19
1
2
3
1.ಆಮಂಕ ಪಿಲಾತುಡು ಯೇಸುನ್ನಿ ಕೊರತೆನ್ನಿಂಕ ಕೊಟ್ಟಿಚ್ನಾಡು. 2.ಮಲಿ ಸಿಪಾಯಿಲು ಮುಂದ್ಳು ಬಳ್ಳಿನಿಂಕ ಕಿರೀಟ್ಮಿ ಅಲ್ಲಿ ಆತುಡ ತಲಪೈನಾ ಪೆಟ್ಟಿ ಎರ್ರವಲ್ಲಿನಿ ಆತುಡ್ಗಿ ಮೂಸಿ ಆತುಡ ದೇಗ್ಗರ್ಗಿ ವಚ್ಚಿ- 3.ಯೆಹೂದ್ಯಲ ಅರಸುಡೆ,ನೀಕಿ ನಮಸ್ಕಾರಂ! ಅನಿ ಸೊಪ್ಪಿ ಆತುಡ ಕೆನ್ಗಿ ಎಟ್ಲು ಎಸ್ನಾರು.
4
5
6
4.ತರುವಾಯಂ ಪಿಲಾತುಡು ತಿರ್ಗಿ ಆತರ್ಗಿ ವಚ್ಚಿ ಯೆಹೂದ್ಯಲ್ಗಿ-ನಾಕಿ ವಾಡ್ಲಾ ಯಾವ ಅಪಾರಾಧಂ ಕಂಬಿಚ್ಲೆದನೀ ಮೀಕಿ ತಿಳ್ಸಟ್ಲಾ ವಾಡ್ನಿ ಮೀ ದೇಗ್ಗರ್ಗಿ ಆತರ್ಗಿ ತಿಸ್ಗವಸ್ತಾನು,ಸೂಡoಡಿ ಅನಿ ಸೋಪ್ನಾಡು. 5.ಅಪ್ಡು ಯೇಸು ಮುಂದ್ಲ ಕೀರೀಟ್ಮೀ ಎರ್ರವಲ್ಲಿನೀ ಧರಿಚ್ನವಾಡೈ ಆತರ್ಗಿ ವಚ್ನಾಡು.ಪಿಲಾತುಡು ವಾಳ್ಗಿ-ಇನೋ,ಈ ಮನುಷ್ಯಡು!ಅನ್ನಾಡು. 6.ಮಾಹ ಯಾಜಕುಲು ಓಲೆಕಾರ್ಲು ಆತುಡ್ನಿ ಸೂಸ್ತಾನೆ-ಶಿಲೆಬೇಗಿ ಎಬಿಚ್ಚು,ಅನಿ ಕೂಸ್ನಾರು.ಪಿಲಾತುಡು ವಾಳ್ಗಿ-ಬೀಕೈoಟ್ಟೆ ಮೀಲೆ ವಾಡ್ನಿ ತಿಸ್ಗಾನಿಪಾಯಿ ಶಿಳುಬೇಗಿ ಎಬಿಚ್ಚoಡ್ಡಿ;ನಾಕಿ ವಾಡ್ಲಾ ಅಪರಾಧಮು ಕಂಬಿಚ್ಲೇದನಿ ಸೋಪ್ನಾಡು.
7
8
9
7.ಯೆಹೂದ್ಯಲು ವಾಡ್ಗಿ-ಮಾಕಿ ಒಕ್ಕ ನೆಮಮ್ಮುoದ್ದಿ, ಆ ನೆಮಮ್ನ ಪ್ರಕಾರಂ ಊಡು ಸಚ್ಚತಕ್ಕವಾಡು;ಯಂದ್ಗoಟ್ಟೆ ವಾಡು ತನ್ನನ್ನಿ ದೇವುಡ ಕೊಡ್ಕೈ ಸೇಸ್ಗಾನಾಡು ಅನಿ ಉತ್ತರಂ ಇಚ್ನಾರು. 8.ಪಿಲಾತುಡು ಈ ಮಾಟ್ನೀ ಇನಿ ಮಲಂತ ದಡ್ಸಗಾನಿ ಅರಮನೆಲೋಕಿ ಪಾಯಿ- 9.ನುವ್ವ ಯಾನ್ನಿಂಕ ವಚ್ನಾಡೋ ಅನಿ ಯೇಸುನಿ ಅಡ್ಗನ್ನಾರು.
10
11
10.ಆಯ್ತೆ ಯೇಸು ವಾಡ್ಗಿ ಉತ್ತರo ಇಲೇ.ಪಿಲಾತುಡು-ನಾ ಸಂಗಡಮು ನುವ್ವ ಮಾಟಡಲೆದೋ?ನಿನ್ನಿ ಉಡ್ಬಿಚ್ಚೆ ಅಧಿಕಾರಮು ನಿನ್ನಿ ಶಿಲುಬೇಗಿ ಎಬಿಚ್ಚ ಅಧಿಕಾರಮು ನಾಕಿ ಉಂದಿಅನಿ ನೀಕಿ ಗೊತ್ಲೇದೋ ಅನಿ ಆತುಡ್ನಿ ಅಡ್ಗನಾಡು. 11.ಅಂದ್ಗೆ ಯೇಸು-ಪೈನ್ನಿಂಕ ನೀಕಿ ಇಚ್ಚಪ್ಳಡುಗುoಟ್ಟೆ ನಾ ಪೈನಾ ನೀಕ್ಜಿ ಯಾವ ಅಧಿಕಾರಂ ಉಂಟಾವುನ್ದ್ಲೇ. ಆಯ್ನಾಕಾರಣಮು ನನ್ನಿ ನೀಕಿ ಒಪ್ಪಿಚ್ನಾವಾಡ್ಗಿ ಹೆಚ್ಚಿನ ಪಾಪಂಮುಂಟ್ಟು ಅನ್ನಾಡು.
12
13
12.ಈ ಮಾಟ್ನಾ ದೆಸೆನ್ನಿಂಕ ಪಿಲಾತುಡು ಆತುಡ್ನಿ ಉಡ್ಬಿಚ್ಚೆದಾಂಗು ಪೆಚಾಡ್ನಾಡು.ಆಯ್ತೆ ಯೆಹೂದ್ಯಲು -ನುವ್ವ ಊಡ್ನೀ ಉಡ್ಬಿಸ್ತೆ ನುವ್ವ ಕೈಸರುಡ್ಗಿ ಮಿತ್ರಡುಕಾದು;ತನ್ನನ್ನು ಅರಸುಡೈ ಸೇಸ್ಗನ್ನಾವಾಡು ಕೈಸರುಡ್ಗಿ ವಿರೋಧಿ ಅನಿ ಕೂಸಿ ಸೋಪ್ನಾಡು. 13.ಈ ಮಾಟಲ್ನಿ ಪಿಲಾತುಡು ಇನಿ ಯೇಸುನ್ನಿ ಇತರ್ಗಿ ಪಿಲ್ಬಿಚ್ಚಿ ಇಬ್ರಿಯ ಮಾಟ್ಲಾ ಗಬ್ಭಾತ ಅನ್ಬಿಚ್ಚಗನ ಯಾರಿ ಪೊರ್ಸಾ ಕಟ್ಟಾಅನಾ ಪೇರುಳ್ಳಾ ಪಾಯಿ ನ್ಯಾಯ ಪಿಟಂಪೈನಾ ಕೂಸ್ಗಾನ್ನಾಡು
14
15
16
14.ಪಸ್ಕ ಪಾಂಡಗ ಸೌರಣೆಯ ದಿನಂಲಾ ಪದ್ನಾ ಹೆಚ್ಚು ಕಡ್ಮಿ ಆರು ಗಂಟ್ಲು ಆಯ್ನ್ದೆ.ವಾಡು ಯೆಹೂದ್ಯಲ್ಗಿ -ಇನೋ ಮೀ ಅರಸುಡು !ಅನಿ ಸೋಪ್ನಾಡು. 15.ಅಂದ್ಗೆ ವಾಳು-ವಾಡ್ನಿ ಸಂಪ್ಪಿಚ್ಚು,ಸಂಪ್ಪಿಚ್ಚು,ಶಿಲುಬೆಗಿ ಎಬಿಚ್ಚು ಅನಿ ಕೂಸ್ನಾಡು. ಪಿಲಾತುಡು-ಮೀ ಅರಸುಡ್ನೀ ಶಿಲುಬೆಗಿ ಎಬಿಚ್ಚಾಲು?ಅನ್ನಿದಾನ್ಗು ಮಹಾ ಯಾಜಕುಲು-ಕೈಸರುಡೆ ಹೊರ್ತು ಮಾಕಿ ಬೇರೆ ಅರಸುಡ್ಲೆದು ಅನಿ ಉತ್ತರಂ ಇಚ್ನಾಡು. 16.ಅಪ್ಡು ವಾಡು ಆತುಡ್ನಿ ಶಿಲುಬೆಗಿ ಎಬಿಚ್ಚೆದಾನ್ಗಿ ವಾಳ ವಶಾಂಗಿ ಇಚ್ನಾಡು.
17
18
17.ವಾಳು ಯೇಸುನ್ನಿ ತಿಸ್ಗಾನಿ ಪೈನಾರು;ಆತುಡು ತನ್ನ ಶಿಲುಬೆನ್ನಿ ತಾನೇ ಮೋಸ್ಗಾನಿ ಕಪಾಲಸ್ಥಳoಮನ ಸ್ಥಾನಾನ್ಗಿ ಪೈನಾರು; ದಿನ್ಗಿಇಬ್ರಿಯ ಮಾಟ್ಲಾ ಗೊಲ್ಗೊಥಾ ಅನಿ ಪೇರು. 18.ಆನಾ ಆತುಡ್ನಿ ಆತುಡ ಸಂಗಡಂ ಇಂಕ್ಕಿದ್ದರ್ನಿ ಶಿಲುಬೆಗಿ ಎಸ್ನಾರು;ವಾಳಾ ಆ ಕಡ ಒಕ್ಕಡ್ನಿ ಈ ಕಡ ಒಕ್ಕಡ್ನಿ ಮದ್ಯ ಯೇಸುನ್ನಿ ಪೆಟ್ನಾಡು,
19
20
19.ಇದಿಕಾಗುಂಡ ಪಿಲಾತುಡು ಒಕ್ಕ ವಿಳಾಸಂನ್ನಿ ರಾಸಿ ಆತುಡ ಶಿಲುಬೆಯ ಪೈನಾ ಹಚ್ಚಿಚ್ನಾಡು ಅದೇಮಂಟ್ಟ-ನಜರೆತ್ನಾ ಯೇಸು,ಯೆಹೂದ್ಯಲ ಅರಸುಡು ಅನ್ನದೇ. 20.ವಾಳು ಯೇಸುನ್ನಿ ಶಿಲುಬೆಗಿ ಎಸ್ನ ಸ್ಥಳಮು ಪಟ್ಟಣಾನ್ಗಿ ದೇಗ್ಗರುಂಡ ದಾನ್ನಿಂಕ ಯೆಹೂದ್ಯಲ ನಿಂಡ ಮಂದ್ದಿ ಆ ವಿಳಾಸಂನ್ನಿ ಓದ್ನಾರು.ಅದಿ ಇಬ್ರಿಯ ಲಾತೀನ್ ಗ್ರೀಕ್ ಭಾಷಾಲಾ ರಾಸುಂಡೆ.
21
22
21.ಇಟ್ಟುoದಾಗ ಯೆಹೂದ್ಯಲ ಮಹಾಯಾಜಕುಲು ಪಿಲಾತುಡ್ಗಿ-ಯೆಹೂದ್ಯಲ ಅರಸುಡು ಅನಿ ರಾಸುಂದಿ ನೀನು ಯೆಹೂದ್ಯಲಾ ಅರಸುಡನೀ ಸೋಪ್ನಾವಾಡು ಅನ್ನೈ ರಾಯಾಲಾನ ಸೋಪ್ನಾರು. 22.ಅಂದ್ಗೆ ಪಿಲಾತುಡು ನೀನು ರಾಸಿಂದಿ ರಾಸೆದಾಯ ಅನ್ನಾಡು.
23
24
23.ಸಿಪಾಯಿಲು ಯೇಸುನ್ನೀ ಶಿಲುಬೆಗಿ ಎಸ್ನಾಪೈನಾ ವಾಳು ಆತುಡ ಪೈನು ಹೊದಿಕೆಲ್ನಿ ತಿಸ್ಗಾನಿ ನಾಲ್ಗು ಪಾಲ್ ಸೇಸಿ ಒಕ್ಕೊಕ್ಕ ಸಿಪಾಯಿಗಿ ಒಕ್ಕೊಕ್ತಿ ಪಾಲ್ನಾ ಪ್ರಕಾರಂ ಪಂಚ್ಗನ್ನಾರು.ಆತುಡ ಲೊಗಅಂಗಿನಿ ಸಹ ತಿಸ್ಗಾನ್ನಾರು;ಆಯ್ತೆ ಆ ಅನ್ಗಿಗ್ಗಿ ಹೊಲ್ಗಾ ಉಂಡ್ಲೇ.ಅದಿ ಪೈನ್ನಿಂಕ ಅಖಂಡoಗ್ಗ ಅಲ್ಲೇದೈಯ್ಯ. 24.ದಾನ್ನಿ ಸೂಸಿ ವಾಳು-ಮಾಮು ದೀನ್ನಿ ಚಿoಚೆಗುಡ್ದು;ಚೀಟುಏಸಿ ಇದಿ ಯವ್ವಳ್ಗಿ ವಸ್ತಾದೋ ಸೂತಾಮು ಅನಿ ಮಾಟಾದ್ಗನ್ನಾರು.ದೀನ್ನಿಂಕ-ನಾ ಬಟ್ಟಲ್ನಿ ತಮ್ಮಲ್ಲಿ ಪಾಲು ಸೇಸ್ಗಾನ್ನಾರು,ನಾ ಅಂಗಿಗೊಸ್ಕರಂ ಚೀಟು ಎಸ್ನಾರು ಅನಾ ಶಾಸ್ತ್ರoನ ಮಾಟ ನೆರವೆರೆ.ಸಿಪಾಯಿಲು ದೀನ್ನಂತ ಸೇಸ್ನಾರು.
25
26
27
25.ಯೇಸುನಾ ಶಿಲುಬೇಯ ದೇಗ್ಗರ ಆತುಡ ತಲ್ಲಿಯು ಆತುಡ ತಲ್ಲಿಯ ತೊಡ್ಬುಟ್ಟು ಕ್ಲೋಪo ಪೆಂಡ್ಲಾಮೈನಾ ಮರಿಯಳು ಮಗ್ದಲಂನಾ ಮಲಿಯಳು ನಿಲ್ಚುನ್ನಾರು. 26.ಯೇಸು ತನ್ನ ತಲ್ಲಿನಿ ದೇಗ್ಗರ್ಲಾ ನಿಲ್ಚುoಡ್ಡ ತನ್ನ ಪ್ರೀತಿಯ ಶಿಷ್ಯಾಡ್ನೀ ಸೂಸಿ ತಲ್ಲಿಗೆ-ಅಮ್ಮಾ,ಇನೋ ನೀ ಕೊಡ್ಕು ಅನಿ ಸೋಪ್ನಾಡು. 27.ತರುವಾತಂ ಆ ಶಿಷ್ಯಾಡ್ಗಿ-ಇನೋ ನೀ ತಲ್ಲಿ ಅನಿ ಸೋಪ್ನಾಡು ಆ ಪದ್ದನ್ನಿಂಕ ಆ ಶಿಷ್ಯಾಡು ದಾನ್ನಿ ತನ್ನ ಇಂಟ್ಲಾನೇ ಉಳ್ಬಿಚ್ಗಾನ್ನಾಡು.
28
29
30
28.ಇದೈನಾಪೈನಾ ಯೇಸು ಇಪ್ದು ಅಂತಾ ತೀರೇಅನಿ ತಿಳ್ಸಿ ಶಾಸ್ತ್ರoನ ಮಾಟ ನೆರವೇರಟ್ಲಾ-ನೀಕಿ ನೂಳಡ್ಕಾ ಅಯ್ನಾದಿ ಅನ್ನಾಡು. 29.ಆನ ಪುಲ್ಪುರಸಂ ನಿಂಡಿನ ಗಡ್ಗ ಪೆಟ್ಟುoಡಗ ವಾಳು ಸ್ಪಂಜನ್ನಿ ಪುಲ್ಪುರಸಂನ್ನಿಂಕ ನಿಂಡಿನ ಹಿಸೋಪ್ ಸೆಟ್ನಾ ಕಟ್ಗಿ ಸಿಕ್ಕಿಚ್ಚಿ ಆತುಡ ನೋರ್ನ್ನಿಂಕ ಮುಟ್ಟಿಚ್ನಾರು. 30.ಯೇಸು ಆ ಪುಲ್ಪುರಸಂನ್ನಿ ತಿಸ್ಗಾನ್ನಪೈನಾ-ತೀರೇ ಅನಿ ಸೊಪ್ಪಿ ತಲವಂಗ್ಗಿಚ್ಚಿ ಆತ್ಮಂನ್ನಿ ಒಪ್ಪಿಚ್ಚಿಇಚ್ನಾಡು.
31
32
33
31.ಆ ಪದ್ದು ಸೌರಣೆಯ ದಿವಸಂಮೈನಂದ್ಗು ಯೆಹೊದ್ಯಲು-ಸಬ್ಬತ್ ದಿನಂಲಾ ಶವಲು ಶಿಲುಬೆಯ ಪೈನಾ ಉಂಡೆಗುಡ್ದುಅನಿ ಪಿಲಾತಡ್ನಿ-ವಾಳ ಕಾಲ್ನಿ ಇರ್ಬಿಚ್ಚಿ ವಾಲ್ನಿ ತಿಸಿ ಎಬಿಚ್ಚಾಲನಿ ಅಡಿಕ್ಕನ್ನಾರು;ಯಂದ್ಗoಟ್ಟೆ ಆ ಸಬ್ಬತ್ ದಿನಮು ನಿಂಡ ವಿಶೇಷಂಮೈನದಿ. 32.ದಾನ್ನಿಂಕ ಸಿಪಾಯಿಲು ವಚ್ಚಿ ಮೊದಲ್ನೆ ಕಾಲ್ನಿ ವಾಡ ಜೊತ್ಲಾ ಎಬಿಚ್ಗಾನುಂಡ ಮಲೊಕ್ಕ ಕಾಲ್ನಿ ಏರ್ಸ್ನಾರು. 33.ಆಯ್ತೆ ಯೇಸುನ ದೇಗ್ಗರ್ಗಿ ವಚ್ನಾಪ್ದು ಅತುಡು ಅಪ್ದೆ ಸುತ್ತುಂಡೆದಾನ್ನಿ ವಾಳು ಸೂಸಿ ಆತುಡ ಕಾಲ್ನಿ ಇರ್ಲೆದು.
34
35
34.ಆಯ್ನು ಸಿಪಾಯಿಲು ಒಕ್ಕಡು ಈಟಿನ್ನಿoಕ್ಕ ಆತುಡ ಪಕ್ಕನ್ನಿ ಗುಚ್ನಾಡು;ಗುಚ್ನ ಕೂಡ್ಲೇ ರಕ್ತಮು ನೂಳು ಎಲ್ಲಿಂದಿ. 35.ದಾನ್ನಿ ಸೂಸ್ನಾವಾಡೆ ಸಾಕ್ಷಿ ಸೋಪ್ನಾಡು ,ವಾಡ ಸಾಕ್ಷಿ ಸತ್ಯಮೇ,ತಾನು ಸೋಪ್ಪೇದಿ ಸತ್ಯಮನಿ ವಾಡು ತಿಳ್ಸನಾಡು;ಮೀಳು ಸಹ ನಂಬಲಾನಿ ದೀನ್ನಿ ಸೋಪ್ನಾಡು;
36
37
36.ಯಂದ್ಗoಟ್ಟೆ-ಆತುಡ ಒಕ್ಕ ಎಲುಬನೈನ ಇರೆಗುಡ್ದು ಅನಿ ಶಾಸ್ತ್ರಂಲಾ ರಾಸ್ನಾ ಮಾಟ ನೇರವೇರಟ್ಲಾ ಎದೈಯ್ಯ; 37.ಮಲಿ-ವಾಳು ತಾವು ಇರ್ಸ್ನಾವಾಡ್ನಿ ದಿಟ್ಟಿಚ್ಚಿಸೂಸ್ನಾರು ಅನಿ ಶಾಸ್ತ್ರಮ್ಲಾ ಮಲೋಕ್ಟ ಮಾಟ ಸೋಪ್ಪಿಂದಿ.
38
39
38.ಇದೈನ ಪೈನಾ ಯೆಹೂದ್ಯಲ ಭಯಂನ್ನಿಂಕ ಗುಪ್ತoಗ್ಗ ಯೇಸುನಾ ಶಿಷ್ಯಡೈನಾ ಅರಿಮಥಾಯದಿ ಯೋಸೆಫುಡು-ಯೇಸುನ ದೆಹಂನ್ನಿ ತಿಸ್ಗಾನಿ ಪೈಯ್ಯೇದಾನ್ಗು ಅಪ್ಪಣೆಕಾವಾಲನಿ ಪಿಲಾತುಡು ಬೇಡ್ಗಂನ್ನಾಡು.ಪಿಲಾತುಡು ಅಪ್ಪಣೆ ಇಚ್ಚಲೈ ವಾಡು ವಚ್ಚಿ ಆತುಡ ದೆಹಂನ್ನಿ ತಿಸ್ಗಾನ್ನಿ ಪೈನಾಡು. 39.ಇದಕಾಗುಂಡ ಮೊದ್ಲು ಒಕ್ಕ ಸಾರಿ ರಾತ್ರಿಪದ್ಲಾ ಯೇಸುನ ದೇಗ್ಗರ್ಗಿ ವಚ್ನಾ ನಿಕೊದೇಮುಡು ಸಹ ರಕ್ತಂಬೋಳ ಅಗುರುಲ್ನಿ ಕಲ್ಪ್ನಾ ಚೂರ್ಣಂನ್ನಿ ನೂರು ಸೆರಂತ್ತ ತಿಸ್ಗಾನ್ನಿ ಆನ್ಗಿ ವಚ್ನಾಡು.
40
41
42
40.ವಾಳು ಯೇಸುನ ದೆಹಾಮ್ನಿ ತಿಸ್ಗಾನ್ನಿ ಯೆಹೂದ್ಯಲ ಹೂನ್ಪೆಟ್ಟ ಪದ್ದತಿಯ ಪ್ರಕಾರಂ ದಾನ್ನಿ ಆ ಸುಗಂಧ ದ್ರವ್ಯಲ ಸಹಿತಂಗ ನಾರು ಬಟ್ಲಾ ಸುತ್ನಾರು. 41.ಆತುಡ್ನಿ ಶಿಲುಬೆಗಿ ಎಸ್ನಾ ಸ್ಥಳಂಲಾ ಒಕ್ಕ ತೋಟಮುಂಡೆ;ಆ ತ್ವಾಟ್ಲಾ ಒಕ್ಕ ಕೊತ್ತ ಸಮಾಧಿ ಉಂಡೆ;ದಾಂಟ್ಲಾ ಅದುವರ್ಗು ಯವ್ವಲ್ನು ಪೆಟ್ಟುoಡ್ಲೆ. 42.ಆ ದಿನಂಮು ಯೆಹೂದ್ಯಲ ಸೌರಣೆಯ ದಿನಮೈದಾನ್ಗು ಆ ಸಮಾಧಿದೇಗ್ಗರುಂಟಾದಿಅನಿ ಯೇಸುನ್ನಿ ಆನೇ ಪೆಟ್ನಾರು