¹ Díryɔ́ŋ funkpɛ̂ɛ̂ bè gbukɛl ŋmɔ́n, fù gbukɛlî bè tɛ̀ŋnɛ̀n Jɔnɔsɔ wɔ́se, fù gbukɛlî nɔ̀nkurni bè Jɔnɔsɔ. ² À ri tɛ̀ŋnɛ̀n ín díryɔ́ŋ funkpɛ̂ gbâr ye Jɔnɔsɔ wɔ́se. ³ Mɔ́n kúur nɔ̀nkurn ni búr lìɲɛ̀n fù gbukɛlî se, fù to mɔ́n bóló wo tɛ̀ŋnɛ̀n fù Gbukɛlî wo mùmun búrɲɛ̀n bo. ⁴ Shi ri lɛ̀ àkun mɔ, fù shiî ki tɛ̀ŋnè niyɛ́ɛl jimiì se. ⁵ Fù niyɛ́ɛlî ri woyɛ́ɛl lɛɛ̀n butúun mɔ, butúun w'à gbɔ hláan á to bo. ⁶ Jɔnɔsɔ ki jɔ dyàn tɔ́ŋ bɛ, yì r'à fɛ́ɛŋn ín dé Yuhana. ⁷ Fù jɔɔ̂ ri byɛ̀, ki bɛ tɛŋn fù niyɛ́ɛlî nínshî, ki fù niyɛ́ɛlî nínshîbé kwo, nɔkɔ́ŋl jimiì ki gbɔ hlɔja àkun faŋ mɔ. ⁸ Yuhana ki tù niyɛ́ɛl ɔ ín bo, kɛ̀ à ri byɛ̀, tɔŋnî mun ki niyɛ́ɛl ɔ, ki fù nínshîbé kwo. ⁹ Fù niyɛ́ɛlî k'à niyɛ́ɛl sɛ̀bɛ̂ sɛ̀bɛ̂ sɔ́ɔɔ̂ rɔ ín, à ri byɛ̀ díryɔ́ŋ mɔ woyɛ́ɛl lɛ ɔ jimiì nɔ̀nkurn se. ¹⁰ Fù Gbukɛlî mùn ni fɔn ín díryɔ́ŋ mɔ. À ri díryɔ́ŋ bré ín kɛ̀ jimiì w'à hlɔ̀ tɔŋnî mun ɔ à gbɔ tosyɛ́ bo. ¹¹ À ri byɛ̀ á fù tɔbin kúurî se, kɛ̀ à fù tɔbin kúurî k'á ká se. ¹² Fù n'á nɔ̀nkurn mɔ, mɛ̀mun n'à gbɔ toshɛ́, yì k'à gbɔ hlɔja, à ri Jɔnɔsɔ dyebê mɔ tɛŋn ɲɛ̂l tɛ̀ fɛ̀ nɔ̀nkurn to, yì ki tɛŋn Jɔnɔsɔ derê. ¹³ Fù derêê wo kwɔ̀ŋɲɛ̀n jimin kwɔŋ fáâ to bo, yì kwɔ̀ŋɔ̂ wo jimin mɔ lɛ̀ gbɔ ɔ bo, à wo jɛn mɔ lɛ̀ gbɔ ɔ bo, kɛ̀ fù derêê kwɔ̀ŋɔ̂ ri tɛ̀ŋn Jɔnɔsɔ mɔ lɛ̀ gbɔ. ¹⁴ Fù Gbukɛlî k'á tojìr tɛ̀ŋnè jimin, ki bè ɲínɛ́ɛn ŋmɛ́ɛn tyé mɔ, ŋmɛ́ɛn k'àn lobéê ŋmɔ́n, lobéê mun tɛ̀ŋnɛ̀n árí Jɔnɔsɔ se lɛ̀ Dye-Jɛn mɔ́nbyéenî fù ri ɛ̀, à bè ywárɲɛ̀n jàrfyɛ nì hlɔ ɔ. ¹⁵ Yuhana k'à yɛ̀n nínshîbé mɔ á myɛl tokpâr ɔ fù jɔɔ̂ gbɔ mɔ dé: «Mún ni jɔɔ̂ mun gbɔ lóon ín, d'à ri blaàn ín mún besé, fù jɔɔ̂ rɛn, à ri nur mún to, bóló ɔ bo à fɔn wà ín, mún nyân.» ¹⁶ À ri ywárɲɛ̀n mɔ́nî mun mɔ, ŋmɛ́ɛn byéen byéenî ki ŋmɔ́n fù mɔ, fù nì jàrifyɛ ki búr jàrfyɛ ta. ¹⁷ À tɔ̂ŋn sɛ́bɛ̂ɛ̂ ri ŋmɔ́nɲɛ̀n Musa se ki tè ŋmɛ́ɛn to, kɛ̀ jàrfyɛ nì hlɔ ri ŋmɔ́nɲɛ̀n Yesu Krista se. ¹⁸ Jimin dó wo Jɔnɔsɔ ŋmɔ́n din fífí bo. Kɛ̀, Dye-Jɛn mɔ́nbyéenî mun ni tɛ̀ŋnɛ̀n Jɔnɔsɔ wɔ́se, yì bè yíi won shi, àkun mùn la à mɔfáló. ¹⁹ Yuhana ǹ nínshîbé gbukɛlî rɛn. À Yawutu ɲɛrotêê ri gbârî mun ye à flɛ́klɛrêê nì Lefi buryinî tɔ́ŋè Jerisalɛmu dyɛɛ̂ mɔ tɛ̀ŋn mɔ Yuhana se, yì r'à dù dé: «Ákún ki gbò rɔ?» ²⁰ À wo tàr án gbukɛlî mɔ bo, k'à mɔli à fá to yì nɔ̀nkurn ɲíɲra dé: «Mún ki Krista ɔ bo dɛ́, àkun mun ki Jɔnɔsɔ ǹ Mɔtɔ̂ŋmun Jiminî ɔ.» ²¹ Yì k'à du dé: «À la máno tɛ̀ŋn híin, ákún ki Eli ɔ la kpɛ́ b'a? Yuhana k'à wú dé: «Owo dɛ́, mún ki Eli ɔ bo.» Yì k'à du dé: «Ákún ki la à Tɔ́ŋrɔnî ɔ kpɛ́ b'a?» K'à mɔli dé: «Owo.» ²² À la máno tɛ̀ŋn híin, á ki tɔŋnî mun ɔ á byéen se, fù wú ŋmɛ́ɛn se nɔkɔ́ŋl n̂ k'à sɛɛŋnlî teké ŋmɛ́ɛn tɔ́ŋ bɛ̀ tê to. ákún se kwó ákún la ki la gbò rɔ?» ²³ Yuhana k'à wú dé Tɔ́ŋrɔn Esayi ǹ wú jìrɛ̂ fáâ to dé: «Mún k'à klɔŋnkúur se gbɔ́nkɔ́klɛrɔnî ɔ dé yíi wo n̂ Totɔn jìrɛ́ɛ ɲɛ̂ɛ̀lî sòlnja.» ²⁴ Tɔ́ŋrêê mun ni tɔ́ŋ bɛ̀ɲɛ̀n Yuhana se, fɛ̀ ki Farisiyɛ̂ɛ̀ŋa ɔ ín. ²⁵ À Yawutu ɲɛrotêê k'à du dé: «À ri gbáno jà á bè jimiì tyɛl-tofénéjaàn, ákún wo Krista mún ki Jɔnɔsɔ ǹ Jimin Mɔtɔ̂ŋnmunî ɔ bo, ákún wo Eli ɔ bo, fù nì kwoa bo, ákún w'à tɔ́ŋrɔnî ɔ bo?» ²⁶ Yuhana ki yì ǹ gbukɛlî mɔli dé: «Mún ni jimiì tyɛl-tofénéjaàn nun ɔ. Jir fɔn líɲɛ̀n yíkun tyé mɔ, yíkun wo mùmun shi bo, fù ri mí blaàn mún besé, ²⁷ mún ni fáaŋn fù ǹ sáɛ̀ŋɛ̂ mɔyɛŋlî jal ɔ.» ²⁸ Fù gbɔɛ̀ɛ̂ ri klɛ̀ Betani dyɛɛ̂ mɔ, Jurudɛni yísɔ́ɔɔ̂ kɛɛl máâ mɔ, Yuhana ri jimiì tyɛl-tofénéjaàn ín tíkɛ́lî mun mɔ. ²⁹ Fù wóontɛ̂lî mɔ Yuhana ki Yesu blakún ŋmɔ́n àkun bén se, Yuhana k'à wú dé: «Jɔnɔsɔ ǹ bɛ́bɛ́binî rɛn, mùmun ni jimiì to gbɔjáal gbɔɔ̀n li. ³⁰ Mún ni mùmun gbɔ lóon ín d'à ri mí blaàn mún besé, à ri nur mún to, bóló ɔ bo à ri fɔn wà ín mún nyân. ³¹ Mún wo fù tɔŋnî shi ín bo. Mún ni byɛ̀ jimiì tyɛl-tofénéja ɔ nun ɔ nɔkɔ́ŋl Isirayɛli buryinî k'à shu.» ³² Yuhana k'án ŋmɔ́n jìrɛ̂ gbɔɛ̀ɛ̂ dɛ̀ndɛn dé: «Mún ni Tɛ́l-Féné kyɛl blakún ŋmɔ́n ín ki li à jɔ̀nɔ̀ ɲɛ árí yekákwoon, ki b'á twólè Yesu fléen ki tɛ̀ŋnè. ³³ Fù klɛ̀ kaarn gbâr yé, mún wo fù tɔŋnî shi ín bo, kɛ̀ tɔŋnî mun ni mún tɔ́ŋ bɛ̀ɲɛ̀n ín jimiì tyɛl-tofénéja ɔ nun ɔ, fù r'à ló ín dé mún bè Tɛ́l-Féné kyɛl blakún ŋmɔ́na, ki b'á twólê jɔ dyàn fléen, ki tɛŋnê, d'àkun ni jimiì tyɛl-tofénéjaàn Tɛ́l-Féné ɔ. ³⁴ Mún k'à ŋmɔ́n, ń b'à wú hìn hlɔtabê mɔ dé fù jɔɔ̂ ki Jɔnɔsɔ Dye-Jɛnî ɔ.» ³⁵ Fù wóontɛ̂lî mɔ, Yuhana b'á sɛtɛ̀ŋnɛ̀n yé fù tíkɛ́l byéenî mɔ án kɛɛln-bisháɛ̀ŋɛ̂ mɔ jir níin wɔ́se; ³⁶ ki Yesu jìrékɔ́ɔŋnkún ŋmɔ́n, k'à wú dé: «Jɔnɔsɔ ǹ bɛ́bɛ́binî rɛn.» ³⁷ Yuhana ǹ kɛɛln-bisháaŋn jir níinî ki fù gbukɛlî ná kpɛŋn ta kpé Yesu ta. ³⁸ Yesu k'á besé yi, k'à ŋmɔ́n yì bè kpéɲɛ̀n àkun ta, ki yì du dé: «Yíkun ni myɛ́n ɲɛ́ɛn?» À kɛɛln-bisháɛ̀ŋɛ̂ k'à mɔli dé: «Rabi, ákún tɛ̀ŋn fɔŋnî ki fɛ́ɛŋn ɔ?» (Rabi, fù k'à lóo ɔ dé Kɛlɔn.) ³⁹ Yesu k'à wú yì se dé: «Yíi wo bɛ, yíi b'à ŋmɔ́na.» À kɛɛln-bisháɛ̀ŋɛ̂ ki dénno à tɛ̀ŋn fɔŋnî ŋmɔ́nké. Yì ki tɛ̀ŋnè à wɔ́se fù lɔɔ̂ mɔ. Fù wóonî ki ye togbál gbâr ɔ ín. ⁴⁰ Fù kɛɛln-bisháaŋn jir níinî mun ni Yuhana ǹ gbukɛlî ná yì ki kpé Yesu ta, Simɔn Piyɛri srɔ́ɔ Andere ki fɛ̀ mɔ jir ɔ ín. ⁴¹ Andere k'à kyɛ̀ŋlî ɔ dénno á ɲínkar Simɔn se, k'à wú dé: «Ŋmɛ́ɛn ni Krista ŋmɔ́n.» Fù k'à lô ɔ grɛki jɛ́ɛn mɔ dé Jɔnɔsɔ ǹ Jimin mɔtɔ̂ŋnmun. ⁴² Andere ki Simɔn jàno Yesu se. Yesu ki Simɔn ɲáa mɔ yi, k'à wú dé: «Ákún ki Jonasi dye-jɛn Simɔn ɔ, á yin bè nɛ́nbɛ̂ dé Piyɛri.» (Piyɛri k'à lô ɔ dé táaŋ.) ⁴³ Fù wóontɛ̂lî mɔ Yesu k'á byéen mɔtityɛ́ŋn Galile kìyɛŋnî mɔ kɔ́ɔŋn ɔ, ki Filipu ŋmɔ́n, k'à wú fù se dé: «Kpé ń ta.» ⁴⁴ Filipu ki Betisayida dyɛɛ̂ jir ɔ ín, Andere nì Piyɛri ǹ dyɛɛ̂ ɛ̀. ⁴⁵ Fù jìrɛ̂mun kwɔ́ɔn, Filipu ki dénno Natanayɛli se, k'à wú à se dé: «Jɔnɔsɔ ǹ mɔtɔ̂ŋnmun jiminî mun gbɔ ri ɲúrɲɛ̀n ín, Musa ǹ ɲwár sɛ́bɛ̂ɛ̂, nì Jɔnɔsɔ ǹ twɔ́ɔŋnlórêê ǹ ɲwâr sɛ́bɛ̂ɛ̂ mɔ, ŋmɛ́ɛn la à ŋmɔ́n. Fù mun ki Isufu dye-jɛn Nasarɛti jir Yesu ɔ.» ⁴⁶ Natanayɛli k'à wú à se dé: «Mɔ́n ɲɔn ŋmɔ́n hìn ki li Nasarɛti a?» Filipu k'à mɔli dé: «Bɛ à yi.» ⁴⁷ Yesu ki Natanayɛli ŋmeljìr blakún ŋmɔ́n àkun tɛ̀ŋn bénî se, ki kɛl à gbɔ mɔ dé: «Àniî ki la Isirayɛli jir sɛ̀bɛ̂ sɛ̀bɛ̂ sɔ́ɔɔ̂ rɛn, mùmun wo dɔ̀nblî klɛɛ̀n fífí bo.» ⁴⁸ Natanayɛli k'à du dé: «Ákún ni gbáno mún hlɔ̀?» Yesu k'à mɔli dé: «Filipu k'á fɛ̂ŋnî n'á to gbɔ tyé mún n'ákún ŋmɔ́nɲɛ̀n ín, á b'à bwɛl finî tɔŋn. ⁴⁹ Natanayɛli k'à sɛwú dé: «Kɛlɔn, ákún ki Jɔnɔsɔ Dye-Jɛnî ɔ, á bè Isirayɛli buryini ǹ kìyɛŋntɔn.» ⁵⁰ Yesu k'àn gbukɛlî mɔli dé: «Á ri fù lóon bóló ɔ bo mún n'à ló dé ń n'ákún ŋmɔ́n à bwɛl finî tɔŋn a?, fù r'à jɛ́l á bè gbɔ hlɔjaàn. Á bè gbɔ sɔ́ɔ máɛ̀ ŋmɔ́nbɛ̂ yé mùmun b'á dɔ ɔ àniìî to.» ⁵¹ Yesu k'à wú dé: «Hlɔ ta, hlɔ ta, mún n'à lóon yíkun se dé yíi bè jɔ̀nɔ̀kpár mɔflìɲɛ̀n ŋmɔ́na, Mɛlɛkɛɛ̀ bè dú n'á sɛkyɛl Jimin Dye-Jɛn to.»