¹ Jakobo, mhiri ndima wake Izubha na Mzuri Yesu Kristo, ha bhala makabila kumi na mbiri makutawanyika salamu. ² Yoeni raha yose, bhamdwetu, magheti mbhetia bhasi tofauti, ³ mkitisibha iti mtihani wa imani uhira saburi. ⁴ Shigha subira ikenje ndima yake, esa muoke bhandu bhazima, msisobhe chochose. ⁵ Lakini ghati yenu ekundie ukarimu na aombe hake Izubha. Eye m'mwe eingana bhukarimu bila kukemea na bhala bhose bhembhujanya, nae ebhainga. ⁶ Kake bhujanya na imani, bila kushuku, amu ula eshuku nisa makindi hena ipe, metikwa ni ngungu na kubhiritwa aho. ⁷ Amu uo mndu esifaie kufikiria iti enepata maombi mange hake Mzuri; ⁸ mndu sa uo efikiria keri keri, esina msimamo hena zia jose. ⁹ Mndugu maskini efaie kusifu hena kukwejwa kwake, ¹⁰ na mndugu tajiri hena kusea hake, amu eneteka sa iua lakititoni. ¹¹ Izano linefumia na hena ndughuri ikaihe, iomija mimea na maua kugwa na bhwedi bhwake bhose kuteka. Na hena hubho bhandu matajiri bheangamizwa hena ndima jabho. ¹² Abarikiwe mndu mwaminifu hena majaribu amu akabhetia majaribu enepata tuzo ya uzima, eyo yaahidiwa ha bhala bhemkundie Izubha. ¹³ Hesina wowose efaie kughamba bhundu agheshwa, " Ama majaribu ni make Izubha, "amu Izubha esigheshwa ni uovu, na Izubha mwenye esighesha mdu wowose. ¹⁴ Kake kila mndu en agheshwa ni tamaa jake mwenye ejo jinamjuta uko. ¹⁵ Baada ya tamaa inarateria dhambi, dhambi ikakomaa kinatareria kifa. ¹⁶ Msikengike bhamndwetu bhapenzi. ¹⁷ Kila kipaji chedi na kila zawadi kamilifu ifuma wanga, kusea sii kufuma hake Apa wa mianga. Esinabadilika wala esikigeugeu sa kivuli. ¹⁸ Izubha esaghure kutuinga uhai hena ineno la kididi, esa tuoke matunda makubhoka ghati ya bhiumbe bhake. ¹⁹ Mmaije hubhu, bhamndwetu bhapendwa. Kila mndu na aoke mwepesi wa kusikija, ²⁰ asioke mwepesi wa kuteta na asioke mwepesi wa kureghija, amu mndu wa kureghija esiidima kuhira ndima ya haki yake Izubha. ²¹ Kwa hubho bhikeni mbai mitongire michafu, na tabia mbibhi kila handu, na hena unyenyekevu pokeeni ujumbe uhandiwe esa uokoe nafsi jenu. ²² Tiini kiteto, msilisikije tiki, mkakukenga nywi bhenye. ²³ Amu kila mmwe esikija kiteto na esihira, ni sa mndu ekuyoa bhusho bhwake mwenye hena kioo, ²⁴ na kutonga jake na aho kuibha bhundu efanane. ²⁵ Kake ula mndu ewaho makini hena sheria kamilifu, sheria ya uhuru, na eendelea kuitii, nisikusikija tiki na kuibha, uu mndu etasiwa ekihira. ²⁶ Kacha mndu akaosha ni wa dini, kake esiidima kuitora lumi lwake, ekenga ngoro yake na dini pia. ²⁷ Dini eyo yoho izerie na isina hitilafu mbele yake Izubha na apa ni ii: kubhanghenja mayatima na bhajane hena shidajabho, na kukurinda mwenye hena isanga lisibhe.