¹ Hirba wunih tanh, ana k'oonk'oh guduyuh d'egeh tah aka anamah samah kesa jiru tah wah ishiini yete, " Haleluyah. Jireenah, gudinah, amaleh deneechah ani tah Waak'a keenati. ² Adaawa isah kah d'ugoofatanu amaleh kah d'ugaati, Malyenani iniini hah daaimtuh guduyuh adaawe tah lafa sobde daaima ishiatini. Iniini hah haaluh beh d'iiga ergatuh isaatini, kah ishiini jisite." ³ Wogah lameesah kaaneh dubatanih, "Haleluyah! K'ayini gara ishiatih ola kah guyah t'uut'umah muumeh t'uut'umah. ⁴ "Maangudoh ilamah afurih amaleh uumama afuri kah jiru gadataneh amaleh Waak'a dulatane kah malsuni barch'uma hayuh ah ara taau. Wah isaani yed'ani, " Ameeni. Haleluyah!" ⁷ Nutini kikitaa amaleh gamada hayuma isah iti kana malyenani jila fuud'ah kah Imooleh Hoolah ah had'upte, amaleh niitih isah ufa shawaanesite ⁸ ."Ishih malsuni hah dendeechah iti kanani kah ishiini faaya hangad'u amaleh saara daansah ch'oleh hid'atu (malyenani saara ch'oleh ni tochih d'ugaa tah dega abdateeti). ⁹ Malaikah ani wah iniini anaani yed'e, "Wunih tana bareesi: Dega eeba k'abdu tah d'iyeesifatani suni bereh nyaata fuud'a Imooleh Hoolah." Deewieh wah iniini anaani yed'e, "Dubih ni tuni d'ugah Waak'a ati. ¹⁰ "Malsuni gadanad'eh faana isah dura isa dulad'e, amoh wah iniini anaani yed'e, "Akisi hiinteini! Ana ergatuha aka keetiti amaleh ebeleeni kenkeh kah k'awih k'au Yeesuh afi. Waak'a dulad'ah, malyenani k'awih Yeesuh ah gula ishiini hara rhaagoleh ati." ¹¹ Eegiah ana samah diigamte d'erge, amaleh ilaaleh malsuni farda adih ti jira! Kah malsuni isa geesu aka yed'anih waamanu abdih afi d'ugah. Iniini d'ugumaaani adaawa baasa amaleh lola d'ufaani. ¹² Ila isah aka silah k'aank'atih ati, amaleh isah ara goomfah gudaati jira. Mak'ah ati jira kah araati bareesani kah namuh himbeenye isaafi himbeinih. ¹³ Iniileni kaanzuh kaayata kah d'iiga kesa ch'uupani, amaleh mak'ah isah dubih Waak'a ah yed'anih waamani. ¹⁴ Miila marah ah tah samah ah isa hordopte farda adih araani, saara daansah hid'atani, adih amaleh ch'oleh. ¹⁵ Afaani isah kesah fach'oh murtuuti kasah bah tah iniini lafa t'uut'umaatini baleesuni, iniini isaani ara ijeta kutah sibiilah atini. ¹⁶ Iniini bereh zabiibuh iti miich'anu tah hooj'a dalansuh Waak'a ah kesa had'eeta, kah wunih t'uut'umah ara ijetu. Iniini mak'ah isa kaanzuh isaatifi luka isah raati bareese, HAYUH KAH HAYUH AH AMALEH AABOH AABOH AH. ¹⁷ Ana malaikah d'erge kah aduh kesa ijetu. Iniini kee shimbireh t'uut'umah tah arana matah isah bak'atu k'oonk'oh guduyuh ani waameh, ¹⁸ "Kotah, urga tokochaati jachaa segeleh guduyuh Waak'a ati. Kotaa fooni hayuh ah nyaad'ah, fooni dega jenah, fooni fardah afi geesituh isaanih, amaleh fooni anamah t'uut'umah, dega gidi d'iisanih fi boojah, amaleh dega mali hink'amne amaleh dega jaweena k'abdu." ¹⁹ Ana kee bineesa d'erge amaleh hayooleh d'uniah ah miila marah isaanitini wiliini. Isaani malsuni ufa shaawanefatani suniini nama farda afi miila marah ah isah lolaniini. ²⁰ Bineesa kaaneh k'awanih amaleh wiliini rhaagah d'arah kah hakeeka mid'aase isa dura. Hakeeka kanaani iniini dega guwah bineesa ah d'ak'abde soweh amaleh dega uumama isah dulate. Isaani lamaanuh jireenumaani darbatane koonoh abidah gula kah kib'iritih ani beboh.