¹ Ki bei ei mayei, Yeso kokranta tong Galili, si nda ndishe yahudiya bu kika yahudaku ndalanko dugini. ² Geleshik sanyaya yahudaku inni nem. ³ Yagenakuni a anita, "wustik wonɗe ndutko yahudiya, majirakungko moi ke moi rutai ko ishe. ⁴ An ngoi a she 'ya tong bungko bu na nda algi mante rutani. Nako 'ya mamaye, tam katkok algi tong dunya." ⁵ Lei yaganakuni ma anangko jire kanni bu. ⁶ Yeso ansuta "somboɗino dongo iko bu, somboɗingku me lei tomiya a saratku. ⁷ Dunya kuɗa guni bu,ne'e kika ne ansheta rutanto disa. ⁸ Nda bei geleshis e ne go bei geleshis wouses bu kika somboɗino iko bu dongo." ⁹ Ki bei ishesu eni woi, iko ɗeinoni galili. ¹⁰ Yaganakuni me ɗo ndasu bei geleshis, si ke hinɗa goni me tong bungko. ¹¹ yahudakui a gyaza bei geleshi, a anshe ta, "ta si?" ¹² Algi shei a ani kanni bei geleshi e, ma'ato ansheta, "si ngoi zina." ma'ato anshe ta,ka a bu, a boitanta ka sheke aigi." ¹³ shafki ka a an ngoi iko eniy a hili bu kika zuba yahudaku. ¹⁴ Ɗo geleshi kina shim a laktito, Yeso ruko tong ban ɗonshu some shutantu. ¹⁵ Yahudakui 'yangko monmoni, a ansheta, "iko lolo ngo woi an mantu kanni shei ka a'ye? Damɓa rishe bukarabu." ¹⁶ Yeso lafsu anita, "shutantunoi yono bu, me yo ngoi sarno ne'e. ¹⁷ Na ngo ndalo 'e 'yak kanni, a mantiti shutantu woi bei ndinok gem Ndeyi ɗomruane enik kanno. ¹⁸ Leilo na a enik kanni a gyaza nama kanni, me ngoi na a gyaza nama kak gem ngoi sarno siy, ngoi wom an jire hawonni, ke an mure jire hawonni bu. ¹⁹ Musa angku sherya budu/ shafki ka a an ngoi gafko bu. kika miya ngu gyaza duginoi ye?" ²⁰ Dahis lahagko ta, "kok an maska. Ngoi yiya nda duga koiye?" ²¹ Yeso lafko ansuta, "Nn iko moɗi, shafku meng monmono. ²² Musa anku eni ɓato, (mek gemani bu ki gem dikanshe), hoti subdu meng ishe ɓato. ²³ Na 'yango ɓatok ngo hoti subdu woi dafko uhe musa bu, kika miya ngu gyahak ne'e kika ne ongko laliyak ngo hoti subdu ye? ²⁴ Ngu 'e sheryak moya ido bu, me 'ya sherya so jire. ²⁵ Ma'atok urshalima ta, "woi ngoi nzuni gyaza duginiy budu? ²⁶ Moyai, a eni ngaryak tili, ke anani 'yabu. koknaku manangko ta woi kristi bu, ɗo ka a bu? ²⁷ Mu manangkoti be is ngo woi ndingo. Yeso me na ndinoi, an ngoi a manta be is si ndingo bu." ²⁸ Yeso iko enik geɗo tong ban ɗonshu a anshe ta," shafkung manangkotik be is ne ndino. Ne ndinok kanno bu, me ngoi sarno ne'ei a jire, ngu mananko si bu. ²⁹ Nen manoni kika ne ndinok gemani ke sarno ne'e." ³⁰ Nzuni ndalangko ndafsi; me an ngoi moko sara zugoni bu kika somboɗini ngamko bu dongo. ³¹ Me tong dahis algi shei onangkok jire kanni, nzuni ta, "Na Kristi ndinoi an 'yak doboi a ina yo wallak woi yo ngoi woi ikoi ɗo? " ³² Farisaku kolshe algi eni ka Yeso, moishe ma' i malumshe ki farisaku sarnangko ana kesi ngaftu si. ³³ Yeso jo anita, "Har kauson gemangku yo somboɗi shim, ki beini manno gem ngoi sarno ne'e. ³⁴ Ngu gyaza ne'e me wena ne'e bu; be is ne gonnoi, ngu gita ndishe bu." ³⁵ Yahudakui anangkok zehe, "Ngoi woi a gonni tiya tam gita wena sibuye? A gonni gem helenakui lalaktansu go shutantesu bansu? ³⁶ Eni woi ngafko miya, 'ngu gyaza ne'e meng wena ne'e bu; be is gonnoi, ngu gita ndishe bu?" ³⁷ Hoti teke geleshi na'ako, Yeso hinɗa iko enik geɗo, a anshe ta," leilo a kola kizi nditu gemano se ham. ³⁸ Ngoi angkok jire kanno, kit shida yo eni Ndeyi angkok haushi ham so zau hektetik hawonni." ³⁹ Si me iko rete kelui bu'uono, yo mamayei ongkok jire kanni beska; kelui bu'unoi har kauso onangko bu kika manangko Yeso bu dongo. ⁴⁰ Ma'ato tong geleshis, ɗo kolangko rete woi anagkota, yo jire woi nabi." ⁴¹ Ma'ato me ta, "Kristiy a ndituk Galili ɗo? ⁴² Eni Ndeyi angko budu ta kristi hetetuk tong shida Dauda ke ki Betelehem, gyabanis Dauda hetengo? ⁴³ Moishe dahis tikito bo bolo kanni. ⁴⁴ Ma'ato ndalanko ka ngahini, me an ngoi za sara kanni bu. ⁴⁵ Ana kesiy mangko gem malumshe ki farisaku mayei anansuta "kika miya ngu mokano sibuye? ⁴⁶ Ana kesiy lahangko ta, "An ngoi damɓa eni kit woi bu." ⁴⁷ Farisakui lahansu ta, "Nguni ke youtang kuɗo shaf'i? ⁴⁸ A tong ma'inshe ki farisaku ngoi yiya ongko jire kanni? ⁴⁹ Dahi wonses mamangko sherya bu, anan barka bu." ⁵⁰ Nikodimus (moɗik tong farisaku,yo ndino gemni yo tono) ansuta, ⁵¹ Sherya mu ɓashentik sherya ka ngo wara kolshek boni ka ei si iko? ⁵² Nzuni lahi anita, "koke ngoi Galili ɗo? jakdi zinak moyi an Nabi yo hetenok Galili bu." ⁵³ Moishe leilo ngafko billa bannoni.