¹ దేవుని నుంచి,ఓండు తోపకాదటం,ఓని రాజెం వాదనస్కే బతికి మందనోరికి,డొల్లి అత్తోర్కి తీర్పు తీర్సాని క్రీస్తు యేసు నుంచి,నన్న నీకు కెచ్చో మిందాను ² వాకేం తీను బోధిస్సా,కుదరకన్న కుదురుకన్నకష్టబర్ము,ఖండిచ,గద్దిస్సా,బుద్దికెళ్ళ ఓపిక తోటే కెల్లా. ³ . బారిత్కు జనుర్కు మెంచి బోధతీను ఓర్చు కుండటం ఇల్లోరు.దురద కెవ్కీను తోటే ఓరి సొంత దురాశాకీంకు కుదరనాటే బోధిస్సనోరీను పోగు తుంగి, ⁴ జమత్తే దానీను లెక్క తుంగకుంట అడ్డగోలి వేసోడి కెత్తనోరాకే గిరుడ్డిదాతోరు. . ⁵ నిమ్మ అత్కు అన్ని విషయకీను మేల్కేతే మంజీ, కష్ట బర్ము.కుషేల్ కబుర్ కెత్తాను పని తుంగ,నీ పరి సెర్యతీను పూర్తి తుంగ. ⁶ నా పాండం ఈదాని సమయం వత్తే.నా డొల్లాను రోజు దెగేర్ వత్తే. . ⁷ మెంచి పోరాటం తుంగ తాను,నన్న మిర్రనాది ఆప్తాను.నా విశ్వాసం తీను కాపాడతాను. . ⁸ నా సేన్క నీతి కిరీటం ఆజుర్ గానే మిందే.నీతి మందాని నాయం తున్గాని పెద్ద అత్తే పెభువు దానీను ఆ రోజు నాకు ఈతోండు. నాకేనయ్యో గాని,ఒని రాకడసేన్క ఎదురూడనోరందరీంకు ఈతోండు. ⁹ . నాయగ్గ తొందరగా వాదనాంకి ఊడ. . ¹⁰ దేమా ఈలోకంతీను పెమిస్సి నానీను విడిసి థెస్సలోనీక అత్తోండు.క్రేస్కే గలతీయత్కు,తీతు దల్మతీయత్కు అత్తోరు. ¹¹ లూకా మాత్రమే నాయగ్గ మిందోoదు.మార్కీను తీసితర్ర.ఓండు పరిసేర్య తున్గానాంకు నాకు కుదిరితోండు.తుకికు తీను ఎఫెసునాటే రోం. ¹² నిమ్మ వాదనస్కే నన్న త్రాయతే కర్పు ఇందానోనగా తాసి వత్తే గుడ్డాకు,పుస్కాకు, ¹³ ముకేసం తోలు కాయత పెయిసి వర్రా. ¹⁴ అలెగ్జాoడర్ ఇందాని కమ్మరి వాండు నాకు చాల కీడు తున్గతోండు.ఓని పనితికి జీతం పెభువే ఈతోండు. ¹⁵ ఓని విషయాతే నిమ్మ కూడ జాగ్రత్త మన్ను. బారిత్కు ఓండు మా బోధ తీను బాగ ఎదిరిస్తోండు. ¹⁶ నన్న మున్నె నాయం తిరియాను సభాతే ఎదురు నిత్తపై నాయాకే బెనోండు నిచ్చి తిరియిల్లోరు,అందోరు నానీను విడిసి అత్తోరు.ఇద్దు ఓర్కు నేరం ఆదకుంట మందవాలి గాక. ¹⁷ అత్కు నన్న కుషేల్ కబురు మొత్తం కెత్తనస్కే యూదుర్కు అయ్యోవోరు దానీను కేంజానాంకి,పెభువు నాయాకే మంజీ నానీను బలపరస్తోండు అందకాడే సింహం పౌటే నుంచి తప్పిస్సి మిన్డాను. ¹⁸ పెభువు అన్ని చెడ్డ పనికి నగ్గా నుంచి నానీను తప్పిస్సి కాపాడి పరలోక రాజెం సేర్పితోండు.యుగాయుగాకు ఓనికి మహిమ కలిగితే గాక,ఆమెన్. ¹⁹ ప్రిస్కకూ అకులాత్కి ఒనేసిఫోరు కే లోత్తోరికి నా అభివందనాకు. . ²⁰ ఎరస్తూ కొరింథు నాటే ఆంగి అత్తోండు.త్రోఫిముత్కు జబ్బు వత్తే.అందకాడే ఒనీను మిలేతు నాటే విడిసి వత్తాను. ²¹ నిమ్మ చలి కాలం వాదవస్కే వాదనాంకి ఊడ.యుబూలు,పుదే,లీను,క్లౌదియ,ఇంకా మందాని అన్నలోరు అంతా నీకు వందనాకు కెచ్చోమిందోరు. ²² పెభువు నీ ఆత్మత్కు తోడాసి మంతోండు గాక.కృప మీకు తోడై మంతే గాక.