¹ Hwenɛ́nu ɔ́, ahwanví ɔ́ yě wa ɖo kpɔ́ sú d'é jí wɛ, bɔ Jwifu e nɔ́ xwedó walɔ Glɛ̌sinu ɔ́ yě tɔn ɔ́ yě jɛ nǔ hlún ɖɔ dó walɔ Jwifu e nɔ xwedó walɔ Eblée tɔn ɔ́ yě go jí. Yě nɔ́ ɖɔ yě nɔ́ dó vɛ̌ ní asúkúsi émítɔn ɔ́ yě ɖo nǔmímá hwenu ayǐhɔ́ngbe ayǐhɔ́ngbe . ² Énɛ́ wú wɛ mɛsɛ́dó wěwe ɔ́ yě wa ylɔ́ ahwanví ɔ́ yě kplé, bó ɖɔ ní yě ɖɔ: "É jɛ xá ɖɔ mǐ ní jó Mawuxó jlájlá dó, bó wá yi ɖo nǔɖuɖu má wɛ à. ³ Énɛ́ wú ɔ́, nɔví ce ɛ mi, mi ní gbɔ bo kpɔ́n miɖée mɛ, bó cyán súnnu tɛ́nwe e ɖo jujɔ ɖagbe, bɔ Yɛsinsɛn kpán sɛ́nǔnyɛ́ kpán gɔ́ ayi mɛ ná ɔ́ yě e, bonú mǐ ná sɔ́ yě ɖó asɔ̌ nɛ́ ɔ́ nu. ⁴ Énɛ́ ɔ́ mǐdɛɛ ɔ́ mǐ ná kpé nukún dó ɖɛxixo kpán Mawuxó jlájlá kpán go. ⁵ Xó nɛ́ ɔ́ nyɔ́ agun ɔ́ có nukún mɛ, bɔ yě kyán mɛ tɛ́nwe éyɔ́ ɔ́ yě e: Etyɛ́ni, nya nǔɖitɔ́ titewungbe ɖé wɛ, bɔ Yɛsinsɛn gɔ́ ayi mɛ n'i, Filípu, Plokɔ́ɔ, Nikanɔ́ɔ, Timɔ́ɔ, Pamɛnási, Nikoláa Antyɔ́cinu e ko byɔ́ Jwifu ɔ́ yě sín sinsɛn mɛ ɖ'ayǐ ɔ́ kpán. ⁶ Yě wá kplá yě mɛ tɛ́nwe ɔ́ yě yi mɛsɛdó ɔ́ yě gɔ́n, bɔ mɛsɛ́dó xo ɖɛ bó ɖ'álɔ yě jí. ⁷ Mawuxó ɔ́ ka jɛ gbigba kpé jí; bɔ ahwanví ɔ́ yě ɖo kpɔ́ sú d'é jí ɖo Jeluzalɛ́mu; bɔ fɔ̌sánúxwlémawutɔ́ wɔ̌buwɔ̌bu ɖé ɔ́ yě jɛ nǔ ɖi ní Jezu jí ɖo Jwifu ɔ́ yě mɛ. ⁸ Mawu tún acɛ tɔn dó Etyɛ́ni jí, bó n'ɛ́ hlɔ̌nhlɔ́n tɔn, bɔ é nɔ́ ɖo nǔdábaɖa ɖe tɔ́n we, bonɔ́ ɖo nǔ ɖaxó ɖaxó ɔ́ yě jlɛ́ we ɖo togun ɔ́ tɛ́ntin. ⁹ Jwifu ɖé ɔ́ yě ka gosín kplɔ́ngbaasá e è nɔ́ ylɔ́ ɖɔ "kannumɔ e jɛ yěɖée sí ɔ́ yě tɔn é" bó wa jɛ nǔ dɔn xá Etyɛ́ni jí; to vovo mɛ Jwifu nɛ́ yě gosín, mɛ ɖé ɔ́ yě gosín Silenɛ́ɛ, Alɛsándli, Silisíi kpán Azíi yíkúngban jí kpán. ¹⁰ Lo ɔ́ yě nɔ́ sixú nɔ te sɛ́ nǔnyɛ́ kpán Yɛsinsɛn e nɔ́ ɖɔ xó gbɔn Etyɛ́ni mɛ ɔ́ nukɔn à. ¹¹ Bɔ yě gbɔ bó dɔn mɛɖé ɔ́ yě dó awo mɛ, bó na kwɛ́ yě , bonú yě ná ɖo nǔvu dó Etyɛ́ni kɔ ɖɔ: "Mǐ se nya éyɔ́ ɔ́ ɖo nu nylá dó Mawu kpán Mɔyízi kpán wú we." ¹² Xó nɛ́ e yě kpá ɖɔ ɔ́ zɔ́n bɔ togun ɔ́, tomɛxó ɔ́ yě, kpán sɛ́nkplɔ́nmɛtɔ́ ɔ́ yě kpán có xwíi xo zǐn bó zɔn Etyɛ́ni jí bó wlí, lóo kpl'ɛ́ hɛn yi toxóɖɔgbɛ́ ɔ́ nukɔn. ¹³ Yě lɛ́ kplá kúnnu-agɔɖétɔ́ ɖěvo ɔ́ yě wá bɔ yě ɖɔ: "Nya éyɔ́ ɔ́ nɔ́ gɔn nu nylá dó tɛ́n mímɛ́ kpán sɛ́n ɔ́ kpán go à. ¹⁴ Ɖó mǐ se b'ɛ ɖɔ Jezu Nazalɛ́tinu ɔ́ ná gba sinsɛnxɔ bo ná ɖyɔ́ hwɛndo e Mɔyízi ɖ'ayǐ ní mǐ ɔ́." ¹⁵ Mɛ e ɖo ayǐjúnjɔ́n ɖo toxóɖɔgbɛ ɔ́ mɛ ɔ́ yě có xwíi bɔ nukún nyi Etyɛ́ni go, bɔ nukún mɛ tɔn kí wɛnsagun Mawu tɔn ɔ́ yě sín nukún mɛ nɔhun ɖo yě nukún mɛ.