¹ Yeso ɗo urnok ka gosho, algi tim a ɗabshe si. ² Moishe a wale n dino gyemani joma domni ani ta "Bomu abano, nako ndaloti ko matino lahiya." ³ Yeso habte saranni ki saha si, moishe anita, ne anko tak watkok lahiya ki naso bu darani ki tong walenni. ⁴ Yeso ani ta, "moyi ko an ik ngobu ngab billenko ko tam katko a ruta Ndeyi ko e onom kit yo Musa anku, a ɗeyi kaftu kasu." ⁵ Ɗo Yeso ruko tong kafarahum moishe a kesi ndino gem ni dolko si. ⁶ Anko ta bomu a bano, "Nguruno, gendeno sureno bano a ka sena moito yam." ⁷ Yeso anita , "Ne dutun daranti ni." ⁸ A kesi labni, ani ta bomu ne mana ko ritu bannono bu, ko e eni 'ya 'i nguruno watik lahiya. ⁹ Nek kanno ma ne tong mene na ne anko ngoi moɗi jo an a suɓa ma'i elenin no, ne anak ngoi dui ke gonni, anik zaɓi moɗi ditu jo me dinni nguruno ne ani ka a moishe itko. ¹⁰ Do Yeso kolshe ka onotik saba, moishe anko biya ana ɗaha si, jiren ashenku, Ne takma we na ngoi an ona jire gyeɗok tili tong Isra' ilawa kit woi bu. ¹¹ Ne anshen ku biya tim a ndutuk bo jeni ki bo zoni a deiya bei tina wo'oto ki Ibrahim, Ishaku, ki Yakubu a tong ban Ndeyi. ¹² Me millai tong ban mene a yaktinsu tong be'e unu a wonɗi a hanta bele ki haɗa udonsu. ¹³ Yeso anko a kesi' I ei ndui kit yo onko gyeɗo, a jajim wom Nguru ni watok lahiya. ¹⁴ Yeso dino ban Bitrus, a moishe sorkiti Bitrus a gyendeno ka indi an lahiya bu, a kolshek hoɗa ka. ¹⁵ Yeso ngafko sarato moishe hoɗa kas di' into ke moishe te hinɗa some isheni ruta. ¹⁶ Ɗo bo zoni ito, moishe biya tim mokano, biyai maska damɓin su kasu tim ki Yeso moishe si hoko maskai ki eni bo ni yaki, ki gyeɗo kelui bu'uno, jome wankok lahiya. ¹⁷ Ki ka,a eni ngamini kit yo anakko bo Nabi Ishaya kit yo si anko, "Si kanni namko golla mu ki yaklu lahiyan mu." ¹⁸ Yeso moi dahik biya kokrantani anko nzuni gosu wondi lahai haushik Galili. ¹⁹ Moishe an mallum a tureshi dino ani ta, mallum ne ɗaha koi lei be'is siya yo ko go. ²⁰ Yeso anita jambulde anan wuyonsu ki rayinshe ɓaɓa an binsu, me lah ngo an bini yo a sundi bu. ²¹ Moɗik tong majirakuni ani ta, "Bomu ne nda ne'e ne go mallitik bono." ²² Moishe Yeso ani ta, "Ɗabti ne'e di'i ana mato male ana mato." ²³ Ɗo Yeso ruko tong gyrei, majirakun ɗahanko si. ²⁴ Moishe hiflai gyeɗo hindenok haushi e kaba do ham some wanlaantik ka gyrei Yeso monsom. ²⁵ Moishe majirankuni n ɗano gyemani haftanko si moishe ana ni ta, "I'mu zau bomu, mu 'yammu nem ki mato!" ²⁶ Yeso ansu ta, "Ki bo miya ngu zuba, ana mamma'ik jire?" Moishe hinda gilla ka hiblai e, ki haushis moishe be'is ye'etito. ²⁷ Kolshe biyaye'e ta, "Woi shida ngoi yiya hibla ki haushi a kolshen tik enini ka,a?" ²⁸ Ɗo Yeso ndino bolaha haushi a elik Garasiyaku, moishe biya bolo yo sinkau ngahinsu bola no si kit biya isno hetek tong bure a washing, 'yak suba yam an ngoi a gishe ɗaha bille bu. ²⁹ A lula a anshe ta, "Mu idi miyak koi lah Ndeyi, ko n dino wonɗek bo dugamuni kabun bo matonmu ?" ³⁰ A wonɗe an birik dokzakui riya tishi, nem ki zuni. ³¹ Kaba sinkau some donsha Yeso anshe ta na ko rokimu matimu tong birik dokzakui 'e. ³² Yeso ansu ta n dai sinkau hatani n duni tong dokzaku, moishe shafsu ngaanko marshe bola be'ishe a gyenga hare a tong haushi moishe matansu tong ham. ³³ Ana deita dokzakui gunansu gya nga kaba dishensu tong gabani moishe ananko lei miya, kit eyo halak n zuni yo sinkau an gyeɗo kasu. ³⁴ Shafki biyai gabanise moishe hatano barta Yeso do moyanko ɗonshan ko si detik elisu.