦ತ , ಜ್ಯಾಸ್ತಿ ಅಯಿದ್ದಿ ಅನಿ ಗೊತ್ತು .
20
21
20 :- ಆಯ್ತೇ ನೀ ಮಿದ್ದ ಒ೦ಕ್ಕ ತಪ್ನಿ ಹೊರಿಬಿಚ್ ಬೇಕೈತಾದಿ ; ಅದೇಮ್ ಅಟ್ಟೆ ಯೆಜೆಬೇಲ್ ಅನಿ ಅಡ್ದಿ ತಾನು ಪ್ರವಾದಿ ಅನಿ ಸೋಪ್ಕನೀ ಜಾರತ್ವಮ್ ಸೇಯೋಚ್ ಅನಿ , ವಿಗ್ರಹಲ್ಕಿ ನೈವೇದ್ಯ ಸೇಸ್ನಾಟ್ಟ ದಾನೀ ತಿನ್ನೋಚ್ ಅನಿ ನಾ ದಾಸಲ್ಕಿ ಬೋಧಿಸ್ತಾ ವಾಳ್ನಿ ತಪ್ಪು ಮಾರ್ಗಕ್ಕಿ ಸೆರ್ಪ್ತವು೦ಟ್ಟೆ ನೂವ ದಾನೀ ತಡಿದನೆ ಇಸ್ಪೆಟ್ ವು೦ಡ್ಡದೇ . 21 :- ದೇವುಡ್ ತೋಟು ತಿರಕನಿಕ್ಕಿ ನಾನು ದಾನ್ಕಿ ಸಮಯಮ್ ಇಸ್ತೇ ; ಆಯ್ತೆ ದೇವುಡ್ ತೋಟು ತಿರಿಕನಿ ತನ್ ಜಾರತ್ವನೀ ಇಸ್ಪೇಟೆಕಿ ದಾಕಿ ಇಷ್ಟಂಲೇದು .
22
23
22 :- ಇಗೋ ಅದೀ ಹಾಸಿಗೆಮಿದ್ದ ಪೋಡುಡ್ಡಾಲ ಅಟ್ಟ ಸೇಸ್ತಾನು , ಮಲ್ಲಿ ದನ್ಜೊತ್ಲ ವ್ಯಭಿಚಾರಾಮ್ ಸೇಸೋಳು ವಾಳ್ ಮನಸ್ನಿ ದೇವುಡ ತೋಟು ತಿರಿಗಿಬಿಚ್ಚಿ ದಾನ್ ಕೃತ್ಯಲ್ನಿ ಇಸ್ಪೆಟ್ಲೆದು ಅಟ್ಟೆ ಪೆದ್ದ ಸ೦ಕಟಕ್ಕಿ ಪೊಡೆ ರೀತಿ ಸೇಸ್ತಾನು . 23 :- ದಾನ್ ಬಿಡ್ಡುಲ್ನಿ ಸೆಪ್ಪೆ ಸೇಪ್ಪೆಸ್ತಾನು . ಅಪ್ಡು ನಾನು ಮನುಷ್ಯುಲ ಅ೦ತರಿ೦ದ್ರಿಯನೀ ಹೃದಯನೀ ಪರಿಕ್ಷೆ ಸೇಸೋಡ್ ಅನಿ ಎಲ್ಲಾ ಸಭೆಲ್ಕಿ ಗೊತ್ತಾಯ್ತದಿ . ಮೀಲಾ ಪ್ರತಿಯೋಕುಡ್ಕಿ ವಾಡ ಕೃತ್ಯಲ್ಕಿ ಸರಿ ಅಯ್ಯಿ ಪ್ರತಿಫಲ ಇಸ್ತಾನು .
24
25
24 :- ಆಯ್ತೇ ಥುವತೈರ ಲಾ ಉಳಿಸುಡ್ದೋಳ್ಕಿ ಅಟ್ಟೆ ಅಗಾಧ ಬೋಧೆನಿ ಅನಿ ಸೊಪ್ಕವು೦ಡ್ಡ ಸೈತಾನುಡ್ನಿಚ್ಚ ಪ್ರೆರಿತಮೈನಾ ದುರ್ಬೋಧನೆನೀ ಮೀಲಾ ಯೋಳೊಳು ತಿಲಿದನೆ ಅವಲ೦ಬಿಸ್ದನೆ ವು೦ಟ್ಟಳೋ ವಾಳ್ಕಿ ಸೋಪ್ಪೆದ್ ಹೇಮಟ್ಟೆ - 25 :- ಮೀಕಿ ವು೦ಡ್ಡದಾನೀ ನಾನು ವಚ್ಚೆ ತನಕ ಬಿಗಿ ಅಯ್ಯಿ ಪುಟ್ಕೊವು೦ಡಲ ಅನೆ ಅಪ್ಪೆಣೆ ಇಸ್ಪೆಟ್ಟಿ ಬೇರೆ ಭಾರನೀ ಮೀ ಮಿ೦ದ್ದ ಹೇಸಲೇ ಅನೇದೇ .
26
27
28
29
26 :- ಯೋವಡು ಜಯಶಾಲಿ ಅಯ್ಯಿ ನಾಕಿ ಮೆಚ್ಚಿಕೆ ಅಯ್ನಾ ಕೃತ್ಯಲ್ನಿ ಕೊನೆತನಕ ನಡಿಪಿಸ್ತಾಡೋ ವಾಡ್ಕಿ ನಾನು ನಾ ತ೦ಡ್ರಿಯಿಚ್ಚ ಹೊ೦ದ್ನಾಟ್ಟ ಅಧಿಕಾರಮ್ ರೀತಿ ಜನಾ೦ಗಗಳ್ ಮಿ೦ದ್ದ ಅಧಿಕಾರಮ್ನೀ ಇಸ್ತಾನು . 27 :- ವಾಡು ಕಬ್ಬಿಣಮ್ ಕೋಲಿನಿ೦ಚ್ಚ ವಾಳ್ನಿ ಆಳ್ತಾಡು ; ಮನ್ನು ಮಡಕಲು ಪೋಗಿಲಿಪೆಟ್ನಾಟಕ್ಕ ವಾಳ್ ಬಲಮು ಇರಿಸಿಪೋತು೦ದ್ದಿ . 28 :-- ಇದುಕಾಕು೦ಡ್ದ ಉದಯಸೂಚಕನಕ್ಷತ್ರಲ್ನಿ ವಾಡ್ಕಿ ಇಸ್ತಾನು . 29 :- ದೇವರಾತ್ಮುಡು ಸಭೆಲ್ಕಿ ಸೋಪ್ಪೆದಾನಿ ಸೌವು೦ಡ್ದೋಡು ಇನ್ನಿ .