¹ Va wusu wuisi wu sabbat, Merie ma Magdala, ne Merie ma nguyi Sake ne Salomé basumbe bisému bi uyitse sunze mu fumbi yi Sésu. ² Divioghe va maghiélu mawuisi udibandu ditsonu va sogheme yawu ghu songu. ³ Bayembilenge yawu ne yawu re: awuke sindighile yétu dimagni ghu songu ndigni ? ⁴ VA simbule yawu misu, Balabe re, mutu atse burulu dimagni didinène. ⁵ Bane gningene ghu ghare songu, bane labe ngièbe dibaghele ne ilingue ghi fughe matsaghele ghu kube yimabaghele, ne yawu bane ghangu ne wome. ⁶ Ayambile yawu re: Diyalabe wome. Yénu dighone bène Sésu muisi Nazareth, ufu mukurusua? Yandi atse fuangughu! Asa ghughe. Béminanu! ghu ghitsighe ghitse sunzu yandi. ⁷ Yendanu ghuyé yambile bayikitsi bandi yawu ne Pierre re atse réghilile yénu ghu Galilee. Re yénu dighu labene nèndi nave yandi ayambile yénu. ⁸ Bane pule bambangu ghu songu. Bareghemenge, ne baghibeme. Base yambile nisi mutu umosi mumbara babile ne woma umbili. ⁹ Veghamaghiélu ma wisi umarèghe utsonu, va mane fuangughu yandi, Atsombughu marègha ghu Meri mapuse yandi badému. ¹⁰ Yèndi ayende, nugnighule ghu batu bandi, va bile yawu nu seleghene nuwulile. ¹¹ Bayulu nendi re atse fuangughu ya nu yambile yawu re: atse laba yendi, bane kate bapaghe mumbara base bile ne ghitu. ¹² Vayulu mambu mèna, abélabene ne batu babéyi, mu munongu utsusu venanga yawu vala ne dimbu. ¹³ Yawu koke bayende ghu yéyambile bayikitsi baba sale, ne yawu ba kate bapaghe koke. ¹⁴ Veyulu vane, Sésu atsombughu ghu dighumi dibayikitsi tsibadukitsi va bile yawu matsaghala va tavuru. Ne apandule yawu mubara bakate bapaghe, mirima miawu mibile wiri mumbara base singe va yambulu yawu tsangu yiburambughulu bu Sésu. ¹⁵ A konde yambile nuwu re: Yèndanu mu tséngi yotsu, lonzanga musamu umugni ghu bulongu buotsu. ¹⁶ wotsu uke singe, nubonge batêmu, akeyubulu, te usake singe, aghubile ne mbele. ¹⁷ Labanu bilimbe bighu sunde ghu babane ghitu: Baghu punza badému, mu ndughemi, baghu yambilenge malongu mamone. ¹⁸ Baghu ghanga bagnioghe ne makake mawu, gha banu mambe maghamagni, maka boki batu, basake labe diâmbu dibive. Baghu sunza mioghu miawu ghu yulu miuru mibabétsi, baghu bélughungu. ¹⁹ Va mane yambile Fumu nawu mambu mèna, amake ghu yulu ne utsaghele va mabaghele ma Nzambi. ²⁰ Bayikitsi bendi baghabughu nu lonza musamu mu bitsighe biotsu, Fumu aguianzenge nawu, nu ritsigha bimuile mu musamu wèna.