¹ Pɔlu, Apotri Yesu Kristo tɔ, le Mawu wo gbéɖéɖé mɛ, hloingantɔ Yesu Kristo tsi nyí mia mɔkpɔkpɔ, ² Timoti evinyɛn vévi le xɔse mɛ. Amenuvévé, ku nushishi kuku, ŋtsifafa, tsi so Mawu miatɔ kúɖo Yesu Kristo mia xɔnamétɔ gbɔ lɔ ne nɔn kúo. ³ Enyɔn tsi ŋtonɔn gbɔxué djó yi Makedonia yí nyi be: nɔn Efésó nɛ na dosé nɔ amɛɖéwó bé wó ŋgbe fiɔ núbúbúwó. ⁴ ŋgbe tɛɖó edru tótó ku djidji mɛ xótutu tsiwó ŋdé ɖónɔn nuwúwú o. Enu tsɛwo lɔ manman kpo yí i hɛnnɔva, ŋdé nɔnɔn bé Mawú yio dɔwawa yi nɔn ŋkɔ le xɔnsesemɛo. ⁵ Ese lɔ yio taɖodjinú yi nyí lɔlɔntsi só dji kɔkɔɛ, kúɖo djidjinyɔn nyui, kúɖo xɔse ŋtɔŋtɔ mɛ. ⁶ Amɛɖéwó tsiwó doŋgbé nú yɛwo lɔ, wo bú mɔ, yí wovɛ tsi enyɔn manyatanawó núnú mɛ. ⁷ Wolé djidjiɔ lafiɔn sé amɛ, vɔ wó le wó ŋdé se gɔmɛ nɔ nutsi nuɔ wóléo, alo nú yi djí wó le gbetɛɔ ɖó o. ⁸ Mi nyabe ésé ɛ nyɔn, vɔ nutsi hian yí nyi bé, wazin nyuiɖé. ⁹ Mian nyabe ese ɛ woŋdé wɛ nɛ ame djɔdjɔɛ wó, vɔ wowɛ nɛ enubaɖa tɔwó, agladjétɔwó, amɛ mavɔn Mawu ku nuvuin watɔwó, amɛ tsiwó ŋde subɔnɔ ŋɖekpíkpí wo, mɛ tsiwó ŋde donɔn ashi xɔxɔ Mawu yio ŋɖoɖowó ŋtsio, mɛtsiwó wunɔn wótɔwó ku wo nɔnwó, ¹⁰ matéli watɔwó, ŋsu la ɖe ŋsu, amɛ fiɛn tɔwó, nusukantɔwó, adje ɖaɖa wo ɖasé ɖutɔwó, nutsiwó tovo nɔ nufiafia kɔkɔɛ lɔ, ¹¹ le Mawu ylaylatɔ yio ŋti kɔkɔɛ nyɔn nyui tsi sɔɖo alɔmɛ nu lɔ nu. ¹² ŋbui sebé mia xoétɔ Yesu Kristo doŋ ŋsɛn, ɖo nu yí tsi lɔ, e kpɔŋ nutexoéwoatɔ, yí yi sɔ dɔdashi ŋnyɛn naŋ. ¹³ Enyɛn tsi nyi busú nyɔn nutɔ kúɖo adan watɔ. Vɔ ŋxɔ amɛnuvévé ɖo ŋwa nuxɔnwó le manya manya mɛ. ¹⁴ Mian xoétɔ yió mɛnuvévé tsi le xɔse kuɖo Yesu Kristo yio lɔnlɔn mɛ sugbɔ kaka wugan nɔnŋ. ¹⁵ Enyɔn tsɛ kankan ɖodji le ŋti yí dje be amɛshiamɛ nɛ xoɛ; yí nyi bé Kristo Yesu va xixɛ mɛ be yava ɖe nuvuin watɔwó; tsio dome nyɛn nyɛn nyranwu le. ¹⁶ Susu xɔn ŋtsi wó kú ŋsinsin nɔŋ nɛ, be Kristo Yesu yɛ yaɖe yio djigbɔɖanyi lɔ kékéŋ asɔ fia le nyɛmɛ tútúgbɔn, nɛ manyi kpɔɖoŋui nɔ amɛ tsiwó la xɔ dji se nɔn agbemavɔ. ¹⁷ Efiɔmavɔ, makú makú, makpɔkpɔ, Mawu ɖekɛ lɔ, yé tɔ la nyi kafukafu kúɖo ŋtikɔkɔɛ só mavɔ yi mavɔ mɛ. Amɛn! ¹⁸ Sédódó tsi ŋsɔ nɔn vinyɛn Timoti le nyɔn tsiwó wó nú só ŋtiwo daɖɛ lɔ, yí nyí bé na dran avun nyuitɔ; ¹⁹ xɔse kúɖo djidjinyɔ nyuitɔ nɛ nɔ ashio. Amɛ ɖéwó bui, yé wó bú mɔ djó le xɔseɛ gbɔ. Mɛtsɛwó domɛtɔ ɖéwó yí nyí Iméné kúɖo Aleksandri, ²⁰ mɛ tsiwó ŋsɔ do ashi nɔ satana nɛ wóa tashi busúnyɔnwó tótó.