¹ Jezu ɖo ɖɛ xo we ɖo fi ɖe gbe unkpó. Ée é xo ɖɛ ɔ́ fo ɔ́, ahwanvu tɔn unkpó ɖɔ n'i ɖɔ: "Aklúnɔ kplɔ́n mǐ unté e mǐ ná nɔ́ xo ɖɛ gbɛn ɔ́, unté e Jǎan kplɔ́n ahwanvu tɔn ɔ́ yě gbɛn ɔ́." ² Jezu ɖɔ ni yě ɖɔ: "Mi ɖo ɖɛ xo we ɔ́, nǔ e mi ná nɔ́ ɖɔ ɖíe: "Tɔ́ mǐtɔn e ɖo sɛxwé e, nyǐkɔ tuwe ní nyí nǔmímɛ, axɔ́súɖuɖu tuwe ní wa. ³ Nɔ na nǔɖuɖu tɛgbɛ tɔn mǐ. ⁴ Nɔ sɔ́ hwɛ mǐtɔn ɔ́ yě kɛ mǐ unté e mǐ nɔ sɔ́ kɛ mɛ j'agɔ dó mǐ ɔ́ yě gbɛn nɔhun. Má lɔn bonú mǐ jɛ mɔɖuɖó awóvi tɔn mɛ ó." ⁵ Jezu ká lɛ́ ɖɔ ní yě ɖɔ: "Ényí mɛɖé ɖo mi mɛ bó ɖo xɔ́ntɔn unkpó bó yí mɔ ɛ zǎnxwete, bó ɖɔ n'i ɖɔ: "Xɔ́ntɔn, nya wɔ̌xúxú atɔn nú mì, ⁶ ɖó xɔ́ntɔn ce unkpó xwe tomɛ, bó wá gbɔn gɔ̌n unce, un ká ɖo nǔɖé boná n'ɛ́ à." ⁷ Bɔ hwe nɛ́ nú ɔ́, mɛ ɖě ɔ́ yí gbe n'i sín xɔ tɔn mɛ ɖɔ: "Ma dó tagba nú mì ó, un ko dó gan hɔn ce mɛ, bɔ fǐ ce ɔ́ yě kpan nyí kpán ko mlɔ́ ayǐ; un sɔ́ sixú fɔnte bó wá na wɔ̌xúxú we à." ⁸ Ma ɖɔ nú mi, ényí é má kpɔ́n dó xɔ́ntɔn e yě nyí ɔ́ wú à ɔ́, é ná kpɔ́n tagba e dó ní wɛ é ɖe é wú, boná fɔnsite wá n'ɛ́ nǔ e hu dé ɔ́ yě có. ⁹ Ma lɛ́ ɖɔ ní mi, mi byɔ́ nǔ Mawu, é ná na mi, mi ba, mi ná mɔ, mi xo hɔn, è ná hun ní mi. ¹⁰ Ɖó , mɛ e byɔ́ nɔ́ mɔ yí, bɔ mɛ e ba ɔ́ nɔ́ mɔ, bɔ mɛ e xo hɔn ɔ́ wɛ è ná hun n'i. ¹¹ Fǐtɔ́ tɛ ká ɖo mi mɛ bonú fǐ tɔn byɔ́ hweví ɔ́, é na zé dan d'álɔ mɛ n'i? ¹² Alo é ná byɔ́ azin b'ɛ́ ná sɔ́ hɔnkéklě dó alɔ n'i? ¹³ Ényí midɛɛ mi ɔ́ unte mi nyí mɛ nyanya sɔ nɛ́, có mi tunwun nǔ ɖagbe bonɔ́ na fǐ mitɔn ɔ́ yě. Bɔ nɛ̌ Mawu tɔ́ mitɔn e ɖo sɛ́xwé ɔ́ má ká ná na Yɛsinsɛn tɔn mɛ e byɔ́ ɛ ɔ́ yě à gbɛn? ¹⁴ Azǎn ɖo nukɔn yi we, Jezu nya yɛ nyanya e nɔ́ hu ɖɛ̌ ní mɛ ɔ́ sín nya ɖɛ̌kúmɔnɔ́ ɖé sín gbɛzán, bɔ́ nya nɛ́ ɔ́ jɛ xó ɖɔ jí, b'ɛ́ kpácá lɛdó e ɔ́ có xwíi. ¹⁵ Amá mɛ ɖé ɔ́ yě nɔ́ ɖɔ ɖo ahwan ɔ́ mɛ ɖɔ: "Beluzebúlu yɛ nyanya ɔ ́yě xɔ́sú sín hlɔ̌nhlɔ́n wɛ Jezu nɔ́ zan dó nya yɛ nyanya ɔ́ yě e." ¹⁶ Mɛ ɖěvo ɔ́ yě ká jló ná ɖó mɔ ní Jezu bó by'ɛ́ ɖɔ ní ɖe wuntun ɖé xlɛ́ yě bóní yě ná mɔ ɖɔ nà Mawu gɔ̌n wɛ hlɔ̌nhlɔ́n tɔn gosín. Amǎ Jezu ká tunwun linlin yětɔn bó ɖɔ n'i ɖɔ̀ nà: ¹⁷ "Axɔ́súɖuto ɖěbú e mɛ gbeɖokpɔ́ tíin à ɔ́ gba wɛ nɔ́ gba, xwé ɖé bonú xwé ɔ́ gbe nu ɔ́ yě má nɔ́ gbe kpɔ́ ɔ́ xwé nɛ́ ɔ́ gba wɛ nɔ́ gba." ¹⁸ Ényí Satáan tɔn ahwan éɖée ɔ́, nɛ́ wɛ axɔ́súɖuto ka sɔ́xú nɔ te gbɛn? Mi ɖíe ɖɔ yɛ nyanya ɔ́ yě xɔ́sú Bɛluzebúlu sín hlɔ̌nhlɔ́n wɛ nyí nɔ dó nya yɛ nyanya ɔ́ yě ná e. ¹⁹ Ényí yɛ nyanya ɔ́ yě xɔ́sú Bɛluzebúlu sín hlɔ̌nhlɔ́n wɛ ní ɔ́ un nɔ sɔ́ dó nya yɛ nyanya ɔ́ yě ná ɔ́, mɛ sín hlɔ̌nhlɔ́n wɛ ahwanvú mitɔn ɔ́ yě ká ná nya yě ná lo? Énɛ́ ɔ́ wútu wɛ yě ɖésúnɔ ná wá ɖɔ hwɛ xá mi. ²⁰ Lo ɔ́, é nyí ɖɔ Mawu sín hlɔ̌nhlɔ́n wɛ un nɔ dó nya yɛ nyanya ɔ́ yě ná ɔ́, hǔn mi bó tunwun ɖɔ axɔ́súɖuɖu Mawu tɔn kó wá mi mɛ. ²¹ Ényí nya hlɔ̌nhlɔ́nɖowǔnánɔ ɖé sɔ́ ahwannú ganjí , bó ɖo xwé éɖésunɔ tɔn ɔ́ cɔ́ we ɔ́, nǔɖé nɔ́ wa nǔ e é ɖo ɔ́ yě à. ²² Amǎ ényí mɛ e ɖo hlɔ̌nhlɔ́n hu i ɔ́ ɖě ká wá zɔn jǐ wun tɔn, bó ɖu ɖo jǐwun tɔn ɔ́, mɛ nɛ́ ɔ́ ná yí aliňnyánú e wú é ɖeji dó ɔ́ yě có sín así wun tɔn, boná bɛ nǔ e é ɖo ɔ́ yě có xwíi, lóo fɔ má. ²³ Mɛ e ma ɖo ahwan ce mɛ à ɔ́, mɛ nɛ́ mɔ mì gbɔ à, mɛ e ma ka nɔ dɔn gbɛtɔ́ ɔ́ yě wá gɔ̌n wun ce à ɔ́, yě nya dó zɔ nú mi wɛ é ɖe. ²⁴ Ényí yɛ nyanya gosín mɛɖé jí ɔ́, é nɔ yi dán gbɔn axéko jí, bonɔ́ ɖo gbɔjɛtɛn ba we. Ényí é má mɔ à ɔ́, é nɔ́ ɖɔ nà: "Un ná lɛ́ kɔ yi xwé ce e gbe un gosín ɔ́." ²⁵ Nú é wá ɔ́, é nɔ mɔ xwé ɔ́ ɖo ziza bɔ nǔ có ɔ kó jlájlá ɖó. ²⁶ Nú é mɔ mɔ̌ ɔ́, é nɔ yi, bonɔ́ kplá yɛ nyanya e nylá hú é ɖésunɔ ɔ́ tɛ́nwe dó éɖée jí, bɔ yě có nɔ wá byɔ́ xwé ɔ́ gbe, bonɔ́ nɔ fínɛ́ bɔ nya nɛ́ ɔ́ sín ninɔmɛ nɔ wá nylá hú hwenu e yɛ unkpó ɖo jǐ wun tɔn é. ²⁷ Énɛ́ ɔ́ ɖɔ we Jezu ɖe bɔ nyɔ̌nu ɖé zé gbe yi jǐ ɖo mɛ ɔ́ yě mɛ bó ɖɔ nà: "Nǔ nyɔ́ nú dɔgo e mɛ ó nɔ ɔ́ kpán anɔ̌ ó nɔ ɔ́ kpán." ²⁸ Jezu ka yí gbe ɖɔ: " Éeǒ é nyɔ́ wa ɔ́, mɛ e se Mawuxó ɔ́ bó bló ɖ'éjí ɔ́ yě wɛ nǔ nyɔ́ na." ²⁹ Ɖěe ahwan jɛ nyinyi kplé ɖo Jezu jí ɔ́, é yí xó bó ɖɔ ní yě ɖɔ: "Gbɛtɔ́ din tɔn ɔ́ yě ɔ́ mɛ nyanya wɛ ní yě, yě ɖo nǔjíjlɛ́ e ná ɖe hlɔ̌nhlɔ́n Mawu tɔn xlɛ́ ɔ́ unkpó ba we. Yě ká sɔ́ ɖo nǔjíjlɛ́ ɔ́ ɖěvo ná mɔ we zɛ nǔɖɔɖ'ayǐtɔ́ Jonási tɔn ɔ́ wú à. ³⁰ Ɖó unté e Jonási nyi wuntun unkpó ní Ninívunu ɔ́ yě ɔ́, mɔ̌ wɛ ní Gbɛtɔ́fí ɔ́ lɔmɔ̌ ná nyí wuntun ní gbɛtɔ́ din tɔn ɔ́ yě ɔ́ nɛ́. ³¹ Ɖo hwɛɖɔzan gbe ɔ́, axɔxú-nyɔ̌nu tofɔligbé tɔn ɔ́ ná sí te ɖo gbɛtɔ́ din tɔn ɔ́ yě nukɔn boná ɖo hwɛ ní yě. Ɖó é gosín to linlin mɛ, bó wá ɖótó nǔnywɛ́xó axɔ́sú Salomɔ́ɔ tɔn. È ɖíe, mɛ ká ɖo fí din ɔ́ hú gǎn Salomɔ́ɔ. ³² Hwɛɖɔzán gbe wá sún ɔ́, Ninívunu ɔ́ yěná sí te ɖo gbɛtɔ́ din tɔn ɔ́ yě nukɔn, boná ɖo hwɛ ní yě, ɖó hwenu e Nǔɖɔɖ'ayǐtɔ́ Jonási ɖɔ Mawuxó ní yědɛɛ ɖo Ninívu ɔ́, yě ɖoto lobo lobo lɛ́ kɔ sín hwɛ yětɔn ɔ́ yě gúdo; éɖíe mɛ ka ɖo fí din ɔ́ hú gǎn Jonási." ³³ Mɛ ɖéjan nɔ́ ta zogbɛ́n bonɔ́ sɔ́ hwlá à, è ka nɔ́ xwe xásún dó à, lo ɔ́ nǔ ta aga wɛ è nɔ́ sɔ́ ɖó, boní mɛ e ná byɔ́ xwé ɔ́ gbe ɔ́ yě ná dó mɔ wěziza. ³⁴ Nukún tuwe ɔ́ yě wɛ nyí zogbɛ́n ní agbaza tuwe . Ényí nukún tuwe ɔ́ yě ɖo ganjí ɔ́, agbaza tuwe có ɖo wěziza mɛ. Amǎ ényí nukún tuwe ɔ́ yě ma ka ɖo ganjí à ɔ́, agbaza tuwe ɔ́ có xwíi wɛ ɖo zǐnflú mɛ. ³⁵ Bo cɔ́ hwiɖée, bonú wěziza e ɖo wǔtu tuwe ɔ́ má nyí zǐnflú ó. ³⁶ Ényí agbaza tuwe có ɖo wěziza mɛ, bonú akpá ɖéjan xwé ma ɖo zǐnflú mɛ à ɔ́, hwenɛnu ɔ́ agbaza tuwe ɔ́ có ná nyí wěziza bó hɔ́n dó fí ó ɖe ɔ́. ³⁷ Ée Jezu ɖɔ xó fó ɔ́, Falizyɛn unkpó by'ɛ́ ɖɔ ní wa ɖu nǔ emì ɖo xwé emìtɛn e gbe, Jezu ka yí gbe n'i bó yí xwé tɔn gbe, bó jíjɔ́n ayǐ ɖo tavu tó, boná ɖu nǔ. ³⁸ Ée Falizyɛn mɔ ɖɔ Jezu kún klɔ́ alɔ unté e sɛ́n ɔ́ zɔ́n gbɛn ɔ́ cóbó jɛ nǔ ɖu jí ó ɔ́, é kpác'ɛ́. ³⁹ Lo ɔ́, Aklúnɔ ɔ́ ɖɔ n'i ɖɔ: "Mi Falizyɛn ɔ́ mi ɔ́ ɖíe nǔgbó, mi nɔ́ klɔ́ kɔ́fu kpán agbǎn kpán gúdo, lo ɔ́ dǎka kpán ajo kpán wɛ gɔ́ xo mitɔn mɛ. ⁴⁰ Yɛyinɔ e mi. Mɛ e bló agbǎn gúdo ɔ́ jɛ́n ká bló agbǎn xomɛ lɔmɔ̌ à cé? ⁴¹ Mi gbɔ ó na nǔɖuɖu e ɖo kɔ́fu kpán agbǎn kpán xomɛ ɔ́ wamamɔnɔ ɔ́ yě, énɛ́ ɔ́ nǔ có ná nyí nǔ mímɛ́ ɖo nukún mitɔn mɛ. ⁴² Heelú ní mi Falizyɛn ɔ́ mi, ɖó mi nɔ́ na mǎɖówǒnǔhwɛ́nkún e è nɔ ylɔ́ ɖɔ mati é kṕn ée è nɔ ylɔ́ ɖɔ hlúu é kpán, kpán mǎ tɛnmɛ tɛnmɛ ɔ́ yě kpán lobo ka nɔ́ dó vɔ́ ní nǔjlɔ́jlɔ́wiwa kpán wǎn yi ní Mawu kpán. Nǔ nɛ́ ɔ́ yě wɛ mi ɖoná wa, ma wɔn ɖě ɔ́ yě. ⁴³ Heelú ní mi Falizyɛn ɔ́ mi, ɖó mi nɔ yí wǎn ní tɛn nukɔntɔn ɔ́ yě mɛ ninɔ, ɖo sinsɛnxɔ jwifu ɔ́ yětɔn mɛ, lobo nɔ jló ɖɔ è ní dó gbe níe kpán sísí kpán ɖo tokplétɛn ɔ́ yě. ⁴⁴ Heelú ni mi, ɖó mi kí yɔta e è ma ɖo wuntun à, bɔ è ma nɔ́ tunwun à bonɔ́ gbɔn jí ɔ́ yě nɔhun. ⁴⁵ Sɛ́nkplɔ́nmɛtɔ́ unkpó ka yí xó bó ɖɔ n'i ɖɔ: "Mɛ̌si, nǔ ó ɖɔ we ó ɖe ɔ́, mǐ zun wɛ ɖe." ⁴⁶ Jezu ka ɖɔ: "Heelú ni sɛ́nkplɔ́nmɛtɔ́ ɔ́ yě lɔmɔ̌, ɖó mi nɔ dó agban kpinkpɛn ní mɛ ɔ́ yě bó ka sɔ́ nɔ wa nǔ ɖěbǔ dó d'álɔ yě à." ⁴⁷ Heelú ni mi, ɖó mi nɔ xo kpe ɖagbe ɔ́ yě nyi gbeyíɖɔ Mawutɔn e tɔ́gbó mitɔn ɔ́ yě hu ɔ́ yě sín yɔ ta. ⁴⁸ Nǔ e tɔ́gbó mitɔn ɔ́ yě wa ɔ́, mi ɖo kúnnu ɖe ná we, bó yí ɖo yětɔn jí; ɖó yědɛɛ ɔ́ yě hu gbeyíɖɔ Mawu tɔn ɔ́ yě, midɛɛ ɔ́ mi ka xo kpe ɖagbe nyi yɔ yětɔn un ta. ⁴⁹ Nǔ nɛ́ ɔ́ wú wɛ Mawu ko ɖɔ dó mi wú ɖ'ayǐ ɖo nǔnyɛ́ tɔn mɛ ɖɔ: "Un ná sɛ́ gbeyíɖɔ yě kpán mɛsɛ́dó ɔ́ yě kpán dó yě, yě ná hu mɛ ɖě boná dó ya ní mɛ ɖě," ⁵⁰ bɔ gbɛtɔ́ din tɔn ɔ́ yě wɛ Mawu ná kan gbeyíɖɔ tɔn yě sín hun byɔ́ sín hwenu gbɛ ɔ́ jɔ́ e, ⁵¹ sin Abɛ́li sín hun jí káká jɛ Zakalíi tɔn jí, Zakalíi e è hu ɖo sinsɛnxɔ kpán fɔ̌sakpe tɛn mímɛ́ kpán tɛ́ntin é. ⁵² "Heelú ni mi sɛ́nkplɔ́nmɛtɔ́ ɔ́ mi, ɖó mi sɔ́ nǔnyɛ́xwé sín cáfi ɔ́ ɖo alɔ mitɔn mɛ; lo ɔ́, mi ɖésúnɔ ɔ́ mi nɔ by'ɛ́ mɛ à bɔ mi kɔn nɔ́ vɔ́ sú ali tɔn dó mɛ e jló ná by'ɛ́ ɔ́ yě." ⁵³ Ée Jezu tɔ́n sín Falizyɛn ɔ́ xwé ɔ́, Sɛ́nwlántɔ́ ɔ́ yě kpán Falizyɛn ɔ́ yě kpán jɛ unta sɔ́ ɛ jí, bó nǔ kanby'ɛ́ jí magbokɔ, ⁵⁴ boná dó ɖo mɔ n'i, lobo ná dó ɖo mɔ tɛn boná wlí i ɖo xógbe tɔn ɔ́ yě mɛ.