1
पौलुसा री तरफा न जूण परमेश्वरा री इच्छा ना प्रभु यीशु रा प्रेरित सा, तिन्हा पवित्र होर मसीह यीशु न बशाह केरणु आलै लोका रे नाँ जूणा इफिसुसा ना री जगा न सी l
2
आसा रे बापू परमेश्वर होर प्रभु यीशु मसीह री धीरे ना तुस्सा बै अनुग्रह (कृपा) होर शान्ति मिलदी रोहे l
3
आसा रे प्रभु यीशु मसीह रे परमेश्वर होर बापू री जयजयकार होली, किबैकी तेइए आसा बे मसीह न ऐक होइया स्वर्गीय जगह ना हर तरह री आशीष धिन्नी री सा l
4
ऐथा न पेहले कि परमेश्वर दुनिया बै बणाला तेईये आसे छाँटे सी, कि आसे तेइरी नज़री न पवित्र होर बैकसुर होले l कि आसे तेइरे नेड़े प्यारा ना पवित्र होर निर्दोष होले l
5
होर आपणी शौभली इच्छा रै मुताबिक आसे बै आपणी तेंइये पैहले न ठहराए सी, कि यीशु मसीह ज़े केरु तेथा री बजा न आसे तेइरे गोद लेऊ हुन्दे शौहरु ठहरे l
6
कि तेइरे तेई अनुग्रह री महिमा री स्तुति हो, जूण तेइए आसा बे तेई रै प्यारै बेटे रै ज़रिये बिना किमतिये धिना l
7
आसा बे यीशु रै खुना रै दुआरा जौ तेईऐ कुस्रा पेन्दे बहाऊ तेथा री बझाह न पापा री क्षमा, परमेश्वरे रै अनुग्रह रुपी धना रै मुताबक मिली साl
8
जूण तेइए सारे ज्ञान होर समझा सेंघे आसा पांधे बोहु जादा केरू l
9
कि तेइए आपणी इच्छा रा भेद एंडी शोभली तरहे आसा बे दसु कि जूण तेइए आपणै आपा ना पक्की सोचिया रखुन्दा ती l
10
कि बोक्ते रे पुरे होणे रा एण्डा प्रबन्ध हो, कि जे किच्छ स्वर्गा न सा, होर जे किच्छ धौरती पांधे सा, सेभ किच्छ सो मसीह ना कठ्ठा केरेले
11
मसीह न जूणी न आसे भी तेइरी इच्छा न जूण आपणी इच्छा रे मताबक सेभ किच्छ केरा सा, परमेशवरे आसे पहले न ओरु मसीह रे वारिस होणै री तेंईय चुने सी
12
कि आसे, जूणीऐ पेहले ना ओरु मसीह पांधे आश रखी ती, तेइरी महिमा री स्तुति री बजह होले l
13
होर तेई ना जेबे तुसे सच्चाई रा वचन शुणु, जूण तुसा रे उधारा रा सुसमाचार सा, होर जूणी पांधे तुसे बशाह केरू, वायदा केरेंदे पवित्र आत्मा री मोहर लागी l
14
सो तेइरे खरीदूँऐदे लोका रे छूटीकारे री तेंइए आसारी मीरासा रा बयाना सा, कि तेइरी महिमा री स्तुति हो l
15
एता बजह ना, हाँऊ भी तेई बशाह रा समाचार शुणीया जूण तुसा लोका आंधरे प्रभु यीशु री तेंइए सा, होर सेभी पवित्र लोका ना प्रगट सा l
16
तुसा री तेंइए धन्याबाद केरना नेई छौड़दा, होर आपणी प्रार्थना न तुसा बे याद केरदा रोहा सा l
17
कि आसा रे प्रभु यीशु रा परमेश्वर जूण महिमा रा बापू सा, तुसा बे आपणी पहचाना ना, ज्ञान होर प्रकाशा री आत्मा दे l
18
होर तुसा री मने री हौछी ज्योतिर्मय हो कि तुसा बे पता लागा लोड़ी कि तेइरे शादणै री कैन्डी आश होआ सा, होर पवित्र लोका ना तेइरी मीरासा री महिमा रा केन्डा धन होआ सा l
19
होर तेइरी सामर्थ आसा री धीरे जूण बशाह करा सी, केतरी महान सा, तेइरी शक्ति रे प्रभाव आनुसार l
20
जूण तेइए मसीह रे बारे ना केरू, कि तेइबे मुंऐदें ना ज़िंदा केरिया स्वर्गीय स्थाना ना आपणै सीधे हौथे
21
सेभ तरह री प्रधानता, होर अधिकार, होर सामर्थ, होर प्रभुता रे, होर हर-एक नाँ पांधे, जूण ना सिर्फ ऐई जुगा ना, पर ऐणु आलै जुगा न भी लेईणा, बशाऊ l
22
होर सेभ किच्छ तेइरी जोंघा हेठे केरू, होर सो सेभी चिजा पांधे शिरोमणि ठहराईया कलीसिया बे धिना l
23
ऐ तेइरा शरीर सा, होर तेइरी परिपूर्णता सा, जो सेभी ना सेभ किच्छ पुरा करा सा l