¹ Tah isani beechanih feenu, ebeleena keena dada Waak'a ah tah mina Waak'a ah tah Maked'oniah ati kanani gula. ² Wogah hanshaara isaanih guduyuh, gudina gamada isaanih amaleh k'aweena deeguma isaanih hah halak'uma tola isaanih gidbaasite. ³ Malyenani mala dendeechah isaanih kanani, hah d'erge, tah dendeechah isaanih leh ara jirtu. ⁴ Akuma fed'ih isaanih, aka magaaduma sosowanoh isaanih, aka fed'ih isaanih tah hujih anamah k'uk'uloh k'ak'aartih ah gula. ⁵ Amoh tochih ntuni aka nuti isheenemuh, amoh isaani dursah fed'ih Aaboh ah gula ufa kanani, deewanih fed'ih Waak'a ah nuh gula. ⁶ Suniifi T'iit'oh gudah sosowad'e kah malsuni baiyah isani hujih tana iti d'aawe suniini tochih hujih dada tanah leesa. ⁷ Amoh akuma isani gudatanu wunih t'uut'umah kesa, abdih ah, dubih ah, beekinah ah, k'arumah, yoh fed'ih teesani nuh gula- ilaalah aka isani gudatanu hujih dada tanah kesa. ⁸ Tana isaanti hih himuh aka d'aamsah amoh d'egersiisah fed'ih teesanih tah aadah tah abdih anamah keesanih wilfakaachiptu. ⁹ Malyenani isani himbeechani dada Aaboh keena Yeesuh Kristoh ah, tah iniini malsuni halak'ah ah, amoh kee isaniifi deegah iteh, suniini deeguma isah araani halak'ah itaatani. ¹⁰ Ishih tanaafi gumaachih isaanti kana tah dendeecheh isani k'ak'aartu. Gana toko kah darfe wih mid'aasah iti d'aabdani, aka isani aka hamah feetane suniifi. ¹¹ Suniifi mid'aasah rhaawad'ah, akuma isani mimira fed'ih hujih tana mid'aasah tanaani rhaawatih, akuma dendeechah teesanih. ¹² Malyenani woh mimira hujih tana mid'aasah jirtu, aka daansah amaleh fed'achiipti, akuma nama toko k'au, amaleh akuma iniini wih hink'amne suniifi. ¹³ Malyenani aka silaateh anamah d'iwih gid'iisaneh kah d'iwih ulfeena baachisanuumuh. Tanaafi kiyaafi keenah hink'aawatanih. ¹⁴ K'aweena keesani kah teemtanah wunih isani feetanu isaanti kaniti. Suniini k'aweena isaanih wunih isani feetanu isaanti kaniti, tanaafi kiyaafi keenah hink'aawatanih. ¹⁵ Akumu bareesani, " Kah wunih gudah k'au, wih himbimneefih amoh kah dik'iyoh k'au wih hind'emneh. ¹⁶ Amoh d'ud'ah Waak'a ati kanina, kah ona daansah T'iit'oh ona ilaalchiah tah malsuni ana k'au isani gula. ¹⁷ Malyenani iniini kad'ah teena ch'alah gula himbaaneh, amoh iniini gudah fed'e. Iniini isaanti d'ufe akuma fed'ih isah. ¹⁸ Amoh nutini hah wiliini ergine ebeleesa kah faarsanu mina Waak'a ah Oduh daansah waadiah isah gula. ¹⁹ Ishini tana ch'alaamuh, amoh mina Waak'a ah isa fooch'e wah nutiini wiliini imaleh d'enyeh tochih baasih tanaafi. Ishiini tuni hiila Aaboh atifi mimira k'ak'aartih teenah gula. ²⁰ Nutini hah marfane dendeechah anamah ani dendee hujih daansah tana tah nutini wilti jachaasine iti wawaku. ²¹ Nutini aka daansah wunih hiilah mid'aasina, Aaboh dura ch'alaamuh, amoh amaleh anamah duraaleh. ²² Nutini hah amaleh ebeleesa d'iwih isaani wiliini ergine kah nutini guyah gudah ilaaleh dendeechah araati d'egere, amoh abdih guduyuh k'au kah abdih iniini isani gula k'au suniifi. ²³ Akuma T'iit'oh ni, iniini jaala kiyah amaleh gudumuh isaniifi. Abeleena kena gula, mina Waak'a ati erge. Isaani hiila Kristoh ati. ²⁴ Suniifi fed'ih teesani d'egersiisah, amaleh d'egersiisah wunih nutini iti isani gula ufa olfuunu mina Waak'a ah magaadi gula.