¹ Ẹghẹna ọmọhe ọkpa na chiọe Ilazarọs, ọ khọnmọn. Ibẹtani nọda vae, ovbi ẹvboo ghi Imeri bi omiọn Imata. ² Imeri ọkpa ni ọnọ ri imai gbo Ebiain, ọ da ri eto ghọe kiẹn oẹ ghọe, ni omiọn nain Ilazarọs ọ khọnmọn. ³ Imiọn ni ikhuoho ri eta juhọnmọn re Ijesu, nain ta, "Ebiain, kaghe, ọnu họnmẹkẹọe, ọ khọnmọn." ⁴ Bi Ijesu rẹ họin, ọ tae, "Ọni emianmina u u kọ foọe, sokpẹn rẹji ọkhae ghi Oisẹlẹbua ọ, nada rọe rọkhae ni Ovbi Oisẹlẹbua." ⁵ Ijesu họnmẹkẹe ghi Imata bi omiọn ni okhuoho bi Ilazarọs. ⁶ Bọ rẹ họn khi Ilazarọs ọ khọnmọn, Ijesu chie deha e ikpẹdẹ eva vbi ehe nọri. ⁷ Ehin mọn na, ọ tama ivbiehinmi ghọe, "Vba juan kie kha shan vbi Ijudia." ⁸ Ivbiehinmi ghọe da ta main, "Irabai, ẹghẹna ekhẹn Iju ọho ninain fiẹ udo ọkpa, wuo chie gbo chie kha shan vbi evbọ?" ⁹ Ijesu anjẹin, "Awa igbeva ghi ọfuan kọ r vbi ukpẹdẹ? Uan kha shan odanmi, ọ ya dekhu emi, ọhiọ ori ọfuan ghe ẹdẹ daodẹ. ¹⁰ Ọ kha shan asọn, mọ dekhu emi ọhiọ ọfuan ọi riọevbọ." ¹¹ Ijesu tin eni emina, ehimi eni emina, ọ tama nain, "Ọmọ main Ilazarọs mẹhẹin, sokpẹn mẹmẹn kha shan nida riọe vbo mẹhẹn." ¹² Ivbiehinmi ghọe da ta main, "Ebiain, ọ kha mẹnhẹn, mọn riọ?" ¹³ Ijesu teta vbọhiọ ghi uu ghi Ilazarọs, sokpẹn nagbe khọ teta vbọhiọ ghi fetian vbo mẹnhẹn. ¹⁴ Ijesu da tama nain, "Ilazarọs uu. ¹⁵ Ẹkẹ ẹmẹn ẹnghẹin, vbọhiọ vba, khi iri vbeheni nivbai da miehọn. Vba ji main ogaere." ¹⁶ Itọmọs na chiọe Ididimọs, tama ivbiehinmi ghọe liọ, "Vba ji main gbo nain kha shan nimain da uu bai Ijesu." ¹⁷ Ẹghẹ ni Ijesu kirẹ vae, ọ da miẹn khi Ilazarọs mọki rivbi ẹkẹ idi vbi ikpẹdẹ ẹnẹn. ¹⁸ Ibẹtani ọsikia Ijerusalẹm, enibi ibata igbe ihẹn rẹ kha shan. ¹⁹ Ekhẹn Iju nọ buun regi Imata bi Imeri re, ninain da fun nain udu re vbọhiọ gho miọn nain ni ọmọhe. ²⁰ Ọnẹghẹ Imata, bọ rẹ họn khi Ijesu vade, ọ shan lodẹ gaere, sokpẹn Imeri sẹkpẹ deha vbi oa. ²¹ Imata da tama Ijesu, "Ebiain, u khakha ri maana, omiọn mẹn ni ọmọhe khai uu. ²² Ẹghẹna, i ẹn emikhemi nu vbi obọ ghi Oisẹlẹbua, mọ rọe wẹ." ²³ Ijesu ta main, "Omiẹn mọ chie riọ re." ²⁴ Imata ta main, "I ẹn khi mọ chie riọkpare vbi ariọkpare vbi ẹdi kpehimi." ²⁵ Ijesu ta main, "Ẹmẹn nikhi ariọkpare bi arivbọ; ọnọ mie mẹn họn, ọ kha rẹ uu, mọn kha rivbọ; ²⁶ uanikhuan nọ rivbọ nọ mie mẹn họn, ọ yia uu ghe. U miọn na họn?" ²⁷ Ọ ta main, "Hee, Ebiain, i miehọn khi wẹwẹ nikhi Kristi, Ovbi Oisẹlẹbua, ọni ọkpa nọ vade vbẹkẹ agbọn." ²⁸ Bọ kirẹ tọna e, ọ shan, ọ da chi Imeri omiọn ni okhuoho vbi uheegbe. Ọ tae, "Ọnọma ri maan na, ọ chiẹ." ²⁹ Bi Imeri kirẹ họn na, ọ rotua kpare, ọ ji Ijesu re. ³⁰ Ijesu ọi sẹ o vbẹkẹ ọni ẹvboo sokpẹn ọ sẹ rivbi ehe ni Imata da gaere. ³¹ Evba Iju ninain deba Imeri vbi oa nina suọe udu, bi nain rẹ daghọe khọrotua kpare doe, rẹkhain; mina gbe khọ lodẹ vbi idi nọi viẹ vbi ẹvboo. ³² Imeri ẹghẹ nọ kirẹ si ehe ni Ijesu ri, ọ daghọe, ọ degbe vbi otọe vbi oẹ ghọe, ọ da ta main, "Ebiain, u kha rivbaan, omiọn mẹn khai uu." ³³ Bi Ijesu kirẹ daghọe khọ viẹ, ekhẹn Iju nọ rẹkhain vae dagbo viẹ, ọ mọn shamẹn vbi etin bi okpokpo; ³⁴ ọ tae, "Si vba muọin hi?" Nain ta main, "Ebiain, vae, kaghọe." ³⁵ Ijesu viẹe. ³⁶ Ekhẹn Iju tae, "Kaghe bọe zemi họnmẹkẹ Ilazarọs!" ³⁷ Sokpẹn eso vbi use nain tae, "Ọni ọmọhe na, nọ vujẹ oghi ọkpa nọ ruẹo khai, gbo meti nain wuọ eni ọni ọmọhe na khai u?" ³⁸ Ẹghẹni Ijesu, ọ gbo chie mọn ọshamẹn vbi egbọe, lodẹ vbi idi. Ee otọe ọ, a mun udo voọe. ³⁹ Ijesu tae, "Mun udo kpa vbiọre." Imata, omiẹn Ilazarọs ni okhuoho, ọkpa nọu, tama Ijesu, "Ebiain, ọhina egbe ghọe kio khaa, ọhiọ mọki u ikpẹdẹ ẹnẹ." ⁴⁰ Ijesu ta main, "Memẹn, i tama vba khọ, u kha miehọn, muo mi ọkhae ghi Oisẹlẹbua?" ⁴¹ Nain da mun udo kpa vbọre. Ijesu khua ẹo ghọe ri okhumu ta, "Era, i khuẹnmiẹ khi u da mẹn ehọ. ⁴² I ẹn khi u mua da mẹn eho ẹghẹ ikhẹghẹ, sokpẹn ọhiọ ghi obuyọ ninain muzẹ lẹga mẹn nida tin ọna, ninain da miehọn khi ẹwẹ nu je mẹn." ⁴³ Ehimi khi ọ tọna e, ọ ri urun nọkhua viẹ dainre, "Ilazarọs, deanre!" ⁴⁴ Ọmọhe nọ uu deanre, obọ bi oẹ ghọe na ri ukpọn naria toimi gbalọ, a gbo ri ukpọn gbalẹ oghọe. Ijesu tama nain, “Vba tinjọin an, jọe kha shan." ⁴⁵ Enọ buun vbi ekhẹn Iju nọ vae ji Imeri re, daghe bi Ijesu u, nain miọehọn; ⁴⁶ sokpẹn eso vbi use na kpare oji ekhẹn Ifarisi re tama nain emi ni Ijesu u. ⁴⁷ Ekhẹn oje ihẹin bi evba Ifarisi si ẹguae koko, nain ta, "Bi main kio u? Ọni ọmọhe na wui aẹnẹn nọ buun. ⁴⁸ Main kha zọe obọ ọkpa ina, erẹmẹn mina miọehọn; ekhẹn Irom mina vae hio vbi ehe main bi ẹvboo main kpare." ⁴⁹ Ọmọhe ọkpa vbi use nain, Ikayafas, nọ wui oje ohẹin ọni ukpe ni, tama nain, "Vbai ẹn emiọso gbeigbei. ⁵⁰ Vbai mun o vbi oomi khọ eọ vbọ ivba khi ọmọhe ọkpa mọ u ni eọha ekpen ni uhọnmuro erẹmẹn da khue o." ⁵¹ Ọ tọna ọi wui oghudu ghọe; ekpen, ọ wui oje ghi ohẹin ọni ukpe, ọ miẹo khi Ijesu mọn uu ni uhọnmuro; ⁵² ọi wui rẹji uhonmuro ọkpa, sokpẹn ni Ijesu dagbo meti sikoko vbi ọkpa ivbi Oisẹlẹbua ninain fi khakha vbi ehe ọdọdan. ⁵³ Rẹ davbi ọni ẹdẹ ni kha shan nain mamain ebi nain hio gbi Ijesu vbi ubi. ⁵⁴ Ijesu ki chie shan vbi udagbo vbi use vba Iju, sokpẹn ọ kpavbi ẹvboo re o vbi ẹkẹ ẹvboo nọ sikia ọdagbe o vbi ẹkẹ ẹvboo na chiọe Ifrem. Evbọ ọ deha kpẹn ivbiehinmi. ⁵⁵ Afanra oghi Iju ki sikia ean, enọ buun kpavbi ẹvboo relode vbi ierusalem ọkpẹsi Afanra ninain da khuẹ egbe nain. ⁵⁶ Na ho Ijesu, na teta man ọkpa deba ọvbehe enibi nain emuzẹ vbi itẹmpu. "Buo o? Khọ ya vae vbi ukpe ọ?" ⁵⁷ Ẹghẹna ije ihẹin bi evba Ifarisi yiyi akha min uan nọ ẹn ehe ni Ijesu ri, nọi rọekan ninain da mun ọi.