4 तीतूसे नांओंए, ज़ुंण विश्वासे सहभागिते बच़ारा दी मेरअ सच्च़अ शोहरू आसा,
परमेश्वर पिता और म्हारै उध्दारकर्ता और मसीह यीशू का दया और शांती लोळी भेटदी रही।
5 हूँ आअ त ताह क्रेतै एते तैणीं छ़ाडी कि तूह बाकी रही दी गल्ला सुधारे, और मेरी आज्ञे साबै नगरी-नगरी दी विश्वासी मंडळीए बुज़ुर्ग नियुक्त करे। 6 ज़ुंण निर्दोश और एकी ई बेटळीओ मरध होए, और ज़सरै बाल बच्च़ै विश्वासी होए और ज़हा दी लुच़ै लफंगै हंणेंओ दोश निं होए। 7 किल्हैकि अध्यक्ष लोळी परमेश्वरो भड़ारी हणें बज़ह निर्दोश हुअ, नां हठी, नां क्रोधी, नां शराबी-खराबी, नां मारपीट करनैआळअ, और नां नीच कमाईओ लोभी होए। 8 पर पाहुणच़ारी करनैआळअ, भलाई झ़ूरनै आळअ, सब्र करनै आळअ, न्यायी, पबित्र, और आपणीं इंद्री बशा दी डाहणैं आळअ 9 और विश्वासयोग्य बच़न जुण धर्में उपदेशे साबै आसा, तेथ दी स्थिर रहे; कि खरी शिक्षा करै उपदेश दैई सके; और बिबाद करनैंआळेओ मूँह बी सके बंद करी।10 किल्हैकि कई लोग आसा ईहै ज़ुंण कुंण कोहीए निं शुंणदै और धोखै दैणैं आळै, खासकर खतनैं करनै आळै मांझ़ै। 11 इंनो मूँह च़ाहिए बंद करनअ, ईंयां लोग बगाळा नीच कमाई लै बूरी गल्ला सखाऊई करै घरा परैंदै भबन। 12 तिन्नां मांझ़ै ई एकी आदमीं ज़ुंण तिंनो भविष्यवक्ता आसा, तेऊ बोलअ इहय कि क्रेती लोग ह्आ सदा झ़ुठै, दुष्ट पशू, आलसी और पेटू। 13 अह ग्वाही आसा सच्च़ी, तैहीता तिन्नां लै कर सखती संघै चतैनगी दैई कि तिंयां विश्वासा दी पाक्कै होए। 14 और तिंयां यहूदिए कथैया काहणीं दी और तिन्नां लोगे आज्ञा दी मन निं लाआ, ज़ुंण सच्च़ाई का भटकै दै ह्आ। 15 शुध लोगा लै आसा सोभै गल्ला शुध, पर हळकै विश्वासी लै निं किछ़ बी शुध हंदअ, तिन्नें आसा बुधी और बिबेक दुहै अशुध्द। 16 तिंयां बोला इहय कि हाम्हैं ज़ाणा परमेश्वरा, पर आपणैं कामां का करा तेऊओ नकार, किल्हैकि तिंयां आसा घृणिंत और आज्ञा न मनणैंआळै, और कोई बी राम्बळै कामां जोगी निं तिंयां आथी॥