¹ Mangataka anareo aho noho izany, ry rahalahy, noho ireo famindram-pon'Andriamanitra, mba hanolotra ny vatanareo ho sorona velona, masina, eken' Andriamanitra. Izany no fanompoanareo araka ny tokony ho izy. ² Aza mitovy amin'izao tontolo izao, fa miovà amin'ny fanavaozana ny sainareo. Ataovy izao mba ho fantatrareo izany tsara, azo ekena, ary ny sitrapo lafatr'Andriamanitra. ³ Fa ambarako, nohon'ny fahasoavana izay nomena ahy, ny tsy tokony hananan'ny rehetra izay eo aminareo eritreritra hanambony ny tenany mihoatra izay tokony ho eritreretiny. Fa kosa, tokony hieritreritra am-pahendrena izy ireo, tahaka ny nanomezan' Andriamanitra fatram-pinoana ny tsirairay avy. ⁴ Fa manana rantsana maro amin'ny vatantsika isika, kanefa tsy mitovy avokoa ny asan'ireo rantsana ireo. ⁵ Mitovy amin'izany, isika izay maro be dia vatana iray ihany ao amin'i Kristy, ary rantsana manokana amin'ny tsirairay. ⁶ Manana fanomezam-pahasoavana samy hafa isika araka ny fahasoavana izay nomena antsika. Raha faminaniana no fanomezam-pahasoavan'ny iray, dia aoka atao araka ny haben'ny finoany. ⁷ Raha fanompoana no fanomezam-pahasoavan'ny iray, dia aoka izy hanompo. Raha nisy iray nahazo fanomezam-pahasoavana hampianatra, aoka izy hampianatra. ⁸ Raha fampaherezana no fanomezam-pahasoavan'ny iray, aoka izy hampahery. Raha mahanome no fanomezam-pahasoavan'ny iray, aoka izy hanao izany amim-pahalala-tanana. Raha hitarika no fanomezam-pahasoavan'ny iray, aoka izany ho vita am-pitandremana. Raha hampiseho fangoraham-po no fanomezam-pahasoavan'ny iray, aoka izany ho vita am-piravoravoana. ⁹ Aoka ny fitiavana tsy hisy fihatsaram-belatsihy. Ankahalao ny ratsy; hazony mafy izay tsara. ¹⁰ Raha ny momba ny fitiavan'ny mpirahalahy, mifankatiava aminareo tsirairay avy. Raha ny momba ny fanomezam- boninahitra, mifanajà. ¹¹ Raha ny momba ny fikirizana, aza misalasala. Raha ny momba ny Fanahy, aoka hafana fo. Momba ny Tompo, tompoy Izy. ¹² Mifalia ao amin'ny fahatokiana izay hanananao momba ny ho avy. Mahareta amin'ireo olanao. Mivavaha hatrany. ¹³ Mifampizara amin'izay ilain'ny mpino. Mitadiava fomba maro hampiantranoanao olona . ¹⁴ Misaora ireo izay manenjika anao; misaora ary aza manozona. ¹⁵ Miaraha-mifaly amin'ireo izay mifaly; miaraha-mitomany amin'ireo izay mitomany. ¹⁶ Mitovia fisainana amin'ny tsirairay. Aza misaina amin'ny fomba mirehareha, fa ekeo ireo olona ambany. Aza mihevitra ny tenanao ho hendry. ¹⁷ Aza mamaly ratsy ny ratsy. Manaova zavatra tsara maro eo imason'ny olona rehetra. ¹⁸ Raha mety, araka izay azonao atao, mihavana amin'ny olona rehetra. ¹⁹ Aza mamaly ratsy ny tenanareo, ry malala, fa omeo lalana ny fahatezerana Andriamanitra. Fa efa voasoratra hoe: '''Ahy ny vali-faty; Izaho no hamaly,' hoy ny Tompo.'' ²⁰ Fa raha noana ny fahavalonao, omeo sakafo izy. Raha mangetaheta izy, omeo ho sotroina izy. Fa raha manao izany ianao, dia hanangona vain'afo eo amin'ny lohany.'' ²¹ Aza mety ho resin'ny ratsy, fa reseo amin'ny tsara ny ratsy.