¹ Fù kpɛŋnî ta, à tobra kúùrî nɔ̀nkurn ki dukú, yì ki Yesu jàno Pilati se. ² Yì ki saaŋ jo à nɛ gbɔ to dé: «Ŋmɛ́ɛn n'à ŋmɔ́n àni jɔɔ̂ bè ŋmɛ́ɛn ǹ tɔbin kúur sɔ́ɔɔ̂ kpaŋlmɔkɛŋl gbɔ to, fù n'à bè yì tɛ́ɛln dé yì be martar túr Sesari se bo, fù n'à b'à lóon d'àkun ki Jɔnɔsɔ ǹ Mɔtɔ̂ŋnmun Jiminî ɔ, à kìyɛŋntɔnî ɛ̀.» ³ Pilati k'à du dé: «Ákún k'à Yawutu kìyɛŋntɔnî ɔ a?» Yesu k'à wú dé: «Ákún ni máno à ló.» ⁴ À la máno tɛ̀ŋn híin, Pilati k'à wú à flɛ́klɛrê ŋmelêê n'à jùmɔ̂ɔ̂ se dé: «Mún fɔn ŋmel bólóon ŋmɔ́nɲɛ̀n mùmun b'àni jɔɔ̂ kɛŋ ŋmel yan bo.» ⁵ Yì b'à wú nì wú má dé: «À r'án kɛɛlnî ɔ jimiì kpaŋlmɔkɛɛŋln nì búr gbɔ to káa to Jude kìyɛŋnî nɔ̀nkurn wono, à r'à yɛŋnjà Galile kìyɛŋnî mɔ, fóro à húnmɔ.» ⁶ Pilati ki Galile kìyɛŋnî yinî nââ se, ki dukwo, à jɔɔ̂ nì Galile jir kwó. ⁷ À r'à hlɔ̀ dé Yesu ri lɛɛ̀n Erɔdi ǹ takɛl kìyɛŋnî wono gbârî mun ye, k'à búrno fù se; fù mun saaŋ tɛ̀ŋnɛ̀n ín Jerisalɛmu dyɛɛ̂ wono fù gbâr ye. ⁸ Erɔdi ri Yesu ŋmɔ́n gbârî mun ye k'à tìyà tɛŋn tɛ́tɛ̂, bóló ɔ bo, à gbɔ̀n mɔ dâlmun ɔ, à r'à se k'à ŋmɔ́n ín, Yesu gbɔ mɔ lô gbɔɛ̀ɛ̂ náaâ núkwɔ́ɔn. Fù n'à nwɔ́ɔn n'à se ín Yesu k'án shɔ́gbɔɛ̀ɛ̂ máɛ̀ kwo àkun ɲíɲra. ⁹ Erɔdi ki Yesu du gbukɛl tyɛɛ́ŋ sɔ́ɔ ɔ, kɛ̀, à wo bóló ló bo. ¹⁰ À flɛ́klɛrê ŋmelêê n'à tɔ̂ŋn kɛlêê bè tɛ̀ŋnɛ̀n. Fɛ̀ b'à nɛɛ̀n jaarbê mɔ. ¹¹ Erɔdi n'án surashîìî ki Yesu gbɔjìr fájaalbé mɔ, yì k'à flɛ́li shɔn jaalbê mɔ, yì k'à tonɛ́n wâ ɲɔn sɔ́ɔ ɔ, k'à sɛbúrno Pilati se. ¹² Fù lɔɔ̂ núkúuri mɔ Erɔdi nì Pilati ki tɛ̀ŋnè yíi jirɛ̂, ta kyɛ̀ŋlye yì ki yíi kɛ̀ŋlshì ɔ ín. ¹³ À la máno tɛ̀ŋn híin, Pilati k'à flɛ́klɛrêê ŋmelêê n'à ŋmelêê n'à jùmɔ̂ɔ̂ fɛ́ŋn, ¹⁴ k'à wú yì se dé: «Yíkun mùn ni byɛ̀ àni jɔɔ̂ rɔ d'à fɔn jimiì kpaŋlmɔkɛɛŋln. À nì fù kwó, mún k'à dùmun nɛn yíkun ɲíɲra, yíkun n'à nɛ gbɔɛ̀ɛ̂ mun nɔ̀nkurn ɔ, mún wo fɛ̀ mɔ bóló ŋmɔ́n mùmun b'à kɛŋ ŋmel yan bo ¹⁵ Erɔdi saaŋ à kɛŋ ŋmel ŋmɔ́n bo, bóló ɔ bo à r'à sɛbúr bɛ ŋmɛ́ɛn se. À jɔɔ̂ rɛn, à wo bóló klɛ̀ mùmun b'à krɔ ŋmel yan bo. ¹⁶ Fù r'à jɛ́l mún b'à ŋmɛbɛ̂ ń ki kwɔ́ɔn à tobúrê.» ¹⁷ Kàtɛ̂l mun nɔkɔŋl Pilati ri yanɲɛ̀n à bè jimin mɔkyɛ̂mun jir byéen tobúurnè ín, À Bè Jìréa Fù Ta Wúwɔ́ɔŋɔ̂ mɔ. ¹⁸ Yì nɔ̀nkurn k'á myɛl tɔŋnkrɔ̂ mɔ à wú yíse dé: «Àni jɔɔ̂ kwoê, á ki Barabasi jélê ŋmɛ́ɛn se.» ¹⁹ Barabasi ri mɔkpɛ́ɲɛ̀n ín jimin kpaŋlmɔkɛɛŋl brê gbɔ tokáa to à dyɛɛ̂ wono fù nì jimin kwò yɛŋn se. ²⁰ Pilati r'à se ín ki Yesu tobúrê, ki kɛl yé à jùmɔ̂ɔ̂ se. ²¹ Kɛ̀, yì k'á myɛl tɔŋnkrɔ̂ mɔ à wú dé: «À kpé tá nan gbɛ́ɛ to! À kpé tá nan gbɛ́ɛ to!» ²² À tyáarɔnî mɔ Pilati k'à wú yì se dé: «À jɔɔ̂ ri myɛ́n gbɔjáal klɛ̀? Mún ɲáa fɔn àn klɛ̀ gbɔ bóló to mùmun b'à krɔ ŋmel yan bo. Fù se kwó, mún b'à ŋmɛbɛ̂ ń ki kwɔ́ɔn à tobúrê.» ²³ Kɛ̀, yì bè kpéɲɛ̀n má à ta, yì k'á myɛl tɔŋnkúr, yì b'à lóon à se d'à w'à kpé tá nan gbɛ́ɛ to, fóro Pilati ki b'à búrè yì fù ri to. ²⁴ Fù la klɛ̀ híin, Pilati k'à wú dé yì ri mùmun nyɛl, dé fù ki kwo. ²⁵ Jɔɔ̂ mun ni mɔkpɛ́ɲɛ̀n à mɔklálɔ́ɔ̂ mɔ ín, jimin kpaŋlmɔkɛɛŋl brê gbɔ totáa to nì jimin kwò yɛŋn se, ki fù tobúrè bóló ɔ bo fù ki yì ɲɛ́n fù ri ɔ ín. Yesu kwó, ki fù búrè yì se, à jùmɔ̂ɔ̂ ki fù gbɔ jìr á tìyà fáâ to. ²⁶ Yesu jà kɔ́ŋnfɔn à krɔ fɔŋnî mɔ, yì ki jɔ dyàn kàrmɔkír à bè li blaàn klɔŋn se, yì r'à fɛ́ɛŋn ín dé Simɔn. Fù jɔɔ̂ ki Sirɛni dyɛɛ̂ jir ɔ ín. Yì ki fù tíin à nanî tɔŋn k'à gbɔnno Yesu besé. ²⁷ Jùmɔ̂ bè kpéɲɛ̀n Yesu ta, fù nì mél tyɛɛ́ŋ sɔ́ɔ, fɛ̀ bè béníin, yì bè hlɛɛ̀n Yesu gbɔ ɔ. ²⁸ Yesu k'á ɲáa tojìr ki yì yi á besé, k'à wú yì se dé: «Jerisalɛmu méèlî ɛ̀, yíi be mún gbɔ to bo, yíi w'á byéen gbɔ to, fù nì yíi derêê ɛ̀, ²⁹ bóló ɔ bo yefyɛ̂l dyàn blaàn, fù lɔɔ̂ mɔ jimiì b'à wúa dé méèlî mun ki kwɔŋ kaarn méèl ɔ, yì wo dye kwɔ̀ŋ din bo, fù nì yì wo dye ɲɔ́ din bo, dé fɛ̀ la fyâr. ³⁰ Fù gbâr ye jimiì b'à wúa káàl se dé yì wo wô yìkun fléen, fù nì yì k'à wú kpéè se dé yì wo yìkun tohlú, ³¹ bóló ɔ bo yì n'àni gbɔɛ̀ɛ̂ klɛɛ̀n nan blɛ̂ ɔ, yì bè myɛ́n gbɔ kwoa nan kwɛ̂l ɔ?» ³² Yì ki saaŋ jɛn gbɔjáal klɛrɔn jir níin jàno, fɛ̀ krɔ ɔ Yesu wɔ́se. ³³ Yì ri lò kpé dyàn fléen, yì ri mùmun fɛ́ɛŋn dé Ŋmel Kpár, Yì ki Yesu kpé à nanî gbɛ́ɛ to mímí, fù n'à gbɔjáal klɛrɔn jir níinî ɛ̀. À máâ r'à kìndíir bén se ín, à máâ b'à kìmɛ́ɛl bén se. ³⁴ Yesu k'à wú dé: «Ń Tɔ Jɔnɔsɔ, á tɛjél yì se, bóló ɔ bo yì w'án klɛ fù ri mɔfáshi bo.» Yì k'àn wɛ́ɛ̀ɛ̂ síkáar mɛ̀l búr. ³⁵ À jùmɔ̂ɔ̂ bè líɲɛ̀n mímí, yì bè yì kar lɛɛ̀n. À Yawutu ŋmelêê bè Yesu flɛ́lɛɛn d'à ri jimin máɛ̀ ɲɔnlɛ, à wo la á byéen ɲɔnli, à nì Kristax kwó, Jɔnɔsɔ ri mùmun mɔtɔ́ŋnɲɛ̀n. ³⁶ À sùrashîìî saaŋ à flɛ́lɛɛn ín. Yì k'á sukúrno à to, yì ki nunɲàn tè à to. ³⁷ Yì k'à wú dé: «Á nì Yawutuì ǹ kìyɛŋntɔn kwó á byéen ɲɔnli.» ³⁸ À ri ɲúr ɲɛ̀nɲɛ̀n à ŋmelî taróo ín dé: «Àniî ki Yawutuì ǹ kìyɛŋntɔn ɔ.» ³⁹ À wɔ́se nan to kpéɲɛ̀n jir níinî máâ bè kwɔ́ɔŋn à ta dé: «Ákún ki Jɔnɔsɔ ǹ Mɔtɔ̂ŋnmun Jiminî ɔ be a? Á byéen ɲɔnli, fù nì ŋmɛ́ɛn.» ⁴⁰ Kɛ̀, à máâ k'à máâ tafɛ́ à b'à lóon dé: «Ákún mùmun ni fù daâ núkúuri mɔ, ákún wo Jɔnɔsɔ ɲɛhlóon be a? ⁴¹ Ŋmɛ́ɛn ni nɛɲɛ̀n, bóló ɔ bo àniî ki ŋmɛ́ɛn ǹ klɛ̀ fù ri kwɔnsɛ ɔ ŋmɛ́ɛn to. Kɛ̀, àni jɔɔ̂ wo bóló gbɔjáal kwòɲɛ̀n bo.» ⁴² Fù jìrɛ̂mun kwɔ́ɔn, k'à wú Yesu se dé: «Yesu, á mùkâr ye byɛ̀ án faŋbéê mɔ, á k'á tɛ́l ɲɛn mún mɔ.» ⁴³ Yesu k'à mɔli dé: «Hlɔ ta, mún n'à lóon á se d'á ri ɲa dɛ́ɛn àrijínɛ̂ mɔ mún wɔ́se.» ⁴⁴ Yekpɛ̀ŋl sɛn sɛn to wóon ki bùrè à kìyɛŋnî nɔ̀nkurn mɔ, fóro gbâr mɔ́n tyáar kúur. ⁴⁵ À yeê k'á ɲátoyáè, à tonyɛɛlklɛ-lɔ́sɔ́ɔɔ̂ wonkárɲɛ̀n wââ ki gbɔ́nè á tyé mɔ. ⁴⁶ Yesu k'á myɛlkwo á faŋsɔ́ɔ ɔ dé: «Ń Tɔ Jɔnɔsɔ, ń ni ń shiî nɛ́nè á kpɛŋn.» À mùfɔn fù ló híin, à yɛŋn marî k'á sɛ́è à kpɛŋn. ⁴⁷ À sùráshîì ŋmelɔn jɔɔ̂ la máno à ŋmɔ́n híin, ki Jɔnɔsɔ súnkwó dé: «Hlɔ ta, àni jɔɔ̂ ki bùkwɔ̀ŋ ɔ ín.» ⁴⁸ Jimiìî mun nɔ̀nkurn n'àni karî yì, fɛ̀ mùfɔn àni gbɔɛ̀ɛ̂ klɛ̀ fáâ ŋmɔ́n, fɛ̀ sɛkɔ́ŋnfɔn yì k'á kàr mɔ ŋmɛ̀ dénno yì ɲámɔɲàn se. ⁴⁹ Yesu hlɔ̀ fɛ̀ɛ̂ nɔ̀nkurn líɲɛ̀n ín dɔ́se yì b'àni gbɔɛ̀ɛ̂ fɔnlɛɛ̀n. Méèlî mun ni kpéɲɛ̀n à ta ín Galile lìbɛ̀ mɔ, fɛ̀ saaŋ tɛ̀ŋnɛ̀n yì wɔ́se ín. ⁵⁰ À kítíkártêê ǹ tobrakúurî mɔ jɔ dyàn ni tɛ̀ŋnɛ̀n ín, fù jɔɔ̂ ki jimin ɲɔn ɔ ín, à bè bùkwɔ̀ŋ; yì r'à fɛ́ɛŋn ín dé Isufu. ⁵¹ Arimati dyɛɛ̂ jir ɔ ín, à Yawutuìî ǹ dyɛɛ̂ ɛ̀. Fù jɔɔ̂ ri Jɔnɔsɔ ǹ faŋbéê kpɛŋnlɛɛ̀n ín. Fù jɔɔ̂ wo kpɛ́ɛn ín á krɔmɛ́ɛ̀ɛ̂ ǹ kɛl gbukɛɛ̀lî nì yì ǹ klɛ gbɔɛ̀ɛ̂ ta ín bo. ⁵² Fù se kwó, ki dénno Yesu nikyɛ́ɛŋɛ̂ nyɛlké Pilati se. ⁵³ Fù jìrɛ̂mun kwɔ́ɔn, k'à nikyɛ́ɛŋɛ̂ kyɛl à kpɛ̂ nanî to, k'à tokɛkɛ̂l wâ lɔ̂ ɔ, ki dénno à nɛ́nké dùkur mɔ. Fù dùkurî ri tìnɲɛ̀n ín táaŋ mɔ, nikyɛ́ɛŋ dó wo tokyɛ́ kɛŋn mùmun mɔ bo. ⁵⁴ Fù yefyɛ̂lî ki júmâ ɔ ín, à tarwɔ yefyɛ̂lî bè yɛŋnja kpɛŋn ta. ⁵⁵ À méèlî mun ni kpéɲɛ̀n ín Yesu ta Galile lì bɛ̀ mɔ, fɛ̀ ri dénno Isufu wɔ́se à tokyɛ́ dùkurî ŋmɔ́nké, yì k'à tokyɛ̂ fáâ yi. ⁵⁶ Fù méèlî k'á sɛno ben nukwɔ́ɔ mɔ́n nì nyɛ́ɛl toben nar sɔ́ɔ mɔtityɛ́ŋnké. Yì k'á kyɛ̀ŋmyɛ̀n à tarwɔ yefyɛ̂lî ta, à tɔ̂ŋnî mɔ à yɛ̀n fáâ to.