¹ Yesu xo nuxo nɔn wó lé lodódómé bé:Nusu ȡéká dé rézin gblé.E tɔn kpá dúí.E wá áha fiɔn nu.E tu éxɔ gángán ȡéká ȡó mé,yí i sɔ agbléɛ sɔ ná amɔnwó bé wó né kpɔ djí yí í djó lé duɔ mé. ² Tsí gámé sun yí énuɔ wó wá vɔ lɔ,é dɔ yó subɔvi ȡéka ȡoȡá wo bé wó né sɔ yo gomé ȡóȡá yé. ³ Vɔ é tsí subɔviɛ vá lɔ,Wó xúí yí í trɔ djo álɔ gbáló. ⁴ Tsí íwá zánȡé lɔ,é trɔ dɔ subɔvi bu ȡoȡá wó vɔ wó gban tá ní yí wó zúí.Etrɔ dɔ subɔvi bu ȡóȡá wó ké vɔ wó wúí. ⁵ Wó wá nu báȡá kudo subɔvi buwo tsí yí dɔ ȡóȡá wo.wó xo améȡéwó yí wó wu amé buwo. ⁶ Anyígbantɔlɔ dɔ évíɛ tsí í lɔn nɔn ȡóȡa wo,ȡó ŋtí ŋtíá é búíbé wo lá dó bubu ŋtí. ⁷ Tsí agblédikpɔlawo kpɔɛ lɔ,wó tó nɔn wo nɔnɔn bé;métsí djá va nyí domé nɔn anyigban lɔ né,mia wúí né anyigban lɔ atrɔ zun miatɔ. ⁸ Wó djédjí yí wó wúí.Wó sɔ ŋtílan kukuɔ sɔ da ŋkpɛn ȡó anyigbanlɔ gódó. ⁹ Fifiɛ mí nyá ŋti anyigbantɔlɔ lá wá?E lá vá wu ámé vɔnȡí xɔnwo yí í lá sɔ mébuwo dáȡó anyigban lɔ djí ¹⁰ Mi ŋhlɛn ényɔn tsí í lé ŋlɔnŋlɔn mé bé:Ekpé tsí exɔtulawó gbé lɔ trɔ vá zun zogodjikpé ló . ¹¹ Yéhowa yí woɛ yi nyɔn lé mia ŋmé.Yudatɔwo méganwó sɔɛ bé Yesu lé ényɔn sɔwɔ ȡo yéwo ŋtí étsimé yí xo nuxo só agblédatɔ báȡá xɔnwo ŋtí. ¹² Wó dji bé yéwa lí,vɔ wó vɔn améha wo yí wó djó. ¹³ Yudatɔwó méganwó dɔ Farisitɔwo,Romatɔwo méganwo kudó métsiwó lé Herodi dji lɔ ȡóȡá Yesu.Wo dji bé yéwá lí gamɔn ni lé yeŋtɔ xuxo xoxomé ku susu bé yéwa sɔ nyɔn ȡo ŋtí lé Romatɔwo fiɔ ȡuxoɛ méganwo gbɔ. ¹⁴ Tsi wo va lɔ,wo toní bé:Amégan mi nyá bé wo fia nɔn nyawo toto.Mi nyá bé ŋdé sénɔn é nyɔn ti amɔnwo tonɔn vɔ ó fianɔn Mawuo lɔnlɔnnu lé nyáwó totomé.Fífíɛ túí nɔn mí:E nyɔn bé mia tu takoɛ né romatɔwá? ¹⁵ Yesu nyá wó susu.E to nɔnwó bé:Ŋdé ŋtí mi lé dódó ŋwɔ kpɔ?Mi sɔ égá ȡéká vá mákpɔ, ¹⁶ Tsi wó sɔ égá va lɔ,é biɔ sé bé:Méȡé yó foto kudo méȡé yó ŋkɔ yi lé égá lɔ dji?Wó ȡo ŋtí bé sézár yó foto kudo yo ŋkɔ yí lé égá djí. ¹⁷ Yesu to nɔnwo bé:Mi sɔ ŋtí nyí Sezar tɔ lɔ ná sezar yi ŋtí nyí Mawu tɔ lɔ ná Mawu.Ŋmé wá yá nɔnwo ȡo nyɔnti Yesu to nɔnwo ŋti. ¹⁸ Sadúkítɔwo tsi wo ŋdé xoɛsé bé amé kukuwo lá tɛŋ fɔn lɔ vá Yesu gbɔ yí wo toní bé . ¹⁹ Mosé fiá mi bé né ŋsu ȡé ku yí ŋdé djí vio lɔ,nɔnvíɛ lá ȡé áshíɛ,né wo djí vi lɔ,ȡévíɛ lá sɔ mé tsi ku lɔ yo ŋkɔ. ²¹ Nɔnvíɛ lɔ ȡé nyɔnnu lɔ vɔ wo ŋdé dji vio yí yétsan ku méxɔn noviɛ tsan ȡé nyɔnnu lɔ vɔ yétsan ku shibé nɔnviɛ kpɛtɛ wɔ néné. ²² Ŋsu amadrɛ lɔwo kékéŋ ku yí nyɔnnu lɔ tsán ku. ²³ Lé ŋkéké tsi dji wó lá fɔn amé kukuwo lɔ,méȡé tɔɛ lá nyí nyɔnnuɔ? ²⁴ Yesu tonɔnwo bé:mio kékéŋ miwá vo dada.Mí ŋdé sé ŋlɔnŋlɔn wo gɔn mé kuȡó énu yɛwó ŋtio ku Mawu yó ŋsé kuȡó ámé kukuwo ŋtió. ²⁵ Nyɔnnu lɔ ŋdá nyí méȡé kpékpi yó shío,Ðó lé djipo lɔ,nyɔnnuwo ŋdá ȡé ŋsuo yí ŋsuo tsan ŋdá ȡé nyɔnnuo,amé shiámé lá nɔn shigbé Mawu dolawó néné. ²⁶ Mi nánŋ gbé má xonuxo nɔn mi so amé kukuwo fɔnfɔn ŋtí.Mi ŋhlɛn lé womá tsi Mosé ŋlɔn mé bé Mawu lé tótóɔ ní bé:E nyé yí nyí Abraham,Isaak kudo Jakɔb yo Mawu. ²⁷ Mawu ŋdé nyí amé kukuwo Mawuo vɔ amé gbágbé wo Mawu.Yí ŋtiá mí lé vodádá mé. ²⁸ Ŋsu ȡéka tsí fianɔn Yudatɔwo sé lɔ,sé nyɔn lɔ yí í nyá bé Yesu ȡo ényɔn lɔ ŋti nyúíȡé né Sadúkitɔwo,évá Yesu gbɔ yí íbiɔɛ bé:Esé ŋdé nyi gángán lé éséwo domé? ²⁹ Yesu ȡo ŋtí ni bé:Esé gángán lé éséɛ wo mé nyí bé:Oó Izraɛl sé!axuétɔ mia Mawu ȡéka yí lé. ³⁰ OÐó lá lɔn Mawu kudó axó dji blíbo,axo klá blibo,axo susu blibo kudo axo ŋsɛn blibo. ³¹ Esé végɔn tsí le véví lɔ yi nyí:ó ȡó lá lɔn hawoví shígbé wo ŋtɔ há néné.Esé ȡékpíkpí ŋdé gbé lólo wu amévé xɔn. ³² ŋsuɔ to né Yesu bé: Amégán,o ȡó ényɔn ŋti nyúíȡé bé Mawu ȡéká yí lí. O gbé túí nyúíȡé bé miȡo lá lɔn Mawu kudo miá dji blibo, mia klá, mia susu kudo mia ŋsɛn. ³³ O gbé to tsán bé mia lɔn mia háviwo shigbé mia ŋtɔ há néné yi né mi lé néné wawɔ lɔ, é djé nɔn Mawu nu sɔ wu vɔsá tsi wó tɔnɔnzo kékéŋ kudo vɔsá kpɛtɛwo. ³⁴ Yesu dúí djéshi bé ŋsuɔ lɔ ȡó ényɔn ŋtí kudo nunyá yí í to ní bé:O gógó Mawu fiɔ duxoɛ. Yi méȡé kpíkpí ŋdé gbé biɔɛ ényɔn bé yéwá sɔ lí gamɔn níó. ³⁵ ŋgbodomé tsí Yesu lé nu fiáɔ lé gbédoȡá hɔmélɔ, é tonɔn amɔnwo bé: mé tsi wo lé yudatɔwo séɛ fiaɔ lɔ wa vódádá,étsímé wo bé Kristo nyí amé gbétɔ gbáló so David yó djidjimé. ³⁶ kɔkoɛ ȡo David ŋtɔ mé yí í tó bé: Mawu to né axuétɔ nyé bé: Nɔn anyi ȡó axun ȡushí mé, vá sɛnȡo gátsimé ná sɔ axó kétɔwo wá axo fɔ tutunu. ³⁷ David ŋtɔ yo Kristo bé axuétɔ nyé, fifiɛ lédé Kristo lá nyi yó djidjimé viȡo? Amé sugbɔ kpɔ djidjɔ lé yoó nufiafia ŋti. ³⁸ E tsimé Yesu lé nufiaɔ dukɔn lɔ,é to nowo bé:mi kpɔ miá ȡokúí djí nyúíȡé lé ómá ŋlɔntɔwo tsi wó donɔn awu lɔgbɔ anɔn sá ȡiɔ yí wo djinɔn bé amɔnwo na do bubu yéwo ŋti. ³⁹ Wo dji nɔn bé yéwa nɔn téxóé tutugbɔn lé gbédoȡá xóé wo kudó téxoé tutugbɔn lé ázán duxoé wo. ⁴⁰ Wo gbán nɔn ahoshiwo xoé,vɔ wo wanɔn wo ȡokúwo shigbé amé kɔkoɛ wo néné to gbédodoȡá lɔgbɔ wó mé.Vɔ Mawu lá hɛn to nɔnwo véviȡé. ⁴¹ Exɔn ŋgbodomé lɔ,Yesu nanyí ȡó agbán tsimé wo djɔnɔn nu ȡo lɔ gbɔ.Tsi í lé hɔn lɔ ,é kpɔ létsí gatɔwo sɔ égá sugbɔ lé énuɔ mé dówɔ. ⁴² Ahoshí ȡé tsán sɔ biévé dó nuwɔ mé. ⁴³ Yesu yɔ yó nukplanviwo yí í to nɔnwo bé: lé nyáwo toto mé lɔ égátɔ hɔnwolɔ égá sugbɔ lé wo shí. ⁴⁴ Vɔ viȡé kpó wo vá ná.Vɔ nyɔnnu ahoshí xɔn sɔ égá tsi kékéŋ lé shí lɔ vá ná.Ahoshíɛ ná nu wu améshiamé.