¹ À martar-hlárêê n'à ŋmáantêê nɔ̀nkurn k'á sukúr bɛ̀ Yesu ǹ kɛl gbukɛɛ̀lî toná. ² À Farisiyɛ̂ɛ̀ŋɛ̂ n'à tɔ̂ŋn kɛlêê k'á yɛŋn kɔ̀nɔn kɛl kùnmɔ dé: «Àni jɔɔ̂ fɔn sɛ̀bɛ̂bé klɛɛ̀n ŋmáantê se, à bè le leèn yì wɔ́se.» ³ Kɛ̀, Yesu k'àni gbukɛlî kɛl tɛl mɔ dé: ⁴ «Gbò ri fɔn yíkun tyé mɔ, bɛ́bɛ́ɛ kar-kwɛŋl bè tɛ̀ŋnɛ̀n à se, yì mɔ mɔ́n byéen ki jelè, fù tɔŋnî nì bè fù mɔ́n byéenî ɲɛ́nkúna k'à kpɛ̂ŋlŋmɛn àmi fú-kɛlî (99) jél ta klɔŋnkúur se, fóro ki b'à ŋmɔ́n bo? ⁵ À mùkâr ye b'à ŋmɔ́n, k'à gbɔn ɲɛn á bùfàŋn ta á gbɔmɔnar se, ⁶ fù n'à byɛ̀munî ɛ̀ á sádi, k'á jirɛ̂ɛ̀ n'á ɲínɛ́nshî fɛ́ŋn k'à wú yì se dé yì w'àkun kyaŋ fù gbɔmɔnarî kwo, bóló ɔ bo àkun n'án bɛ́bɛ́ɛ jɛɛlmunî ŋmɔ́n. ⁷ Fù fá byéenî to, mún n'à lóon yíkun se, dé ŋmáantɔn jir byéen k'á hlɔ̀má wú, ki kárè gbɔjáal to, fù bè tɛŋna gbɔmɔnarbé à jɔ̀nɔ̀kpár mɔ fɛ̀ɛ̂ se ki jìré à bùkwɔ̀ŋ jir kpɛ̂ŋlŋmɛn àmi fú-kɛlî (99) to, hlɔ̀má togbɔ wo fɛ̀ mun se ká bo. ⁸ Fù nì kwoa bo, mél gbò ri tɛ̀ŋnɛ̀n, kpɛ̂ŋl tɔŋn bin mɔ́n fú b'à se, mɔ́n byéen ki jelè, à wo niyɛ́ɛl brémɔ́n mɔ nyɛ búra, ki srɔ gbɔ̀n k'à lɔ́ɔ̂ mɔ yɛ̀n, k'à ɲɛ́n ɲátolîbê mɔ fóro ki b'à ŋmɔ́n bo? ⁹ À mùkâr ye b'à ŋmɔ́n, k'á jirɛ̂ méèl n'á ɲínɛ́nshî méèl fɛ́ŋn á sádi, k'à wú yì se dé yì w'àkun kyaŋ fù gbɔmɔnarî kwo, bóló ɔ bo àkun n'án kpɛ̂ŋl tɔŋn bin jɛɛlmunî ŋmɔ́n. ¹⁰ Fù fá byéenî to, mún n'à lóon yíkun se, dé ŋmáantɔn jir byéen k'á hlɔ̀má wú, ki kárè gbɔjáal to fù bè tɛŋna gbɔmɔnar gbɔ Jɔnɔsɔ ǹ tɔ́ŋrêê se.» ¹¹ Yesu k'à wú yé dé: «Jɛn-bisháaŋn jir níin tɛ̀ŋnɛ̀n jɔ dyàn se ín. ¹² À srɔ́ɔtɔnî k'à wú yíi tɔɔ̂ se dé: "Ń tɔ, ákún kyɛ̂ŋɛ̂ mɔ mún fù nin fɔŋnî ki mùmun ɔ fù rɔ ń kɛ́ŋ". Yì tɔɔ̂ k'á kyɛ̂ŋɛ̂ síkár, ki yì nɔkɔŋl fù nin fɔŋn ɔ yì kɛ́ŋ. ¹³ Yefyɛ̂l tyáar kúrur jìrɛ̂mun kwɔ́ɔn, à srɔ́ɔtɔnî k'án ŋmɔ̂n mɔ́ɛ̀ɛ̂ nɔ̀nkurn gbe yíi ta, ki fù kpɛ̂ŋlî gbɔ̀n, ki dénno kìyɛŋn má mɔ mùmun fɔŋn bɛl. À mùfɔn lò mímí ni mɔ, k'án nòfelî nìnáè tayáa gbɔɛ̀ klɛfɔn. ¹⁴ À ri gbârî mun ye án nòfelî nɔ̀nkurn nìná kɔ́ŋnè híin, klɔ̂ ki jòè fù kìyɛŋnî mɔ, le ki dìrè à to. ¹⁵ À la máno tɛ̀ŋn híin, ki dénno déké klɛwɔ mɔ fù kòkɛ̀lî mɔ jir má se. Fù tɔŋnî ki dénno à búrké án klɔŋ mɔ kíìr toblɔ fɔŋn. ¹⁶ À r'à se ki fù kíìr leyɛ́ɛŋnî má kun ín, k'á to klɔ̂ kár fù rɔ, kɛ̀ dó wo fù bóló tea à to bo. ¹⁷ Tɛ́l dyàn ki bɛ à se, k'à wú á byéen wono d'àkun tɔɔ̂ se klɛwɔ-klɛrɔn jir gbá ri tɛ̀ŋnɛ̀n fɛ̀ bè le di nì búur jéelnè? Àkun bè fɔn klóon klɔ̂ kpɛŋn. ¹⁸ D'àkun b'á sɛkɔ́ɔŋn, ki don à wúké dé: "Ń tɔ, mún ni tɔ̂ŋn kútâr Jɔnɔsɔ se, ¹⁹ ń ki gbɔ jáal kwo ákún to; mún wo ɲɔn ń ki fɛ́ŋn ká d'ákún dye-jɛn bo, mún gbɔjìr án klɛwɔ klɛrêê gbɔjir fáâ to". ²⁰ À jɔɔnî ki dukúno á tɔɔ̂ besé. À bè dɔ́se yé, à tɔɔ̂ k'à blakún ŋmɔ́n, à mùnur k'à ja, ki túno á bɔ̀ kekɛ̂lkúnè à kpra k'à tìn táè á kàr mɔ. ²¹ À dye jɔɔ̂ k'à wú à se dé: "Ń tɔ, mún ni tɔ̂ŋn kútâr Jɔnɔsɔ se, ń ki gbɔ jáal kwo ákún to; mún wo ɲɔn ń ki fɛ́ŋn ká d'ákún dye-jɛn bo". ²² Kɛ̀, à jɔɔnî tɔɔ̂ k'á wú án klɛwɔ klɛrêê se dé yì w'à wâɛ̀ɛ̂ nɔ̀nkurn to ɲɔn fù ri gbɔn bɛ á munân ɔ, dé yì ki fù nɛ́n à kpra, fù nì daan, yì ki fù nɛ́n à kpɛŋnbin to, fù nì sáaŋn, yì ki fù nɛ́n à níi to. ²³ Dé yì wo don à nal káarn kùrmun ɲɔn sɔ́ɔɔ̂ jakún bɛ kprakwa, dé yíi ki gbɔmɔnar wúwɔ́ɔŋ le táaŋn di. ²⁴ Fù bóló ɔ bo d'àkun dye jɔɔnî mun nɛn, à ri jelè ín ki bè ŋmɔ́n. À ri tɛ̀ŋnɛ̀n ár'à ri kúɲɛ̀n ín, ki ɲìnɛ̀n bɛ. Yì ki jo à gbɔmɔnar wúwɔ́ɔŋɔ̂ wúwɔ́ŋ to á tìyà fá to. ²⁵ Fù r'à ŋmɔ́n, à dye-jɛn klɔ̀rɔnî bè mí yé klɔŋn se. À mùfɔn á sɛbɛ shùnja di yɛŋn to, ki binmɔ́ɛ̀ myɛl ná, fù nì sɛŋn sɛŋn myɛl, ²⁶ k'á tɔɔ̂ ǹ klɛwɔ klɛrêê mɔ jir má fɛ́ŋn, k'á sádi klɛgbɔɔ̂ mɔ fá dukwo fù se. ²⁷ Fù jɔɔ̂ k'à wú à se d'à srɔ́ɔ jɔɔ̂ r'á sɛbɛ̀ɲɛ̀n, à tɔɔ̂ k'à nal káarn kùrmun ɲɔn sɔ́ɔɔ̂ kwo à se bóló ɔ bo à ri bɛ̀ lo á kpɛ́ln ɔ. ²⁸ À jɔɔ̂ dye-jɛn klɔ̀rɔnî k'á nìrfúnè, k'á káè dɛ́ɛ ɔ di. À tɔɔ̂ ki lìno à tonyɛlkún bɛ̀ dé di. ²⁹ À la máno tɛ̀ŋn híin, k'à wú á tɔɔ̂ se de: «À ri fɔn nɔ̀tɔ̂ŋn mimyɛ́ɛl ŋmɔ́nɲɛ̀n mún b'ákún ǹ klɛwɔɛ̀ɛ̂ klɛɛ̀n á n'à ŋmɔ́n árí ń ki fwɔŋ ɔ, ń w'án tɔ̂ŋ to ń ká din bo. Ákún wo blebin tè din mún to ń k'à nɔ wúwɔ́ɔŋ le táaŋn di ń jirɛ̂ wɔ́se bo. ³⁰ Kɛ̀, á dye jɔɔ̂ mun nɛn, à ri byɛ̀, àkun mùmun dénno án nòfelî nìnáké tayáabê klɛfɔn mímyée sɔ́ɛ̀ wɔ́se, á ki nal káarn kùrmun ɲɔn sɔ́ɔɔ̂ kprakwa fù se. ³¹ À tɔɔ̂ k'à wú à se dé: «Ákún kwó, ń tɔé, ákún fɔn mún wɔ́se gbángbâr mún kpɛŋnmɔ́ɛ̀ɛ̂ nɔ̀nkurn k'ákún fù rɔ, ³² kɛ̀, fóro ŋmɛ́ɛn k'àni gbɔmɔnar wúwɔ́ɔŋɔ̂ wúwɔ́ŋ, bóló ɔ bo ákún srɔ́ɔ jɔɔ̂ mun nɛn, à ri jelè ín ki bè ŋmɔ́n. À ri tɛ̀ŋnɛ̀n ár'à ri kúɲɛ̀n ín, ki ɲìnɛ̀n bɛ."»