¹ Khidangkong laa khi Jesu eh Bethlehem ndhi khi yil Judiya nteer ndhi Herod nhi a long, nyen maan dahass muh ndhi muh yikhil khi saar kuul ji muu rhoo eh Jerusalem muh phi sih nah, ² "Gwo ndhi muh sihnah mu laa nhi a long Jewess mu ni anneh? Muh naa taar khisar kuul yakhal muh ji npee dhik yil nni". ³ Ndhi long Herod khiling ndhisih bhi bii fee tuwang bhizung muk yakhal khidhing gokhotshii gurummu nJerusalem ndhi muu awukhimeh. ⁴ Herod yong pee khidhing nnyen kaar fhinni mu khi nyen raan khi gurum muu, yakhal taal shiphimuu "pee ndhi muh npe laa Kristi di? ⁵ Yakhal muh sat nni, "A khi yil Bethlehem ndhi nJudiya, npe ndhi a bii ndhi nyen lep khi Ndah Naan gyet muu raan gwe. ⁶ Npe nghi Bethlehem, ndhi khi yil Judiya, ghi a wutesmah khinar nyen phitikhim mhi Judiya, npee ndhi nnarguu muu npe kat gwo wuyon npe puut ndhi ni npe tap khi jep Isara'ila muh." ⁷ Long Herod yakhal nnabiya bhi yong nyen maan muu yakhal taal shi phi mwo yad ndhi zaar fee puut di. ⁸ Yakhal lep muu shinyaa nBethlehem, sih nah, "Guu mwan guu bohong pee ndhi laa wullee fee di. Kaat guu kat ni bhi guu sat nnan dee nnan a mwan a dhik yil nni di". ⁹ Khidangkong ndhi muu khiling bhilip ndhi nhi long fee sat bih muu mang yarkaam, zaar ndhi muu naa khisar kuul taa tikhimmu yakhal ji daar daap khiting nkaa pee ndhi laa fe di. ¹⁰ Ndhi muu naa zaar fe bih bhizung muu piya. ¹¹ Muu dhel ndhikhin lih fee, bih muh naa laa fee nih nsar Mary, nhikhinmuk. Muu ghim yakhal muu dhikyil nnih. Muu shin baam fhut mhi bii wuret ndhi mel-mel, npe ret nyit ndhi muh khi ni. ¹² Ndah Naan biyalmuu nsukkuun yakbaa mu nwaji ndeer Herod, yakhal muu wakyaa khipang lhi-duu nyarkaam wudhik. ¹³ Khidangkong ndhi muu wahak bih la-lep khi Ndah Naan ji ndeer Joseph nsukkuun phi sih nah, "Ghi yakhal khiting, ghi mang la fe khi nhikhin fe ghi sih ghi yaa nEgypt. Ghi tong di seh a saat bhilip khi ghi npe ndhi Herod ni phi tang yarkaam thi la fee." ¹⁴ Nlih-paar bhih Joseph yakhal bhih mang laa fe khi nhikhin fe bhih deel yaa nEgypt. ¹⁵ Dee tong di haar Herod ji muut. Mhi-sih gaam a bi ndhi Ndah Naan saat khisaar nyen naa shi kaa, "Ndhikhin Egpyt an npe yong laa fhinn. ¹⁶ Ndhi Herod naa ndhi jep maan mwo gwam jiin bih bii fee laa nni. Nhi yakhal lep dee mu tiwo jepdaas muh khiding ndhi mu nBethlehem khiding khi mu ndhi khi yil fee ndhi muu deel phi yii vhil ma yad ndhi ni maan ndeer nyen ma'an mu. ¹⁷ Dih mu gaam bii ndhi guu naa shikaa Jeremiah gyet sat. ¹⁸ "Meh dhikhil tong puut nRamah, waal khi baagaa dokor, Racel ni phi wal npe jep fhit muu, yakhal niyang pe dee muu shin mokhor npe ndhi muu di ma." ¹⁹ Khidangkong ndhi Herod muut bhih jep lep Ndah Naan mu pwaat nsukkuun ndeer Joseeph di nEgypt yakhal saat naa, ²⁰ "Ghi yakhal ghi mang laa fee khi nhikhin fee bhih ghi yaa khiyil Israila npe ndhi muu ndhi mu phi tang seen laa fe mu dwaam khidhing. ²¹ Joseph yakhal, mang laa khi nhikhin fe, bhi mu wakyaa Israila. ²² Ndhi yakhal khiling ndhi Archelaus a ni phi yaa yil Judiya nkop ndah muuk Herod, bhi lukkuut thi ni npe wayaa di. Khidangkong bhih Ndah Ndah Naan biyaal ni bhuut sukkuun bhih yakhal wayaa nGalilee. ²³ Yakhal mwan bih tong npe ndhi muu khi yong a Nazareth. Mhisih gaam bi ndhi nyen jagaam mu saat ndhi muu khi yong ni a Nazarene.