¹ Yésu ake nénge digumi diandi ne bebeye di bebingitsi sige ake be vége bungudu mu menieni mabi nange be ke me sanze me be ku beluse ke pagene me béle ne biene. ² Sige yuluanu mine me digumi ne bebeve be bebingitsi. Dirége, Simon (a wua ku néngu re Pierre) ne André muane nguandi; Jacques, muane wu Zébédé, ne Jean wu muane nguye yandi; ³ Philipe, ne Barthélémy, Thomas, ne Matthieu, mu bobitsi doli tsi migage; Jacques, muane d'Alphée ne Thaddée; ⁴ Simon le Zélote, ne Judas Iscariot, wu sake Yésu. ⁵ Digumi ne bebeye bane, Yésu a ke be rume; ake be vége gingitsi gigi, "Nu ya guende mbure wotsu yatsageni batu be sa juifs nu ya nangise vere ditambi gu ke pagene musiéngi wu Samaritains. ⁶ Tumbe di nange re, nuendi mu medombï me tsiemuge mendagu Israel sige mu nzile, ⁷ Yabisanu musamu nyambi nu kuambile re: "Bulangu bu yulu bu ke béli. ⁸ Bélusanu bi bédu, véganu monui gu batu bafu, tsiémusanu buati bu batu ba du béli, ne sanzanu menuini mabi nu se vegu mu sa guivulu divane yénu guandi vaganu nu ya guivule. ⁹ Nu ya kébe nesi kunge, nesi doli nesi putu guvére mu posi tsiénu; nu ya bonge nesi péngi y muvé vilu, nési du véngu. ¹⁰ Mbare mudianzitsi a ne dignange di gu végu dukabu du gidianzu giandi. ¹¹ Ke pagene musiéngi nesi dimbu di nua véri ditambi, bébanu wua singi nu bége mbétsi mbétsi gu mbu ngiandi, bangamugu, mutune kuange ve nua gusugi mburine. ¹² Ve nua guingeni ndangu mosi, véganu mbulu. ¹³ Pasi ndagu y se singe re nuigeni, poluénu yibi mu ndanguime; tumbe pasi ndagu yise yélemine, poluénu y nu gabugibe. ¹⁴ Gu kiélu ba busire muéndi gu yawu nési gulu me nua guambili, ve nu gusuge ndaguine nesi musiénguine, be kulaumunilianu di fufundu di biéru biénu. Di ne gu ngenze, ¹⁵ Nia nuambili dioni, wisi wu gu sosisu, butambe bu sodome ne bu Gomorrhe mi sa gu kengisu viagunu ne musiénguine. ¹⁶ Labanu, nia nu tindi né medembi vegasi minzi, nuéle misime mu kuéndange ne dikéngi ne niage ne mutsange ninu wu yénu nu sa gube ne tagu ne me bémbi. ¹⁷ Nube ne mutsageninu wu minime miéle ne bulangu, mbare be gu nu sake mu ndagu tsi migage ne gu gari ndagu tsi awu tsi Nyambi, be gu nu dimbe migébi. ¹⁸ Ne nu gu bégu ve wusu bidiéti bi bivunde bi misiéngi ne kanangu gu kieluami, gu gu dile bu mbéye gu yayu béni ne gu batu be sa juifs. ¹⁹ Ve be gu nusakile, nu yabe ne medume gu kiélu névu di gubile, névu di gu viagile nesi gu kiélu menu gué guambile, mbare me yénu nu gué guambile ne gu nu rugile ve diguére diénidine. ²⁰ Mbare sa yénu nugu kébe di yénu nu gué guambile. Di sa gube di range, nu guambile di dinuini di tayénu a gunu vage re yambilanu. ²¹ Be gu nu bége ve wusu bisi migage nembare nua périli gitu. Né vane, be mosi be gu sake bane be nguye be yawu béni ne betaye be gu di vage ne bane bawu. Bane be sa gu ku gulilu bébunu biawu ne dufu be gu be bukile. ²² Mbili be gu nu vine mbare nua périli gitu. Tumbe wotsu wu négiti gi ngenze; nami kuange ne ve dufu a gué dile monui gu nyambi. ²³ Ve batu be musiéngi mosi be gu nu kéngise, yéndanu gu musiéngi wu susu. Réndanu didi: Digu labene re muane mutu a gu ku ruge mu butambe nesi nu gumane guénde misiéngi ne guéne guambile gu kiéluami ne giani ne giani gi Israel. ²⁴ Mubingitsi a sa kibi fumuandi ne be diamzitsi be sa kibi fumuausu. ²⁵ Nu yabe negitu re batu be gu kibe gube ne mutsagininu wu boti ne mu bingitsi viagunu ne fumu. Di munongu wu mosi, mbare ménu ni fumuénu, batu be gu nu kéngise néve be se kéngise. Di gabi ka nane re mubingitsi a ga vagu ne Fumuandi. Gé ba néngi Fumu ndagu re Béelzébub ne nguéne guinde re ne bini ndaguandi be sa gu di vage? ²⁶ Re vane, nu yadume batu bane. Siotsu dia suéngu batu, Nyambi a ga rondi re nu me vudisi kane. A sa rondi re nume suengi re nu gu me bandeke nesi gu garitsienu. ²⁷ Viagunu ne gube ne wame, motsu me menu nze nuambile gu tsié diviseme, mambilianu niangu gibale, ne diotsu di nu se guambile gu fundu, di nianzianu gu yulu muanze ndagu. ²⁸ Nuya dume, batu ba boki dunuinu tumbe be sa bénzi boke fumu mutu. Kibe, dumanu wu benzi boke fumu mutu ne du nuiru gu mubige wu sa tsimi. ²⁹ Ki pikilanu nionitsigigi. Be sandi ne musumbu ne pundu re dia vagi re be benzi sumbisu ditsu di mosi. Tumbe nesi nane, jasi y mosi ve yawu ya bonduge vétsi y kufu, tayénu y gu yulu a ga di yabi mbare a ga yabi mambu motsu. ³⁰ Kabe, a ga yabi mambu motsu nési gu kiéluénu guandi. Nési nange tsotsu tsi muviénu tsi rangu. ³¹ Digobe di nua végu dia kibi di mbili nioni Kabe nuya dume. ³² Revane, mutu wotsu wune tangulu boti nami gu batu; ni gu murangule guandi tangulu boti gu tayami y gu yulu. ³³ Tumbe a wu gu kalegu batu, méguami mi gu mu gale gu tayami y gu yulu. ³⁴ Nu ya pikile renze ruge gutsi guse bége polu, nza ruge guse bége polu tumbe di poti di dibambu. ³⁵ Be mosi ba mbingi be gufu mbare be sa mbingi be gu be vine ne mbare ba périli gitu. Bane be sa gu ku gulusénu ne tayitsiawu ne taye be gu vine bane. Nguye a gu vine muanandi wu mugetu ne muane mugetu a gu vine, nguyandi, baye bu mugetu a gu vine mugatsi muanandi ne mugatsi muane a gu vine nguye mulumi. ³⁶ Mureinitsi mutu a gube muisi tsapele yandi béni. ³⁷ A wua rondi tayandinési nguyandi viagunu nami ase yélémine nami, ne wa rondi maunandi dibagele nesi muanandi wu mu gétu viagumu nami ase yelémine nami. ³⁸ A wu sa bengi kuausuandi ne gu buse gu mbinge; ase yélémine nami. ³⁹ A wu gu bandekéne monuiandi a gu mu tsiémune, tumbe a wu gu mu tsiémune gu kiéluami, a gu ku mu dile. ⁴⁰ A wua nu singi ga nzingi, a ga singi wure tinde. ⁴¹ A wua singi mu bigitsi ne mbare a yi mubigitsi, a gu végie dukabu du mubigitsi. A wu gu singe mutu wu sungeme ne mbare a sungeme a gu végu dukabu du mutu wie sungeme. ⁴² A wua végi givave mé mambi gi sane mu sumbu, gu muane mugégi wu mosi vane, ne mbare mubingitsiami, nia muambili bunéti, a sa gu tsiémune dukabu duandi.