¹ Fù jìrɛ̂mun kwɔ́ɔn, à Yawutuìî ǹ wúwɔ́ɔŋ dyàn ki tɛŋn Jerisalɛmu dyɛɛ̂ mɔ, Yesu ki dúno mímí. ² Jerisalɛmu dyɛɛ̂ dɛ́ɛ yéenî jɛ̀nî se, à bɛ́bɛ́ɛ̀ dɛ́ɛ yéenî blɛ̀ se nun-mwɔn bɔ̂n sɔ́ɔ dyàn ni tɛ̀ŋnɛ̀n ín, yì b'à fɛ́ɛŋn ébúrû jɛ́ɛn mɔ dé Betisada. Fù nun-mwɔnî kpra dàn mɔ́n kwɛŋl bè tɛ̀ŋnɛ̀n. ³ Fù dàɛ̀ɛ̂ kɔ̀nɔn láaŋrɔn tyɛɛ́ŋ sɔ́ɔ bè shín shínɲɛ̀n: À kyaâr gbo, à kpaŋlbyéentê gbo, à mòròkôè gbo. [Yì b'à nunî mɔkinî kpɛŋnlɛɛ̀n. ⁴ Fù bóló ɔ bo mɛ̀lɛ̀kɛ̂ dyàn ni bɛ nì bɛ kyɛl dyàno, à nun-mwɔn bɔ̂n sɔ́ɔɔ̂ mɔ, ki b'à nunî mɔkìn. Jiminî mun nɔkɔŋl kyɛ̀ŋl ki kyɛl hìn tɛŋn à nunî mɔ, à mɔkìnmun kwɔ́ɔn, láaŋâ mun nɔkɔŋl fù jiminî to ín, fù ri kɔ́ɔŋnè.] ⁵ Fù tíkɛ́lî mɔ láŋrɔn jɔ dyàn ni tɛ̀ŋnɛ̀n ín, fù jɔɔ̂ ǹ láaŋâ k'à jàâ bè nɔ̀tɔ̂ŋn kufú àmi kprɛɛn (38) ŋmɔ̂nɲɛ̀n. ⁶ Yesu k'à shínɲɛ̀n ŋmɔ́n, k'à shu d'àni jɔɔ̂ ǹ láaŋâ mɔdâlmun ɔ à mɔ, k'à du dé: «Á r'à se á ki kpɛ́lnja a? Jɔ!» ⁷ À láŋrɔn jɔɔ̂ k'à mɔli dé: «Ń Totɔn, dó wo fɔn mún se, fù ki mún gbɔn búr à nun-mwɔnî mɔ, à nunî mɔkin gbâr ye bo. Mún ki ń toká joɛl fɔn, jir má jòmun ɔ mún ɲɛ.» ⁸ Yesu k'à wú à se dé: «Dukú, á k'á shínmɔ́nî gbɔ̀n, á ki kél.» ⁹ À jɔɔ̂ ki kpɛ́lnjàè fù tíkɛ́l byéenî mɔ, k'á shínmɔ́nî gbɔ̀n, ki jo kɛ́ɛl to. ¹⁰ Fù yefyɛ̂lî k'à yawutuìî ǹ tarwɔɔ̂ rɔ ín. À Yawutu ɲɛrotêê k'à wú à kpɛ́lnjàɲɛ̀n jɔɔ̂ se dé: «Ɲa ki tarwɔ ɔ, ɲɛ̂l wo tèɲɛ̀n á to, á k'á shínmɔ́nî gbɔ̀n bo.» ¹¹ Kɛ̀, à jɔɔ̂ k'à wú yì se dé: «Jɔɔ̂ mun ni mún kpɛ́lnjàɲɛ̀n fù r'à ló dé ń wo ń shínmɔ́nî gbɔ̀n dé ń ki kél.» ¹² Yì k'à du dé: «Gbò k'à lô tɔŋnî ɔ d'á w'á shínmɔ́nî gbɔ̀n d'á ki kél?» ¹³ Kɛ̀, à láaŋrɔn jɔɔ̂ w'á kpɛ́lnjàɲɛ̀n jɔɔ̂ shùɲɛ̀n ín bo; fù bóló ɔ bo Yesu r'á yɛn lìɲɛ̀n ín fù tíkɛ́lî jùmɔ̂ɔ̂ mɔ. ¹⁴ Fù jìrɛ̂mun kwɔ́ɔn, Yesu ki dénno à jɔɔ̂ ŋmɔ́nké à tonyɛɛlklɛ-lɔ́sɔ́ɔɔ̂ dishɛ́ŋɛ̂ mɔ, k'à wú à se dé: «Á la kyáŋmɔ kpɛ́lnjàè, be gbɔjáal kwo ká bo dɛ́! Narî mun ni jaar láaŋ to, nɔkɔ́ŋl fù b'á ŋmɔ́n bo.» ¹⁵ À láŋrɔn jɔɔ̂ ki dénno à wúké à Yawutu ɲɛrotêê se dé Yesu mùn k'àkun kpɛ́lnjà jɔɔ̂ rɔ. ¹⁶ Fù mùn n'à jɛ́l à Yawutu ɲɛrotêê ki jo Yesu to fá ɲɛ́ɛn to, bóló ɔ bo à ri fù gbɔɔ̂ klɛ̀ tarwɔ yefyɛ̂l ta. ¹⁷ Kɛ̀,Yesu ki yì ǹ gbukɛlî mɔli dé: «Mún Tɔ Jɔnɔsɔɔ̂ r'á klɛgbɔ klɛɛ̀n tòmɔ̀-tomɔ, mún saaŋ fɔn fù to.» ¹⁸ Fù mùn n'à jɛ́l à Yawutu ɲɛrotêê k'á sɛ̀bɛ̂ ɔ Yesu to fá ɲɛ́ɛn yé à krɔ ɔ, bóló núkwɔ́ɔn ɔ bo, à r'à lóon d'àkun Tɔ ki Jɔnɔsɔ ɔ, à bè saaŋ á byéen shaaŋn Jɔnɔsɔ to, fù takɛɛl mɔ à bè saaŋ à tarwɔɔ̂ yefyɛ̂lî gbɔ mɔŋmɛɛ̀ln. ¹⁹ Yesu ki yì ǹ gbukɛlî mɔli dé: «Hlɔ ta, hlɔ ta, mún n'à lóon yíkun se dé Dye-Jɛn wo bóló kwo hìn á byéen, à wo mùmun klɛ fɔn ŋmɔ́n Tɔ se bo. Tɔ ri gbɔɔ̂ mun nɔkɔŋl klɛɛ̀n, Dye-Jɛn saaŋ fù byéenî klɛɛ̀n máno fá byéen. ²⁰ Fù bóló ɔ bo Dye-Jɛn gbɔ ki Tɔ mɔnarî se, à r'án klɛ gbɔ kúur nɔkɔŋl fáyɛɛ̀n à to. Tɔ bè klɛgbɔ máɛ̀ yɛna Dye-Jɛn to yé, mùmun bè nur àniìî to, nɔkɔ́ŋl yíkun won ki kɔ́ŋnê. ²¹ Fù wono, Tɔ ri fáâ mun to jimin klômɛ́ɛ̀ ɲinɛɛ̀n, k'à kwo yì ki tɛŋn á lɛ̀ ɔ, fù fá byéenî to Dye-Jɛn ni jimin klômɛ́ɛ̀ ɲinɛɛ̀n yì ki tɛŋn á lɛ̀ ɔ, à r'à se mɛ̀mun ki tɛŋn á lɛ̀ ɔ. ²² Tɔ Jɔnɔsɔ wo jimin dó kítíin bo, kɛ̀ à r'à kítí kár gbɔɛ̀ɛ̂ nɔ̀nkurn tèɲɛ̀n Dye-Jɛn to, ²³ nɔkɔ́ŋl jimiì ri fáâ mun to Tɔ ɲɛflɛ́ɲɛɛ̀n, yì ki máno Dye-Jɛn ɲɛflɛ́ɲɛn. Jiminî mun wo Dye-Jɛn ɲɛflɛ́ɲɛɛ̀n bo, fù jiminî saaŋ Dye-Jɛn tɔ́ŋ bɛ̀ Tɔɔ̂ ɲɛflɛ́ɲɛɛ̀n bo. ²⁴ Hlɔ ta, hlɔ ta, mún n'à lóon yíkun se dé jiminî mun ki mún ǹ gbukɛlî toná, ki mún tɔ́ŋ bɛ̀ tɔŋnî gbɔ hlɔja, fù ri dɔ kaarn shi ŋmɔ́nɲɛ̀n; à wo déa kítí mɔ bo. Fù jiminî ri lɛ̀ kún mɔ, ki tɛŋn shi mɔ. ²⁵ Hlɔ ta, hlɔ ta, mún n'à lóon yíkun se, dé ye dyàn bè fɛ́a, fù yeê nɔ̀nkurni fyɛ̂mun ɔ. Jimin klômɛ́ɛ̀ bè Jɔnɔsɔ Dye-Jɛnî kɛl myɛl náa, mɛ̀mun n'à kɛl myɛlî ná fɛ̀ bè tɛŋna á lɛ̀ ɔ. ²⁶ Tɔ nɔ̀nkurni mun ki shi fin ɔ, fù fá byéenî to, Tɔ ri shi tɛ̀ Dye-Jɛn to. Dye-Jɛn nɔ̀nkurni ki saaŋ tɛŋn shi fin. ²⁷ Tɔ ri faŋbé tèɲɛ̀n Dye-Jɛn to kítí káar ɔ, bóló ɔ bo jimin Dye-Jɛn* ɔ. ²⁸ Yíi b'à jél mún ǹ lóo fù ri ki tɛŋn yíkun se yɛŋntajò gbɔ bo, bóló ɔ bo gbâr dyàn bè loa, jimin klômɛ́ɛ̀ɛ̂ mun ni tɛ̀ŋnɛ̀n á dùkur mɔ, fɛ̀ b'à myɛl náa, ²⁹ yì ki li á dùkur mɔ. Mɛ̀mun ni gbɔɲɔn kwòɲɛ̀n, fɛ̀ bè ɲinɛna, yì ki tɛŋn á shi mɔ. Mɛ̀mun nì gbɔjáal kwòɲɛ̀n, fɛ̀ bè ɲinɛna, yì ki kítî. ³⁰ Mún wo bóló kwo hìn ń byéen fù loô rɔ bo, mún ni kítí káarn nì yan Jɔnɔsɔ se ná fù ri to. Mún ni kítí káarn à fá to, bóló ɔ bo mún wo ń tìyàgbɔ klɛɛ̀n bo, ń tɔ́ŋ bɛ̀ tɔŋnî tìyàgbɔ kwó kɛ̀. ³¹ Mún nì ń byéen gbɔ tokɛɛ̀ln, fù bè tɛŋna hlɔ gbukɛl yíkun se bo. ³² Jir má ri mún gbɔ tokɛɛ̀ln, mún n'à shi d'à ri nínshîbéê mun klɛɛ̀n mún gbɔ tokɛlî wono, fù k'à hlɔɔ̂ rɔ. ³³ Yíkun ni jimiì tɔ́ŋno Yuhana se, k'à hlɔɔ̂ gbɔ mɔ nínshîbé gbukɛl kɛl. ³⁴ Mún kwó, jimin dó ǹ nínshîbé gbukɛl kɛlî togbɔ wo mún se bo, kɛ̀ mún n'àni gbɔɛ̀ɛ̂ lóon nɔkɔ́ŋl yíkun ɲɔn ki li. ³⁵ Yuhana ki woyɛ́ɛl-brémɔ́n ɔ ín, ki woyɛ́ɛl búr, yíkun kwó, yíkun n'à se ín yíi ki gbɔmɔnarbê kwo gbâr tíin tyé mɔ fù woyɛ́ɛlî to. ³⁶ Kɛ̀, gbɔɛ̀ɛ̂ mun ni wúɲɛ̀n mún gbɔ mɔ, mún ǹ klɛgbɔɛ̀ɛ̂ r'à yɛ̀nɲɛ̀n d'à ri sɔ́ɔ Yuhana ǹ lô fù ri to: mún Tɔɔ̂ ri klɛgbɔɛ̀ɛ̂ mun kwò mɔyîn gbɔ wúɲɛ̀n mún se, mún ni fɛ̀ mun klɛɛ̀n, fù klɛgbɔɛ̀ɛ̂ r'à yɛɛ̀n dé mún Tɔ Jɔnɔsɔɔ̂ ri mún tɔ́ŋɲɛ̀n. ³⁷ Mún Tɔ Jɔnɔsɔɔ̂ mun ni mún tɔ́ŋ bɛ̀ɲɛ̀n, fù nɔ̀nkurni ri nínshîbé gbukɛl kɛl mún gbɔ mɔ. Yíkun w'à kɛl myɛl toná din bo, yíkun w'à ɲáa mɔ ŋmɔ́n din bo. ³⁸ Àn kɛl gbukɛlî wo ɲínɛ́ɛn fɔŋn ŋmɔ́n yíkun nìryɛŋn ta bo, bóló ɔ bo yíkun w'àn tɔ́ŋ bɛ̀ tɔŋnî gbɔ hlɔjà bo. ³⁹ Yíkun ni Jɔnɔsɔ ǹ gbukɛlî ɲwârmunî tityɛ́ŋn kɛɛln ɲɔn sɔ́ɔ à Sɛ́bɛ̂ɛ̂ mɔ, bóló ɔ bo yíkun n'à se yíi ki dɔ kaarn shi ŋmɔ́n fù wono, fù gbukɛlî ɲwârmunî bè mún gbɔ dèndɛ́nɲɛ̀n. ⁴⁰ Fù n'á nɔ̀nkurn wono, yíkun w'à se yíi ki kpé mún ta nɔkɔ́ŋl yíi ki dɔ kaarn shi ŋmɔ́n bo! ⁴¹ Mún wo jimiì ǹ ɲɛflɛ́ɲɛ̀n ɲɛ́ɛn bo. ⁴² Kɛ̀, mún ni yíkun shi: Jɔnɔsɔ gbɔmɔnarî wo tɛ̀ŋnɛ̀n yíkun se yíi nìryɛŋn ta bo. ⁴³ Mún ni bɛ̀ɲɛ̀n mún Tɔ Jɔnɔsɔɔ̂ yin ɔ, yíkun wo mún gbɔ toshɛ́ bo. Jir má nì blaàn á byéen yin ɔ, yíkun bè fù gbɔ tosɛ́a. ⁴⁴ Yíkun bè gbáno mún gbɔ hlɔjabɛ̂? Yíkun b'à se yíkun byéen byéenî ki yíi ɲɛflɛ́ɛ ŋmɔ́n yíi se, ta ɲɛflɛ́ɛɛ̂ mun ni lɛɛ̀n Jɔnɔsɔ byéen nì byéenî se, yíkun wo fù ɲɛ́ɛn bo. ⁴⁵ Yíi b'à búr á ŋmel mɔ dé mún bè yíkun nɛa mún Tɔ Jɔnɔsɔɔ̂ se bo dɛ́! Yíkun nɛtɔnî bè tɛŋna Musa, yíkun n'á kpɛŋnjàɲɛ̀n fù mun to. ⁴⁶ Yíkun ki Musa gbɔ hlɔjà kwó ín, yíkun ni saaŋ mún gbɔ hlɔjaa ín, bóló ɔ bo Musa ri mún gbɔ dèndɛ̂nî ɲwár sɛ́bɛ̂ mɔ. ⁴⁷ Kɛ̀, yíkun w'à sɛ́bɛ̂ɛ̂ mɔ Musa ǹ ɲwâr gbɔɛ̀ɛ̂ hlɔjaàn bo, yíkun bè gbáno mún ǹ kɛl gbukɛɛ̀lî hlɔjabɛ̂?»