¹ v 1 Mambe maghu mbóghe a Nzèmbi ghu yulu ghu ndè yumu ngana banómbe ba lekumi babavèkilene na babaghele, bababonge balèmbi mu yènde ghu yikèsele mulumi makabade. ² Batane vatso bo nibabade na budoke. To babatane bane nibabade na buyédi. ³ Babatane bababade na budóke batóle balèmbi, bo pitarole kime bonge vè. ⁴ Bababade na buyédi batóle balèmbi babo, nibabonge na pitarole kime ghutso biruru. ⁵ v 5 Mutu watonde kuèle banómbe adinge na sóte, chiole yikuate bo bótchi, bo nibalase. ⁶ Kètiakèti a buchi, bo nibayóghe kime ti: Wakuèlene ndóne ayade, yèndani ghu yibuane na ndè. ⁷ Avanekaniva banómbe bótchi basóghe chiole, nibavange balèmbi ba bo. ⁸ Kava banómbe bababade na budóke balèle bababade na buyédi bó: Vèdani na bése pitarole, balèmbi ba bése ka dime badime. ⁹ Banómbe bababade na buyédi nibakale bo bó: Pitarole yisakunu mu vède na béne vè. Yèndani ghu mbóghe miyughu, béne leyisómbe ya béne. ¹⁰ v 10 Bo bayède ghu yisómbe pitarole, wakuèlenenge nakise bo ghu mbise. Bababade bakóghe baningele bóne a bo ghutso nzo yibakile mubéke lekuèle, nibadibeghe nzo. ¹¹ Mua mukulu avioghe, babatane bane bayade nibalèle bó: Kumu dibele bése nzo. ¹² To wakuèlenge nakale bo ndé: Mumbuli mè lèle béne mé, mè sayèbi béne vè. ¹³ Avanekaniva Sése abuèse ndè: Ka rambelani, muti béne lesayèbi letsughu na lekèse le Wabonge ndjime a baate akayade vè. ¹⁴ v 14 Tchambe la buyumunu bua Nzèmbi bua ghu yulu ngana musame a mutu wapatède basèli bèndi mu niaghele bo mabuè mèndi, ndè napayènde ghu muniale lekabade. ¹⁵ Ghulidi wóne ndè navède makumi ma mikame mia badole matane. Nabavède na wóne makumi ma mikame mia badole moli. Nabavède na wóne na ndè lekumi lamikame mia badole. Mutu mutu nabaghe ndji yi ndè mbé tóghe funile. Amane, nayènde. ¹⁶ Avanekaniva wubavède makumi ma mikame mitane ayènde ghu yifudulu tsonge na badole bandè baghe. Ndè nababaghe makumi ma mikame matane makime. ¹⁷ Wubavède makumi ma mikame moli na ndè nababaghe makumi ma mikame moli makime. ¹⁸ Wubavède lekumi la mikame ndile lemóchi ayènde, nasuèghe badole ba kumu a ndè ghutso lebéle le ndè bóke. ¹⁹ Kumu a baate muène adinge ghu ndè yènde, ayade natsaghese basèli bèndi mu fulu bo bu bo basade badole bèndi. ²⁰ Wubaniaghele makumi ma mikame matane akukulu nabuèse makumi ma mikame matane va yulu a mabavède ndè, nalèle ndé: A Kumu, wè mè makumi ma mikame matane wè niaghele va wè yènde. Ghu mbise a wè bo nibafunile makumi ma mikame matane makime. ²¹ Kumu a ndè amone bóne, nakakese ndè ndé: Wè musèli wumubuè, wulidi na mambe ma ledite. Wè bédi wasongene mu mua ndji yi mè vède wè. Mè vède wè ka biakunu. Yade ghu yitsange na ngombe béne a kumu a wè ²² Wubaniaghele makumi ma mikame moli nabatsuale na ndè makumi ma mikame moli va yulu a mabavède ndè. Nalèle ndé: A Kumu, wè mè makumi ma mikame moli wè niaghele. Ghu mbise a wè bo nibafunili makumi ma mikame moli makime. ²³ Kumu a ndè amone bóne, nakakese ndè ndé: Wè musèli wumubuè wulidi na mambe ma ledite. Wè bédi wasongene mu mua ndji yi mè vède wè. Mè vède wè ka biakunu. Yade ghu yitsange na ngombe béne a kumu a wè. ²⁴ Wubaniaghele lekumi lamukame badole ndile lemóchi, ayade na ndè nalèle ndé: A Kumu, mè yèbi mé, wè mutu wubavèkèmbe na ndeè. Wè tolenge biéle bi wè vè vade. Wè tolenge bi wè sanianze. ²⁵ Mè mone bome buawè, mè nayènde ghu yisuèghe badole bawe ghutso toto. Yake badole bawe, bóbe banebe. ²⁶ Kumu a ndè nakale ndè ndé: Wè musèli wumubi, wusayèbi bu badianze vè. Wè yèbi wó mè tólenge biéle bi mè vè vade, kèni bi mè vè nianze, ²⁷ Wè ka muki wè sasóse badole bème ghu yitchighe chibafudulu tsonge vè? Wè mbéghi wasade bóne, mbéghi mè bèkichi tsonge va mè yidi. ²⁸ Pókani ndè lekumi la mukame badole le ndè lidi na lo, béne lebuèse wulidi na mululi mumóchi. ²⁹ Baate baba lidi na biabo, nibababuèse bo bikime mu bade ka na biakunu. To wusalidi na yimbu ni yikumbu vè, nibapóke ndè kiti mua ndji yi ndè bédi na yo. ³⁰ Bongani musèli muène wavènapèti, béne lebusu ndè ghu mbèdi ghutso yipfundu. Aghóne ni ghu bakalélenge na ghuède makéke. ³¹ Wabonge ndjime a baate va ndè kayade ghutso buyimbe buèndi na bikumbu bia buyimbe bibia salele ndè, nátsaghele va kuange a ndè ya buyimbe. ³² Baate ba malonge mótchi nibakókene va busu buèndi. Ndè nakaghele baate ngana bu mukéli batabe akaghele batabe banzèbi na babindombe. ³³ Ndè nasóse batabe babindombe ghu ngulu a mbaghele, banzèbi nasóse ghu ngulu a kase. ³⁴ Avanekaniva Kumu akalèle babakabade ghu ngulu a mbaghele a ndè ndé: Béne ba Taate a mè asole navède misange ningelani. Bongani buyumunu bubachile béne ki va kèti a mbande bulonge. ³⁵ Muti va mè kuade na nzale, béne lavède mè bia tchade. Va mè kuade na péyi a maambe, béne labavède mè na maambe maniode. Va mè yade bundjinze, béne layake mè. ³⁶ Va mè bade muniange, béne lavède mè matsande ma luate. Va mè bade na mabéde, béne layade ghu yimone mè. Va mè bade ghu tsughu, béne lesabise mè yade ghu mone vè. ³⁷ Bangua mambe mamayèbene nibakale ndè bó: A Kumu, vèni bése lamone wè kuadenge na nzale nilavède wè bia tchade? Bése wè vèni lamone ghu wè kuadenge na péyi a maambe nilavède wè maambe maniode. ³⁸ Bése wè vèni lamone ghu wè ghu wè yade bundjinze, nilayake wè. Bése wè vèni lamone ghu wè bade muniange, nilavède wè matsande ma luate. ³⁹ Bése wè vèni lamone ghu wè bade na mabéde, nilayade ghu yimone wè. Bése wè vèni lâamone ghu wè bade ghu tsughu, nilayade ghu yimone vè. ⁴⁰ Kumu nakale bo ndé: Mumbuli mè lèle béne mé, lekèse lótchi le béne lasadenge tchambe pèti lo ghulidi mua ngèbe vatso baane ba taate béne lo ghulidi mè lasadenge. ⁴¹ Ndè nabalèle babakabade ngulu a kaase a ndè ndé: Matani va pédi a mè. Baate babachibele banebe! Yèndani ghutso mbuaghe yiyavèdime yibavange mu diabele bóne bikumbu bia buyimbe bibiasalele ndè. ⁴² Muti béne lamonenge ghu mè kuadenge na nzale, to béne lesavède mè biatchade vè. Béne lamone ghu mè kuadenge na péyi a maambe, to béne lesavède mè maambe maniode vè. Béne làmone ghu mè yade bundjinze, to béne lesayake mè vè. ⁴³ Béne lamone ghu mè bade muniange, to béne lesavède mè matsande ma lute vè. Béne lamone ghu mè bade na mabéde, to béne lesayade ghu yimone mè vè. Mè bade ghu tsughu, to béne lesayade ghu yimone mè vè. ⁴⁴ Bonabo nibakale ndè bó: A Kumu, bése wè vèni lamone wè kuadenge na nzale, nilabise wè bia tchade vède. Bése wè vèni lamone ghu wè kuadenge na péyi a maambe, nilabise wè maambe maniode vède? Bése wè vèni lamone wè yade bundjinze, nilabise wè sangele? Bése wè vèni lamone wè bade na mabéde, nilabise wè yade ghu yimone? Bése wè vèni lamone wè bade ghu tsughu, nilabise wè yade ghu yimone. ⁴⁵ Kumu nakale bo ndé: «Mumbuli mè lèle béne mé, lekèse lótchi le béne labisenge tchambe pèti lo sade ghulidi mua ngèbe vatso banebe, béne lo ghulidi mè labisenge sade. ⁴⁶ Bo nibayènde ghu yitchade chighi ya mubunamubu, to bangua mambe mamayèbene nibayènde ghu fuade móyi wa mubunamubu.