¹ Iri mo kaŋ go ga goy Irikoy banda, iri g'araŋ yaamar araŋ ma si Irikoy gomno ta yaamo. ² Zama a ne: «kaŋ ga hagu ra no ay hangan ni se, faaba zaari ra mo no ay na ni gaa.» Guna, soho no ga ti alwaato kaŋ ga hagu. ³ Gunaa, soho no ga ti faaba zaaro. Iri si katiyaŋ hari daŋ boro kulu jine, zama i ma si iri goyo jance. ⁴ Amma hay kulu ra iri go g'iri boŋ cabe sanda Irikoy goy-teeriyaŋ. Iri go g'a te da suuru kuuku, da taabi, da jaŋay, da kankami ra. ⁵ Barzuyaŋ ra mo, da kasu, da kosongu binde ra, da taabi goy, da hanna ka batu, da mehawyaŋ ra. ⁶ Iri go g'a te hananyaŋ ra, da bayray, da suuru hinyaŋ, da booriyaŋ, da biya hanno, da baakasinay kaŋ sinda munaficitaray. ⁷ Iri go g'a te da cimi sanno, da Irikoy dabaro, da kambe ŋwaari da kambe wo adilitaray wongu jinayey. ⁸ Iri go g'a te beerandiyaŋ da kaynandiyaŋ ra, ciine laalo da ciine hanno ra. I n'iri himandi hallikoyaŋ amma iri ya cimikoyaŋ no. ⁹ Iri ciya boroyaŋ kaŋ i mana bay, amma boro boobo yaŋ g'iri bay. Iri ciya boro yaŋ kaŋ ga ba ka bu, guna mo iri go ga funa. Iri ciya boro yaŋ kaŋ i gooji, amma i man'iri wi. ¹⁰ Iri go bine-saray koyaŋ, amma alwaati kulu iri go ga farha. Iri ciya talkayaŋ, amma iri go ga boro boobo arzakandi. Iri sinda hay kulu, amma wiiza hay kulu iri wane no. ¹¹ Ya korint borey, kaŋ iri n'iri meyey feeri iri mana hay kulu araŋ se, iri n'iri biney feeri araŋ se mo gumo. ¹² Iri n'iri bine kwaaray cabe araŋ se, amma araŋ no mana araŋ wano cabe iri se baakasinay ra. ¹³ Soho araŋ ma ye ka iri bana yaadin_ ay go ga salaŋ araŋ se danga ay izeyaŋ_ kal araŋ m'araŋ biney feeri ka yaadin ka tonton. ¹⁴ Araŋ ma si margu calu ra da borey kaŋ yaŋ mana cimandi. Zama marguyaŋ fo dumi no go adilitaray da zunubi game ra? Wala markasinay fo dumi no go kaari nda kubay game ra? ¹⁵ Koyne mate no Almasihu nda beliyal ga te ka margu? Wala baa woofo no go boro kaŋ cimandi se boro kaŋ mana cimandi do? ¹⁶ Woodin banda, sabayaŋ woofo dumi no go Irikoy fuwo da toorey game ra? Zama iri ya Irikoy fundikoono fuwo no, mate kaŋ Irikoy ne: < ga goro i game ra, ka bar-bare i game ra. Ay ga ciya i Irikoyo, ngey mo ga ciya ay jama. ¹⁷ Woodin sabbay se Rabbi ne: «fun i game ra ka fay d'ey.» ¹⁸ Wa si lamba hay kulu kaŋ ga ziibi gaa, ay mo g'araŋ ta. Ay ga ciya araŋ se Baaba, araŋ mo ga ciya ay se ize aruyaŋ da ize wayaŋ. Yaadin no Rabbi hina-kulu-koyo ci.»