¹ Riin mwan khi Jesu ndhem deh sharfom kamni dhi. ² Ndhi tongkhinen mpeh teer yakgurum vhil khi lhipar yakgurum vhil, neen lha nnih. ³ Sharfom jhi satni nha "Kat ghi ah lah Naan, bhi ghi villing pang sih shin waya burodi. ⁴ Jesu phiring/lap nnhi nah "Awurhiran, "Gurum khi bor akhi burodi det mah, akhi duk meh bhilip ndhi nhi ah mhi Naan. ⁵ Sharfom shin mangnih shinya khiyil wubang bhi kah khini khiting jong jong nlhina'an, ⁶ Bhi sat nhi nah "Kat ghi alah Naan, bhi ghi bhiring ghi wasam nyil, mpe ndhi nih ah wuran 'khi lhi jeplep finih mu tap ghi' mu khi ehp ghi nsar du, yakba ghi shit kwak ghi khika pang. ⁷ Jesu sat ni nah "Awuriran 'Tapbhi ghi kam Nda Naan ghik ma. ⁸ Shinbin sharfom lap nhi shin kah khidikir yakal nhin dhikin yil nhi khi bhi ndhi mudi khiding, ⁹ Sat nih nah bhi ndhi ghi nah sih mukot amak duk duk, kat ghi kurum ghi dikyil nnan." ¹⁰ Nda Jesu piring/lap nnhi na "Ghi bah nder nhi sharfom, mphe ndhi nhi awuriran "Ghi dikyil ah Nda Naan fhik, anih det khime ndhi mu dikyil nnhi. ¹¹ Ndhi sharfom yitnidi bhi jeplep khi Ndah Naan mutong sam khiting, mu dikyil nnhi. ¹² Ndhi Jesu khiling muh yaa Jon, bhi tenshini mwan ya khi yil Galilee. ¹³ Yakal yit yil Nazareth dhi, mwan tong nCapernaum, shiging am teku nGalilee khi yil Zebulum mukhi Naphtali. ¹⁴ Ndhisih tah ampeh gam sat khi ngu jakam Ishaya. ¹⁵ Yil mhi Zebulum khi yil mhi Naphtali, nkwang amteku shinkam nJordan, Galilee mhi Gentiles mu. ¹⁶ Gurum ndhi mukhi twakat nkwo munah bhiga pebang, nyen ndhi mu zan kwak phi tukun munah Pebang khi yit du. ¹⁷ Yakhal shiwuni bhi Nda Jesu kop-bhilip Naan nah "Gu thiwap mpe ndhi wul khi Naan wulkus" ¹⁸ Ndhi nhi phi mwan phikom am teku mhi Galilee, bhi nah emnikin shak mu vhil, Simon ndhi mukhi yong nih a Peter mukhi Andrew emnikin nih muphi khon teng yak sherep nbut am teku, mpe ndhi mu a nyen yak sherep mu. ¹⁹ Jesu satmu nah "Gu ji gu mwan nder nhi bhi ah den gun a nyen yak gurum mu. ²⁰ Ndhi sat nmu asih, bhi mu yit teng sherep fut mudi, mu mwan nder muk. ²¹ Jesu nhi phi yit peh feh dhi bhi naan emnikin shak nkwa mu vhil, James lah Zebedee mukhi Jon emnikin nhi, mu ndikin shii a wukhime khi ndah du Zebedee mu phi taan teng sherep fut yong peh mmu. ²² Bhi mu yit shii feh dhi khi ndha du mu mwan nder muk. ²³ Jesu ka'at yil Galilee phi kop bhilip Naan, kam bhi mu muh lhinaan, kam pwonaan nmu, lat khi shwal mu shini shini nyen ghok ndhi mudhi nhaarmu. ²⁴ Bhilip mwan khi sim muk khiyil Syria, gurum ndhi mu di mu wul khi nyen gok mu ndhi mukhi shwal mu shini shini deh mu kat kaham dhi, nyen ndhi riin wubis bhim mu, nyen dwam kukui mu khi kungkuut mu Jesu lat khi shwal khimu khiding. ²⁵ Gurum mu ngam mu wakder muk khiyil Galilee nyen Decapolis, Jerusalem, Judea khi gurum dhi mu deel phi Jordan.